Yezu Adzakhala Mesiya

Juwau akhamwaza mphangwa mbalonga: ‘Ali kubwera munthu wankulu kupiringana ine.’ Pikhali Yezu na pyaka 30 pyakubalwa, abuluka ku Galileya mbaenda ku Nkulo wa Yordani, ku mbuto ikhabatiza Juwau anthu. Yezu akhafuna kuti Juwau ambatize, mbwenye Juwau alonga: ‘Ine nee ndathema kukubatizani. Imwe ndimwe adathema toera kudibatiza.’ Yezu apanga Juwau: ‘Yahova asafuna kuti iwe undibatize.’ Natenepa iwo aenda mu Nkulo wa Yordani, Juwau mbabiza Yezu m’madzi.

Pidabuluka Yezu m’madzi, acita phembero. Penepo pene, kudzulu kwafunguka, nzimu wa Mulungu mbutcita ninga nkhangaiwa. Buluka penepo, Yahova alonga kubulukira kudzulu: “Iwe ndiwe Mwana wanga wakufunika; ine ndisakomerwa na iwe.”

Ndi mu ndzidzi unoyu wakuti Yezu adzakhala Kristu peno Mesiya. Natenepa iye akhali dzololo toera kutoma basa idapaswa iye na Yahova kuti acite pa dziko yapantsi.

Pidamala iye kwene kubatizwa, Yezu aenda n’thando mbamala ntsiku 40 kweneko. Pidabwerera iye, aenda kaonana na Juwau. Pidaona iye Yezu alonga: ‘Uyu ndi Mwanabira wa Mulungu wakuti anadzabulusa madawo pa dziko.’ Pidalonga iye pyenepi, Juwau apangiza kuti Yezu akhali Mesiya. Usadziwa ninji pidacitikira Yezu pikhali iye n’thando? Tinaona pyenepi mu nsolo unatowera.