Kufunika Kwa Kupirira—Mphangwa izi zabuluswa mu Anuário das Testemunhas de Jeová de 2013
Tsamba 45 ndima 1, mpaka tsamba 46 ndima 1—Afrika
Tinakwanisa Kulonga Na Iye?’
Muyang’aniri wa cisa ku Etiopya akhamwaza mphangwa na m’bale unango. Panyumba inango, iwo agumana ntsikana wakuti akhali nyabasa, amphemba toera kulonga na nsolo wa banja. Pidatawira iye kuti nee mbapidakwanisika, abale ambvundza khala mbadakwanisa kunsiyira mabukhu mangasi. Ntsikana aenda kalonga na patrau wace, pidabwerera iye, alonga kuti pakutoma, patrau akhafuna aone mabukhu anewa.
Natenepa, abale ampasa revista toera apangize patrau. Mudapita mphindi zingasi, ntsikana abwerera mbalonga kuti patrau atawira revista. M’bodzi wa abale ambvundza: “Khala iye nkhabe kwanisa buluka kunja, tinakwanisa kupita toera kulonga na iye?” Nyabasa aenda pontho kalonga na patrau. Paulendo unoyu iye adembuka kakamwe, natenepa, abale akhanyerezera kuti nee mbadarerabve. Pakumalisa iye abwerera mbaphemba kuti abale apite. Penepo, abale adzindikira kuti mwanaciro nyumba, Yirgu, akhadakalamba, pontho akhali pa mpfumba mu pyaka khumi, nee akhakwanisa kulamuka pa mpfumba peno kukhala pantsi. Nyabasa akhadadembuka thangwi akhakhunganya kwartu na kuphedza patrau toera kubvala.
Abale alonga na iye pya mphangwa zadidi. Yirgu, akomerwa na mphangwa zidabva iye, mbatawira pfundziro ya Bhibhlya. Mukhapitiriza iye kuthambaruka mu pfundziro yace, iye acita mbwenye pang’ono. Natenepa, akhakwanisa kulamuka pa mpfumba mbafamba pa njinga ya anyakulamala. Buluka penepo, atoma kugumanika pa misonkhano, iye abatizwa cincino pa nsonkhano wa gawo.