Hulda Akwanirisa Cifuno Cace

KHALA mwaenda kaona ntsuwa ing’ono ya Sangir Besar ku Indonezya pyaka pingasi nduli, panango mwaona alongo athu atatu n’khundu mwa bara. Alongo anewa asadziwika thangwi ya basa yawo yakuphedza anthu kubvesesa Bhibhlya. Mbwenye pa ndzidzi unoyu, iwo akhacita basa inango.

Pakutoma, iwo akhapita m’madzi mbakwata miyala mbaiikha n’khundu mwa bara. Inango mwa miyala ineyi ikhali mikulu ninga bhola. Buluka penepo, akazi anewa akakhala pantsi mbaswa miyala ineyi na martelo toera ikhale ming’ono ninga mazai a nkhuku. Angamala akhaikha miyala ineyi m’mabhaldhe mbaenda nayo kunyumba kwawo. Buluka penepo akhaikha miyala ineyi m’masakha makulu yakuti mbidaikhwa m’makaru mbiphatisirwa toera kusasanya nseu.

M’bodzi wa alongo anewa akhali Hulda. Iye mbadakwanisa kucita basa ineyi mu ndzidzi uzinji kupiringana anango. Kazinji kene, iye asaphatisira dinyero ineyi toera kutsalakana banja yace. Mbwenye ulendo uno iye asafuna kuphatisira dinyero ineyi toera kucita cinthu cinango. Iye akhafuna kugula thabhuleti toera akwanise kuphatisira JW Library^®. Hulda akhadziwa kuti thabhuleti mbidam’phedza toera kupangiza mavidhyu na pinthu pinango mu utumiki, pontho mbidam’phedza toera kubvesesa mwadidi Bhibhlya.

Hulda akhacita basa ineyi m’maora mawiri macibese onsene, pontho acita pyenepi mwezi ubodzi na hafu. Iye akhaswa miyala mizinji toera kudzadza karu ing’ono. Mukupita kwa ndzidzi, iye akwanisa dinyero toera kugula thabhuleti.

Hulda alonga: “Maseze ndikhakhala wakuneta kakamwe thangwi yakuswa miyala, mwakucimbiza ndaduwala kubva kupha konsene pidatoma ine kuphatisira thabhuleti yanga mu utumiki na kukhunganyika misonkhano Yacikristu mwakukhonda nentsa.” Iye alongambo kuti thabhuleti yamphedza mu ndzidzi wa utenda wa Koronaviru, thangwi mipingo ikhaona misonkhano na kumwaza mphangwa mukuphatisira vidhyukonferensya. Ife tiri akutsandzaya thangwi Hulda akwanirisa cifuno cace.