Nsolo Makumawiri Naubodzi
Cifuniro Ca Yahova Cisakwanirisika Mwambiri
1, 2. (a) Kodi ndi cipi cifuniro ca Yahova na pyakucitwa pyanzeru? (b) Kodi mbani akhacita khundu ya banja yakuphatana ya alambiri a Mulungu?
CIFUNIRO cakufuna ca Yahova ndi cakuti pyakucitwa pyonsene pyanzeru piphatane m’ulambiri wa Mulungu mbodzi basi wandimomwene na kuti pyonsene pitsanzaye na ufulu wa mbiri ninga ana a Mulungu. Pyenepi ndi pinafunambo kakamwe ale anafuna ulungami.
2 Yahova atoma kukwanirisa cifuniro ceneci cakudzumatirisa mudatoma iye mabasa ace akucita pinthu. Pakutoma iye acita Mwanace wakuti kutomera padalamuswa iye muli akufa ndi “kuyetima [peno cipangizo] kwa mbiri ya Babace, ndiyembo [cithunzi] ca umulungu wache.” (Ahebere 1:1-3) Mwana unoyu akhali wakupambulika, wakucitwa na Mulungu basi. Patsogolo pace, pyakucitwa pinango pyonsene mbipidakhalapo kubulukira mwa Mwana unoyu: pakutoma aanju kudzulu, na buluka penepo anthu pa dziko yapantsi. (Yobe 38:7; Luka 3:38) Pyakucitwa pyenepi pyonsene pikhali banja ibodzi ya kudzulu na pantsi. Kwa ipyo pyonsene Yahova akhali Mulungu, Ntongi Wankulu Wakudzulu na Pantsi, na Baba wapyo wakufuna.
3. (a) Kodi ife tonsene tatambiranji kwa anyakubala athu akutoma? (b) Kodi ndi masasanyiro api akufuna adacitira Yahova mbeu ya Adamu?
3 Mudatongwa kufa anyakubala athu akutoma ninga anyakudawa mwanyakhomo, iwo athamangiswa m’Edeni na akhondiwa na Mulungu. Iwo asiya kucita khundu ya banja yace ibodzi ya kudzulu na pantsi. (Genesi 3:22-24; Deuteronomyo 32:4, 5) Tonsene ndife mbeu yawo, natenepa tabalwa na cipendamiro cakudawa. Mbwenye Yahova akhadziwa kuti pakati pa mbeu ya Adamu na Eva mbapadaoneka anthu akufuna ulungami. Natenepa Iye mwakufuna acita masasanyiro akuti anthu anewa akwanise kugumana “ufulu wa mbiri wa ana a Mulungu.”—Aroma 8:20, 21.
Israele Aluza Mbuto Yakupambulika
4. Kodi ndi mwai wanji udapasa Yahova Israele wakale?
4 Cifupi na piaka 2.500 Adamu mbadamala kucitwa, Yahova apasa anthu anango mwai wakukhala na uxamwali wakupambulika na Iye. Iye asankhula Israele wakale towera kukhala mbumba yace na aapasa Mwambo wace. (Genesi 12:1, 2) Iye aacita kukhala dzinza mbaaphatisira mwakubverana na cifuniro cace. (Deuteronomyo 14:1, 2; Izaiya 43:1) Mbwenye, iwo apitiriza kukhala m’ubitcu wa kudawa na kufa, natenepa iwo hadatsanzaya na ufulu wa mbiri ukhali na Adamu na Eva pakutoma tayu.
5. Kodi aluza tani Aisraele ciimiriro cawo cakupambulika pamaso pa Mulungu?
5 Ngakhale tenepa, Aisraele akhali na ciimiriro cakupambulika pamaso pa Mulungu. Iwo akhalimbo na kupitawirira kwa kulemedza Yahova ninga Babawo na kuphata basa mwakubverana na cifuniro cace. Yezu agomezera kufunika kwa kukwanirisa kupitawirira kweneku. (Mateo 5:43-48) Mbwenye, dzinza ya Israele yacimwana kucita pyenepi. Maseze Ayuda anewa akhalonga kuti “Baba wathu mbodzi ekha ndi Mulungu,” Yezu alonga kuti mabasa awo na nzimu ukhapangiza iwo nee pikhabverana na pikhalonga iwo. (Juwau 8:41, 44, 47, MZ) M’caka ca 33 E.C., Mulungu amalisa Mwambo, na uxamwali wakupambulika wa Israele na iye wamalambo. Kodi pyenepi pikhabveka kuti cipo anthu mbadakwanisabve tayu kukhala na uxamwali wakupambulika na Mulungu?
Kugumanywa Kwa ‘Pinthu Pya Kudzulu’
6. Kodi cifuniro ca masasanyiro adalonga Paulu pa Aefesi 1:9, 10 ndi ninji?
6 Mpostolo Paulu apangiza kuti anango pakati pa anthu mbadakwanisa kukhala na uxamwali wakupambulika na Mulungu. Mwacitsanzo, mwakubverana na masasanyiro a Yahova towera ale anankhulupira akwanise kukhala piwalo pya banja Yace, Paulu alemba: “[Mulungu] na ntsisi zache, atifokotozera pikhafuna iye na pikhadziwa iye ekha kalene kuti anadzapichita [masasanyiro] male ndzidzi ungadzakwanira: kugumanyisa pinthu pyonsene pya kudzulu na pya pantsi pano towera pitawire mwanachinthu mbodzi ene.” (Aefesi 1:9, 10) Anafuna cita masasanyiro anewa ndi Yezu Kristu. Kubulukira mwa iye, anthu asaendeswa ku makhaliro akutawirika pamaso pa Mulungu. Akucepa a iwo ali na cidikhiro cakukhala maso kudzulu. Mbwenye mwinji ukulu unadzakhala maso pa dziko yapantsi kwenda na kwenda.
7. Kodi mbani ‘pinthu pya kudzulu’?
7 Pakutoma, kubulukira pa Pentekoste ya 33 E.C., kwatoma kugumanywa kwa ‘pinthu pya kudzulu,’ pyakuti ndi ale anafuna kutambira unthaka pabodzi na Kristu m’Umambo wa kudzulu. Thangwi ya cikhulupiro cawo pa ntengo wa ntsembe ya Yezu, iwo asalongwa na Mulungu kukhala akulungama. (Aroma 5:1, 2) M’kupita kwa nzidzi, Ayuda na Ajentiyu aphatanizwambo, na cilengeso ca ‘pinthu pya kudzulu’ mbicidafika pa 144.000. (Agalata 3:26-29; Apokalipse 14:1) Akusala pang’ono basi a iwo aciri pa dziko yapantsi.
Kugumanywa Kwa ‘Pinthu Pya Pantsi’
8. Kodi mbani ‘pinthu pya pantsi,’ na ali na uxamwali wanji na Yahova?
8 Masasanyiro mabodzi ene asagumanyambo ‘pinthu pya pantsi.’ Mamiliyau a anthu akugumanywa cincino na cidikhiro ca kukhala maso kwenda na kwenda pa dziko yapantsi. Mwakuphatana na akusala anafuna kutambira Umambo, asalemedza dzina ya Yahova na asakuza ulambiri wace. (Izaiya 2:2, 3; Sofoniya 3:9) Iwombo asaona Yahova ninga “Baba” thangwi asandzindikira ninga ncera wa umaso. Asatsanzayambo na ciimiriro cakutawirika pamaso pace thangwi ya cikhulupiro cawo ku ciropa cakucuciswa ca Yezu. (Apokalipse 7:9, 14) Mbwenye nakuti iwo aciri akusowa ungwiro, kudzindikirwa kwawo mwadidi ninga ana a Mulungu kuciri kutsogolo.
9. Kodi Aroma 8:21 ali na pikiro yanji kwa anthu?
9 Ale ali na cidikhiro cakukhala maso pa dziko yapantsi asadikhira kakamwe nzidzi wakuti pyakucitwa pyaumunthu “pinadzaomboliwa mu ubichu wakuipa.” (Aroma 8:21) Kusudzulwa kweneku kunadzatoma Kristu na anyankhondo ace akudzulu angamalisa nyatwa zikulu pa nkhondo ya Harmagedoni. Pyenepi pinadzabveka kufudzwa kwa makhaliro onsene a pinthu akuipa a Sathani, mbukutowererwa na nkhombo za Utongi wa Kristu wa Piaka Cikwi m’mphambvu ya Umambo.—Apokalipse 19:17-21; 20:6.
10. Kodi ndi nyimbo ipi yakusimba inafuna kudzaimba anzakazi a Yahova?
10 Pinadzakomeresa tani anzakazi a Yahova pa dziko yapantsi angadzaphatana na akudzulu m’kuimba mwakutsanzaya: “Mbuya, Mulungu wa mphambvu zonsene, pinthu pyonsene pinachita imwe mphikulu na mphyakudzumisa. Ndimwe mambo wa mitundu ya anthu onsene. Njira zanu ndi njira zaulungami na za udidi. Mbuya, ndi ani anakhonda kukugopani? Ndi animbo, anakhonda kubvekesa mbiri yanu? Thangwi imwe mwekha ndimwe wakuchena. Anthu a mitundu yonsene anadzabwera dzakulambirani pa maso panu, thangwi kutonga kwanu kwaoneka pa kwecha.” (Apokalipse 15:3, 4) Inde, anzakazi onsene a Yahova anadzaphatana m’kulambira Mulungu mbodzi basi wandimomwene. Ngakhale anyakufa anadzalamuswa muli akufa mbapaswa mwai wa kugumanyikana m’kusimba Yahova mwakugaluza.—Machitiro 24:15.
Ufulu Wakudzumatirisa Wa Ntsogolo
11. Kodi ndi ufulu upi wakudzumatirisa unafuna kudzatsanzaya na akupulumuka pa nyatwa zikulu?
11 Harmagedoni, nkhomo ya nyatwa zikulu, ingamala pswaira uipi pa dziko yapantsi, Sathani Dyabo, “mulungu wakuipa wa pantsi pano,” hanadzakhalapobve tayu. Alambiri a Yahova nee anadzathimbana pontho na pidzoloero pyakuipa pya Sathani tayu. (2 Akorinto 4:4; Apokalipse 20:1, 2) Uphemberi waunthawatawa nee unadzapambizira pontho Yahova na kuphata basa ninga cidzoloero cakugawa mbumba ya anthu. Cipo anzakazi a Mulungu wandimomwene anadzanenseka na kusowa kulungama peno kuoneswa nyatwa na mautongi aanthu. Ndi ufulu wakudzumatirisa tani unafuna kutsanzaya na anthu!
12. Kodi anthu onsene anadzasudzulwa tani ku madawo na pyakubwereswa pyawo?
12 Ninga “Bira ya Mulungu inafudza madawiro a dziko ya pantsi pano,” Yezu anadzaphatisira ntengo wa ntsembe yace towera kumalisa madawo a anthu. (Jwau 1:29) Mukhakhala Yezu pa dziko yapantsi mbalekerera anthu madawo, iye aawangisa ninga cipangizo ca kulekererwa kweneku. (Mateo 9:1-7; 15:30, 31) M’njira ibodzibodzi, Kristu Yezu, ninga Mambo wa kudzulu wa Umambo wa Mulungu, anadzawangisa mwacirengo maboliboli, mabewewe, madrodro, anyakulamala, anyamisala na onsene ali na utenda unango. (Apokalipse 21:3, 4) “Mwambo wa madawo” unadzamaliswa mwa anyakubvera onsene towera manyerezero na mabasa awo akhale akukomeresa kwa iwo ene na kwa Mulungu. (Aroma 7:21-23) Kunkhomo kwa Piaka Cikwi, iwo anadzakhala anthu aungwiro, ‘akulandana’ na Mulungu mbodzi basi wandimomwene.—Genesi 1:26.
13. Kunkhomo kwa Utongi wa Piaka Cikwi, kodi Kristu anadzacitanji, na pyenepi pinadzabweresanji?
13 Kristu angadzabweresa anthu ku ungwiro, iye anadzabwezera kwa Babace utongi ukhadapaswa iye towera kucita basa ineyi: “Kristu anadzabwezera dziko [peno umambo] m’manja mwa Mulungu babache, male angamala kufudza upfumi wonsene, mphambvu zonsene na mbiri zonsene. Iye apangwa kutonga mpaka kuti anyamalwa ache onsene akhale pa manyalo ache.” (1 Akorinto 15:24, 25) Utongi wa Piaka Cikwi wa Umambo unadzakwanirisa mwakukwana cifuniro cawo; natenepa nee kunadzafunikabve utongi wakuphedza pakati pa Yahova na anthu tayu. Nakuti kudawa na kufa pinadzamalisirwatu na anthu mbadzakhala akuombolwa, kufunika kwa Yezu ninga Muomboli kunadzamala. Biblya isafokotoza: “Mwana [anadzalambirambo] ule adakhalisa pyonsene pa [manyalo] ache, towera Mulungu ekha akhale mwa pyonsene pa mbuto zonsene.”—1 Akorinto 15:28.
14. Kodi anthu onsene aungwiro anadzapitiswa kupi, na thangwi yanji?
14 Pakumalisira, anthu aungwiro anadzapaswa mwai towera kupangiza kuti iwo asankhula kutumikira Mulungu mbodzi basi wandimomwene kwenda na kwenda. Mbwenye mbasati kuacita mwakukwana ninga anace, Yahova anadzapitisa anthu onsene aungwiro ku mayesero akumalisa. Sathani pabodzi na mademonyo ace anadzasudzulwa m’dzenje. Pyenepi nee pinabweresa kufudzwa kwa ale anafunadi Yahova tayu. Mbwenye onsene anafuna khonda khala akukhulupirika mbakhonda bvera Yahova anadzafudzwa kwenda na kwenda, pabodzi na nyakupanduka wakutoma na mademonyo ace.—Apokalipse 20:7-10.
15. Kodi ndi nkhaliro upi unafuna kudzaoneka pontho pakati pa pyakucitwa pyonsene pyanzeru pya Yahova?
15 Buluka penepo Yahova anacita ninga anace anthu onsene aungwiro adaphedza utongi ukulu wa Mulungu nkati mwa mayesero akumalisa. Kutomera nzidzi unoyu, iwo anadzakomerwadi na ufulu wa mbiri wa ana a Mulungu ninga banja ibodzi ya Mulungu ya kudzulu na pantsi. Pyakucitwa pyonsene pyanzeru pya kudzulu na pya dziko yapantsi pinadzagumanywa pontho m’kumulambira ninga Mulungu mbodzi basi wandimomwene. Cinadzakwanirisika mwambiri tani cifuniro ca Yahova! Kodi musafuna kucita khundu ya banja ineyi yakutsanzaya ya kudzulu na pantsi inafuna kudzakhala kwenda na kwenda? Khala ndi tenepa, tisakuwangisani kukoya m’ntima pinalonga Biblya pa 1 Juwau 2:17 (MZ): “Pantsi pano na pyonsene pinasirira anthu a penepo, pinamala. Mbwenye anachita pinafuna Mulungu, hanamala tayu.”
Kubwerezera Pidapfunzwa
• Kodi ndi uxamwali upi ukhali na Yahova na alambiri ace onsene, upanduki mbusati kuoneka m’Edeni?
• Kodi ndi kupitawirira kwanji kuli na anzakazi a Mulungu?
• Kodi mbani anafuna kudzakhala ana a Mulungu, na pyenepi pisabverana tani na cifuniro ca Yahova na ulambiri wakuphatana?
[Foto pa tsamba 190]
Anthu akubvera anadzatsanzaya na umaso m’paradizu ya dziko yonsene yapantsi