Mukhadatumikira Kale Ninga Mpainiya wa Ndzidzi Onsene?

1. Kodi ndi mwai wanji udakhala na anthu azinji, mbwenye ndi ninji pidacitika kuna anango?

¹ Nkati mwa pyaka pizinji, anthu pikwi na pikwi atsanzaya na mwai ‘wakupfunzisa na wakupangiza’ mphangwa zadidi ninga atumiki a ndzidzi onsene. (Mac. 5:42) Mbwenye, anango mwa iwo alimira kutumikira ninga apainiya thangwi ya makhaliro akusiyana-siyana. Khala imwe mukhadatumikira kale ninga mpainiya wa ndzidzi onsene, mwadinga mwacidikhodikho makhaliro anu a cincino toera kuona khala munakwanisa kubwerera toera kutumikira pontho ninga mpainiya wa ndzidzi onsene?

2. Thangwi yanji ndi kwakufunika kuti ale adatumikira ninga apainiya nduli aone makhaliro awo acincino?

² Makhaliro Asacinja: Panango makhaliro adakucitisani kulimira kutumikira ninga mpainiya nee mukuthimbana nawo pontho. Mwacitsanzo, khala imwe mwasiya basa ya upainiya thangwi ya kucimwana kukwanisa midzidzi 90 ikhaphembwa pa nthanda, kodi munakwanisa kutoma papswa thangwi cincino midzidzi ikhaphembwa yabwezwa mpaka 70? Kodi pinthu pinaphembwa pa basa yanu peno pyakufunika pya pa banja yanu pyapunguka kubulukira pa ndzidzi udasiya imwe basa ya upainiya? Mulongo unango wakuti akhali na ungumi wanyatwa-nyatwa atonga kupita m’basa ya upainiya mbakhali na pyaka 89 pyakubalwa. Nakuti iye akhadapiringana caka nee kuenda ku nyumba ya ungumi, iye akhapibva kuti ungumi wace mbudantawirisa kupita pontho basa ya upainiya!

3. Kodi piwalo pya banja pinabverana tani toera kuphedza m’bodzi wa iwo kutumikira ninga mpainiya?

³ Panango imwe nee ndimwe mpainiya wakale, mbwenye unango m’banja yanu alimira kutumikira ninga mpainiya toera kutsalakana piwalo pya banja, ninga nyakubala wakugwesera. (1 Tim. 5:4, 8) Khala ndi tenepa, kodi imwe peno anango m’banja munakwanisa kucita pizinji toera kuphedza ule adalimira kutumikira ninga mpainiya? Thangwi yanji nkhabe kucedza pya nkhani ineyi pabodzi na anango pa banja? (Mis. 15:22) Piwalo pya banja pingabverana toera kuphedza m’bodzi wa iwo kutumikira ninga mpainiya, onsene anakwanisa kupibva kuti akucitambo khundu.

4. Kodi munacitanji khala imwe nkhabe kukwanisa kukhala pontho mpainiya mu ndzidzi uno?

⁴ Lekani kufewa khala makhaliro anu acincino nkhabe kukutawirisani kutumikira ninga mpainiya. Cifuno canu toera kucita pyenepi cisakomeresa Yahova. (2 Akor. 8:12) Phatisirani cincino luso yanu idakhala na imwe pa ndzidzi ukhatumikira imwe ninga mpainiya mu utumiki wanu. Phemberani thangwi ya cifuno canu, na khalani wakusaka mwai wakucinja makhaliro anu. (1 Jwau 5:14) Panango, mu kupita kwa ndzidzi, Yahova anadzafungula kwa imwe “nsuwo ukulu” toera kucita basa, natenepa munakwanisa pontho kukhala wakutsanzaya mu kutumikira ninga mpainiya wa ndzidzi onsene!—1 Akor. 16:9.