Khunganyani Ntima Wanu

Tingapfundza Bhibhlya, ife tisafuna kuti manyerezero a Yahova akhuye ntima wathu. Ife tinakwanisa kupfundza na citsandzo ca Esdhra wakuti “akhadakhunganya ntima wace toera kupfundza Mwambo wa Yahova.” (Esd. 7:​10) Tinakhunganya tani ntima wathu?

Citani phembero. Mbamudzati toma kupfundza, longani na Yahova m’phembero. Phembani Yahova akuphedzeni toera kubvesesa pinapfundza imwe na kupiphatisira.​​—​Mas. 119:​18, 34.

Khalani wakucepeseka. Mulungu asabisira undimomwene wa m’Bhibhlya kuna anthu akudzikuza na ale ananyerezera kuti nee asafunika kuphedzwa. (Luka 10:​21) Ife nee tisapfundza Bhibhlya na kufufudza toera kupangiza anthu kuti tisadziwa pinthu pizinji. Mungapfundza pinthu mbamuona kuti musafunika kucita macinjo mu umaso wanu, khalani wakucepeseka mbamucita macinjo anewa.

Bveserani ibodzi mwa nyimbo zathu. Nyimbo ziri na mphambvu yakukhuya mabvero athu na kutikhunganya toera kulambira Yahova. Kubvesera ibodzi mwa nyimbo zathu mbamudzati toma kupfundza kunakuphedzani toera kukhunganya ntima wanu toera kupfundza.