Yahova Ndi Nyakutitsalakana na Nyakutitsidzikiza

‘Nakuti apangiza kuti asandifuna, ndinadzantsidzikiza thangwi adziwa dzina yanga.’​—SAL. 91:14.

MUNATAWIRA TANI?

Thangwi yanji tinakwanisa kulonga kuti Yahova ndi Nyakutsalakana wankulu?

Ndi basa ipi idacita Yezu toera kubveranisa papswa anthu na Mulungu?

Kodi Yahova asatsidzikiza tani ale ananfuna na anambvera?

1, 2. Kodi tisasiyana tani m’makuziro a m’banja na pakupfundza undimomwene?

TOERA banja ikhalepo pisanyindira Yahova. (Aef. 3:14, 15) Ngakhale kuti ndife a banja ibodzi ene, tiri na makhaliro akusiyana. Panango, imwe mwakhala na anyakubalanu kutomera pakubalwa kwanu mpaka kukula. Anango anyakubalawo afa, panango thangwi ya utenda, cidengwa, peno thangwi ya pinthu pinango. Pontho anango nkhabe kudziwa anyakubalawo.

² Pakati pa piwalo pya banja ya alambiri a Yahova, makhaliro athu auzimu ndi akusiyana. Ninga munalonga anango panango imwe mwakuzwa mu undimomwene, pontho anyakubala anu akupfundzisani midida ya Mulungu. (Deut. 6:6, 7) Peno ndimwe m’bodzi wa pikwi pya anthu adapfundziswa undimomwene kubulukira m’basa yakumwaza mphangwa inacitwa na atumiki a Yahova.​—Arom. 10:13-15; 1 Tim. 2:3, 4.

3. Ndi pinthu pipi pyakuti tonsene tisapitamba?

³ Kusiyapo pidalongwa, pana pinthu pinango pyakuti tonsene tisapitamba. Tonsene tisathabuka na nyatwa yakusowa ungwiro, madawo na kufa thangwi yakukhonda bvera kwa Adhamu. (Arom. 5:12) Ngakhale tenepo, ninga alambiri andimomwene, tinakwanisa kulonga Yahova ninga “Baba wathu.” Thangwi ya mbumba yakusankhulwa ya Mulungu mu ndzidzi wakale, Izaiya 64:8 isalonga: ‘Imwe Yahova, ndimwe Babathu.’ Kusiyapo pyenepi, Yezu atoma phembero yace yacipangizo na mafala awa: “Baba wathu muli kudzulu, dzina yanu ikhale na mbiri.”​—Mat. 6:9.

4, 5. Munadinga ife kuthimizira kwathu kupereka takhuta kuna Babathu, Yahova, ninji pisafunika ife kudinga?

⁴ Babathu wakudzulu asatsalakana pyakusowa pyathu na kutitsidzikiza ninga mbumba inacemera dzina yace na cikhulupiro. Nyamasalmo alemba mafala a Yahova kuti: ‘Nakuti apangiza kuti asandifuna. Ndinadzantsidzikiza thangwi adziwa dzina yanga.’ (Sal. 91:14) Inde, mwaufuni Yahova Mulungu asatipulumusa m’manja mwa anyamalwa athu na kutitsidzikiza ninga mbumba yace, toera tikhonde kufudzwa.

⁵ Toera kuthimizira kupereka kwathu takhuta kuna Babathu wakudzulu, tendeni tidinge mathangwi matatu akufunika kakamwe: (1) Yahova ndi Nyakutitsalakana. (2) Yahova ndi Nyakutitsidzikiza. (3) Mulungu ndi xamwali wathu wapantima. Munadinga ife ntsonga zenezi, zinadzatiphedza kakamwe toera kunyerezera mwacidikhodikho thangwi ya uxamwali wathu na Mulungu na kudzindikira kuti tinamulemedza tani ninga Babathu. Kunadzakhalambo kwakuphindulisa kunyerezera nkhombo zinapereka Yahova kwa ale ananfendedzera.​—Tgo. 4:8.

YAHOVA NDI NYAKUTSALAKANA WANKULU

6. Ndi njira ipi yakuti Yahova asapangiza kukhala Nyakupasa ‘miyoni yadidi yonsene?’

⁶ Nyakupfundza wa Yezu Tyago alemba: ‘Miyoni yadidi yonsene na yakulungama kakamwe, inabuluka kudzulu kuna Baba, adacita ceza consene.’ (Tgo. 1:17) Natenepa umaso ndi muoni wakubulukira kuna Yahova. (Sal. 36:9) Mu kuphatisira umaso wathu toera kucita cifuniro ca Mulungu tinadzakhala na nkhombo zizinji cincino, pontho tinadzakhala na cidikhiro ca umaso wa kwenda na kwenda mu dziko ipswa. (Mis. 10:22; 2 Ped. 3:13) Kodi pyenepi pinakwanisika tani na nyatwa zinatamba ife thangwi yakukhonda kubvera kwa Adhamu?

7. Kodi Mulungu afungula tani njira toera tikhale na uxamwali wakuwanga na iye?

⁷ Mwandimomwene Yahova ndi Nyakutitsalakana Wankulu mu njira zakukhonda kulengeseka. Mwacitsandzo, udidi wace wakukhonda kutithema usabwera toera kutipulumusa. Inde, tonsene ndife akudawa na akusowa ungwiro thangwi ya babathu wakutoma wa pa dziko yapantsi. (Arom. 3:23) Ngakhale tenepa, thangwi yaufuni, Yahova acita masasanyiro a kufungula njira toera tikhale na uxamwali wakuwanga na iye. Mpostolo Jwau alemba mafala awa: “Mulungu ationesa kutifuna kwache pa kutitumira Mwana wache, towera alipire madawo athu. Natenepa kwapangisika kutifuna kwache, si ife tayu adafuna Mulungu, mbwenye ndiye adatifuna mbatitumira Mwanache adaperekeka thangwi ya ife towera atibuluse madawo athu.”​—1 Jwau 4:9, 10.

8, 9. Mu ntsiku za Abrahamu na Isaaki Yahova apangiza tani kuti ndi Nyakutsalakana Wankulu? (Onani cithundzithundzi cakutoma.)

⁸ Mu pyaka madzana 19 M.N.W., kwaoneka pyakucitika pya profesiya pyakuti pyapangiza masasanyiro aufuni a Yahova kwa anthu akubvera toera kutsandzaya na umaso wakukhonda mala. Lemba ya Ahebere 11:17-19 isafokotoza: ‘Abrahamu mudapendiwa iye na Mulungu, apereka Isaaki, mwana wace m’bodzi ekha toera akhale ntsembe, nee kukumbuka kuti Isaaki akhadapikirwa pinthu na Mulungu. Abrahamu akhadapangwa kuti mwa Isaaki unadzakhala na ana, anadzathulwa na dzina yako. Penepo Abrahamu anyerezera kuti Mulungu ana mphambvu za kulamusa anthu muli akufa; thangwi ya ipyo Abrahamu apaswa mwana wace toera mwana uyu akhale ninga nsangani wakubvekesa pya Kristu.’ Ndi kwakukhonda nentsa kuona kulandananiswa kwa pyenepi mudapereka Yahova Mwanace, Yezu Kristu toera kuombola anthu pa dziko yapantsi.​—Lerini Jwau 3:16, 36.

⁹ Isaaki akhala wakutsandzaya mu kupulumuswa kubulukira ku ntsembe yakufa! Iye mwakukhonda kupenula apereka takhuta kuna masasanyiro a Mulungu thangwi ya kupitirwa kwace mbuto na ntsembe ya mwanabira wakutsakama na nyanga zace pa thendere ya minga. (Gen. 22:10-13) Natenepa mbuto ineyi yatoma kucemerwa “Mulungu anadzaona,” pyakuti pisabveka ‘Pa Phiri Yahova anadzatitsalakana.’​—Gen. 22:14.

MASASANYIRO AKUBVERANISWA PAPSWA

10, 11. Mbani anatsogolera “mabasa akubveranisa,” pontho iwo acita tani pyenepi?

¹⁰ Munanyerezera ife mwacidikhodikho kuti Yahova asapangiza tani kukhala Nyakutsalakana Wankulu, tisapereka takhuta kakamwe thangwi yakudziwa basa yakufunika idacita Yezu Kristu ninga pidacita Paulu mudalemba iye kuti: ‘Munthu m’bodzi afera anthu onsene, mphapo anthu onsene amala kufa. Aafera toera anthu ali maso akhonde kukhalira pinaoneka na maso okha, mbakhalire Kristu adaafera mbalamuka muli akufa thangwi ya iwo.’​—2 Akor. 5:14, 15.

¹¹ Na thangwi ya ufuni wawo kuna Mulungu na kupereka kwawo takhuta thangwi ya mwai wawo wakupambulika wakutumikira Yahova, mwakukomerwa, Akristu akutoma atawira “mabasa akubveranisa.” Basa yawo yakumwaza mphangwa na kucita anyakupfundza yafungula njira kwa anthu a mitima yadidi toera kukhala na ntendere na Mulungu, mbatsandzaya na uxamwali na iye na kukhala anace auzimu. Lero, atumiki akudzodzwa a Yahova asacita basa ibodzi ene. Pinakwanirisa iwo ninga atumiki a Mulungu na a Kristu pisacitisa anthu anapangiza cifuno toera kufendedzerwa na Yahova na kukhala alambiri ace.—Lerini 2 Akorinto 5:18-20; Jwau 6:44; Mach. 13:48.

12, 13. Kodi tinapangiza tani kuti tisapereka takhuta ku masasanyiro mazinji a Yahova?

¹² Kusiyapo kupereka takhuta kuna Yahova ninga Nyakutsalakana Wankulu, Akristu onsene akuti ali na cidikhiro cakukhala pa dziko yapantsi asacita khundu pabodzi na Akristu akudzodzwa m’basa yakumwaza mphangwa za Umambo. M’basa ineyi, tisaphatisira Bhibhlya na mabukhu anango. (2 Tim. 3:16, 17) Tingaphatisira mwaluso Mafala akupumirwa a Mulungu mu utumiki, tisapereka mwai kuna anango toera kuwina umaso wakukhonda mala. Toera kutiphedza m’basa ineyi, tonsene tisanyindira nzimu wakucena wa Yahova. (Zak. 4:6; Luka 11:13) Maphindu ace ndi akudzumatirisa, ninga pinapangizwa mu Anuário das Testemunhas de Jeová. Pyenepi pisapangiza kuti ndi mwai kucita khundu m’basa ineyi toera kusimba Babathu na Nyakutitsalakana!

¹³ Mu kunyerezera pyonsene pinatipasa Mulungu, mphyadidi kubvundzika: Kodi ndisacita pyonsene pinakwanisa ine m’basa ya utumiki toera kupangiza Yahova kuthimizirika kwa kupereka kwanga takhuta thangwi ya masasanyiro ace? Ndi mu njira zipi ndinakwanisa kusasanyira na kukhala m’mwazi mphangwa waphinga wa mphangwa zadidi? Ife tinakwanisa kupangiza kupereka takhuta kakamwe thangwi ya masasanyiro akudzumatirisa a Mulungu mu kuikha pifuno pya Umambo pa mbuto yakutoma mu umaso wathu. Tingacita tenepa, Yahova anadzaona kuti tikukwanirisa pifuno pya Umambo. (Mat. 6:25-33) Thangwi ya ufuni wa Mulungu, mwandimomwene tisafunika kucita pizinji ninga munakwanisa ife toera kunkomeresa na kutsandzayisa ntima wace.​—Mis. 27:11.

14. Kodi Yahova asakhala tani Muomboli wa mbumba yace?

¹⁴ Nyamasalmo Dhavidhi aimba: ‘Maseze nditcerenge mbandisowa mphambvu, ndinadziwa kuti munandiduwala tayu. Ndimwe mphedzi wanga na muomboli wanga.’ (Sal. 40:17) Mwakubwereza-bwereza, Yahova asakhala Muomboli wa mbumba yace ninga nsoka, makamaka mu ndzidzi unatcingwa iwo na kuthuswa na anyamalwa awo. Tisapereka takhuta kakamwe thangwi ya ciphedzo ca Mulungu m’midzidzi ineyi, pontho na masasanyiro mazinji auzimu anapereka iye kuna ife.

YAHOVA ASATSIDZIKIZA

15. Fokotozani citsandzo cinapangiza kuti baba waufuni asasaka tani kutsidzikiza mwanace.

¹⁵ Baba waufuni nee asatsalakana anace basi tayu, mbwenye asasakambo kuatsidzikiza. Mwacibaliro, Baba mbadayesera kuombola mwanace angakhala mu ngozwi. M’bale m’bodzi asakumbuka pidacitika mu ndzidzi ukakhala iye mphale. Iye na babace akhabwerera kunyumba mudakotoka iwo m’basa ya m’munda. Njira idabwerera na iwo ikhali na nkulo, pontho madzi akhadabvumba camacibese mbadzadza nkulo unoyu. Toera kuwambuka akhafunika kunumpha kubulukira pa mwala ukulu mpaka ku mwala unango. Mukhaenda iye kutsogolo kwa babace, mphale unoyu agwegweduka mbatherezeka m’madzi. Mphale unoyu apereka takhuta kakamwe nakuti mwakucimbiza babace amphata maphewa mbampulumusa. Babathu wakudzulu asatipulumusa mu dziko ino yakuipa na kuna ntongi wace, Sathani. Mwandimomwene, Yahova ndi Nyakutsidzikiza wakuti munthu onsene anakwanisa kunyindira.​—Mat. 6:13; 1 Jwau 5:19.

16, 17. Yahova apereka tani ciphedzo na citsidzikizo kwa Aisraele mu ndzidzi ukhathimbana iwo na Aamaleke?

¹⁶ Citsidzikizo ca ufuni cidapereka Yahova capangizwa pakweca mu pinthu pidacitika pakumala kuombola a Aisraele mu ubitcu mu dziko ya Ejito mbaatsidzikiza mwakudzumisa mu ndzidzi ukhawambuka iwo Bara Yakufwira mu caka 1513 M.N.W. Pakumala kupita n’thando mbakafamba kutowerera Phiri ya Sinai, mbumba yadzafika pa Rafidimi.

¹⁷ Mwakubverana na profesiya ya Genesi 3:15, panango, Sathani asowa cidikhiro mukhasaka iye mwai wakupomokera Aisraele akuti akhaoneka ninga nkhabe citsidzikizo. Sathani acita pyenepi kubulukira kwa Aamaleke, akuti akhali anyamalwa a mbumba ya Mulungu. (Num. 24:20) Tendeni tidinge pidacita Yahova kubulukira kwa amuna anai akukhulupirika, Yoswa, Mose, Aroni na Hure. Yoswa amenya nkhondo na Aamaleke akuti akhali cifupi na phiri ikhali Mose, Aroni na Hure. Aisraele awina mu nkhondo ineyi mu ndzidzi ukhathukula Mose mikono yace. Mudaneta mikono yace, Aroni na Hure aiphatirira. Na thangwi ya ciphedzo na citsidzikizo ca Yahova, ‘Yoswa angonjesa Aamaleke na mbumba yace.’ (Eks. 17:8-13) Mose amanga guwa ya ntsembe pa mbuto ineyi mbaicemera na dzina yakuti ‘Yahova ndi cidzindikiro canga.’​—Lerini Eksodo 17:14, 15.

CALIRANI MANYENGERERO A SATHANI

18, 19. Kodi ndi masasanyiro api adacita Mulungu toera kutsidzikiza atumiki ace mu ntsiku zathu?

¹⁸ Yahova asatsidzikiza ale ananfuna na anambvera. Ninga Aisraele a ku Rafidimi, ife tisanyindira Mulungu toera kutipulumusa munathimbana ife na anyamalwa. Yahova kazinji kene asatitsidzikiza ninga nsoka, pontho asatiphedza toera kucalira manyengerero a Dyabo. Nyerezerani citsidzikizo cidapereka Mulungu m’midzidzi mizinji kuna abale athu toera kupitiriza kupangiza unakatinakati wawo Wacikristu. Mwacitsandzo, pyenepi pyacitika mu ndzidzi wa utongi wa Anazi ku Alemanya na madziko anango mu caka 1930 na kutoma kwa caka 1940. Kuleri na kunyerezera mwacidikhodikho pyakucitika pyenepi na pinango pinalongwa m’bukhu ya Anuário, thangwi ya citsidzikizo ca Mulungu mu ndzidzi wakutcingwa pinadzawangisa kunyindira kwathu Yahova ninga pakuthawira pathu.​—Sal. 91:2.

¹⁹ Kubulukira ku gulu ya Yahova na mabukhu ayo, ife tisatambira pikumbuso pyaufuni toera kutitsidzikiza. Dingani kuti pikumbuso pyenepi pisakhala tani pyakuphindulisa mu ndzidzi wathu. Nakuti dziko yathu yabvunda thangwi yakutekera kwa makhaliro akuipa ninga kuledzera, ulukwali na kuona ucipezipezi, Yahova asapereka pikumbuso mwakucimbiza na ciphedzo capakweca toera kuticenjeza ku makhaliro akuipa. Mwacitsandzo, ife tisatambira uphungu waufuni toera kucalira uxamwali wakuipa mu kuphatisira mwakuipa Interneti.a​—1 Akor. 15:33.

20. Ndi citsidzikizo cipi na citsogolero cinagumanika m’mpingo Wacikristu?

²⁰ Kodi tinapangiza tani kuti mwandimomwene ‘tisapfundziswa na Yahova?’ Mu kubvesera matongero ace mwacidikhodikho. (Iza. 54:13) M’mpingo, ife tisagumana citsogolero cakufunika na citsidzikizo thangwi musagumanika amuna akukhulupirika akuti asatumikira ninga akulu a mpingo toera kupereka ciphedzo na uphungu wa Bhibhlya. (Agal. 6:1) Natenepa, tisatsalakanwa kakamwe na Yahova kubulukira mwa ‘miyoni ya amuna anewa.’ (Aef. 4:7, 8) Kodi tinaphatana nawo tani? Mu kufunisisa kuangonjera na kuabvera kusabweresa nkhombo za Mulungu. Aheb. 13:17

21. (a) Ninji cisafunika ife kutonga toera kucita? (b) Kodi nsolo unatowerera unadzadinganji?

²¹ Tendeni tikhale akutonga kutsogolerwa na nzimu wakucena toera kungonjera matongero a Babathu wakudzulu. Tisafunikambo kunyerezera mwacidikhodikho makhaliro a umaso wa Mwanace Yezu Kristu na kuwangisira kutowerera citsandzo cace cadidi. Thangwi ya kubvera kwace mpaka kufa, Yezu atambira sagwati wankulu kakamwe. (Afil. 2:5-11) Ninga Yezu, ife tinadzatambira nkhombo thangwi ya kunyindira Yahova na ntima wathu onsene. (Mis. 3:5, 6) Natenepa tisafunika ndzidzi onsene kunyindira Yahova ninga Nyakutsalakana na Nyakutsidzikiza wakukhonda landanisika. Ndi kwakutsandzayisa kukhala na mwai ukulu kakamwe wa kutumikira Yahova. Ufuni wathu kuna iye unadzakula munanyerezera ife njira yacitatu inatitsalakana Babathu, uxamwali wace. Nsolo unatowerera unadzadinga kuti Yahova asakhala tani xamwali wathu wapantima.

[Cidzindikiro capantsi]