‘Pisafunika Kuti Mukhale Akupirira’

PIDAMALA kubatizwa Anitaa ninga m’bodzi wa Mboni za Yahova, mamunace akhantcinga kakamwe. Anita alonga: “Iye akhandikhondesa kuenda ku misonkhano, nee kulonga dzina ya Mulungu. Kulonga basi ene dzina ya Yahova kukhacitisa mamunanga kuipirwa kakamwe.”

Kupfundzisa anace pya Yahova ukhali nkandzo unango ukulu kuna Anita. “Ulambiri wa Yahova ukhakhondeswa panyumba yathu ene. Ndikhacimwana kupfundza pakweca na ananga, nee kuenda nawo ku misonkhano.”

Citsandzo ca Anita cisapangiza kuti mitcingo ya acibale a pabanja inakwanisa kuyesera kakamwe kukhulupirika kwathu ninga Akristu. Pyenepi ndi sawasawa na utenda wakukhonda wanga, kuferwa na mwana peno ndzathu wa m’banja, kuphatanizambo munthu wa pabanja angasiya kutumikira Yahova. M’makhaliro anewa, ninji cinafuna kuphedza Nkristu toera kupitiriza kukhala wakukhulupirika kwa Yahova?

Mungathimbana na nyatwa ninga zenezi, munacitanji? Mpostolo Paulu alonga: ‘Pisafunika kuti mukhale akupirira.’ (Aheb. 10:36) Ninji cinafuna kukuphedzani toera kupirira?

CITANI PHEMBERO MBAMUNYINDIRA YAHOVA

Njira ikulu kakamwe yakuti tinakwanisa kuwina mphambvu inafuna ife toera kupirira mayesero ndi kucita phembero mbatinyindira Mulungu. Ndi pyenepi pidacita Ana pidaferwa iye na mamunace Nciposi namaulo. Iwo akhali na pyaka 30 mbadamala kale kumanga banja. Ana alonga: “Iye nee abwererabve kunyumba buluka kubasa. Iye akhali na pyaka 52 basi pyakubalwa.”

Kodi Ana akwanisa tani kupirira? Iye akhaenda kubasa, basa yace ikhamphedza thangwi ikhaphemba kupfulika kakamwe, mbwenye pyenepi nee pyamalisa nyatwa yace. Iye alonga: “Ndafungula ntima wanga kuna Yahova mbandidembetera ciphedzo cace toera ndikwanise kupirira kuferwa kwakutsukwalisa.” Kodi Yahova atawira maphembero ace? Ana asanyindira kuti Yahova amphedza. Iye alonga: “Ntendere wakuti basi ene Mulungu anakwanisa kutipasa, wakhurudza ntima wanga na manyerezero anga. Ine nkhabe kupenula kuti Yahova anadzalamusa mamunanga muli akufa.”​—Afil. 4:6, 7.

Yahova asapikira kuti anadzabvesera maphembero a atumiki ace mbaapasa pinafuna iwo toera kupitiriza kukhala akukhulupirika. (Sal. 65:2) Nee musatawira kuti pikiro ineyi isawangisa cikhulupiro? Iyo isakuphedzani kuona kuti imwe munakwanisambo kupirira.

MISONKHANO YACIKRISTU ISATIPHEDZA TOERA KUPIRIRA

Yahova asaphedza atumiki ace kubulukira m’mpingo Wacikristu. Mwacitsandzo, mu ndzidzi wakuti mpingo wa ku Tesalonika ukhathimbana na mitcingo mikulu, Paulu akulumiza Akristu anewa toera ‘kubalangazana na kuphedzana unango na ndzace sawasawa ninga mukhacitira iwo.’ (1 Ates. 2:14; 5:11) Kugumanyikana na kuphedzana unango na ndzace, pyaphedza Akristu a ku Tesalonika toera kupirira mayesero anewa a cikhulupiro cawo. Mbiri ya kupirira kwawo ndi citsandzo cadidi kakamwe kwa ife lero, pontho cisapangiza cinthu cakuti cinatiphedza toera kupirira.

Kukulisa uxamwali na abale na alongo pa mpingo pinatiphedza toera kugawana ‘pinthu pyakuti pinawangisa unango na ndzace.’ (Arom. 14:19) Pyenepi mphyakufunika kakamwe m’midzidzi ya nyatwa. Paulu athimbana na nyatwa zizinji, mbwenye Yahova ampasa mphambvu toera kupirira. Midzidzi inango, Mulungu apasa Paulu cibalangazo cakukwana kubulukira kwa anyakukhulupira andzace. Mwacitsandzo, pidatumiza Paulu mwanyikiro wace kuna Akristu a mpingo wa ku Kolose, alonga mafala awa: ‘Ndiwo adacitika andzanga mbandiwangisa.’ (Akol. 4:10, 11) Inde, ufuni wawo kuna Paulu waakulumiza toera kumbalangaza na kumuwangisa mu ndzidzi ukhafuna iye ciphedzo. Panango imwe mwatambira kale ciwangiso ninga ceneci na ciphedzo kubulukira mu mpingo wanu.

CIPHEDZO CA AKULU A MPINGO

Yahova asaphatisira akulu a mpingo ninga njira inango toera kupereka ciphedzo m’mpingo Wacikristu. Amuna anewa akukola mwauzimu anakwanisa kukhala ninga mbuto yakuthawira ‘mphepo peno condzi, ninga madzi adidi nthando yakusowa madzi, ninga nthundzi wa mwala ukulu pa mataka akuuma.’ (Iza. 32:2) Mphyakuwangisa kakamwe kudziwa kuti abale anewa ali dzololo toera kutiphedza. Natenepa, mungathimbana na makhaliro akunentsa phembani ciphedzo cawo. Ciwangiso na ciphedzo ca akulu a mpingo cinakuphedzani toera kupirira.

Ndimomwene kuti akulu a mpingo nee anakwanisa kumalisa nyatwa zanu zonsene. Iwo ndi akusowa ungwiro, pontho asaonambo “nyatwa sawasawa ninga imwe.” (Mach. 14:15) Mbwenye maphembero awo anakwanisa kutiphedza kakamwe. (Tgo. 5:14, 15) M’bale unango ku Italya wakuti asapirira nyatwa ikulu kakamwe ya ungumi alonga: “Ufuni, citsalakano ca abale na kundicedzera kwawo mwakhonda phonya pisandiphedza toera kupirira.” Khala musathimbana na nyatwa, Yahova asafuna kuti muphembe akulu a mpingo toera akuphedzeni.

IKHANI MABASA AUZIMU PA MBUTO YAKUTOMA

Pana pinthu pinango pisafunika ife kucita toera kupirira. Cibodzi ndi kupitiriza na ndandanda yauzimu. Ndi pyenepi pidacita John wa pyaka 39 pyakubalwa wakuti adzindikirwa kuti akhali na utenda wa câncer. Iye alonga: “Ndaona kuti pyenepi pikhali pyakutsukwalisa kakamwe thangwi ndikhali mwana.” Pa ndzidzi unoyu, John akhali na mwana wa pyaka pitatu basi. John alonga: “Pyenepi pikhabveka kuti nkazanga akhafunika kutsalakana mwanathu wang’ono na ine, na kundiphedza m’maulendo onsene akhafunika ine kuenda kaonana na madotoro.” Ukondzi wa quimioterapia wacitisa John kukhala wakuneta kakamwe, pontho ukhancitisa kunyebvuka ntima. Mbwenye si pyenepi basi tayu. Pai wace John adzaphatwa na utenda wakuti mbadafa nawo, iye akhafuna munthu toera kuntsalakana.

Kodi John na nkazace akwanisa tani kupirira makhaliro anewa akunentsa? Iye alonga: “Mwakukhonda tsalakana kuneta, ndikhacita pyonsene toera banja yathu ipitirize kuikha pinthu pyauzimu pa mbuto yakutoma. Ife tikhagumanika pa misonkhano yonsene, tikhaenda mu utumiki pa sumana, na tikhacita kulambira kwathu kwa banja namaulo mwakukhonda phonya, ngakhale m’midzidzi yakunentsa.” Inde, John aona kuti cinthu cakufunika kakamwe toera kupirira nyatwa yonsene ndi kukhala wakuwanga mwauzimu. Ndi uphungu upi uli na iye toera kupereka kuna ale anathimbana na makhaliro akunentsa? Iye alonga: “Pakutoma pisatsukwalisa na kudzudzumisa, mbwenye manyerezero anewa asapitirwa mbuto na mphambvu pabodzi na ufuni wa Yahova. Yahova anakwanisa kukuwangisani ninga pinacita iye kwa ine.”

Mwakukhonda penula, na ciphedzo ca Mulungu tinakwanisa kupirira nyatwa peno mayesero akunentsa akuti tinakwanisa kuthimbana nawo lero peno ntsogolo. Natenepa, tendeni ticite phembero mbatinyindira Yahova, kukulisa uxamwali na abale na alongo m’mpingo wathu, kuphemba ciphedzo ca akulu ampingo na kupitiriza kuikha pinthu pyauzimu pa mbuto yakutoma. Tingacita pyenepi, tinapangiza kuti tikutowezera mafala adalonga Paulu kuti: ‘Pisafunika kuti mukhale akupirira.’

[Cidzindikiro capantsi]