Kodi Mbani Nyamalwa Wa Kristu?

▪ Vidyu yakugopswa idabuluswa cincino ikhali na nsolo wakuti Nyamalwa wa Kristu.

▪ Nsoka unango wakubvekera wa anyakuimba walemba albu yawo ibodzi nsolo wakuti Nyamalwa wa Kristu Wakudziwika Kakamwe.

▪ Friedrich Nietzsche, siyentista wa filozofiya wa m’pyaka dzana 19, ibodzi mwa mabukhu ace aithula Nyamalwa wa Kristu.

▪ Amambo na atongi a m’pyaka 500 mpaka cifupi na 1500 N.W kazinji kene akhacemera anyamalwa awo kuti ndi anyamalwa a Kristu.

▪ Martinho Lutero, ntsogoleri Wakusasanyira Pinthu Papswa wa ku Alemanya, alonga apapa a Katolika Waciroma ninga anyamalwa a Kristu.

NAKUTI fala yakuti “nyamalwa wa Kristu” isaphatisirwa kutomera kale ninga cidzindikiro kwa amambo peno mavidyu, natenepa mphyadidi kubvundzika: Mbani nyamalwa wa Kristu? Kodi fala ineyi isatikhuya tani lero? Mwandimomwene, bukhu yakuthema toera kudinga mabvekero a fala yakuti nyamalwa wa Kristu ndi Bhibhlya, thangwi fala ineyi isagumanika mwenemu m’maulendo maxanu.

APANGIZWA NYAMALWA WA KRISTU

Nyakulemba Bhibhlya adaphatisira fala “nyamalwa wa Kristu” ndi mpostolo Jwau basi. Kodi iye anfokotoza tani nyamalwa wa Kristu? Onani mafala awa mu tsamba yakutoma inacemerwa na dzina yace: ‘Ananga, ndzidzi wakumalisa wakwana. Mwabva kuti nyamalwa wa Kristu anabwera. Paoneka cincino anyamalwa azinji a Kristu; natenepa tinadziwa kuti ndzidzi wakumalisa wafika. Anyamalwa anewa a Kristu akhali kale pabodzi na ife . . . Mbani mphapo nyauthambi ule na nyamalwa ule wa Kristu? Ndi anthu onsene analonga kuti Kristu si mpulumusi wakupikirwa tayu. Analonga tenepa, anakhonda Mwana na Baba.’​—1 Jwau 2:18, 19, 22, Mphangwa Zadidi.

Tisapfundzanji m’mafala anewa? Jwau alonga “anyamalwa azinji a Kristu,” toera kupangiza kuti anyamalwa a Kristu si munthu m’bodzi tayu, mbwenye nsoka wa anthu. Anthu peno pigawiko pinacita khundu ya nyamalwa wa Kristu pisamwaza uthambi, pisakhonda kuti Yezu ndi Kristu peno Mesiya mbayesera kufudza uxamwali pakati pa Mulungu na Mwanace Yezu Kristu. Ale anacita khundu ya nyamalwa wa Kristu asalonga kuti iwo ndi Kristu peno aimiriri ace, mbwenye ‘angabuluka pana ife,’ iwo asasiya pipfundziso pyaundimomwene wa Bhibhlya. Kusiyapo pyenepi, nsoka unoyu ukhalipo mu ndzidzi udalemba Jwau tsamba yace, “ndzidzi wakumalisa,” panango kunkhomo kwa ndzidzi wa apostolo.

Ninji pidalemba pontho Jwau thangwi ya anyamalwa a Kristu? Mukulonga thangwi ya aprofeta aunthawatawa, iye acenjeza: ‘Angabvekesa kuti Yezu Kristu acitika munthudi ninga ife, ana Nzimu wa Mulungu. Angapikhonda, hana Nzimu wa Mulungu tayu; nzimu wawo ngwa nyamalwa wa Kristu. Mwabva kuti unoyu anabwera; mbwenye aoneka kale pantsi pano.’ (1 Jwau 4:2, 3, MZ) Buluka penepo, mu tsamba yace yaciwiri, Jwau agomezera: ‘Mbazinji anyakunyengeza adabalalika pantsi pano mbakhonda kudzindikira kuti Yezu Kristu acitikadi munthu ninga ife. Anacita tenepa ndiyedi nyakunyengeza na nyamalwa wa Kristu.’ (2 Jwau 7, MZ) Mwandimomwene, Jwau adzindikira kuti anyamalwa a Kristu ndi onsene ale akuti mwanyakhomo asamwaza uthambi wauphemberi wakulonga pya Yezu Kristu na pipfundziso pyace.

‘APROFETA AKUNYENGEZA’ NA ‘ANTHU AKUKHONDA BVERA MWAMBO’

Kale kakamwe, Jwau mbadzati kulemba pya kunyengeza kweneku kwa mauphemberi, Yezu Kristu acenjeza atowereri ace: ‘Cenjerani na aprofeta akunyengeza, anadza kwa imwe mbabvala nthembe za mabira mbwenye mu ntima ndi mibindzi yakuluma. (Mateo 7:15) Mpostolo Paulu acenjezambo Akristu a ku Tesalonika: ‘Nee munthu m’bodzi akudodomeseni na uthambi wace, thangwi mbidzati kufika ntsiku ya Yahova, panaoneka ndzidzi wakuti anthu azinji analeka Mulungu, panaonekambo anthu akukhonda bvera mwambo, mwana wakutayika.’​—2 Atesalonika 2:3.

Na thangwi ineyi, mu pyaka dzana yakutoma, aprofeta akunyengeza na anyakupanduka akhawangisira kakamwe toera kufewesa mpingo Wacikristu. Onsene ale akhacita khundu yakumwaza uthambi wa mauphemberi wakulonga pya Yezu Kristu na pipfundziso pyace akhaphatanizwa mu fala idalonga Jwau kuti “nyamalwa wa Kristu.” Maonero a Yahova kwa anthu anewa apangizwa mudaafokotoza Paulu ninga “mwana wakutayika.”

CITANI GAXUGAXU NA MABASA A ANYAMALWA A KRISTU LERO

Ndiye tani lero? Anthu na pigawiko pinacita khundu ya nyamalwa wa Kristu akupitiriza kupokanya Kristu na pipfundziso pyace. Mwanyakhomo iwo asamwaza uthambi na cifuno cakuti anthu akhonde kudziwa mwadidi Baba, Yahova Mulungu na Mwanace, Yezu Kristu. Tiri na mathangwi adidi akucita gaxugaxu na unthawatawa unoyu wa mauphemberi. Tendeni tidinge pitsandzo piwiri.

M’madzana a pyaka, magereja asamwaza cipfundziso ca Utatu, mbalonga kuti Baba na Mwana ndi munthu m’bodzi ene. Nyamalwa wa Kristu asadodomesa anthu toera akhonde kudziwa mwadidi Yahova Mulungu na Yezu Kristu. Unthawatawa unoyu usacitisa anthu akuona ntima toera akhonde kutowezera Yezu Kristu na kufendedzera Mulungu, ninga pinatikulumiza Bhibhlya kucita.​—1 Akorinto 11:1; Tyago 4:8.

Magereja asathimizira unthawatawa unoyu mukukulumiza anthu toera kuphatisira Bhibhlya yakuti nkhabe dzina ya Mulungu, Yahova. Iwo asacita pyenepi mwakukhonda tsalakana kuti dzina ya Yahova isagumanika m’maulendo cifupi na 7.000 mu cilongero cakutoma ca Bhibhlya. Ninji pidacitika patsogolo pace? Dzina ya Mulungu wandimomwene nkhabe kudziwika mwadidi.

Munjira inango, kudziwa dzina ya Mulungu, Yahova, kwaphedza alambiri azinji a mitima yadidi toera kufendedzera Mulungu. Pyenepi ndi pidacitikira Richard, adacedzerwa na Mboni za Yahova ziwiri. Richard asafokotoza: “Iwo andipangiza kubulukira m’Bhibhlya kuti dzina ya Mulungu wandimomwene ndi Yahova. Ndatsandzaya kakamwe na kudziwa kuti Mulungu ali na dzina, cinthu cakuti cipo ndikhadacibva kale.” Kutomera mu ndzidzi unoyu, iye acita macinjo mu umaso wace toera ubverane na midida ya Bhibhlya mbakomeresa Yahova. “Kudziwa dzina ya Mulungu kwandiphedza toera kukulisa uxamwali na iye.”

M’madzana a pyaka, nyamalwa wa Kristu acitisa pikwi na pikwi pya anthu kukhala n’cidima cauzimu. Mbwenye thangwi yakupfundza Mafala a Mulungu, Bhibhlya, tisakwanisa kudziwa kuti mwandimomwene nyamalwa wa Kristu mbani na kusudzulwa m’mauthambi auphemberi wa anyamalwa a Kristu.​—Jwau 17:17.

[Ntsonga ikulu pa tsamba 15]

Mpostolo Jwau adzindikira kuti anyamalwa a Kristu ndi onsene ale akuti mwanyakhomo asamwaza uthambi wauphemberi wakulonga pya Yezu Kristu na pipfundziso pyace