‘Kuyang’ana Udidi Wa Yahova’

Makhaliro akutsukwalisa anakwanisa kutikhuya kakamwe. Iwo anakwanisa kuphekesa manyerezero athu, kufewesa mphambvu zathu na kukhuya maonero athu a umaso. Mambo Dhavidhi wa Israele wakale akhadakhuiwa kakamwe na nyatwa zizinji. Kodi iye athimbana tani na nyatwa zenezi? M’bukhu ya Masalmo, Dhavidhi atawira: ‘Na fala ikulu ndinakhuwa kuna Yahova, na fala ikulu ndinamphemba ciphedzo. Pa maso pace ndinayikha nyatwa zanga na pyakugopswa pyonsene pinaona ine. Mbandiri duzi na kutaya ntima, ndiye anadziwa pya moyo wanga.’ Mwandimomwene, mwakucepeseka Dhavidhi acita phembero toera kuphedzwa na Mulungu.​—Sal. 142:1-3.

Pa vesi inango ya Masalmo, Dhavidhi aimba: ‘Cinthu cibodzi ndaciphemba Yahova, ndico cinasirira ine basi kuti: Ndikhale n’nyumba mwa Yahova ntsiku zonsene za moyo wanga, toera ndione udidi wa Yahova, mbandimuyang’ana mu nyumba mwace.’ (Sal. 27:4) Dhavidhi nee akhali Mulevi, mbwenye nyerezerani iye mbakakhala m’berere cifupi na nyumba yakucena ya ulambiri wandimomwene. Ntima wa Dhavidhi ukhali wakudzala na kupereka takhuta kwakuti akhafuna kuphatisira umaso wace toera ‘kuyang’ana udidi wa Yahova.’

Fala yakuti ‘kuyang’ana’ isabverana na n’khaliro “wakukomerwa peno wakutsandzaya m’manyerezero, mabvero.” Ndzidzi onsene Dhavidhi akhapasa ntengo masasanyiro a Mulungu aulambiri. Mphyadidi kubvundzika tekhene, ‘Ndisapibva ninga mukhapibvera Dhavidhi?’

KUPASA NTENGO MASASANYIRO A MULUNGU

Mu ntsiku zathu, masasanyiro a Yahova toera kunfendedzera nee asacitwa mu templo yakuoneka na maso. Mbuto mwace, asaphataniza templo ikulu yauzimu ya Mulungu, masasanyiro akucena aulambiri wandimomwene.a Tingapasa ntengo masasanyiro anewa, tinakwanisambo ‘kuyang’ana udidi wa Yahova.’

Dingani guwa ya nkuwa yakupisira ntsembe yakuti ikhali pansuwo pa tabernakulu. (Eks. 38:1, 2; 40:6) Guwa ineyi ikhaimirira kufunisisa kwa Mulungu toera kutawirisa umaso wa Yezu ninga ntsembe. (Aheb. 10:5-10) Pyenepi pisabvekanji kuna ife! Mpostolo Paulu alemba: ‘Ngakhale kuti tikhali anyamalwa a Mulungu, kufa kwa Mwanace kwatisekeranisa na iye.’ (Arom. 5:10) Mu kukhulupira ntsembe ya Yezu, tinakwanisa kutawirwa na Mulungu, pontho mbatikhala na cinyindiro cakukhala axamwali ace. Ninga maphindu a pyenepi, tinakhala na ‘uxamwali wakuwanga na Yahova.’​—Sal. 25:14.

Nakuti ‘talekererwa madawo’ athu, tikukhala mu ‘ntsiku zakubalangazwa za Yahova.’ (Mach. 3:19) Makhaliro athu ndi akulandana na nyankaidi wakuti atcinyuka makhaliro ace akale mbacita macinjo mwakucimbiza mu ndzidzi ukhadikhira iye kuphiwa. Mu kuona pyenepi, ntongi wantsisi akulumizika toera kulekerera mamuna unoyu mbamalisa kutongwa kwace toera kuphiwa. Nyankaidi unoyu apibva kukhala wakusudzuka kakamwe. Ninga ntongi, Yahova asapangiza ntsisi kuna anthu mbabulusa kutongwa kwawo toera kuphiwa.

KUTSANDZAYA MU ULAMBIRI WANDIMOMWENE

Pinthu pya ulambiri wandimomwene pyakuti Dhavidhi mbadakwanisa kupiona pa nyumba ya Yahova pikhali kugumanyikana kwa mwinji wa anthu wa Aisraele andzace, kuleri pakweca Mwambo na kuufokotoza, kupisa ntsembe na mabasa akucena akhacitwa na anyantsembe na Alevi. (Eks. 30:34-38; Num. 3:5-8; Deut. 31:9-12) Pinthu pyenepi pya ulambiri wandimomwene mu Israele wakale piri na mabvekero mu ntsiku zathu zino.

Mu ntsiku zathu ninga mu ndzidzi wakale, ‘mphyadidi na pyakukomeratu kugumanyikana ninga abale.’ (Sal. 133:1) Kuthimizirika kakamwe kusaoneka mu ‘ubale’ wathu wa dziko yonsene yapantsi. (1 Ped. 2:17) Mafala a Mulungu asalerwi na kufokotozwa pakweca pa misonkhano yathu. Kubulukira mu gulu yace, Yahova asapereka cipfundziso cadidi kakamwe. Asaperekambo cakudya cakunjipa cauzimu kubulukira m’mabukhu akudhindwa toera kuphatisira munthu paekha, pontho toera kupfundza ninga banja. M’bale m’bodzi wa Mathubo Akutonga alonga: “Kunyerezera mwacidikhodikho Mafala a Yahova, kuona mabvekero ace na kusaka udziwisi na kubvesesa mwadidi kusandicitisa kukhala na mpfuma zauzimu, pontho na kukomerwa.” Mwandimomwene, ‘udziwisi unadzakhala kukomerwa kwa ntima wathu.’​—Mis. 2:10.

Lero, maphembero akutawirika a atumiki a Mulungu asacitwa kuna Mulungu ntsiku zonsene. Kwa Yahova, maphembero anewa ndi ninga utci wakununkhira wa ntsembe zakupisa. (Sal. 141:2) Pisatitsandzayisa kakamwe kuona kuti Yahova Mulungu asakomerwa kakamwe na ife tinganfendedzera mwakucepeseka mu phembero!

Mose aphembera: ‘Yahova Mulungu wathu, cidzo canu cikhale na ife; tekenyani manja athu mu pyonsene pinacita ife.’ (Sal. 90:17) Munakwanirisa ife mwaphinga utumiki wathu, Yahova asapasa nkhombo basa yathu. (Mis. 10:22) Panango taphedza munthu toera kupfundza undimomwene. Panango tisapirira mu utumiki mu pyaka pizinji mwakukhonda tsalakana kukhonda funa kwa anthu, utenda, kunentseka m’manyerezero, peno kutcingwa. (1 Ates. 2:2) Ngakhale tenepa, kodi nee tisaona ‘udidi wa Yahova’ mbatidzindikira kuti Babathu wakudzulu asakomerwa kakamwe na kuwangisira kwathu?

Dhavidhi aimba: ‘Yahova ndimwe unthaka wanga na ndiko yanga, pyonsene pinandigwera piri m’manja mwanu. Mphyakudzumisadi pidandigwera, mbandikomerwa napyo pikulu pyene.’ (Sal. 16:5, 6) Dhavidhi akhapereka takhuta kakamwe thangwi ya “unthaka” wace wakukhala na uxamwali wakutawirika na Yahova na mwai wakuntumikira. Ninga Dhavidhi, panango tinathimbana na pinentso, mbwenye tiri na nkhombo zizinji zauzimu! Tendeni tipitirize kutsandzaya mu ulambiri wandimomwene, pontho ndzidzi onsene tendeni tipase ntengo templo yauzimu ya Yahova.

[Cidzindikiro capantsi]

[Ntsonga ikulu pa tsamba 29]

M’midzidzi ya nyatwa, mwakucepeseka Dhavidhi akhacita phembero kuna Yahova mbaphemba ciphedzo