NSOLO WA PFUNDZIRO 19
NYIMBO 6 Kudzulu Kusadziwisa Mbiri ya Mulungu
Towezerani Aanju Akukhulupirika
“Simbani Yahova, imwe monsene aanju ace.”—MAS. 103:20.
PINAFUNA IFE KUPFUNDZA
Tinaona kuti tinapfundzanji na aanju akukhulupirika.
1-2. (a) Ife tasiyana tani na aanju? (b) Ndi munjira zipi talandana na aanju?
YAHOVA akucemerani mu undimomwene toera mukhale m’bodzi wa atumiki ace akuti asafunana kakamwe. Atumiki anewa asaphatanizambo mamiliyau mazinji a aanju akukhulupirika. (Dhan. 7:9, 10) Ife kazinji kene tisanyerezera kuti aanju ndi akusiyana kakamwe na ife. Mwacitsandzo, iwo acitwa kale kakamwe, anthu mbadzati kucitwa. (Yobe 38:4, 7) Iwo ndi amphambvu kakamwe, ndi akucena na akulungama kupiringana ife, thangwi ndife akusowa ungwiro.—Luka 9:26.
2 Maseze ndife akusiyana na aanju, ife talandana na iwo munjira zinango. Mwacitsandzo, ninga aanju, ife tisakwanisa kupangiza makhaliro adidi a Yahova, pontho tiri na ufulu wakucita pisankhulo. Kusiyapo pyenepi, ife tiri na madzina, makhaliro na mabasa akusiyana-siyana mu gulu ya Yahova. Pontho ife tisafuna kulambira Nciti wathu ninga pinacita aanju.—1 Ped. 1:12.
3. Tinapfundzanji na aanju akukhulupirika?
3 Nakuti ife talandana na aanju munjira zizinji, citsandzo cawo cinakwanisa kutiwangisa na kutipfundzisa. Mwandimomwene ife tinakwanisa kupfundza pinthu pyadidi kakamwe na aanju. Mu nsolo uno, tinapfundza kuti tinatowezera tani kucepeseka kwa aanju akukhulupirika, ufuni wawo kuna anthu na kupirira kwawo toera mpingo upitirize kukhala wakucena.
AANJU NDI AKUCEPESEKA
4. (a) Aanju asapangiza tani kuti ndi akucepeseka? (b) Thangwi yanji aanju ndi akucepeseka? (Masalmo 89:7)
4 Aanju akukhulupirika ndi akucepeseka. Maseze iwo ali na maluso, mphambvu na udziwisi, asapitiriza kubvera pitsogolero pya Yahova. (Mas. 103:20) Angacita mabasa awo, iwo nee asagaya peno kupangiza kuti ali na mphambvu zakucita pyenepi. Iwo asacita cifuno ca Mulungu mwakutsandzaya, maseze anthu akhonde kudziwa madzina awo.a (Gen. 32:24, 29; 2 Ama. 19:35) Iwo nee asatawira kupaswa mbiri yakuti yathema kupaswa Yahova. Thangwi yanji aanju ndi akucepeseka kakamwe? Thangwi iwo asafuna Yahova, pontho asamulemedza kakamwe.—Lerini Masalmo 89:7.
5. Anju m’bodzi apangiza tani kucepeseka mu ndzidzi udakhondesa iye mpostolo Juwau kumulambira? (Onanimbo foto.)
5 Onani pinthu pidacitika pinapangiza kuti aanju ndi akucepeseka. Mu caka 96 Pakumala Kubalwa kwa Kristu, anju m’bodzi aonesa mpostolo Juwau masomphenya akudzumisa. (Apok. 1:1) Kodi Juwau acitanji pidaona iye masomphenya anewa? Iye akhafuna kulambira anju unoyu. Mbwenye anju unoyu wakukhulupirika, mwakucimbiza alonga: “Cita mphole-mphole! Leka kucita pyenepi! Inembo ndine bitcu ninga iwe na abale ako . . . Lambira Mulungu!” (Apok. 19:10) Anju unoyu akhali wakucepeseka kakamwe! Anju unoyu nee akhafuna kuti mbiri iende kuna iye. Mwakucimbiza iye apanga Juwau kuti basi ene adathema kulambirwa ndi Yahova Mulungu. Pontho iye nee apangiza kuti akhali wakufunika kakamwe kupiringana Juwau. Maseze anju unoyu akhatumikira Yahova mu pyaka pizinji, pontho akhali wamphambvu kakamwe kupiringana Juwau, mwakucepeseka apanga Juwau kuti akhalimbo bitcu ninga iye. Pontho anju apanga Juwau kuti nee akhafunika kumulambira, mbwenye iye nee ampanga mwaukali. Iye alonga naye munjira yadidi. Anju unoyu panango abvesesa kuti Juwau an’godamira thangwi yakuona pinthu pyakudzumisa.
Anju apangiza kuti akhali wakucepeseka pikhacedza iye na Juwau (Onani ndima 5)
6. Tinatowezera tani kucepeseka kwa aanju?
6 Tinatowezera tani kucepeseka kwa aanju? Ninga aanju, ife tinakwanisa kucita pizinji m’basa ya Yahova mbatikhonda kugaya thangwi ya pinthu pinacita ife, peno kukhonda kupangiza kuti tiri na maluso kakamwe kupiringana anango. (1 Akor. 4:7) Kusiyapo pyenepi, nee tisafunika kuoneka ninga ndife akufunika kakamwe kupiringana anango basi ene thangwi tisatumikira Yahova mu ndzidzi uzinji, peno thangwi ya miyai iri na ife. Natenepa, tingakhala na miyai mizinji yakutumikira, tisafunika kupangiza kuti ndife akucepeseka. (Luka 9:48) Ninga aanju, ife tisafunika kutumikira anango. Ife nee tisafunika kupangiza kuna anango kuti ndife akufunika kakamwe kupiringana iwo.
7. Tinapangiza tani kuti ndife akucepeseka pakupereka uphungu?
7 Ife tinakwanisambo kupangiza kuti ndife akucepeseka mu ndzidzi unapereka ife uphungu kuna anango, ninga kuna abale na alongo athu peno kuna anathu. Midzidzi inango, panango tinapereka uphungu wakuwanga. Mbwenye ninga anju adapereka uphungu kuna Juwau munjira yadidi, ife tinakwanisambo kupereka uphungu wakuwanga kuna munthu, mbatikhonda kuntsukwalisa. Tingakhonda kuoneka ninga akufunika kakamwe kupiringana anango, pinatiphedza toera kupereka uphungu wa m’Bhibhlya mwacilemedzo na mwaufuni.—Akol. 4:6.
AANJU ASAFUNA ANTHU
8. (a) Mwakubverana na Luka 15:10, aanju asapangiza tani kuti asafuna anthu? (b) Aanju asatiphedza tani m’basa yakumwaza mphangwa? (Onanimbo foto iri pa tsamba yakutoma.)
8 Aanju nee asapwaza pinacitikira anthu peno kuaona kuti ndi akusowa basa. Iwo asafuna anthu. Iwo asatsandzaya nyakudawa angatcunyuka peno angaona munthu adasiya kutumikira Yahova mbabwerera kuna iye. Ifembo tisatsandzaya munthu angapfundza thangwi ya Yahova mbacita macinjo mu umaso wace toera kuntumikira. (Lerini Luka 15:10.) Aanju asatiphedzambo m’basa yathu yakumwaza mphangwa za Umambo. (Apok. 14:6) Maseze aanju nee asamwaza mphangwa kuna anthu, iwo asatsogolera amwazi mphangwa kuna anthu anafuna kupfundza thangwi ya Yahova. Undimomwene ndi wakuti ife nee tinakwanisa kulonga kuti aanju atiphedza toera kumwazira mphangwa munthu uyu. Yahova anakwanisambo kuphatisira njira zinango, ninga nzimu wace wakucena toera kuphedza anthu anafuna kudziwa thangwi ya iye, peno kutsogolera atumiki ace toera aamwazire mphangwa. (Mabasa 16:6, 7) Mbwenye iye asapitiriza kuphatisira aanju ace toera kutiphedza pakumwaza mphangwa. Natenepa, ife tingamwaza mphangwa zadidi, tinakhala na cinyindiro cakuti aanju ali na ife toera kutiphedza.—Onani bokosi ya nsolo wakuti “Maphembero Awo Atawirwa.”b
Banja yamala kumwaza mphangwa na karinya. Mu ndzidzi unabwerera iwo kunyumba, mulongo ali kuona nkazi m’bodzi wakuti asaoneka ninga ali wakutsukwala. Mulongo adzindikira kuti aanju anakwanisa kutitsogolera kuna ale anasaka ciphedzo. Natenepa, mulongo aenda kacedza na nkazi unoyu mwaufuni. (Onani ndima 8)
9. Tinatowezera tani aanju mbatipangiza ufuni kuna anthu?
9 Tinatowezera tani aanju mbatipangiza ufuni kuna anthu? Tingabva cidziwiso cakuti munthu abwezereswa mu mpingo, tisatsandzaya ninga pinacita aanju. Ife tisafunika kucita pinthu toera m’bale wathu adabwezereswa aone kuti tisanfuna, pontho tiri akutsandzaya thangwi ya iye. (Luka 15:4-7; 2 Akor. 2:6-8) Tinakwanisambo kutowezera aanju tingacita pyonsene pinakwanisa ife m’basa yakumwaza mphangwa. (Ekle. 11:6) Ninga aanju akuti asatiphedza tingamwaza mphangwa zadidi, ife tisafunikambo kusaka njira zakuphedza abale na alongo athu mu utumiki. Mwacitsandzo, tinakwanisa kucita masasanyiro toera kumwaza mphangwa na m’mwazi mphangwa mupswa. Tinakwanisambo kuphedza abale na alongo akukalamba peno akuti ali kuduwala toera amwaze mphangwa pabodzi na ife.
10. Tisapfundzanji na pidacitikira Sara?
10 Mphapo ndiye tani khala makhaliro athu nee asatitawirisa kucita pizinji m’basa ya Yahova? Tinakwanisa kukhala na cinyindiro cakuti aanju anapitiriza kutiphedza m’basa yakumwaza mphangwa. Onani pidacitikira Sara,c mulongo unango wa ku Indiya. Pakumala pyaka 20 mbakatumikira ninga mpainiya wa ndzidzi onsene, Sara aphatwa na utenda wakuti wancitisa kucimwana kulamuka pakama. Thangwi ya utenda unoyu, iye adzaphatwa na utenda wa depressão. Mbwenye mwapang’ono-pang’ono, Sara atoma pontho kukhala wakutsandzaya thangwi ya ciphedzo ca abale na alongo mu mpingo na kuleri Bhibhlya ntsiku zonsene. Kusiyapo pyenepi, iye agumana njira zinango zakumwaza mphangwa mwakubverana na makhaliro ace. Nakuti iye nee akhakwanisa kukhala pantsi toera kulemba matsamba, iye akhaphatisira telefoni toera kumwaza mphangwa. Iye aligariri anthu adamwazira iye mphangwa toera kucita maulendo akubwereza. Mbwenye anthu anewa akhadziwambo anthu anango akuti akhafuna kupfundza Bhibhlya. Ndi nkhombo zipi zidakhala na iye? Mu miyezi yakucepa, Sara adzakhala na mapfundziro a Bhibhlya akukwana 70, pontho iye nee akhakwanisa kupfundzisa Bhibhlya anthu anewa onsene. Natenepa, iye asaka anthu mu mpingo mbaapasa mapfundziro anango. Azinji mwa anyakupfundza anewa cincino asagumanika pa misonkhano yathu. Mwandimomwene, aanju asatsandzaya kakamwe angaphata basa pabodzi na abale na alongo ninga Sara wakuti acita pyonsene pidakwanisa iye m’basa yakumwaza mphangwa.
AANJU ASAPIRIRA
11. Aanju akukhulupirika apangiza tani kuti ndi akupirira?
11 Aanju akukhulupirika asapangiza citsandzo cadidi cakupirira. Iwo apirira kusowa ulungami na uipi mu pyaka pizinji. Iwo aona Sathani na aanju anango azinji akhatumikira pabodzi na iwo mbasandukira Yahova. (Gen. 3:1; 6:1, 2; Yuda 6) Bhibhlya isalonga pya anju m’bodzi wakuti athimbana na anju wakuipa mu ntsiku zizinji. (Dhan. 10:13) Kusiyapo pyenepi, kutomera mu ndzidzi wa Adhamu na Eva, aanju aona kuti anthu anasankhula kutumikira Yahova ndi akucepa kakamwe. Mwakukhonda tsalakana pyonsene, aanju anewa akukhulupirika asapitiriza kutumikira Yahova mwaphinga na mwakutsandzaya. Iwo asadziwa kuti pa ndzidzi wakuthema, Mulungu anadzamalisa kusowa ulungami konsene.
12. Ninji pinafuna kutiphedza toera tipirire?
12 Tinatowezera tani kupirira kwa aanju? Ninga aanju, panango tinaona pinthu pyakusowa ulungami peno kutcingwa. Mbwenye ninga iwo, ife tiri na cinyindiro cakuti pa ndzidzi wakuthema, Mulungu anadzamalisa uipi onsene. Natenepa, ninga aanju anewa akukhulupirika, ife ‘nee tinabwerera nduli pakucita pinthu pyadidi.’ (Agal. 6:9) Pontho Mulungu apikira kuti anatiphedza toera kupirira. (1 Akor. 10:13) Ife tinakwanisa kuphemba Yahova toera atipase nzimu wace wakuti unatiphedza toera kupirira na kukhala akutsandzaya. (Agal. 5:22; Akol. 1:11) Mphapo ndiye tani khala muli kutcingwa? Nyindirani kakamwe Yahova, pontho lekani kugopa. Yahova ndzidzi onsene anakuphedzani mbakupasani mphambvu.—Aheb. 13:6.
AANJU ASAPHEDZA TOERA MPINGO UPITIRIZE KUKHALA WAKUCENA
13. Ndi basa ipi yakupambulika idapaswa aanju mu ntsiku zino zakumalisa? (Mateu 13:47-49)
13 Mu ntsiku zino zakumalisa, Yahova apasa aanju basa yakupambulika kakamwe. (Lerini Mateu 13:47-49.) Anthu azinji kakamwe pa dziko yapantsi asafuna kubva mphangwa zadidi. Anango mwa anthu anewa asatawira kutumikira Yahova, mbwenye anango nkhabe. Aanju apaswa basa yakupambula “anthu akuipa pakati pa anthu akulungama.” Pyenepi pisabveka kuti iwo apaswa basa yakucenesa mpingo. Mbwenye nee pisabveka kuti ale adasiya kutumikira Yahova na mathangwi akusiyana-siyana nee anabwerera, pontho nee pisabveka kuti pa mpingo nee panaoneka mikandzo. Natenepa, tinakwanisa kukhala na cinyindiro cakuti aanju ali kuphata basa mwakuwanga toera kuphedza mipingo kuti ikhale yakucena.
14-15. Tinatowezera tani aanju mbatipangiza kuti tisafuna kuti mpingo upitirize kukhala wakucena? (Onanimbo mafoto.)
14 Tinaphedzera tani mpingo toera ukhale wakucena ninga pinacita aanju? Tisafunika kuwangisira toera uxamwali wathu na Yahova upitirize kukhala wakuwanga. Tinacita pyenepi, tingasankhula axamwali anafuna Yahova, mbaticalira kucita pinthu pyakuti pinafudza uxamwali wathu na iye. (Mas. 101:3) Ife tinakwanisambo kuphedza abale na alongo athu toera apitirize kukhala akukhulupirika kuna Yahova. Mwacitsandzo, tisafunika kucitanji tingadziwa kuti m’bale peno mulongo acita madawo? Nakuti ife tisafuna m’bale peno mulongo wathu, tinampanga toera adziwise akulu a mpingo. Iye angakhonda kucita pyenepi, ife tisafunika kupanga akulu a mpingo pinthu pidacita iye. Ife tisafuna kuti m’bale peno mulongo unoyu atambire ciphedzo mwakucimbiza!—Tiya. 5:14, 15.
15 Mwakutsukwalisa, anango anacita madawo makulu asafunika kubuluswa mu mpingo. Pyenepi pingacitika, ife tisafunika ‘kusiya kucita uxamwali’ na iwo.d (1 Akor. 5:9-13) Masasanyiro anewa asaphedza toera mpingo ukhale wakucena. Natenepa, tingasiya kucita uxamwali na anthu adabuluswa mu mpingo, ife tisapangiza kukoma ntima kuna iwo. Kucita pyenepi, kunaphedza anthu anewa toera aone kuti asafunika kubwerera kuna Yahova. Iwo angacita pyenepi, ife, Yahova na aanju tinatsandzaya kakamwe.—Luka 15:7.
Tisafunika kucitanji tingabva kuti m’bale peno mulongo acita madawo? (Onani ndima 14)e
16. Tinawangisira tani toera kutowezera aanju?
16 Ndi mwai ukulu kuna ife kutawiriswa na Yahova toera kupfundza thangwi ya aanju na kuphata basa pabodzi na iwo. Natenepa, tendeni titowezere makhaliro awo adidi: Kucepeseka kwawo, kufuna kwawo anthu, kupirira kwawo na cifuno cawo cakucenesa mpingo. Tingatowezera aanju akukhulupirika, tinacita khundu ya atumiki a Yahova kwenda na kwenda.
NYIMBO 123 Tisabvera Yahova na Gulu Yace
a Pana mamiliyau mazinji kakamwe a aanju, mbwenye basi ene awiri ndiwo analongwa madzina awo m’Bhibhlya: Migeli na Gabhriyeli.—Dhan. 12:1; Luka 1:19.
b Toera kugumana mphangwa zakuthimizirika, onani Índice das Publicações da Torre de Vigia pa nsolo wakuti “Anjos” na nsolo ung’ono “orientação angélica (exemplos).”
c Madzina anango acinjwa.
d Mwakubverana na pidafokotozwa mu Mphangwa za Mathubo Akutonga za 2024 N.° 2, munthu wakubuluswa mu mpingo angabwera pa misonkhano ya mpingo, mʼbale peno mulongo anakwanisa kuphatisira cikumbuntima cace toera kusankhula khala anamʼmwanyika mwacigwagwa na kuncita bweraniko peno nkhabe.
e MAFALA ANAFOKOTOZA MAFOTO: Mulongo ali kupanga xamwali wace toera aende kadziwisa akulu a mpingo madawo adacita iye. Mukupita kwa ndzidzi, pidadzindikira iye kuti xamwali wace nee acita pidampanga iye, mulongo adziwisa akulu a mpingo pidacita xamwali wace.