Nsolo Khumi Nacitanthatu

‘Funanani Na Ntima Onsene’

1. Kodi kazinji kene ndi ninji cinadzumatirisa ale anaenda pa ulendo wakutoma ku misonkhano ya Mboni za Yahova?

ANTHU angaenda pa ulendo wakutoma ku misonkhano ya Mboni za Yahova, kazinji kene asadzumatirwa na kufunana kunaoneka kweneko. Iwo asaona kufunana kweneku munapaswa iwo bweraniko na m’uxamwali wakupisirwa. Ale anaenda ku misonkhano yathu ya gawo asaonambo kufunana kweneku. Mulembi wa mphangwa alemba pya nsonkhano wa gawo: ‘Nee pakhalipo munthu mbodzi wakuledzera peno wakumwa mitombwe yakuledzeresa. Nee pakhali anthu akudungunya na akukhuwa tayu. Iwo nee akhagwinyana. Iwo nee akhasukhumana. Iwo nee akhaxolana peno kutikanizana. Nee pakhabveka pithankano na makani akuipa. Nee munthu mbodzi akhasuta fodya. Nee akhaberana. Nee akhataya malata a pyakumwa mbwerekambwereka. Pyenepi pikhali pinthu pyacilendo.’ Pyonsene ipi ndi cipangizo ca kufunana, kufunana kwakuti ‘hakunanyadzika tayu [‘kwakusowa phwazo,’ NM], hakunasaka pinthu pyache basi tayu.’—1 Akorinto 13:4-8.

2. (a) Kodi kupangiza kwathu kufunana kusafunika kukhala kwakutani m’kupita kwa nzidzi? (b) M’kusangizira Kristu, kodi tisafunika kusakulira kufunana kwa ntundu upi?

² Kufunana kwa ubale ndi cidzindikiro ca Akristu andimomwene. (Jwau 13:35) Munakula ife mwauzimu, tisapfunza kupangiza kufunana kwakukwana. Mpostolo Paulu aphembera towera kufunana kwa Akristu anzace “kukhale kwa kwenda na kwenda [peno kuthimizirike kakamwe].” (Afilipi 1:9) Mpostolo Jwau apangiza kuti kufunana kwathu kusafunika kukhale kwakumanika. Iye alemba: “Kufuna kwa Mulungu kunadziwika na ipi: Yezu apereka moyo wache thangwi ya ife. Mphapo, pinafunika kuti ifembo tipereke moyo wathu, thangwi ya abale athu.” (1 Jwau 3:16; Jwau 15:12, 13) Kodi mbitidaperekadi umaso wathu thangwi ya abale athu? Nakuti makhaliro mazinji nkhabe phemba pyenepi, kodi tisawangisira mpaka papi towera kuaphedza cincino, ngakhale tigumanike m’makhaliro akukhonda thema?

3. (a) Kodi tinakwanisa tani kupangiza kufunana kwakukwana? (b) Thangwi yanji nkhwakufunika kufunana na ntima onsene lero?

³ Pabodzi na pyakucita pyathu pinapangiza nzimu wakumanika, tisafunika kukhala na kufunana kwandimomwene kwa abale athu. Mafala a Mulungu asatidembetera: “Funanani ninga abale.” (Aroma 12:10) Tonsene tisapibva tenepa kwa anthu angasi. Kodi tingakwanise kupfunza kufuna anthu anangombo? Nakuti kumala kwa makhaliro ano akale kuli duzi, nkhwakufunika kufendedzera duzi kakamwe Akristu anzathu. Biblya isalonga: “Iri duzi ntsiku yakumalisa ya pantsi pano. . . . Makamaka funanani na ntima wanu wonsene, thangwi anafunana analekerwa madawo mazinji.”—1 Pedro 4:7, 8, MZ.

Pangasoseka Miseru

4. (a) Thangwi yanji miseru ingakwanise kusoseka pakati pa anthu m’mpingo? (b) Kodi ndi phindu yanji yadidi inagumana ife m’kuphatisira uphungu wa Biblya, ngakhale kuti nee tinacipendamiro cakucita pyenepi m’nzidzi onsene?

⁴ Mwandimomwene, nakuti ndife akusowa ungwiro, m’midzidzi inango tinadzacita pinthu pyakupindisa anango. Abale athu angakwanisembo kutidawira m’njira zakusiyanasiyana. (1 Jwau 1:8) Kodi musafunika kucitanji mungagumanika m’makhaliro anewa? Malemba asatipasa citsogolero cakufunika. Mbwenye pinalonga iwo panango pingakwanise kusiyana na pinapendamira ife kucita ninga anthu akusowa ungwiro. (Aroma 7:21-23) Ngakhale tenepa, kuphatisira kwathu mwaphinga uphungu unagumanika m’Biblya kunadzapangiza cifuno cathu candimomwene ca kukomeresa Yahova. Kucita pyenepi kunadzapfumisambo ntundu wa kufuna kwathu anango.

5. Thangwi yanji nee tisafunika kubwezera munthu angaticitira pyakuipa?

⁵ M’midzidzi inango anthu angacitirwa pyakuipa asasaka njira zakubwezerambo pyakuipa kwa ale adaacitira. Mbwenye pyenepi pisanyanyisa basi nseru. Pingafunika kuti munthu abwezerwe, tendeni tisiye kuti Mulungu ambwezere. (Misangani 24:29; Aroma 12:17-21) Anango asayesera kucalira kulonga na ule adanxola. Mbwenye tilekeni kucita pyenepi na alambiri anzathu, thangwi, kukhundu inango, kutawirika kwa ulambiri wathu kusanyindira kufuna kwathu abale athu. (1 Jwau 4:20) Natenepa, Paulu alemba: “Pa kukhala na nthonga piriranani, lekereranimbo. Lekeranani sawasawa ninga mudakulekererani Mbuya.” (Akolose 3:13) Kodi mungakwanise kucita pyenepi?

6. (a) Kodi tisafunikira kulekerera mbale wathu mpaka kangasi? (b) Kodi ndi ninji cinafunika ife kudzindikira cakuti cinadzatiphedza unango angatidawira?

⁶ Kodi ndiye tani munthu angatidawira mwakubwerezabwereza mbwenye iye nee asacita madawo makulu akuti mbadancitisa kubuluswa m’mpingo? Kwa madawo mang’ono ninga anewa, mpostolo Pedro akhanyerezera kulekerera “mpaka kanomwe.” Mbwenye Yezu alonga: “Si mpaka kanomwe mbwenye mpaka makumanomwe kulengesa kanomwe.” Iye agomezera kukula kwa mangawa athu kwa Mulungu m’kulandanisa na mangawa akuti anthu anango angakwanise kukhala nawo na ife. (Mateo 18:21-35) Ntsiku zonsene tisadawira Mulungu m’njira zakusiyanasiyana—panango m’pyakucita pyakucenama, m’pyakulonga na m’manyerezero athu, peno m’pinacimwana ife kucita—ngakhale mokhonda nyerezera kuti tiri kudawa. (Aroma 3:23) Ngakhale tenepa, Mulungu asapitiriza kukhala wantsisi na ife. (Masalmo 103:10-14; 130:3, 4) Iye asafuna kuti titsalakanembo anango m’njira ibodzibodzi. (Mateo 6:14, 15; Aefesi 4:1-3) Tenepa tinadzapangiza ntundu wa kufunana wakuti nee ‘usanyerezera pyakuipa tayu.’—1 Akorinto 13:4, 5; 1 Pedro 3:8, 9.

7. Kodi tisafunika kucitanji mbale wathu angabva kuti tina nseru na iye?

⁷ M’midzidzi inango tingakwanise kuona kuti maseze tikhonde kuipirwa na mbale wathu, iye asabva kuti tina nseru na iye. Tingakwanise kusankhula ‘kulekerera na kufuna,’ ninga munalonga 1 Pedro 4:8, MZ. Peno tingakwanise kutoma kulonga na iye mbitiyesera kukhala pontho na ntendere m’uxamwali wathu.—Mateu 5:23, 24, MZ.

8. Kodi tisafunika kucitanji nyakukhulupira nzathu angacita pinthu pyakutipindisa?

⁸ Pingakwanisike kuti nyakukhulupira nzanu asacita pinthu pyakuti nee pisapindisa imwe basi tayu mbwenye na anangombo. Kodi pinakhala pyadidi tayu kulonga na iye? Panango. Mungalonga na iye pya nseru unoyu m’njira yadidi, panango munadzakhala na maphindu adidi. Mbwenye pakutoma musafunika kubvunzika: ‘Kodi iye ali kucitadi pinthu pyakuphonyana na Malemba? Peno ndi thangwi yakuti makuziro anga na mapfunzisiro adapaswa ine mbakusiyana na ace?’ Citani mpholemphole towera mukhonde kuikha midida yanu mbamutonga pinthu mwakubverana na iyo. (Tyago 4:11, 12) Mwakusowa tsankhu, Yahova asatawira anthu a makuziro akusiyanasiyana na asaabvera ntsisi munakula iwo mwauzimu.

9. (a) Kodi mbani anafunika kutsalakana madawo makulu m’mpingo? (b) Kodi ndi pinthu pipi pyakuti nyakudawirwa asafunika kucita pakutoma, na cifuno canji?

⁹ Munthu unango m’mpingo angacita madawo makulu, ninga ulukwali, iye asafunika kuphedzwa mwakukhonda dembuka. Na ani? Na akulu a mpingo. (Tyago 5:14, 15) Mbwenye, munthu angadawira munthu unango, panango m’pinthu pya malonda peno m’kuphatisira lirimi m’njira yakuipa, nyakudawirwa asafunika pakutoma kuwangisira kuenda kalonga ekhene na ule adandawira. (Mateo 18:15) Pyenepi pingakhonda kumalisa nseru, pasafunika kucitwa mathanyo anango, ninga adalembwa pa Mateo 18:16, 17. Kufuna mbale wathu adadawa na cifuno ca ‘kumpulumusa’ pinadzatiphedza kucita pyenepi m’njira yakusaka kukhuya ntima wace.—Misangani 16:23.

10. Pangasoseka nseru, kodi ndi ninji cinafuna kutiphedza kuona pinthu m’njira yakuthema?

¹⁰ Pangasoseka nseru, ukulu peno ung’ono, nkhwakuphedza kuyesera kuuona m’njira inauona Yahova. Iye nkhabe tawirisa ntundu onsene wa kudawa, na m’nzidzi wace wakuthema, ale anacita madawo makulu mbakhonda tcinyuka asabuluswa m’gulu yace. Mbwenye, mbatilekeni kuduwala kuti tonsene tisadawa ngakhale m’pinthu ping’ono na tisafuna kupirira na ntsisi zace. Natenepa Yahova asaikha ndida unafunika ife kusangizira munathimbana ife na madawo a anango. Tingakhala a ntsisi, tisapangiza kufuna kwace.—Aefesi 5:1, 2.

Sakani Njira Za Kufuthula Kufuna

11. Thangwi yanji Paulu awangisa Akorinto kufuthula kufuna kwawo?

¹¹ Paulu amala miyezi m’kumanga mpingo wa Korinto, ku Gresya. Iye aphata basa mwakuwanga towera kuphedza abale kweneku, na iye akhaafuna. Mbwenye anango mwa iwo nee akhanfuna tayu. Iwo akhali anthu akupokanya kakamwe. Iye aadembetera ‘kufungula mitima yawo [peno kufuthula kufuna]’ m’kupangiza kufuna. (2 Akorinto 6:11-13; 12:15) Ife tisafunika kudinga kuti tisapangiza kufuna anango mpaka papi na kusaka njira za kufuthula kufuna kwathu.—1 Jwau 3:14.

12. Kodi tinakwanisa tani kukulisa kufuna kwathu onsene m’mpingo?

¹² Kodi alipo anthu anango m’mpingo anaona ife kukhala akunensa kuafendedzera duzi? Tingacita pyonsene pinakwanisa ife towera kuduwala kusiyana kwa umunthu wathu—ninga munafuna ife kuti iwo acitirembo—pyenepi pingacitise uxamwali wathu kukhala wakupisirwa. Njira inango ya kuafendedzera duzi ndi kusaka na kuyang’ana makhaliro awo adidi. Pyenepi pinadzakulisadi kuafuna kwathu.—Luka 6:32, 33, 36.

13. Kodi tinakwanisa tani kufuthula kufuna kwathu m’kupangiza kufuna anango m’mpingo mwathu?

¹³ Mwandimomwene, tinacimwana kucita pyonsene kwa anango. Panango ife nkhabe kwanisa kumwanyika onsene pa nsonkhano ubodzi. Panango tinacimwana kuphataniza onsene munacemerera ife axamwali towera kudzadya na ife. Kodi tingakwanise kufuthula kufuna kwathu m’kubvunga mphindi zingasi basi towera kudziwa mwadidi munthu unango m’mpingo mwathu? Kodi m’midzidzi inango tingakwanise kucemerera munthu unango wakuti nee tisandziwa mwadidi towera aphate basa na ife m’utumiki wa m’munda?

14. Kodi tinapangiza tani kufunana na ntima onsene tingagumanika pakati pa Akristu akuti nee tisaadziwa?

¹⁴ Misonkhano ya gawo Yacikristu isatipasa miyai yadidi yakufuthula kufuna kwathu. Pikwi pya anthu angakwanise kukhalapo. Ife tinacimwana kudziwa onsene, mbwenye tingakwanise kucita pinthu m’njira yakupangiza kuti tisaikha ukhali wawo wadidi pa mbuto yakutoma kupiringana pyakusankhula pyathu. M’midzidzi yakupuma, tingakwanise kupangiza kuatsalakana kwathu m’kutoma kusaka kudziwa anango ali nkhundunkhundu mwathu. Ntsiku yace, anthu onsene anafuna kukhala maso pa dziko yapantsi anadzakhala abale na alongo, akuphatana m’kulambira Mulungu wandimomwene na Baba wa onsene. Tinadzakomerwa tani na kudziwa anango! Kufunana na ntima onsene kunadzatikulumiza kucita pyenepi. Thangwi yanji imwe nkhabe toma cincino?

Kubwerezera Pidapfunzwa

• Ingasoseka miseru pakati pa Akristu, kodi isafunika kutongwa tani, na thangwi yanji?

• Munakula ife mwauzimu, kodi kufunana kwathu kusafunikambo kukule tani?

• Kodi mphyakukwanisika tani kupangiza kufunana na ntima onsene kwa anango kusiyapo kwa axamwali athu apaduzi basi?

[Foto pa tsamba 148]

Kufunana Kwacikristu kusapangizwa m’njira zizinji, ninga pa misonkhano ya mpingo