Nsolo Waciwiri

Dziwisani Ukulu Wa Yahova Ninga Mulungu Mbodzi Basi Wandimomwene

1. Kodi mbani Mulungu mbodzi basi wandimomwene?

¹BIBLYA isalonga kuti ngakhale alipo azinji anaoniwa ninga alungu, ‘kuna ife alipo Mulungu mbodzi [basi], ndiye baba.’ (1 Akorinto 8:5, 6) “Mulungu mbodzi [basi]” unoyu ndi Yahova, Nciti wa pinthu pyonsene. (Deuteronomyo 6:4; Apokalipse 4:11) Yezu amulonga ninga “Mulungu wanga na Mulungu wanumbo.” (Jwau 20:17) Iye abverana na Mose, adalonga kale kuti: “Mbuya ndiye Mulungu basi [wandimomwene], nkhabe unango wakupita Iye.” (Deuteronomyo 4:35) Yahova ndi wankulu kakamwe kupiringana pinthu pyonsene pinalambirwa, ninga adzimunthu, anthu, peno nyamalwa wace Sathani Dyabo, “mulungu wakuipa wa pantsi pano.” (2 Akorinto 4:3, 4) Mwakusiyana na pinthu pyenepi pyonsene, ninga Yezu ancemera, Yahova ‘ndiye ekha Mulungu wamaso [peno wandimomwene].’—Jwau 17:3.

2. Munapfunza ife pya Mulungu, kodi umaso wathu usafunika kukhuyiwa tani?

² Anthu akupereka takhuta anapfunza pya makhaliro akukomeresa a Mulungu pabodzi na pinthu pidacita iye na pinafuna iye kudzaticitira, asanfendedzera. Munakula kufuna kwawo Yahova, iwo asapibva kukhala akukulumizika kudziwisa ukulu wace. M’njira ipi? Njira ibodzi ndi kulonga na anango pya iye. Aroma 10:10 asalonga: “Pa mulomo panabuluka kubvekesa kunapasa kupulumuka.” Njira inango ndi kunsangizira m’mafala na m’pyakucita. Aefesi 5:1 asalonga: “Sangizirani Mulungu thangwi ndimwe anache a pa ntima.” Towera kucita pyenepi mwakukwana, tisafunika kudziwadi makhaliro a Yahova.

3. Kodi ndi api makhaliro akupambulika a Mulungu?

³ M’Biblya, muna mafala mazinji anapangiza makhaliro akupambulika a Mulungu. Makhaliro ace manai akupambulika ndi awa: udziwisi, ulungami, mphambvu na kufuna. “Mwa Mulungu ndi muna udziwisi.” (Yobe 12:13) “Njira zache zonsene ndi ulungami.” (Deuteronomyo 32:4) “Mphambvu zache ntsikulu kakamwe.” (Izaiya 40:26) “Mulungu ndi kufuna.” (1 Jwau 4:8) Mbwenye pa makhaliro manai akupambulika a Mulungu, kodi ndi upi nkhaliro wakupambulika kakamwe unapiringana anango, unapangiza ntundu wa umunthu wa Mulungu?

“Mulungu Ndi Kufuna”

4. Kodi ndi nkhaliro upi wakupambulika udakulumiza Mulungu kucita kudzulu na pantsi na pinthu pyonsene pyamaso?

⁴ Nyerezerani kuti ndi ninji cidakulumiza Yahova kucita kudzulu na pantsi pabodzi na pyakucitwa pyanzeru pyauzimu na anthu. Kodi ukhali udziwisi wace peno mphambvu? Nkhabe, maseze Mulungu aphatisira basa makhaliro anewa, iye hadakulumizwa na iwo tayu. Ulungami wace nee wankulumiza kugawana na anango muoni wa umaso tayu. Mbuto mwa pyenepi, kufuna kukulu kwa Mulungu kwancitisa kugawana na anango kutsanzaya kwa kukhalapo ninga cakucitwa canzeru. Kufuna kwancitisa kuikha cifuniro cakuti anthu akubvera akhale maso kwenda na kwenda m’Paradizu. (Genesi 1:28; 2:15) Kufuna kwancitisa kubulusa kutongwa kudapaswa anthu na kudawa kwa Adamu.

5. Mwakubverana na Biblya, kodi Yahova ndi cipangizo ca nkhaliro upi, na thangwi yanji?

⁵ Natenepa, pa makhaliro onsene a Mulungu, nkhaliro wace wakupambulika kakamwe ndi kufuna. Unoyu ndi nkhaliro wace wakukhonda cinja. Maseze udziwisi, ulungami na mphambvu ndi makhaliro akufunika, cipo Biblya isalonga kuti Yahova ndi makhaliro anewa. Mbwenye isalongadi kuti iye ndi kufuna. Inde, Yahova ndi cipangizo ca kufuna. Kufuna kweneku kusatsogolerwa na midida, tayu na mabvero. Kufuna kwa Mulungu kusatongwa na midida ya undimomwene na kulungama. Ndi ntundu wapadzulu kakamwe wa kufuna, ninga usapangizwa mwa Yahova Mulungu ene. Kufuna kweneku ndi cipangizo cakusowa umbirimi na m’nzidzi onsene kusapangizwa na mabasa akuoneka.

6. Maseze Mulungu ndi wankulu kakamwe kupiringana ife, kodi ndi ninji cinaticitisa kukwanisa kunsangizira?

⁶ Ndi nkhaliro unoyu wakudzumatirisa wa kufuna unaticitisa kusangizira Mulungu. Ninga anthu akucepeseka, akusowa ungwiro na akudawa, panango tinganyerezere kuti cipo tinakwanisa kusangizira Mulungu mwakupembera. Mbwenye pana citsanzo cinango ca kufuna kukulu kwa Yahova: Iye asadziwa kukhonda kwanisa kwathu na nkhabe dikhira ungwiro kwa ife. Iye asadziwa kuti cincino tiri kutali na ungwiro. (Masalmo 51:5) Na thangwi ineyi Masalmo 130:3, 4 asalonga: “Mbuya, mbamudakoya madawo athu, mbani anakhalikira mungatonga miseru? Mbwenye kwa imwe tinagumana kulekerwa.” Inde, Yahova ndi “[Mulungu] wa ntsisi zikulu na wakupfulika, ananensa kupindira, mbakhala na ntsisi na ulungami.” (Eksodo 34:6) “Imwe, Mbuya, ndimwe wadidi na ntima wakulekera.” (Masalmo 86:5) Ndi kwakuthontholesa tani! Ndi kwakuwangisa tani kutumikira Mulungu unoyu wakudzumatirisa na kuphindula na citsalakano cace cakufuna na cantsisi!

7. Kodi kufuna kwa Yahova kusaoneka tani m’pinthu pidacita iye?

⁷ Kufuna kwa Yahova kungakwanise kuonekambo m’pinthu pidacita iye. Nyerezerani pinthu pizinji pyadidi pidatipasa Yahova towera tikomerwe napyo, ninga mapiri akubalika, misitu, mathawala na mabara. Iye atipasa mitundu yakudzumatirisa yakusiyanasiyana ya cakudya towera tikomerwe na kudzipa pabodzi na kutitsidzikiza. Yahova atipasambo mitundu yakusiyanasiyana ya maluwa akubalika na akununkhira mwadidi pabodzi na pinyama pyakubalika. Acita pinthu pyakuti mbipidakomeresa anthu, maseze iye nee akakamizwa kucita pyenepi. Mwandimomwene, nakuti ndife akusowa ungwiro na tisakhala m’dziko ino yakuipa, nee tisakwanisa kutsanzaya mwakukwana na pyakucitwa pyenepi tayu. (Aroma 8:22) Mbwenye nyerezerani basi pinthu pinafuna kudzaticitira Yahova m’Paradizu! Nyamasalmo asatipasa cibaso: “Munafungula dzanja yanu mbamupikhutisa mu utende mwanu pyonsene pina moyo.”—Masalmo 145:16.

8. Kodi ndi citsanzo cipi cakupambulika cinapangiza kuti Yahova asatifuna?

⁸ Kodi ndi citsanzo cipi cakupambulika cinapangiza kuti Yahova asafuna anthu? Biblya isafokotoza: “Mulungu afuna anthu a pantsi pano pikulu pyene, mphapo apereka Mwana wache mbodzi ekha towera munthu munthu anankhulupira, aleke kutayika, mbwenye aone moyo wakukhalirathu.” (Jwau 3:16) Kodi Yahova acita pyenepi thangwi ya udidi wa anthu? Aroma 5:8 asatawira: “Mulungu ationesa kutifuna kwache, thangwi pa ndzidzi ukhali ife anyakudawa Kristu atifera.” Inde, Mulungu atuma Mwana wace waungwiro pa dziko yapantsi towera kudzapereka umaso wace ninga ntsembe yaciomboli towera kutiombola ku kutongwa kwa kudawa na kufa. (Mateo 20:28) Pyenepi pyafungula njira towera anthu anafuna Mulungu akhale na umaso okhonda mala. Mwakukomeresa, kufuna kwa Mulungu kusafuthulwa kwa onsene anafuna kucita cifuno cace, thangwi Biblya isatipanga: “Mulungu hanayang’ana nkhope tayu, mbwenye pa mitundu yonsene Mulungu anakomerwa na ale anangopa mbachita pyadidi.”—Machitiro 10:34, 35.

9. Kodi maperekero a Yahova Mwana wace ninga ciomboli kwa ife asafunika kutikhuya tani?

⁹ Kodi maperekero a Yahova Mwana wace ninga ciomboli kwa ife, mbafungula njira yakuti tikhale na umaso okhonda mala, asafunika kukhuya tani njira inaphatisira ife umaso wathu lero? Asafunika kukulisa kufuna kwathu Mulungu wandimomwene, Yahova. M’nzidzi ubodzibodzi, asafunika kuticitisa kubvesera Yezu, ule anaimirira Mulungu. ‘Munthu adafera anthu onsene ndiye Kristu, adaafera towera anthu ali maso akhonde kukhalira pinaoneka na maso okha, mbakhalire Kristu adaafera.’ (2 Akorinto 5:15) Ndi kwakukomeresa tani kutowerera manyalo a Yezu, thangwi iye akhali citsanzo cadidi m’kusangizira kufuna na ntsisi za Yahova! Pyenepi pisaoneka m’pidalonga Yezu kwa anthu akucepeseka: “Bwerani kuna ine, imwe mwonsene akuneta na anyakulemerwa, inembo ndinadzakupumisani. Kwatani ntolo wanga, mbamupfundza kwa ine thangwi ndinawo ntima wadidi na wakukhurudzika, mbamudzagumana ntendere mu mitima mwanu, thangwi ntolo wanga ngwakusemiwa, nsekete wanga ngwakululupa.”—Mateo 11:28-30.

Pangizani Kufuna Anango

10. Kodi tinapangiza tani kuti tisafuna Akristu anzathu?

¹⁰ Kodi tinapangiza tani kuti tisafuna Akristu anzathu ninga munatifunira Yahova na Yezu? Onani njira zizinji zakuti tingakwanise kucita pyenepi: “Munthu wakufuna anapirira mbachita pyadidi, bibvu hanachitabve tayu, pyakuipa hanachitabve tayu, anakhondambo kugaya. Munthu anafuna mu ntima mwache hananyadzika tayu, hanasaka pinthu pyache basi tayu, hanasiribzwa tayu, pyakuipa hananyerezera tayu, anachimwanambo kukomerwa napyo, anakomerwa na pinthu pyadidi pyokha. Iye anapirira pyonsene, anatawira pyonsene, anadikhira pyonsene, anakhulupira pyonsene. Kufuna kunamala tayu.”—1 Akorinto 13:4-8; 1 Jwau 3:14-18; 4:7-12.

11. Kodi tisafunikambo kupangiza kufuna kwa ani, na m’njira ipi?

¹¹ Kodi tisafunikambo kupangiza kufuna kwa ani, na m’njira ipi? Yezu alonga: “Ndokoni kuna anthu a madziko onsene mbamuachita anyakupfundza anga. Abatizarini na dzina ya Baba na ya Mwana na Nzimu wa Mulungu. Apfundziseni [kucita] pyonsene pidakupangani ine.” (Mateu 28:19, 20, MZ) Pyenepi pisaphataniza kugawana na anthu anango akuti si Akristu anzathu tayu mphangwa zadidi za dziko ipswa ya paradizu ya Mulungu inafuna kudza. Mwapakweca Yezu apangiza kuti kufuna kwathu nee kusafunika kudroma kwa anyakukhulupira anzathu basi tayu, thangwi iye alonga: “Imwe mungafuna anakufunani basi, [munadzawinanji]? Kodi, apublikano [peno anyamisonkho] asachitambo tenepa tayu? [Mungamwenyika] abale anu okha-okha munapiringana tani andzanu? [Ajentiyu] asachitambo tenepa tayu?”—Mateo 5:46, 47; 24:14; Agalata 6:10.

‘Fambani M’dzina Ya Yahova’

12. Thangwi yanji dzina ya Mulungu isaphatisirwa kwa iye basi?

¹² Njira inango yakufunika ya kudziwisa ukulu wa Mulungu wandimomwene ndi kudziwa, kuphatisira na kupfunzisa anango dzina yace yakupambulika, Yahova. Nyamasalmo alonga kufuna kwace kwa m’ntima: ‘Penepo iwo anadziwa kuti Imwe basi ndimwe Mbuya [“Yahova,” Tradução do Novo Mundo], Ntongi Wankulu kakamwe pantsi pano ponsene. (Masalmo 83:18) Dzina yakuti Yahova isabveka “Iye Asacitisa Pinthu Kukhalapo.” Iye ndi Nkwanirisi Wankulu wa Pifuniro, anacitisa kuti m’nzidzi onsene pifuniro pyace pikwanirisike. Adathema kukhala na dzina ineyi ndi Mulungu wandimomwene basi, thangwi anthu nkhabe cibaso cakuti kuwangisira kwawo kunadzapembera. (Tyago 4:13, 14) Yahova basi angakwanise kulonga kuti mafala ace ‘anacita pyonsene’ pidaatumira iye. (Izaiya 55:11) Anthu azinji asakomerwa munaona iwo pakutoma dzina ya Mulungu m’Biblya yawo na kudziwa mabvekero ayo. (Eksodo 6:3) Mbwenye iwo anadzaphindula na cidziwiso ceneci ‘angafamba m’dzina ya Yahova kwenda na kwenda.’—Mikeya 4:5, NM.

13. Kodi kudziwa na kufamba m’dzina ya Yahova kusaphatanizanji?

¹³ M’kulonga pya dzina ya Mulungu, Masalmo 9:10 asalonga: ‘Ale anadziwa dzina yanu anadzakukhulupirani.’ Pyenepi pisaphataniza pizinji kupiringana kudziwa basi dzina yakuti Yahova, thangwi kudziwa basi dzina ineyi si kunkhulupira tayu. Kudziwa dzina ya Mulungu kusabveka kudziwa umunthu wa Yahova Mulungu, kulemedza utongi wace, kubvera mitemo yace na kunnyindira m’pinthu pyonsene. (Misangani 3:5, 6) M’njira ibodzibodzi, kufamba m’dzina ya Yahova kusabveka kuperekeka kwa iye na kumuimirira ninga mbodzi wa alambiri ace, inde kuphatisira umaso wathu mwakubverana na cifuno ca Mulungu. (Luka 10:27) Kodi imwe muli kucita pyenepi?

14. Kuti titumikire Yahova kwenda na kwenda, kodi tisafunika kucitanji mbuto mwa kubva kuti tiri na mangawa?

¹⁴ Kuti titumikire Yahova kwenda na kwenda, nee tisafunika kukulumizika thangwi yakukhala na mangawa na iye tayu. Mpostolo Paulu adembetera Timoti, wakuti akhatumikira Yahova m’piaka pizinji: ‘Ukhale na cifuno ca kupfunza pya kuperekeka kwaumulungu.’ (1 Timoti 4:7, NM) Munthu asakhala wakuperekeka kwa unango na thangwi yakuti m’ntima mwace asapereka takhuta wankulu kwa munthu unoyu. ‘Kuperekeka kwaumulungu’ kusapangiza kuti munthu asalemedza kakamwe Yahova. Pyenepi pisapangiza kuphatana na Mulungu mwakufuna thangwi ya kumulemedza pabodzi na kulemedza njira zace. Kusaticitisa kufuna kuti munthu onsene alemedze dzina yace. Tisafunika kusakulira kuperekeka kwaumulungu m’umaso wathu kuti tifambe m’dzina ya Yahova, Mulungu mbodzi basi wandimomwene, kwenda na kwenda.—Masalmo 37:4; 2 Pedro 3:11.

15. Kodi tinakwanisa tani kupasa Mulungu ulambiri okhonda gawika?

¹⁵ Kuti titumikire Mulungu mwakutawirika, tisafunika kumpasa ulambiri okhonda gawika, thangwi iye ndi ‘Mulungu wakuphemba ulambiri okhonda gawika.’ (Eksodo 20:5, NM) Nee tisafunika kufuna Mulungu na m’nzidzi ubodzi ene mbitifuna dziko yakuipa, yakuti mulungu wayo ndi Sathani. (Tyago 4:4; 1 Jwau 2:15-17) Yahova asadziwadi ntundu wa munthu unayesera mbodzi na mbodzi wa ife kukhala. (Yeremiya 17:10) Khala tisafunadi kulungama, iye asaona pyenepi na anadzatiphedza kupirira mayesero athu a ntsiku na ntsiku. M’kutiphedza na nzimu wace wakucena wamphambvu, iye anadzaticitisa kukunda uipi unagumanika konsene kwene m’dziko ino. (2 Akorinto 4:7) Anadzatiphedzambo kukoya cidikhiro cathu cakuwanga ca umaso okhonda mala m’paradizu pa dziko yapantsi. Ndi cidikhiro cakudzumatirisa tani! Tisafunika kupereka takhuta wankulu na kutumikira mwakufuna Mulungu wandimomwene, Yahova, anacitisa pyenepi kukwanisika.

16. Kodi ndi ninji pinafuna imwe kucita pabodzi na pikwi na pikwi pya anthu anango?

¹⁶ Anthu pikwi na pikwi pa dziko yonsene yapantsi atawira mwakukomerwa kucemererwa kudalembwa na nyamasalmo: “Dziwisani na ine ukulu wa Mbuya; tibvekese pabodzi pene dzina yache!” (Masalmo 34:3) Yahova asakucemererani kukhala pakati pa mwinji unakula m’madziko onsene unacita pyenepi.

Kubwerezera Pidapfunzwa

• Kodi Yahova ndi munthu wa ntundu wanji? Kodi tisaphindula tani na kubvesesa mwadidi makhaliro ace?

• Kodi tinakwanisa tani kuphedza anthu anango kupfunza undimomwene wa pya Mulungu?

• Kodi kudziwa na kufamba m’dzina ya Yahova kusaphatanizanji?

[Mafoto pa tsamba 14]

M’kufuna kwace kukulu, Yahova ‘anadzafungula dzanja yace mbakhutisa mu utende mwace pyonsene pina moyo’