Iye “Apfundza Kukhala Wakubvera”

1, 2. Thangwi yanji baba waufuni asatsandzaya angaona mwanace mbakambvera, pontho pyenepi pisapangiza tani mabvero a Yahova?

BABA ayang’ana pa janela mbaona mwanace wang’ono mbakamenya bhola na axamwali ace. Mbwenye bhola yagwera mu nseu. Mwana aiyang’ana kakamwe bhola. Na thangwi ineyi m’bodzi mwa axamwali ace ampanga toera aende kaikwata, mbwenye mwana unoyu alonga: “Baba nee asanditawirisa.” Babace asatsandzaya kakamwe na ntawiro wa mwanace.

² Thangwi yanji baba atsandzaya kakamwe? Thangwi iye apanga mwanace akhonde kuenda mu nseu ekhene. Mwana abvera maseze nee akhadziwa kuti babace akhamuyang’ana. Natenepa baba adzindikira kuti mwanace abvesesa kuti ndi pyakufunika kakamwe kumbvera, pontho babace adziwa kuti mwanace akhali wakutsidzikizika. Ndi mabvero anewa ali na Babathu wakudzulu Yahova. Mulungu asadziwa kuti khala tisafuna kupitiriza kukhala akukhulupirika mbatitambira nkhombo za ntsogolo, tisafunika kun’nyindira na kumbvera. (Misangani 3:5, 6) Toera kutiphedza kucita pyenepi, iye atumiza mpfundzisi wadidi kakamwe.

3, 4. Mafala akuti Yezu “apfundza kukhala wakubvera” na akhala ‘wakuthema kakamwe’ asabvekanji? Perekani citsandzo.

³ Bhibhlya isalonga cinthu cakudzumatirisa thangwi ya Yezu: “Maseze iye akhali mwana wa Mulungu, apfundza kukhala wakubvera kubulukira mu nyatwa zidaona iye. Pontho, pidamala iye kuoniwa kuti athema kakamwe, adzapaswa basa yakupereka cipulumuso cakwenda na kwenda kuna onsene anambvera.” (Ahebheri 5:8, 9) Mwana unoyu akhadakhala kale pyaka pizinji kakamwe kudzulu. Iye aona Sathani na aanju anango akukhonda bvera mbasandukira Mulungu, mbwenye Mwana unoyu cipo asiya kubvera Yahova. Mafala a profesiya iyi akwanirisika kuna iye: “Ine ndikhambvera.” (Izaiya 50:5) Mphapo, khala ndzidzi onsene Yezu akhabvera Babace, iye ‘apfundza tani kukhala wakubvera’? Khala Yezu akhali kale waungwiro, ndi munjira ipi adzaoniwa kukhala ‘wakuthema kakamwe’?

⁴ Toera tibvesese mwadidi pyenepi nyerezerani citsandzo ici ca nyakulima. Iye agula phaza yadidi kakamwe. Mphapo iye anadziwa tani kuti phaza ineyi ndi yadidi? Maseze isaoneka kuti ndi phaza yadidi, mbwenye toera kudziwa khala phaza ineyi isalima mwadidi peno nkhabe iye asafunika kuiphatisira kazinji kene. Munjira ibodzi ene, Yezu mbadzati kubwera pa dziko yapantsi iye akhabvera Yahova. Mbwenye pidabwera iye pa dziko akhala na mwai wakupangiza kuti iye ndi wakubvera kakamwe. Iye atamba nyatwa zakuti cipo mbadazitamba mbadakhonda kubwera pa dziko yapantsi, ngakhale tenepo, Yezu apitiriza kukhala wakubvera.

5. Thangwi yanji pikhali pyakufunika toera Yezu abvere Babace, pontho tinapfundzanji mu nsolo uno?

⁵ Kubvera kukhali kwakufunika kakamwe kuna Yezu pa dziko yapantsi. Yezu asacemerwa “Adhamu wakumalisa,” thangwi iye abwera pa dziko yapantsi toera kucita pidacimwana Adhamu wakutoma, kwakuti ndi kupitiriza kubvera Yahova Mulungu, ngakhale pakuyeserwa. (1 Akorinto 15:45) Mbwenye Yezu nee abvera Yahova ninga ntemo basi. Yezu abvera na ntima onsene na umaso wace onsene. Iye acita pyenepi mwakutsandzaya. Kuna iye kucita cifuno ca Babace pikhali pyakufunika kakamwe kupiringana kudya! (Juwau 4:34) Ninji pinafuna kutiphedza toera kukhala akubvera ninga Yezu? Tendeni tione mathangwi adacitisa Yezu kubvera Yahova. Tingabvera Yahova na mathangwi mabodzi ene, pinatiphedza toera kupirira mayesero mbaticita cifuno ca Mulungu. Tinadzadinga nkhombo zingasi zinafuna kutipasa Yahova tingambvera ninga pidacita Kristu.

Thangwi Yanji Yezu Akhali Wakubvera

6, 7. Ndi mathangwi api adacitisa Yezu kubvera Yahova?

⁶ Yezu abvera Yahova thangwi akhali na makhaliro adidi. Ninga pidapfundza ife mu Nsolo 3, Yezu akhali wakucepeseka ndzidzi onsene. Kudzikuza kusacitisa munthu kukhonda kubvera, mbwenye munthu wakucepeseka asabvera Yahova na ntima onsene. (Eksodho 5:1, 2; 1 Pedhru 5:5, 6) Kusiyapo pyenepi, pinthu pikhafuna Yezu na pikhaida iye pyamphedza toera kubvera Yahova.

⁷ Mu pinthu pyonsene, Yezu akhafuna Babace wakudzulu Yahova. Tinadzapfundza pizinji thangwi ya ufuni unoyu mu Nsolo 13. Nakuti Yezu akhafuna kakamwe Yahova, iye akhalemedza kakamwe Babace, pontho nee akhafuna kuntsukwalisa. Cilemedzo cikulu cikhapangiza Yezu kuna Yahova, cakulumiza Yahova kutawira maphembero ace. (Ahebheri 5:7) Cincino Yezu ndi Mambo wa Umambo wa Mulungu, pontho asatonga mwacilemedzo mbabvera kakamwe Yahova.—Izaiya 11:3.

8, 9. Mwakubverana na profesiya, Yezu apangiza tani kuti akhafuna ulungami, mbaida pinthu pyakuipa, pontho ndi mabvero api akhali na iye thangwi ya pyenepi?

⁸ Kufuna Yahova ndi kuida pinaida Yahova. Mwacitsandzo, onani profesiya iyi inalonga pya Mesiya wakuti ndi Mambo: “Imwe mwafuna ulungami, mbamuida pyakuipa. Na thangwi ineyi, Mulungu akudzodzani na mafuta, mbakucitisani kukhala wakutsandzaya kakamwe kupiringana andzanu.” (Masalmo 45:7) ‘Andzace’ Yezu ndi amambo anango a dzindza ya Mambo Dhavidhi. Yahova pidadzodza iye Yezu ninga Mambo, Yezu atsandzaya kakamwe kupiringana amambo anango. Thangwi yanji? Thangwi Yahova ampasa nkhombo zizinji kupiringana amambo anewa, pontho thangwi utongi wace unabweresa nkhombo zizinji kuna onsene. Iye apaswa nkhombo thangwi kufuna kwace ulungami kwankulumiza toera kubvera Mulungu mu pyonsene.

⁹ Ninji pidacita Yezu pinapangiza kuti akhaida pinthu pyakuipa? Mwacitsandzo, Yezu apibva tani pidabvera anyakupfundzace citsogolero cakuenda kamwaza mphangwa mbapaswa nkhombo na Yahova? Iye akomerwa kakamwe. (Luka 10:1, 17, 21) Ndi mabvero api adakhala na Yezu pidakhonda kumbvesera anthu a ku Yerusalemu, ngakhale ayesera kuaphedza kazinji kene? Iye alira thangwi anthu a mu nzinda akhapitiriza kukhonda kubvera Yahova. (Luka 19:41, 42) Anthu angacita pinthu pyakuipa, Yezu akhatsukwala kakamwe.

10. Tisafunika kukhala na mabvero api thangwi ya pinthu pyadidi na pyakuipa, pontho ninji pinafuna kutiphedza kucita pyenepi?

¹⁰ Kunyerezera mabvero akhali na Yezu thangwi ya pyadidi na pyakuipa kunatiphedza toera kuntowezera mbatibvera Yahova na mathangwi adidi. Maseze ndife akusowa ungwiro, tinakwanisa kufuna pinthu pyadidi mbatiida pinthu pyakuipa. Tisafunika kuphemba Yahova toera atiphedze kuti tikhale na maonero ali na iye na a Mwanace. (Masalmo 51:10) Mu ndzidzi ubodzi ene ife tisafunika kucalira pinthu pyakuti pinaticitisa kucimwana kukhala na maonero mabodzi ene na a Yahova na Mwanace thangwi ya pinthu pyadidi na pyakuipa. Toera kucita pyenepi, tisafunika kusankhula mwadidi ubalangazi wathu na axamwali athu. (Misangani 13:20; Afilipi 4:8) Tingabvera Yahova ninga Yezu, nee tinacita pyenepi mwakukakamizika. Ife tinacita pinthu pyadidi thangwi tisafuna kupicita, pontho tinacalira kucita pinthu pyakuipa, tayu thangwi yakugopa kuoniwa, mbwenye thangwi tisaida pinthu pyenepi.

“Iye Nee Acita Madawo”

11, 12. (a) Ninji pidacitikira Yezu pakutoma kwa utumiki wace? (b) Ndi cinthu cipi cakutoma cidaphatisira Sathani toera kuyesera Yezu, pontho iye aphatisira njira zipi?

¹¹ Pidatoma Yezu utumiki wace iye ayeserwa, pontho iye apangiza kuti akhaida madawo. Pidamala iye kubatizwa, iye amala ntsiku 40 nthando, masiku na masikati nee kudya. Kunkhomo kwa ntsiku zenezi, Sathani abwera toera kumuyesera. Onani kucenjera kudapangiza Sathani.—Mateu 4:1-11.

¹² Pakutoma Sathani alonga: “Khala iwe ndiwe mwana wa Mulungu, panga miyala iyi toera isanduke kudza mikate.” (Mateu 4:3) Bhibhlya isalonga kuti Yezu akhabva njala thangwi akhala ntsiku zizinji nee kudya. (Mateu 4:2) Natenepa, Sathani abandza mwai unoyu toera kuyesera Yezu, thangwi Sathani akhadziwa kuti Yezu akhabva njala. Sathani apwazambo Yezu na mafala awa: “Khala iwe ndiwe mwana wa Mulungu.” Sathani akhadziwa kuti Yezu akhali “mwana wautombo mu pinthu pyonsene pidacitwa.” (Akolose 1:15) Mbwenye Yezu nee atawirisa mafala a Sathani ancitise kusiya kubvera Yahova. Yezu akhadziwa kuti nee cikhali cifuniro ca Mulungu kuphatisira mphambvu zace toera kucita pinafuna iye. Iye akhonda kucita pyenepi, mbanyindira kuti Yahova mbadampasa cakudya na kuntsogolera.—Mateu 4:4.

13-15. (a) Ndi mayesero api aciwiri na acitatu adaphatisira Sathani toera kuyesera Yezu, pontho Yezu atawira tani? (b) Tisadziwa tani kuti ndzidzi onsene Yezu akhali wakukhunganyika toera kukhonda mayesero a Sathani?

¹³ Pa mayesero aciwiri, Sathani aendesa Yezu padzulu kakamwe pa templo. Sathani aphatisira mwakuipa Mafala a Mulungu, mbayesera Yezu toera apasike mbiri. Iye ampanga kuti anumphe buluka padzulu toera aanju ampulumuse. Mbidakhala mwinji wa anthu ukhali mu templo waona cirengo ceneci, kodi iwo mbadapenula kuti Yezu akhali Mesiya wakupikirwa? Anthu mbadakhulupira kuti iye ndi Mesiya basi ene thangwi ya cirengo ceneci, kodi pyenepi nee mbapidacitisa Yezu kukhonda kutamba nyatwa zizinji? Panango, mbwenye Yezu akhadziwa kuti Yahova akhafuna kuti Mesiya acite mabasa ace mwakucepeseka, tayu kucitisa anthu kun’khulupira basi ene na pirengo pyakudzumisa pikhacita iye. (Izaiya 42:1, 2) Paulendo unoyu, Yezu apangiza pontho kuti akhabvera Yahova. Iye nee akhafuna kukhala wakubvekera.

¹⁴ Kodi iye mbadatawira mayesero angapaswa pidzo pikulu? M’mayesero acitatu, Sathani mbadapasa Yezu maumambo onsene a pa dziko yapantsi khala Yezu agodamira Sathani kabodzi basi mbamulambira. Kodi Yezu anyerezera pya cidzo ceneci? Nkhabe, iye atawira: “Coka Sathani!” Iye athimiza: “Thangwi pyalembwa kuti: ‘Ndi Yahova Mulungu wako anafunika iwe kulambira, pontho ndiye basi anafunika iwe kutumikira.’” (Mateu 4:10) Nkhabepo cinthu cikhafuna kucitisa Yezu kulambira mulungu unango. Yezu cipo mbadakhonda kubvera Yahova basi ene toera akhale na cidzo mu dziko ino.

¹⁵ Kodi Sathani asiya kuyesera Yezu? Ndimomwene kuti iye asiya Yezu mu ndzidzi udampanga iye toera abuluke. Mbwenye Evanjelyu ya Luka isapangiza kuti Dyabo “abuluka pana Yezu mbadikhira ndzidzi unango wakuthema.” (Luka 4:13) Sathani mbadagumana mwai unango toera kuyesera Yezu mpaka kunkhomo. Bhibhlya isalonga kuti Yezu “ayeserwa m’makhundu onsene.” (Ahebheri 4:15) Natenepa Yezu cipo abwerera nduli, ife tisafunikambo kucita pibodzi pyene.

16. Sathani asayesera tani atumiki a Mulungu lero, pontho tisafunika kucitanji toera tikhonde mayesero ace?

¹⁶ Sathani asapitiriza kuyesera atumiki a Yahova lero. Nakuti ndife akusowa ungwiro, ndi pyakukhonda nentsa toera iye atiyesere. Sathani asadziwa kuti ife tiri na cipendamiro cakufuna kakamwe pinthu, kudzikuza na kufuna mbiri. Ndi thangwi yace iye kazinji kene asaphatisira mpfuma toera kutiyesera. Natenepa ndi pyakufunika kakamwe ndzidzi onsene kudingika toera tione kuti tiri tani. Tisafunika kunyerezera mafala anagumanika pa 1 Juwau 2:15-17. Mu ndzidzi unanyerezera ife mavesi anewa, tisafunika kudingika khala ufuni wathu kuna Yahova ukuthowa thangwi tiri na pifuno pyakumanungo peno thangwi tisafuna kutundusa anango. Tisafunika kukumbuka kuti dziko ino na ntongi wace Sathani pinafudzwa mwakukhonda dembuka. Natenepa tisafunika kukhonda mayesero ace! Tisafunika kutowezera Mpfundzisi wathu thangwi “iye nee acita madawo.”—1 Pedhru 2:22.

“Ndzidzi Onsene Ndisacita Pinthu Pinakomerwa na Iye”

17. Yezu akhapibva tani thangwi yakubvera Babace, pontho ndi citsandzo cipi cidatisiyira iye?

¹⁷ Ndzidzi onsene Yezu akhabvera Yahova. Iye alonga: “Ndzidzi onsene ndisacita pinthu pinakomerwa na iye.” (Juwau 8:29) Kubvera kweneku kwacitisa Yezu kutsandzaya kakamwe. Anango panango ananyerezera kuti ndi pyakunentsa kuna Yezu toera kubvera kupiringana ife. Panango iwo asanyerezera kuti Yezu akhafunika kubvera basi ene Yahova wakuti ndi waungwiro, mbwenye ife kazinji kene tisafunika kubvera anthu akusowa ungwiro akuti ali na cidzo. Mwandimomwene, Yezu akhabverambo anthu akusowa ungwiro akuti akhali na cidzo.

18. Yezu apangiza citsandzo cipi kuna aphale?

¹⁸ Yezu akuzwa na anyakubala akuti akhali akusowa ungwiro, pontho iye akhafunika kuabvera. Mwakusiyana na ana onsene, Yezu akhakwanisa kuona madodo a anyakubalace. Kodi iye asiya kuabvera, mbaapasa uphungu wakuti anatsalakana tani banja? Onani pinalonga Luka 2:51 thangwi ya Yezu pikhali iye na pyaka 12 pyakubalwa: ‘Iye apitiriza kuabvera.’ Yezu apangiza citsandzo cadidi kakamwe kuna aphale Acikristu anawangisira toera kubvera anyakubala awo na kupangiza cilemedzo kuna iwo.—Aefesi 6:1, 2.

19, 20. (a) Ndi pinentso pipi pidathimbana na Yezu thangwi yakubvera anthu akusowa ungwiro? (b) Thangwi yanji Akristu andimomwene lero asafunika kubvera ale anatsogolera pakati pawo?

¹⁹ Tingalonga pya kubvera anthu akusowa ungwiro, Yezu atamba nyatwa zizinji kakamwe zakuti Akristu andimomwene cipo anazitamba lero. Nyerezerani ndzidzi wakunentsa udakhala iye pa dziko yapantsi. Makhaliro auphemberi Aciyuda, templo mu Yerusalemu na masasanyiro a unyantsembe ndi Yahova akhadatawirisa, mbwenye masasanyiro anewa adzapitirwa mbuto na mpingo Wacikristu. (Mateu 23:33-38) Atsogoleri azinji a mauphemberi akhapfundzisa uthambi udatomeswa na filozofiya Yacigerego. Mu templo anthu akhadyekera kakamwe, pyenepi pyacitisa Yezu kuicemera “dzimba ya mambava.” (Marko 11:17) Kodi Yezu akhagopa kuenda mu templo na m’masinagoga? Nkhabe! Yahova akhapitiriza kuphatisira masasanyiro anewa. Mulungu mbadzati kucinja masasanyiro anewa, Yezu abvera mbapitiriza kuenda ku sinagoga na m’maphwando mu templo.—Luka 4:16; Juwau 5:1.

²⁰ Khala Yezu akhabvera mu ndzidzi wakuti ulambiri wakucena ukhadapswipiswa, ife tinakwanisambo kukhala akubvera thangwi tiri kukhala mu ndzidzi wakuti ulambiri wakucena waceneswa. Mulungu apikira kuti cipo anatawirisa Sathani toera kupswipisa mbumba yace idaceneswa. (Izaiya 2:1, 2; 54:17) Ndimomwene kuti Akristu onsene ndi akusowa ungwiro na anyakudawa. Mbwenye madawo a anango nee asafunika kuticitisa kusiya kubvera Yahova, ninga kukhonda kuenda ku misonkhano peno kusumula akulu a mpingo. Mbuto mwace ife tisaphedzera ale anatsogolera mu mpingo. Mwakubvera, ife tisagumanika pa misonkhano Yacikristu na m’misonkhano ya cisa mbatiphatisira uphungu unatambira ife wa m’Bhibhlya.—Ahebheri 10:24, 25; 13:17.

21. Yezu acitanji pidayeserwa iye toera akhonde kubvera Mulungu, pontho tinatowezera tani citsandzo cace?

²¹ Yezu cipo atawirisa anthu, ngakhale axamwali ace toera ancitise kusiya kubvera Yahova. Mwacitsandzo, mpostolo Pedhru ayesera Yezu kuti abvereke ntsisi toera akhonde kuthabuka na kufa. Maseze Pedhru alonga mafala anewa thangwi ya ntsisi, mbwenye uphungu wace nee ukhabverana na cifuniro ca Yahova. Natenepa Yezu akhonda mwacipapo. (Mateu 16:21-23) Lero acibale athu anakwanisa kuyesera kutikhondesa kubvera mitemo na midida ya Mulungu. Mbwenye ninga Akristu a mu ntsiku za apostolo, ife “tisafunika kubvera Mulungu ninga ntongi, tayu anthu.”—Mabasa 5:29.

Yahova Anadzapasa Nkhombo Ale Anabvera Ninga Kristu

22. Yezu apereka ntawiro wa mbvundzo upi, pontho acita tani pyenepi?

²² Pa ntsiku idafa Yezu, kubvera kwace kwayeserwa. Pa ntsiku ineyi, iye “apfundza kukhala wakubvera” m’makhundu onsene. Mbuto mwakucita cifuno cace, iye acita cifuno ca Babace. (Luka 22:42) Yezu apangiza citsandzo cadidi kakamwe cakukhala wakupirira. (1 Timoti 3:16) Kukhulupirika kwace kwadzakhala ntawiro ku mbvundzo uyu: Kodi munthu wakusowa ungwiro anapitiriza kubvera Yahova maseze athimbane na mayesero? Adhamu na Eva asiya kubvera Mulungu. Buluka penepo Yezu abwera, akhala pa dziko yapantsi, afa, pontho apangiza kuti Sathani ndi nyauthambi. Yezu wakuti ndi anju wakufunika kakamwe adacitwa na Yahova abvera maseze atamba nyatwa mpaka kuphiwa.

23-25. (a) Kubvera kwalandana tani na kukhulupirika? Perekani citsandzo. (b) Tinapfundzanji mu nsolo unatowera?

²³ Kukhala wakukhulupirika kuna Yahova ndi cipangizo cakuti tisambvera. Nakuti Yezu abvera Yahova, iye apangiza kukhala wakukhulupirika, pontho aphedza anthu onsene. (Aroma 5:19) Yahova apasa nkhombo Yezu thangwi ya pyenepi. Tingabvera Mbuyathu Kristu, Yahova anatipasambo nkhombo. Onsene anabvera Kristu anadzagumana “cipulumuso cakwenda na kwenda”!—Ahebheri 5:9.

²⁴ Kukhala wakukhulupirika ndi nkhombo munjira inango. Misangani 10:9 isalonga: “Ule anafamba mwakukhulupirika anafamba mwakutsidzikizika.” Kukhulupirika kungalandaniswa na nyumba ikulu yakucitwa na mabhuloko mang’ono, kubvera kwathu kunalandaniswa na bhuloko ibodzi na ibodzi. Bhuloko ibodzi panango inaoneka kukhala yakusowa basa, mbwenye ndi yakufunika. Mabhuloko mazinji angapakwa mwadidi, pasamangwa nyumba yadidi na yakuwanga. Tingabvera Yahova ntsiku zonsene, tisapangiza kuti ndife akukhulupirika kuna iye.

²⁵ Munthu anabvera Yahova mu pyaka pizinji, asakhalambo wakupirira. Mu nsolo unatowera tinapfundza thangwi ya pyenepi.