KUTAWIRWA KWA MIBVUNDZO YA BHIBHLYA

Ninji Cinacitisa Kukhala Nyakubala Wadidi?

Banja yakuti anyakubala asafunana na kulemedzana unango na ndzace isapereka makhaliro adidi toera mwana akule mwadidi. (Akolose 3:14, 19) Anyakubala adidi asafuna anawo na kuasimba, ninga pidasimba Yahova Mulungu Mwanace.​—Lerini Mateo 3:17.

Babathu wakudzulu asabvesera atumiki ace na asatsalakana mabvero awo. Anyakubala anacitambo mwadidi kupfundza kwa iye na kubvesera pinalonga anawo. (Tyago 1:19) Iwo asafunika kudzindikira mabvero a anawo, ngakhale mu ndzidzi unatsukwala iwo.​—Lerini Numero 11:11, 15.

Munakuza Tani Ananu Munjira Yadidi?

Ninga nyakubala, muli na mphambvu yakukhazikisa mitemo. (Aefesi 6:1) Pfundzani kubulukira ku citsandzo ca Mulungu. Iye asapangiza ufuni kwa anace mukulonga pakweca mitemo na pinafuna kucitika ingakhonda kubverwa. (Genesi 3:3) Mbwenye, mbuto mwakukakamiza anthu kuibvera, iye asaapfundzisa kuti anaphindula tani angacita pinthu pyadidi.​—Lerini Izaiya 48:18, 19.

Khalani na cifuno cakuphedza ananu toera afune Mulungu. Buluka penepo, iwo anacita pinthu mwandzeru ngakhale mu ndzidzi unakhonda imwe kukhalapo. Tenepa ninga Mulungu asapfundzisa kubulukira mu citsandzo, pfundzisani ananu toera afune Mulungu kubulukira mu citsandzo canu.​—Lerini Deuteronomyo 6:5-7; Aefesi 4:32; 5:1.

Toera kudziwa pizinji, onani nsolo 14 wa bukhu iyi, yakubuluswa na Mboni za Yahova

Isagumanikambo mu www.jw.org/seh