Tsamba ya Mathubo Akutonga

Abale na Alongo Akufunika:

Kufuna Mulungu na anthu kusatikulumiza toera ‘kuenda kacita anyakupfundza kuna anthu a madzindza onsene, mbabatizwa.’ (Mat. 28:19, 20; Marko 12:28-31) Ufuni wandimomwene ndi wakufunika kakamwe. Ufuni unoyu unakwanisa kuphedza “anthu onsene akuti mitima yawo [isafuna] kutawira undimomwene unapasa umaso wakukhonda mala.”—Mabasa 13:48.

Kale, ife tikhafunika kuwangisira toera tigravari munsolo njira yakumwaza mphangwa na yakugawira marevista. Mbwenye cincino tisafunika kuwangisira toera kuthimizira maluso athu akucedza na anthu. Ife tinapangiza kuti tisafuna anango tingalonga pinthu pyakuti asakomerwa napyo. Pyenepi pisabveka kuti tisafunika kucinja mwakucimbiza njira yathu yakumwaza mphangwa, pontho kuonesesa pinthu pinadzudzumika na munthu anacedza na ife, na pinakomerwa na iye. Bhruxura ino inatiphedza tani toera kucita pyenepi?

Bhruxura ino iri na misolo 12 inagomezera makhaliro akuti tisafunika kuakulisa toera kupangiza ufuni na kucita anyakupfundza. Nsolo ubodzi na ubodzi usalonga pya n’khaliro udapangiza Yezu peno m’bodzi mwa akristu a mu ndzidzi wa apostolo mu utumiki wawo. Cifuniro nee ndi toera kugravari munsolo njira yakumwaza mphangwa, mbwenye ndi toera kusaka njira zakupangiza ufuni wathu kuna anthu. Maseze n’khaliro ubodzi na ubodzi ndi wakufunika m’makhundu onsene a utumiki wathu, mbwenye ife tinadzaona kuti makhaliro anango ndi akufunika kakamwe pakutomesa makani, pakucita maulendo akubwereza peno pakucitisa mapfundziro a Bhibhlya.

Mu ndzidzi unapfundza imwe nsolo ubodzi na ubodzi, nyerezerani mwadidi kuti munapangiza tani n’khaliro unoyu pakucedza na anthu mucisa canu. Wangisirani toera kufuna kakamwe Yahova na anthu. Nkhabepo cinthu cinango cakuti cinakuphedzani kukwanirisa cifuno canu cakucita anyakupfundza, kusiyapo ufuni.

Tisapereka takhuta thangwi ya mwai ukulu uli na ife wakuphata basa pabodzi na imwe phewa na phewa. (Sof. 3:9) Tisadikhira kuti Yahova anakupasani nkhombo zizinji mu ndzidzi unapitiriza imwe kufuna anthu na kucita anyakupfundza.