Basa Ya Yezu Ikhathimizirika Mbwenye Ya Juwau Ikhapunguka

Pidamala kucitwa Paskwa ya caka 30 N.W., Yezu na anyakupfundzace abuluka mu Yerusalemu, mbaenda ku Yudeya. Kweneku iwo abatiza anthu azinji. Juwau M’batizi akhacitambo basa ibodzi ene cifupi na caka cibodzi, pontho anango mwa anyakupfundzace aciri na iye, panango mu Nkulo wa Yordani.

Yezu nee akhabatiza anthu—basi ene akhatsogolera anyakupfundzace toera kucita basa ineyi. Mu ndzidzi unoyu wa utumiki wace, Yezu na Juwau akhapfundzisa Ayuda adatcunyuka ku madawo awo akukhonda kubvera cibverano ca Mwambo wa Mulungu.—Mabasa 19:4.

Mbwenye anyakupfundza a Juwau akhali na ntcanje mbatoma kudungunya thangwi ya Yezu. Iwo alonga: ‘Mamuna Yezu akhali na imwe akubatiza anthu, pontho onsene ali kuenda kuna iye.’ (Juwau 3:26) Mbwenye Juwau nee akhali na ntcanje. M’mbuto mwace, iye akhakomerwa na basa ikhacita Yezu na akhafuna kuti anyakupfundzace akomerwembo. Juwau alonga: ‘Imwe ndimwe amboni a pidalonga ine kuti ine sine Kristu tayu, mbwenye ndatumwa toera kuenda patsogolo pace.’ Buluka penepo Juwau alonga nsangani uyu: ‘Ali na mankhadzi wankazi ndi mankhadzi wamamuna. Mbwenye xamwali wa mankhadzi wamamuna angakhala cifupi mbabva pinalonga iye, asakomerwa thangwi yakubva fala ya mankhadzi wamamuna. Natenepa, kutsandzaya kwanga ndi kukulu kakamwe.’—Juwau 3:28, 29.

Ninga xamwali wa mankhadzi wamamuna, Juwau akomerwa m’miyezi mingasi nduli pidamala iye kupangiza anyakupfundzace kwa Yezu. Anango mwa iwo atowerera Yezu, pontho mukupita kwa ndzidzi mbadadzodzwa na nzimu wakucena. Juwau akhafuna kuti anyakupfundzace akhali na iye penepo atowererembo Yezu. Cifuniro cace cikhali cakukhunganya njira toera Yezu atome basa yace yakumwaza mphangwa. Juwau alonga: ‘Basa yace isafunika kuthimizirika, mbwenye yanga isafunika kupunguka.’—Juwau 3:30.

Juwau unango wakuti akhali nyakupfundza wa Yezu, mukupita kwa ndzidzi alemba thangwi ya kudabuluka Yezu na cifuno cace cakuphedza anthu toera apulumuke: ‘Ule adabuluka kudzulu ali padzulu pa anthu onsene. Baba asafuna Mwana, pontho iye apereka pinthu pyonsene m’manja mwace. Ule anakhulupira Mwana ali na umaso wakukhonda mala; ule anakhonda kubvera Mwana nee anadzawina umaso, mbwenye anadzaona ukali wa Mulungu.’ (Juwau 3:31, 35, 36) Unoyu ndi undimomwene wakufunika kakamwe, pontho anthu asafunika kuti audziwe!

Pidamala kwene Juwau kulonga kuti basa yace isafunika kupunguka, iye aikhwa n’kaidi na Mambo Herodhi. Herodhi akhadamanga banja na kunyado wace Herodhiya, nkazi wa Filipi. Pidalonga Juwau pakweca kuti Mambo Herodhi acita upombo, mambo aipirwa mbaikha Juwau n’kaidi. Pidabva iye kuti Juwau aikhwa n’kaidi, Yezu abuluka ku Yudeya na anyakupfundzace mbaenda ku Galileya.—Mateu 4:12; Marko 1:14.