Mbani Akutonga Dziko Yapantsi?

BHIBHLYA ISALONGANJI?

“Dziko yonsene iri mʼmanja mwa Nyakuipa.”—1 Juwau 5:19.

“Mwana wa Mulungu abwera toera kufudza mabasa a Dyabo.”—1 Juwau 3:8, Bhibhlya ya Dziko Ipswa.

THANGWI YANJI MPHYADIDI KUDZIWA PYENEPI?

Kudziwa pyenepi kunatiphedza toera . . .

Kubvesesa kuti thangwi yanji pa dziko yapantsi pali na nyatwa zizinji.—Apokalipse 12:12.

Kunyindira kuti pinthu pinadzakhala mwadidi pa dziko yapantsi.—1 Juwau 2:17.

TINAKWANISADI KUKHULUPIRA PINALONGA BHIBHLYA?

Inde, pana mathangwi matatu:

• Utongi wa Sathani unafudzwa thimize pano. Ndimomwene kuti lero Sathani akutonga dziko yapantsi, mbwenye Yahova anadzamalisa utongi wa Sathani. Mulungu apikira kuti ‘anafudza Dyabo,’ pontho anamalisa pinthu pyonsene pyakuipa pidabweresa Sathani.—Ahebheri 2:14, Bhibhlya ya Dziko Ipswa.

• Mulungu asankhula Yezu Kristu toera atonge dziko. Yezu asiyana maningi na ntongi wa dziko ino, wakuti ndi wakuipa na wausumankha. Mulungu asapikira kuti Yezu angadzatonga dziko yapantsi, “iye anadzabvera ntsisi anthu akucepeseka na akutcerenga. Iye anadzaapulumusa mʼmanja mwa ale anaaponderera na ale anaacita pyakuipa.”—Masalmo 72:13, 14.

• Mulungu nkhabe kulonga uthambi. Bhibhlya isalonga: “Nkhabe kwanisika kuti Mulungu alonge uthambi.” (Ahebheri 6:18) Yahova angapikira kuti anacita cinthu, iye asacita pidapikira iye! (Izaiya 55:10, 11) Na thangwi ineyi, tisanyindira kuti “ntongi wa dziko ino anathamangiswa.”—Juwau 12:31.