Nsolo Wacinai

Ule Wakuti Aprofeta Onsene Ancitira Umboni

1. Kodi pidalembwa thangwi ya Yezu mbasati kubalwa ninga munthu zisapangizanji pya uxamwali wace na Yahova?

¹‘BABA asafuna Mwanache, mbampangisa pyonsene pinachita iye.’ (Jwau 5:20) Atsanzaya tani Mwana na uxamwali wapantima na Babace, Yahova! Uxamwali unoyu wapaduzi watoma m’nzidzi udacitwa iye, piaka pikwi na pikwi pyakukhonda lengeseka mbasati kubalwa ninga munthu pa dziko yapantsi. Iye akhali Mwana mbodzi ekha wa Mulungu, mbodzi basi wakuti acitwa na Yahova ene. Pinthu pinango pyonsene kudzulu na pa dziko yapantsi pyacitwa kubulukira mwa Mwana unoyu wautombo wakufunika. (Akolose 1:15, 16) Iye aphatambo basa ninga Fala ya Mulungu, peno Nyakulonga wace, Ule wakuti kubulukira mwa iye cifuno ca Mulungu cadziwiswa kwa anango. Mwana unoyu, wakuti Mulungu akhanfuna kakamwe, adzakhala munthu wakucemerwa Yezu Kristu.—Misangani 8:22-30; Jwau 1:14, 18; 12:49, 50.

2. Kodi maprofesiya a Biblya alonga pya Yezu mpaka papi?

² Mwana wautombo wa Mulungu mbasati mitwa mwacirengo ninga munthu, maprofesiya mazinji akupepeserwa alembwa thangwi ya iye. Mpostolo Pedro apereka umboni kwa Kornelyo: ‘Pya Yezu alongeri [peno aprofeta] onsene ancitira umboni.’ (Machitiro 10:43) Basa ya Yezu yagomezerwa kakamwe m’Biblya kwakuti anju unango apanga mpostolo Jwau tenepa: ‘Kucita umboni wa pya Yezu ndi kunapepesera kuprofetizari.’ (Apokalipse 19:10, NM) Maprofesiya anewa ampangiza mwapakweca ninga Mesiya. Iwo athonya mabasa akusiyanasiyana akuti Yezu mbadaacita m’kukwanirisa pifuniro pya Mulungu. Pinthu pyenepi pyonsene pisafunika kuticitisa kusaka kudziwa.

Pidapangiza Maprofesiya

3. (a) Pa profesiya inagumanika pa Genesi 3:15, kodi mbani anaimirirwa na nyoka, “nkazi,” pabodzi na ‘mbeu ya nyoka’? (b) Thangwi yanji anzakazi a Yahova ali na cifuno cikulu ca kudziwa pya ‘kuphwanywa kwa nsolo wa nyoka’?

³ Profesiya yakutoma yalongwa mudamala kuoneka upanduki m’Edeni. Yahova alonga kwa nyoka: “Ndinadzayikha [udani] pakati pa iwe na nkazi, pa dzindza [peno mbeu] yako na yache. Iye anadzakuphwanya nsolo wako, ungadzalesera kumuluma pa chitende chache.” (Genesi 3:15) Mwandimomwene profesiya ineyi ikhalongwa kwa Sathani, ule wakuimirirwa na nyoka. “Nkazi” ndi gulu yakudzulu yakukhulupirika ya Yahova, yakuti ndi ninga nkazi wakukhulupirika kwa iye. ‘Mbeu ya nyoka’ isaphataniza aanju na anthu onsene anapangiza nzimu wa Sathani, ale anapokanya Yahova na anthu Ace. ‘Kuphwanywa kwa nsolo wa nyoka’ kusabveka kufudzwa kwa Sathani wakupanduka, ule adapambizira Yahova na kubweresa kutsukwala kukulu kwa anthu. Kodi ndi cipi cipangizo ca khundu yakupambulika ya ‘mbeu’ inafuna kuphwanya nsolo wa nyoka? M’piaka dzana, ikhapitiriza kukhala cinthu ‘cakubisala.’—Aroma 16:20, 25, 26.

4. Kodi makholo a Yezu aphedza tani kundzindikirisa ninga Mbeu yakupikirwa?

⁴ Pakupita cifupi piaka 2.000 pya mbiri ya anthu, Yahova apereka unyomonyomo wakuthimizirika. Iye apangiza kuti Mbeu mbidabalwa m’nzera wa banja ya Abrahamu. (Genesi 22:15-18) Mbwenye, kuti munthu akhale kholo yakutowerera pa nzera wa makholo a Mbeu, nee pikhanyindira kubalwa m’banja ineyi, mbwenye pikhanyindira kusankhula kwa Mulungu. Maseze Abrahamu akhafuna mwanace Ismaele, adabalwa na Agare, Yahova alonga: ‘Ndinadzachita chibverano changa na Isaki, mwana anafuna kukupasa Sara.’ (Genesi 17:18-21) M’kupita kwa nzidzi cibverano ceneci capangizwa, tayu kwa Ezau, mwana wautombo wa Isaki, mbwenye kwa Yakobe, wakuti mwa iye mwabuluka madzinza 12 a Israele. (Genesi 28:10-14) M’kupita kwa nzidzi, kwapangizwa kuti Mbeu mbidabalwa m’dzinza ya Yuda, m’nzera wa Davide.—Genesi 49:10; 1 Pya dziko ya Israele 17:3, 4, 11-14.

5. Mudatoma Yezu utumiki wace pa dziko yapantsi, kodi ndi ninji cidapangiza kuti iye akhali Mesiya?

⁵ Kodi ndi pipi pipangizo pinango pidaperekwa towera kudzindikira Mbeu? Kupiringana piaka 700 mwanyapantsi, Biblya yalongeratu kuti Mbeu yakupikirwa inadzabalwa ninga munthu ku Betlehemu. Yapangizambo kuti Mbeu yakhalapo kutomera m’nzidzi wa ‘kale kakamwe,’ kutomera m’nzidzi udacitwa iye kudzulu. (Mikeya 5:2) Nzidzi wandimomwene wa kudzaoneka kwace pa dziko yapantsi ninga Mesiya walongweratumbo na mprofeta Danyele. (Danyele 9:24-26) Mudadzodzwa Yezu na nzimu wakucena, mbadzakhala Wakudzodzwa wa Yahova, fala ya Mulungu yakubuluka kudzulu yandzindikirisa mwapakweca ninga Mwanace. (Mateo 3:16, 17) Mbeu yapangizwa! Natenepa, Filipi mbadakwanisa kulonga na cinyindiro: “Ife tagumana Yezu, . . . pya iye pyalembwa pinthu na Mose na alongeri m’bukhu ya mwambo.”—Jwau 1:45.

6. (a) Mwakubverana na Luka 24:27, kodi atowereri a Yezu adzindikiranji? (b) Kodi khundu yakutoma ya ‘mbeu ya nkazi’ mbani, na kuphwanya kwace nsolo wa nyoka kusabvekanji?

⁶ Natenepa, atowereri a Yezu adzindikira kuti mwandimomwene m’Malemba akupepeserwa muli maprofesiya mazinji analonga pya iye. (Luka 24:27) Pyadzakhala pakweca kakamwe kuti Yezu ndi khundu yakutoma ya ‘mbeu ya nkazi,’ ule anafuna kudzaphwanya nsolo wa nyoka, mbadzadzada Sathani mpaka kunfudza. Kubulukira mwa Yezu anadzakwanirisika mapikiro onsene a Mulungu kwa anthu na pinthu pyonsene pinafuna ife.—2 Akorinto 1:20.

7. Kusiyapo cidzindikiro ca Ule adalongwa na maprofesiya, kodi ndi cinthu cipi cakuphindulisa cinafunikambo ife kudzindikira?

⁷ Kodi kudziwa pyenepi kusafunika kutikhuya tani? Biblya isalonga pya tsacikunda wa ku Etiopya wakuti akhadaleri maprofesiya mangasi a pya kubwera kwa Muomboli na Mesiya. M’kuzunguzika nsolo na pyenepi, iye abvunza mmwazi mphangwa Filipi: ‘Mprofeta akhalonga pya ani?’ Mbwenye tsacikunda unoyu hadakomerwa na ntawiro basi tayu. Pakumala kubvesera mwacidikhodikho nfokotozo udapereka Filipi, mamuna adzindikira kuti kupereka takhuta thangwi ya kukwanirisika kwa profesiya ineyi kukhafunika kunkulumiza kucita pinthu. Iye adzindikira kuti akhafunika kubatizwa. (Machitiro 8:32-38; Izaiya 53:3-9) Kodi ife tisadzindikira m’njira ibodzibodzi?

8. (a) Kodi kuyesera kwa Abrahamu kupereka ntsembe Isaki kwaphipirisanji? (b) Thangwi yanji Yahova apanga Abrahamu kuti madzinza onsene mbadatambira nkhombo kubulukira m’Mbeu ineyi, na pyenepi pisaphatisirwa tani kwa ife lero?

⁸ Onanimbo nkhani yakukomeresa ya Abrahamu kuyesera kupereka ntsembe Isaki, mwanace mbodzi basi adabala iye na Sara. (Genesi 22:1-18) Pyenepi pyaphipirisa pikhafuna kudzacita Yahova—kupereka Mwanace mbodzi basi: “Mulungu afuna anthu a pantsi pano pikulu pyene, mphapo apereka Mwana wache mbodzi ekha towera munthu munthu anankhulupira, aleke kutayika, mbwenye aone moyo wakukhalirathu.” (Jwau 3:16) Pyenepi pisatipasa cibaso cakuti tenepa ninga Yahova apereka Mwanace mbodzi ekha towera kukwanirisa cifuniro Cace, Iye ‘anadzatipasambo pabodzi na iye pinthu pyadidi pyonsene.’ (Aroma 8:32) Kodi tisafunika kucitanji na pyenepi? Ninga pyalembwa pa Genesi 22:18, Yahova apanga Abrahamu kuti madzinza onsene mbadatambira nkhombo kubulukira m’Mbeu ineyi, ‘thangwi [Abrahamu] atawira fala [ya Mulungu].’ Ife tisafunikambo kubvesera Yahova na Mwanace: “Uyu anakhulupira Mwana, ndi ana moyo wakukhalirathu mbwenye uyu anakhonda kunkhulupira hanadzaona moyo tayu, anaona ukali wa Mulungu wakukhalika pana iye.”—Jwau 3:36.

9. Khala tisakomerwa na cidikhiro ca umaso okhonda mala cinakwanisika kubulukira m’ntsembe ya Yezu, kodi tinadzacitanji?

⁹ Khala tisakomerwa na cidikhiro ca umaso okhonda mala cinakwanisika kubulukira m’ntsembe ya Yezu, tinadzacita pinthu pidatipanga Yahova kubulukira mwa Yezu. Matongero anewa asaphatana mwapaduzi na kufuna kwathu Mulungu na anyakuendekana athu. (Mateo 22:37-39) Yezu apangiza kuti kufuna kwathu Yahova mbukudatikulumiza kupfunzisa anango ‘kuchita pyonsene pidatipanga [Yezu].’ (Mateo 28:19, 20, MZ) Tisafuna kugawana kufuna kweneku na anyakutumikira anzathu a Yahova ‘m’kusonkhana’ mokhonda phonya na iwo. (Ahebere 10:25; Agalata 6:10) Pontho, munabvesera ife Mulungu na Mwanace, nee tisafunika kunyerezera kuti iwo asaphemba ungwiro kwa ife. Ahebere 4:15 asalonga kuti Yezu, ninga Nyantsembe wathu Wankulu, angakwanise “kubvera ntsisi anthu akufewa.” Ndi kwakuwangisa tani, makamaka tingafika kwa Mulungu m’phembero kubulukira mwa Kristu kuti atiphedze kukunda kufewa kwathu!—Mateo 6:12.

Kupangiza Cikhulupiro Kwa Kristu

10. Thangwi yanji kusiyapo mwa Yezu Kristu nkhabepo kupulumuka?

¹⁰ Pakumala kufokotozera thando ikulu yakutonga miseru Yaciyuda m’Yerusalemu kuti profesiya ya Biblya yakwanirisika mwa Yezu, mpostolo Pedro alonga mwamphambvu: “Kupulumupswa na munthu unango kunachimwanika. Nkhabepo pontho pantsi pa thambo dzina inango idapabswa anthu, towera akwanise nayo kupulumuka.” (Machitiro 4:12) Nakuti ana onsene a Adamu ndi akudawa, nee kufa kwa mbodzi wa iwo kungakwanise kuombola unango. Mbwenye Yezu akhali waungwiro, na umaso wace ukhali na ntengo wa kuombola. (Masalmo 49:6-9; Ahebere 2:9) Iye apereka kwa Mulungu ciomboli ca ntengo wakulinganira umaso waungwiro udaluza Adamu. (1 Timoti 2:5, 6) Pyenepi pyatifungulira njira kuti tikhale na umaso okhonda mala m’dziko ipswa ya Mulungu.

11. Fokotozani kuti ntsembe ya Yezu inakwanisa tani kukhala na phindu ikulu kwa ife.

¹¹ Ciomboli catifungulirambo njira ya kutambira maphindu anango, ngakhale cincino. Mwacitsanzo, maseze tikhale akudawa, ntsembe ya Yezu isaticitisa kukhala na cikumbuntima cadidi thangwi ya kulekerewa kwa madawo. Pinakwanisika na ntsembe ineyi pisapiringana pikhakwanisika na ntsembe za pinyama zikhapereka Aisraele ninga mukaphemba Mwambo wa Mose. (Machitiro 13:38, 39; Ahebere 9:13, 14; 10:22) Mbwenye, towera kulekererwa tisafunika kudzindikira mwakuona ntima kuti ntsembe ya Kristu ndi yakufunika kakamwe kwa ife: “Ife tingalonga kuti hatina pyakuipa tayu, [tisanyengeteka] tekha, udidimbo hunakhala mwa ife tayu. Tingabweka madawo athu, Mulungu wakukhulupirika na wakulungama anatilekera, mbatichenesa m’pyakuipa pyonsene.”—1 Jwau 1:8, 9.

12. Thangwi yanji kubizwa m’madzi ndi cinthu cakufunika towera kukhala na cikumbuntima cadidi pamaso pa Mulungu?

¹² Kodi anyakudawa anakwanisa tani kupangiza cikhulupiro kwa Kristu na ntsembe yace? Mudakhala anthu a piaka dzana yakutoma anyakukhulupira, iwo apangiza pyenepi mwapakweca. M’njira ipi? Iwo abatizwa. Thangwi yanji? Thangwi Yezu alonga kuti anyakupfunza ace onsene asafunika kubatizwa. (Mateo 28:19, 20, MZ; Machitiro 8:12; 18:8) Munthu nee anadzaleka kucita pyenepi ntima wace ungakulumizwadi na masasanyiro a kufuna adacita Yahova kubulukira mwa Yezu. Iye anadzacita kucinja konsene kunafunika m’umaso wace, anadzaperekeka kwa Mulungu m’phembero na anadzapangiza kuperekeka kwace m’kubizwa m’madzi. M’kupangiza cikhulupiro m’njira ineyi, iye asaphemba “ntima [peno cikumbuntima] wakuchena pa maso pa Mulungu.”—1 Pedro 3:21.

13. Tingadziwa kuti tadawa, kodi tisafunika kucitanji, na thangwi yanji?

¹³ Mwandimomwene, ngakhale pakumala kubatizwa, tinadzapangiza makhaliro akudawa. Thangwi yanji? Mpostolo Jwau alonga: “[Ndisakulemberani] pyenepi towera mukhonde kuchita madawo, mbwenye munthu mbodzi angachita madawo adziwe kuti tiri naye nkhobswe wakukhala pana Baba, ndiye Yezu Kristu, ndiyembo wakulungama. Iye ndi ntsembe yakulipira pyakuipa pyathu.” (1 Jwau 2:1, 2) Kodi pyenepi pisabveka kuti mokhonda tsalakana pinacita ife, tingaphembera kwa Mulungu m’kusaka kulekererwa, pyonsene pinadzalekererwa? Nkhabe. Cinthu cakufunika towera kulekererwa ndi kutcinyuka kwandimomwene. Tingakwanisembo kuphemba ciphedzo kwa akulu a mpingo na Akristu anango akukola. Tisafunika kudzindikira kuipa kwa pidacita ife na kusandikika kakamwe thangwi ya pyenepi mbitiwangisira kuti tikhonde bwerezera kudawa kubodzibodzi. (Machitiro 3:19; Tyago 5:13-16) Tingacita pyenepi, tinakwanisa kukhala na cinyindiro ca ciphedzo ca Yezu na kudzakhala pontho akutawirika kwa Yahova.

14. (a) Fokotozani njira ibodzi yakufunika yakuti tisaphindula na ntsembe ya Yezu. (b) Kodi tinadzacitanji tingakhaladi na cikhulupiro?

¹⁴ Ntsembe ya Yezu yafungula njira towera “nkumbi ung’onong’ono,” khundu yaciwiri ya mbeu idalongwa pa Genesi 3:15, ikhale na umaso okhonda mala kudzulu. (Luka 12:32; Agalata 3:26-29) Iyo yafungulambo njira towera pikwi na pikwi pya anthu anango akhale na umaso okhonda mala m’paradizu pa dziko yapantsi. (Masalmo 37:29; Apokalipse 20:11, 12; 21:3, 4) Umaso okhonda mala ndi muoni ‘unapasa Mulungu mwa Kristu Mbuyathu.’ (Aroma 6:23; Aefesi 2:8-10) Tingakhulupira muoni unoyu na kupereka takhuta njira idaucitisa kukwanisika, tinadzapangiza pyenepi. Tingadziwa kuti Yahova asaphatisira tani Yezu mwakudzumatirisa towera kukwanirisa cifuniro Cace na kufunika kwa ife tonsene kutowerera manyalo a Yezu mwapaduzi, tinadzacita kuti utumiki Wacikristu ukhale ibodzi ya mabasa akufunika m’umaso wathu. Kukhulupira kwathu kunadzaoneka kubulukira m’mphambvu inaphatisira ife m’kupanga anango pya muoni unoyu ukulu wa Mulungu.—Machitiro 20:24.

15. Kodi kukhulupira Yezu Kristu kusaphedza tani anthu kuphatana?

¹⁵ Cikhulupiro ceneci ndi cadidi kakamwe na cisaphedza anthu kuphatana. Kubulukira m’cikhulupiro ceneci, tisafendedzera kakamwe kwa Yahova, kwa Mwanace na kwa anango nkati mwa mpingo Wacikristu. (1 Jwau 3:23, 24) Cisaticitisa kukomerwa nakuti Yahova mwakufuna apasa Mwanace “dzina inapiringana madzina onsene [kusiyapo dzina ya Mulungu], towera pa kubva dzina ya Yezu onsene angodamire, onsene a kudzulu, na a pantsi, na a muli akufa. Onsene mbabvekese kuti Yezu Kristu ndi Mbuya, towera Mulungu apabswe mbiri.”—Afilipi 2:9-11, MZ.

Kubwerezera Pidapfunzwa

• Mudafika Mesiya, thangwi yanji cidzindikiro cace cikhali pakweca kwa ale akhakhulupiradi Mafala a Mulungu?

• Kodi tisafunika kucitanji towera kupangiza kuti tisapereka takhuta thangwi ya ntsembe ya Yezu?

• Kodi ntsembe ya Yezu yatiphindulisa m’njira zipi? Kodi pyenepi pisatiphedza tani munaphembera ife kwa Yahova towera kulekerwa madawo?

[Foto pa tsamba 36]

Yezu apanga anyakupfunza ace kuti iwo akhafunika kupfunzisa anango kukoya matongero a Mulungu