Tinakwanisadi Kudziwa Mulungu?

“Mulungu nkhabe kubveseseka.”​—Filo wa ku Alexandria, Filósofo wa pyaka dzana yakutoma.

“[Mulungu] hali kutali na ife tonsene tayu.”​—Saulu wa ku Tarsu, mbakalonga na afilozofo a ku Atena mu pyaka dzana yakutoma.

MAFALA anagumanika padzulu, ndi api anabverana na maonero anu? Azinji asaona mafala a Saulu wa ku Tarsu, wakuti asacemerwambo mpostolo Paulu, kukhala adidi na akubalangaza. (Machitiro 17:26, 27) Bhibhlya iri na mafala anango akupasa cinyindiro ninga adalongwa na mpostolo Paulu. Mwacitsandzo, Yezu acita phembero yakuti yapasa cinyindiro anyakupfundzace cakuti anakwanisa kudziwa Mulungu na kutambira nkhombo zace.​—Jwau 17:3.

Mbwenye, afilozofo ninga Filo akhali na maonero akusiyana. Iwo akhalonga kuti nee tinakwanisa kudziwa Mulungu thangwi iye nkhabe kubveseseka. Ndi upi undimomwene?

Bhibhlya isatipanga kuti pana makhundu anango a Mulungu akuti anthu nee anakwanisa kuabvesesa. Mwacitsandzo, nkhabe munthu anakwanisa kupima kukhalapo kwa kwenda na kwenda kwa Nciti, ndzeru zace na kukula kwa udziwisi wace. Anthu nkhabe kwanisa kupibvesesa. Makhundu anewa a Mulungu nkhabe kuticimwanisa kundziwa. Mbwenye, kuanyerezera kunatiphedza ‘kufendedzera Mulungu.’ (Tyago 4:8) Tendeni tidinge pitsandzo pingasi pya makhundu akukhonda kubveseseka a Mulungu. Buluka penepo tinaona makhundu akuti tinakwanisa kuabvesesa.

Ndi Makhundu Api Akukhonda Kubveseseka?

KUKHALAPO KWA MULUNGU KWA KWENDA NA KWENDA: Bhibhlya isapfundzisa kuti Mulungu ndi “wakukhala na kukhala.” (Masalmo 90:2) Munjira inango, Mulungu nee ali na matomero, pontho cipo anadzakhala na mamalisiro. M’maonero a anthu, “pyaka pyace nkhabe lengeseka.”​—Yobe 36:26, NM.

Munaphindula Tani: Mulungu asakupikirani kuti mungandziwa mwandimomwene munadzakhala na umaso wa kwenda na kwenda. (Jwau 17:3) Pikiro ineyi mbidakhala yandimomwene khala Mulungu nee ndi wa kwenda na kwenda? Basi ene “Mambo wa ndzidzi wonsene” ndiye anafuna kukwanirisa pikiro ineyi.​—1 Timoti 1:17.

NDZERU ZA MULUNGU: Bhibhlya isapfundzisa kuti ndzeru za Mulungu ‘nkhabe kubveseseka’ thangwi manyerezero ace mbakupiringana athu. (Izaiya 40:28; 55:9) Mwapakweca, Bhibhlya isacita mbvundzo wakukhonda phemba ntawiro: “Mbani anadziwa ndzeru za Mbuya toera akwanise kum’pfundzisa?”​—1 Akorinto 2:16, NM.

Munaphindula Tani: Mulungu asakwanisa kubvesera mu ndzidzi ubodzi ene maphembero a anthu azinji. (Masalmo 65:2) Iye asatsalakana ntcenga ibodzi na ibodzi. Kodi ndzeru za Mulungu zinadzala mpaka iye kucimwana kukutsalakanani na kubvesera maphembero anu? Nkhabe, thangwi ndzeru zace nkhabe madire. Mwakuthimizira, ‘imwe ndimwe akufunika kakamwe kupiringana ntcenga zizinji.’​—Mateo 10:29, 31, NM.

NJIRA ZA MULUNGU: Bhibhlya isapfundzisa kuti munthu ‘nkhabe kwanisa kudziwa pidacita Mulungu pakutoma mpaka pakumalisa.’ (Koelete 3:11) Natenepa, cipo tinadzadziwa pyonsene pya Mulungu. Njira zinaphatisira Mulungu udziwisi “nkhabe munthu anazibvesesa.” (Aroma 11:33, NM) Mbwenye, Mulungu ali dzololo toera kupangiza njira zace kuna ale anafuna kunkomeresa.​—Amosi 3:7.

Munaphindula Tani: Mungaleri na kupfundza Bhibhlya, cipo munadzasiya kupfundza pinthu pipswa pya Mulungu na njira zace. Pyenepi pisabveka kuti tinakwanisa kufendedzera Babathu wakudzulu kwenda na kwenda.

Pinakwanisa Imwe Kudziwa

Nakuti nee tinakwanisa kubvesesa mwadidi makhundu anango a Mulungu, pyenepi nee pisabveka kuti ife nkhabe kwanisa kundziwa mwadidi. Bhibhlya iri na mphangwa zizinji zakuti zinatiphedza kudziwa mwadidi Mulungu. Tendeni tidinge pitsandzo pingasi:

DZINA YA MULUNGU: Bhibhlya isatipfundzisa kuti Mulungu apasika ekhene dzina. Iye alonga: “Ine ndine Yahova. Ineyi ndi dzina yanga.” Dzina ya Mulungu m’Bhibhlya isagumanika m’maulendo 7.000, kupiringana madzina anango onsene.​—Izaiya 42:8, NM.

Munaphindula Tani: Mu phembero yace ya citsandzo Yezu alonga: “Baba wathu muli kudzulu, dzina yanu iceneswe.” (Mateo 6:9, NM) Munakwanisambo kuphatisira dzina ya Mulungu m’maphembero anu? Yahova ali na cifuno cakupulumusa onsene analemedza dzina yace.​—Aroma 10:13.

KUNAKHALA MULUNGU: Bhibhlya isatipfundzisa kuti pana “mbuto” ziwiri zakukhala​—kudzulu kunakhala pyakucitwa pyauzimu na dziko yapantsi panakhala pyakucitwa pyakuoneka. (Jwau 8:23; 1 Akorinto 15:44) M’Bhibhlya fala yakuti “kudzulu,” kazinji kene isalonga pya mbuto inakhala pyakucitwa pyauzimu. Ineyi ndi ‘mbuto inakhala’ Nciti.​—1 Amambo 8:43, NM.

Munaphindula Tani: Munadziwa mwadidi Mulungu. Nciti nee ndi mphambvu yakukhonda dziwika inagumanika m’mbuto zonsene na mu pinthu pyonsene. Yahova ndi Munthu wandimomwene anakhala mbuto yandimomwene. Ngakhale tenepa, ‘nkhabepo cinthu cibodzi cidacitwa, cinabisalika pamaso pace.’​—Ahebere 4:13.

MAKHALIRO A MULUNGU: Bhibhlya isapfundzisa kuti Yahova ali na makhaliro akutundusa kakamwe. ‘Mulungu ndi ufuni.’ (1 Jwau 4:8) Iye cipo asalonga uthambi. (Tito 1:2, NM) Iye nkhabe tsankhulo, ndi wa ntsisi, wakudzala na udidi na wakudembuka kuipirwa. (Eksodo 34:6; Machitiro 10:34) Pontho, cakudzumatirisa kwa onsene ndi cakuti Nciti asafuna kukhala pa ‘uxamwali wakuwanga’ na onsene anan’gopa.​—Masalmo 25:14.

Munaphindula Tani: Munakwanisa kukhala xamwali wa Yahova. (Tyago 2:23) Buluka penepo, mungadziwa makhaliro a Yahova, munakwanisa kubvesesa mwadidi pinalonga Bhibhlya.

‘NSAKENI’

Bhibhlya isapangiza undimomwene wa Yahova Mulungu. M’mbuto mwakukhonda kubveseseka, Nciti asafuna kuti mundziwe. Mafalace, Bhibhlya, asapikira: “Ungansaka unadzamuona.” (1 Pya dziko ya Israele 28:9) Thangwi yanji nkhabe kufuna kudziwa Mulungu mu kuleri na kunyerezera mwacidikhodikho pinalonga Bhibhlya? Mungacita pyenepi, Bhibhlya isapikira kuti Mulungu ‘anadzakufendedzerani.’​—Tyago 4:8.

Panango munabvundzika, ‘Nakuti nee ndinakwanisa kubvesesa pyonsene pya Nciti, ndinakhala tani xamwali wace?’ Dingani citsandzo ici: Kodi xamwali wa ponda ndipondembo wa nyakucita operasau asafunika kukhala munthu adapfundza ninga iye? Mwandimomwene nkhabe! Xamwali wa nyakucita operasau anakwanisa kukhala munthu wa basa yakusiyana na yace. Ngakhale tenepo, uxamwali wa ponda ndipondembo ndi wakukwanisika kuna iwo. Cakufunika kakamwe ndi cakuti m’bodzi na m’bodzi wa iwo, adziwe pinakomerwa na pinakhonda kukomerwa na ndzace. Munjira ibodzi ene, musafunika kupfundza makhaliro a Yahova bulukira m’Bhibhlya, akuti anakuphedzani kucita uxamwali na iye.

M’mbuto mwakupereka maonero akuphonyeka thangwi ya Nciti, Bhibhlya iri na mphangwa zakufunika kwa ife toera tikwanise kudziwa Mulungu. Kodi musafuna kudziwa pizinji pya Yahova Mulungu? Mboni za Yahova zisapereka programu ya pfundziro ya Bhibhlya yapanyumba yakukhonda lipa. Tisakuphembani toera kupita ncibverano na Mboni za Yahova n’cisa cinakhala imwe peno pitani mu website yathu, www.jw.org.

[Ntsonga ikulu pa tsamba 13]

Nkhabe munthu anakwanisa kupima kukhalapo kwa kwenda na kwenda kwa Nciti, ndzeru zace na kukula kwa udziwisi wace