Umaso Unadzakhala Tani Ntsogolo?

BHIBHLYA ISALONGANJI?

“Mulungu anadzapukuta misozi yonsene mʼmaso mwawo, pontho nkhabe kudzaonekabve kufa, nee kutsukwala, nee kulira, nee kubva kupha. Thangwi pyakale pyamala.”—Apokalipse 21:3, 4, Bhibhlya ya Dziko Ipswa.

THANGWI YANJI MPHYADIDI KUDZIWA PYENEPI?

Pikiro ineyi isatipasa cidikhiro cakuti:

Tinadzakhala na basa yadidi na yakutsandzayisa.—Izaiya 65:21-23.

Pa dziko yapantsi, anthu nkhabebve kudzaduwala nee kuthabuka. —Izaiya 25:8; 33:24.

Tinadzatsandzaya na umaso wakukhonda mala, pabodzi na banja yathu na axamwali athu.—Masalmo 37:11, 29.

TINAKWANISADI KUKHULUPIRA PINALONGA BHIBHLYA?

Inde, pana mathangwi mawiri:

• Mulungu ali na mphambvu toera kucita pidapikira iye. M’Bhibhlya, basi ene Yahova Mulungu ndiye anacemerwa “Wamphambvu Zonsene,” thangwi mphambvu zace nkhabe madire. (Apokalipse 15:3) Na thangwi ineyi, ife tisanyindira kuti Mulungu anacita pidapikira iye, mbacinja dziko yapantsi toera ikhale mbuto yadidi kakamwe. Mwakubverana na pinalonga Bhibhlya, “kuna Mulungu pinthu pyonsene pisakwanisika.”—Mateu 19:26.

• Mulungu asafuna kucita pinthu pidapikira iye. Mwandimomwene, Yahova asafuna kakamwe kulamusa anthu adafa.—Yobe 14:14, 15.

  Bhibhlya isalongambo kuti Yezu, wakuti ndi Mwana wa Mulungu, awangisa anyakuduwala. Thangwi yanji? Thangwi iye akhafuna kucita pyenepi. (Marko 1:40, 41) Yezu atowezera mwadidi makhaliro a Babace, thangwi iye akhafuna kakamwe kuphedza anthu akhathabuka na nyatwa.—Juwau 14:9.

  Natenepa, tinakwanisa kunyindira kuti Yahova pabodzi na Yezu asafuna kutiphedza toera tikhale akutsandzaya ntsogolo!—Masalmo 72:12-14; 145:16; 2 Pedhru 3:9.