Nhwehwɛmuɛ Ma Abrabɔ Ne Asɛnga Adesũa Nwomaa
MARCH 3-9
NYAMEƐ DWIRƐ NANU ASUADEƐ
ANYANDERA 3
Fa Wɔnwo To Yehowa So
ijwbv asɛm 14 ¶4-5
Anyandera 3:5, 6—“Nnɛfa Wɔ Nwo To Wɔ Bɔbɔ Wɔ Nworɛ So”
“Fa wɔ wora [anaa w’ahone] amukoraa wura AWURADE nu.” Sɛ yɛyɛ bɔ Nyameɛ kuro a, yeɛ okyire kyɛ yafa yɛnwo yato ye so ɔ. Bɔ yɛyɛ biala, odikyɛ yɛfa yɛ wora amukoraa yewura Nyameɛ nu. Bible nu ne, sɛ bɛka ahone a, ɔtaa gyi berɛ ma kyɛbɔ ebie si te deinn. Nna bɔ sona nye nwu ye ne, yeɛ yɛka ɔ. Na mmom, bɔ sona ne dwene yenwo, bɔ opusu ye maa ɔyɛ nikyee bie, ɔne ye subaen. Yeti sɛ bɛka kyɛ yɛfa y’ahone amukoraa yewura Nyameɛ nu a, ɔtte kyɛbɔ yɛte nga ne angome. Na mmom, ɔte gyinayɛɛ bɔ yesi kyɛ yɛkɔfa yɛnwo yɛkɔto Yehowa so, ofikyɛ ye yeɛ ɔbɔle yɛ ɔ, yeti ɔse bɔ ɔte pá ma yɛ.—Romanfoɛ 12:1.
“Nnɛfa wɔ nwo to wɔ bɔbɔ wɔ nworɛ so.” Bɔne wɔ yɛnwo, yeti kyɛbɔ yɛdwene nningyein nwo ne, ongoye pá. Ɛhene ati yeɛ odikyɛ yɛfa yɛnwo yɛto Yehowa so ne. Ɔnzɛkyɛ yɛfa yɛnwo yɛto yɛnwo so, anaa yegyina kyɛbɔ yɛte nga so yesisi gyinayɛɛ. Wannyɛ sɔ a, yɛkɔyɛ nikyee bie bɔ ahyɛaseɛ ne de, y’adwene kɔyɛ yɛ kyɛ gya mvomsoɛ biala nne yenwo, nakoso annea a yɛkɔfa yɛsa yekogua yeti nziɛen. (Anyandera 14:12; Yeremia 17:9) Yehowa nworɛ bo yɛ deɛ so koraa. (Yesaya 55:8, 9) Sɛ yenya Yehowa adwene a, ɔkɔmaa y’abrabɔ kosi yɛ yé.—Edwein 1:1-3; Anyandera 2:6-9; 16:20.
ijwbv asɛm 14 ¶6-7
Anyandera 3:5, 6—“Nnɛfa Wɔ Nwo To Wɔ Bɔbɔ Wɔ Nworɛ So”
“Wɔ bra mukoraa, maa Nyameɛ bra nu.” Sɛ yesi gyinayɛɛ piri biala, anaa yɛyɛ nikyee bie wɔ y’abrabɔ nu a, odikyɛ yɛpena Yehowa adwene wɔ yenwo. Yɛkɔyɛ ye sɛ? Yɛkɔbɔ mbaeɛ yɛkɔpena ye akwangyerɛ, ná yafa bɔ ye dwirɛ Bible ne ka ne yayɛ adwuma.—Edwein 25:4; 2 Timoteo 3:16, 17.
“Okohyire wɔ atee maa ɛkɔfa so.” Bɔ Yehowa yɛ fa kyire yɛ atee yeɛ ole kyɛ, ɔboka yɛ maa yɛfa ye akwangyerɛ pá ne yɛyɛ adwuma. (Anyandera 11:5) Ɛhe ati, nikyee biala bɔ ɔkɔfa ɔhaw kɔbrɛ yɛ ne, yɛtwe yɛnwo yefi yenwo, na ɛhene maa yɛnye gye.—Edwein 19:7, 8; Yesaya 48:17, 18.
be 76 ¶4
Yere Wɔnwo Kɔ Wɔ Nyunu
Yɛfa ye kyɛ ɛhɔle tebea bie nu maa ɛhora lili yenwo dwumaa, yeɛ ebieku asa asi ɔ. Annea a ɛkɔha kyɛ: ‘Aa nna ɛhe de ebie ato me le, yeti mese bɔ odikyɛ meyɛ ɔ.’ Aso nyanza wɔ nu kyɛ ebie kɔha sɔ ɔ? Anyandera 3:7 ka kyɛ: “Nnɛbu wɔ nwo nworɛniɛ.” Yeti, sɛ nikyee bie bɔ ɔte sɔ si wɔ w’abrabɔ nu a, odikyɛ ɛhene mmom maa ɛto wɔ boase susu edwirɛ nanwo kɔ siɛ. Ebiaa yanya osuahu pee wɔ abrabɔ nu, nakoso odikyɛ yede yɛto nu kyɛ, sɛ Yehowa nne nu a, ɔngɔhora ngosi yɛ yé. Yɛyɛ sɔ a, yeɛ okyire kyɛ yɛkɔ yɛ nyunu wɔ Yehowa soen nu ɔ. Sɛ yɛfa akokoduro yegyina tebea bie noa a, ɛhene mbaen ngyire kyɛ yanya ngɔsoɛ. Na mmom, sɛ yɛkɔ tebea bie nu a, odikyɛ yɛpena akwangyerɛ yefi Yehowa berɛ ndɛ. Odikyɛ yedé yɛto nu kyɛ, sɛ Yehowa amma nikyee bie nwo atee a, ongosi. Afei koso, odikyɛ yenya Yehowa nu gyidie, na yɛne ye fa adamvoa bɔ nu yɛ se ɔ.
Bible Nu Dwirɛ Titire
w06 9/15 17 ¶7
Anyandera Nwomaa Nanu Dwirɛ Titire
Anyandera 3:3. Odikyɛ yɛmaa ɔdɔ bɔ onni hwamɔ, ɔne nahorɛlilɛ nwo hia yɛ paa. Odikyɛ yɛda ye ali maa ebiala nwu ye, tekyɛ bɔ yafa kyein bɔ ye nyɔboɛ yɛ se yato yɛ kɔme anu ne. Afei, odikyɛ yɛtwerɛ yegua y’ahone so, kyire kyɛ yɛmaa ɔboka yɛ subaen so.
MARCH 10-16
NYAMEƐ DWIRƐ NANU ASUADEƐ ANYANDERA 4
Bɔ W’ahone Nwo Waen
w19. 01 15 ¶4
Ɛkɔyɛ Sɛɛ Na Abɔ W’ahone Nwo Waen?
Bible ne ka “ahone” nwo dwirɛ a, ɔtɔ mmerɛ bie a okyire bɔ yɛdwene yenwo, kyɛbɔ yɛte nga wɔ nikyee nwo, ɔne bɔ yekuro. Kyɛbɔ yɛte deinn yeɛ ɔka yenwo dwirɛ ne, na nna kyɛbɔ mmenia nwu yɛ ne. (Anyandera 4:23, NWT)
w19. 01 17 ¶10-11
Ɛkɔyɛ Sɛɛ Na Abɔ W’ahone Nwo Waen?
Sɛ yɛkɔhora yɛkɔbɔ y’ahone nwo waen a, odikyɛ yenwu nningyein bɔ ɔkɔhora kopira yɛ, na yɛyɛ yenwo nikyee bie ndɛ. Edwirɛ bɔ behyirele yebo “dwene ye nwo yé” anaa bɔ yenwo waen wɔ Anyandera 4:23 ne, ɔmaa yɛkae adwuma bɔ wɔkyemaen yɛ ne. Solomon aberɛso ne, né wɔkyemaen nemɔ gyina kuro ne fasue naso. Yeti sɛ benwu kyɛ asane bie ba a, né babɔ mmenia nemɔ kɔkɔ. Sɛ yɛpɛ ɛhe anwo foto wɔ y’adwene nu a, ɔmaa yenwu bɔ odikyɛ yɛyɛ na Satan anzɛkye y’adwene ɔ.
Tete ne, né wɔkyemaenfoɛ, ɔne bɛbɔ bɛwɛne anoa ne bonu yɛ adwuma. (2 Sam. 18:24-26) Sɛ benwu kyɛ pɔfoɛ bie ba a, né bemu bɛnea maa bɛtoto anoa nanu bɛfa bɛbɔ kuro nanwo waen. (Neh. 7:1-3) Yɛ tiboa bɔ yafa Bible yatete ye ne, ɔkɔhora kɔyɛ adwuma tekyɛ wɔkyemaen. Sɛ Satan pena kyɛ ɔsɛkye y’ahone a, ɔkɔbɔ yɛ kɔkɔ. Bɔ ɛhe kyire yeɛ ole kyɛ, sɛ Satan pena kyɛ yɛdwene nikyee bɔ ɔttemaye nwo, yenya atenga bɔne, anaa opiapia yɛ maa yɛyɛ nikyee bie bɔ ɔttemaye a, ɔkɔbɔ yɛ kɔkɔ. Mmerɛ biala bɔ yɛ tiboa kɔbɔ yɛ kɔkɔ wɔ nikyee bie nwo ne, odikyɛ yetie na yɛtwe yɛnwo ndɛ.
w19. 01 18 ¶14
Ɛkɔyɛ Sɛɛ Na Abɔ W’ahone Nwo Waen?
Sɛ bɛka kyɛ yɛbɔ y’ahone nwo waen a, okyire kyɛ yɛngɔma atee maa nningyein bɔ ɔttemaye ngɔsɛkye y’ahone. Nakoso, sɛ yɛyɛ sɔ a nna yeyielle; odikyɛ yɛfa nningyein pá yewura y’ahone nanu. Kuro bɔ bato yenwo fasue nwo mvandoho ne, ma yɛnea ye bieku. Sɛ pɔfoɛ bie pena kyɛ ɔbɔ wura kuro nanu a, bɔ ɔwɛne anoa ne toto nu. Nakoso ɔtɔ mmerɛ bie a, ɔma atee ma mmenia fa aleɛ ne nningyein foforɛ ba kuro nanu. Sɛ ɔyɛ ye adwene kyɛ ɔngobukye anoa ne lle a, ɛhɔen kɔdosa kuro nanu mmenia maa bekowu. Yɛ koso, odikyɛ yebukye y’ahone nu maa Nyameɛ dwirɛ kyire yɛ atee daa biala.
w12 5/1 32 ¶2
Nzuati yeɛ odikyɛ yɛbɔ y’ahone nwo waen ɔ? Nyameɛ maa Solomon hworɔle kyɛ: ‘Nu yeɛ ngoa fi ba ɔ.’ (Anyandera 4:23) Sɛ y’abrabɔ kosi yɛ yé ɛnnɛ anaa kyeabie a, ogyi kyɛbɔ y’ahone anaa yɛ subaen te naso. Nzuati ɔ? Ofikyɛ Nyameɛ nwu bɔ ɔwɔ y’ahone nu ɔ. (1 Samuel 16:7) “Ahone nu nikyee bɔ anyeɛ nnwu ye,” anaa kyɛbɔ yɛte deinn ne, ɛhene yeɛ okyire kyɛbɔ Yehowa nwu yɛ ɔ.—1 Petro 3:4.
Bible Nu Dwirɛ Titire
w21. 08 8 ¶4
Ɛkɔnwondɛ Yehowa?
Anyandera 4:18 ka kyɛ, “teneneefoɛ de, b’atee te kyɛ ngyerɛmɔ yia bɔ wapukye ɔ, na ɔbɔ toonn kodwu eyia ketee.” Sɔ dwirɛ he maa yenwu kyɛ, bɔ Yehowa abɔ ye tianu kyɛ ɔkɔyɛ ne, ɔboka ye mmenia maa bɛte yebo ngakangaka. Osa koso maa yenwu kyɛbɔ Kristoniɛ bie kora yɛ nzakrayɛɛ, ná ngakangaka ɔne Yehowa afia yɛ kama ɔ. Ɛhe tte kyea ko dwirɛ, na mmom ode mmerɛ. Sɛ yɛyere yɛnwo yesua Bible, na yɛfa afutue bɔ Yehowa nate ye asafo naso fa ma yɛ ne yɛyɛ adwuma a, ngakangaka yekonya Yesu subaen ne bie, na yekonwu Yehowa yé.
MARCH 17-23
NYAMEƐ DWIRƐ NANU ASUADEƐ ANYANDERA 5
Twe Wɔnwo Fi Adwamamɔ Nwo Koraa
w00 7/15 29 ¶1
Ɛkɔhora Kɔmaa Wɔnwo Kɔte Wɔ Ewiase Bɔne He Anu
Anyandera 5:3 fa bɔnefoɛ toto “brasua sanzaniɛ,” anaa tuutuuniɛ nwo. Edwirɛ bɔ ɔfa lakalaka mmenia maa bɛne ye da ne, ɔyɛ fɛ tekyɛ woɛ bɔ ɔpepe, na ɔte menemene tra aloko. Nna sɔ ala yeɛ bɛlakalaka mmenia maa bɛbɔ adwaman anaa? Nea bɔ ɔtole taluwa bie bɔ wali afoɛ 27 ɔ. Ɔte sɛkɛtri, na yenwo yɛ nyeme kyɛ! Ɔnwa: “Abrandeɛ bie wɔ m’adwuma nu bɔ okuro me dwirɛ soma, na bɔ ngɔyɛ biala ɔkamvo me. Nahorɛ, sɛ mmenia kamvo wɔ a, ɔyɛ fɛ de. Nakoso ɛhe de, mekora menwu ye kyɛ adwaman ala ti yeɛ ɔyɛ sɔ ɔ. Mengɔmaa bɔ ɔyɛ ne ngɔlakalaka me.” Ebie fa yenoa fa wɔnwo sɔ a, w’adwene kɔyɛ wɔ kyɛ gya okuro wɔ dwirɛ, sana enwu adwene bɔ otira ye ɔ. Ɛhe ati odikyɛ yɛmaa yɛnye da berɛ.
w00 7/15 29 ¶2
Ɛkɔhora Kɔmaa Wɔnwo Kɔte Wɔ Ewiase Bɔne He Anu
Brabɔne de ɛkɔbɔ oo, na ye si dwirɛ! Ɔyɛ wee tekyɛ awɔwee, ɔyɛ nna tekyɛ dadeɛ bɔ ye nyunu ne ye si pɛ ɔ, na ɔfa sona kɔ ewue nu. Ɔhaw bɔ ɔkora fa ba ne bie ɛhe: Sona ne tiboa kɔteetee ye, ɔkɔhora kɔnwonzɛ mmerɛ bɔ ɔnnea atee, na ɔkɔhora konya nnaa nu anwonyerɛ. Sɛ sona ne agya koso a, nea kyɛbɔ ɔkɔmaa ɔye anaa ohu koli yealɛ ɔ! Adwaman komapɛ kɔhora kɔmaa okoli yealɛ ye ngoa mukoraati. Sɛ Bible ne ka kyɛ brabɔne di awue a, ɔnnaka!
w00 7/15 29 ¶5
Ɛkɔhora Kɔmaa Wɔnwo Kɔte Wɔ Ewiase Bɔne He Anu
Odikyɛ yɛtwe yɛnwo yefi bɛbɔ bɛ bra asɛkye nanwo, ná bandwetwe yɛ. Ɔnzɛkyɛ yɛfa b’atee biala so. Ebie yeɛ ole bɛ dwein basabasa, vidio bɔ nu dwirɛ kɔhora kɔsɛkye y’adwene, ɔne ponografi. (Anyandera 6:27; 1 Korintofoɛ 15:33; Ɛfesofoɛ 5:3-5) Sɛ yɛyɛ nikyee bie bɔ ɔkɔtwetwe b’adwene kɔwa yɛ so, anaa yesiesie yɛnwo wɔ atee bɔ ɔttemaye so a, okyire kyɛ yɛnze nworɛ.—1 Timoteo 4:8; 1 Petro 3:3, 4.
Bible Nu Dwirɛ Titire
w11 2/1 20 ¶2
Ebie yɛ bɔne a, bɔ ɔkora fi nu ba ne, Bible nu dwirɛ pee maa yenwu ye. Nu ko yeɛ ole Anyandera 5:8, 9. Otu mmrandeɛ fo kyɛ bɛhwe bɛnwo befi adwamamɔ nwo, ‘amaa ɔnate so bamva b’animnyam bamma ebiemɔ.’ Kyɛbɔ tworɔnzɛm ne ka ne, bɛbɔ bɛne ebie da kora ne bagya ne, bɛ subaen sɛkye, mmenia nné bɛ nni, na bemmu bɛ. Ɛhe ati, bɛnwo nyɛ ebie akɔnnɔ kyɛ ogya bɛ. Sɛ babunu bie susu ɔhaw bɔ ɔkɔhora kɔto ye nanwo a, ɔkɔmaa ɔkɔyere yenwo kɔfa Yehowa mmraa kɔyɛ adwuma. Ɔhaw ne bie yeɛ ole kyɛ, ɔne Yehowa afia kɔsɛkye, na okoli yealɛ.
MARCH 24-30
NYAMEƐ DWIRƐ NANU ASUADEƐ ANYANDERA 6
Nzu Yeɛ Yesua Yefi Ngyiregyira Berɛ Ɔ?
it-1 115 ¶1-2
Ngyiregyira
‘Bafa Nworɛ Bawura Benu.’ ‘Nworɛ’ bɔ ngyiregyira le ye ne, banzua, na mmom sɔ ala yeɛ bɛbɔle bɛ ɔ. Bible ne ka ngyiregyira nwo dwirɛ kyɛ, sɛ ‘odwu ahuhuro mmerɛ a, ɔpena ye aleɛ sie, yeɛ fieso aleɛ falɛ dwu a, ɔboaboa aleɛ noa.’ (Any 6:8) Ɛkɔ Palestine a, ngyiregyira ko bie de, ɔnyɛ nna wɔ berɛ. Bɛyɛ bɛ nikyee tekyɛ kuaniɛ. Odwu ahuhuro mmerɛ a, bɛboaboa aleɛ bɔ ayire ba a bekoli noa. Ofikyɛ odwu sɔ mmerɛ ne a, ɔyɛ se kyɛ bekofite bɛkɔɔpena aleɛ. Ɛtaa nwu sɔ ngyiregyira ne wɔ nekaa bɔ bɛboro atokoɔ, ofikyɛ ɛberɛ de aleɛ nyɛ nna. Sɛ nzue tɔ maa b’aleɛ nanu yɛ frɔlɔɔ a, bɛsesa begua eyia nu, na baworɛ nu. Bɔ ɔkɔyɛ na aleɛ bɔ baboaboa yenoa ne amvifi ne, bɛfa bɛ gyé bɛka nekaa bɔ ofifi ne. Bɔ ɔmaa benwu nekaa bɔ bɛla yeɛ ole kyɛ, atee bɔ bɛfa so ne, bahwi so alaa maa watɔ so. Afei, ɛyɛ a bɛfa aleɛ boen bɛto bɛ bɔen ne noa.
Bɔ Ɔyɛ Nyeme Wɔ Bɛnwo Ɔ. Ngyiregyira nwo nikyee kaa bɔ yasua nati, ɔnyɛ nwanwa kyɛ betu yɛ fo kyɛ: “Ɛfoen sona, kɔ ngyiregyira berɛ, nea kyɛbɔ ɔyɔ ye nningyein ɔ, ná sua nworɛ.” (Any 6:8) Bɔ yɛfa yɛse bɛ paa yeɛ ole kyɛbɔ bɛboaboa aleɛ noa besie ne. Nakoso nikyee foforɛ bɔ ɔwɔ bɛnwo yeɛ ole kyɛ, sɛ adwuma ne te sɛɛ oo, sɛ ɔte sɛɛ oo, bemia bɛnye bɛyɛ; bɛmma b’abanu mmu. Nikyee bɔ nu yɛ no tra bɛ po ne, bɛkora bɛpagya anaa bɛtwe ye ase. Sɛ bɛnate nekaa bɔ ɛberɛ yɛ ndono a, ekonwu ye ne, né befi ase ná bedwɔso, né bebu bɛfa so; koso baha kyɛ bɛkɔhɔ ne de, ɛyɛ bɛ sɛɛ, bɛkɔhɔ. Nikyee ko koso yeɛ ole kyɛ, bɛbokaboka bɛnwo paa. Nekaa bɔ bɛla ne, bɛbonu besiesie berɛ maa ɛberɛ te waenn. Afei sɛ benu bie pira anaa olle anwoserɛ a, bɛsosɔ ye nu fa ye ba nekaa bɔ bɛla ne.
w00 9/15 26 ¶3-4
Bɔ Wɔ Dumaa Nwo Waen
Odikyɛ yɛyere yɛnwo yɛyɛ adwuma tekyɛ Ngyiregyira. Sɛ ebie nea yɛ oo, sɛ ebiala nnea yɛ oo, odikyɛ yɛyere yɛnwo yɛyɛ adwuma, ná yɛbɔ mmɔden kyɛ yɛkɔyɛ ye yé. Sɛ yɛwɔ sukuu nu, adwuma nu, anaa yɛyɛ asafo adwuma bie a, odikyɛ yɛyɛ bɔ y’anwoserɛ kɔhora ɔ. Kyɛbɔ ngyiregyira yere yenwo yɛ adwuma a ɔboka ye ne, sɔ ala yeɛ Nyameɛ pena kyɛ ‘yɛfa bɔ yafɛ yanya ye yɛgye ye nye’ ɔ. (Nworɛ Dwirɛhanɛniɛ 3:13, 22; 5:18) Sɛ yɛyɛ adwuma serɛ a, ɔmaa yenya tiboa pá, na y’ahone tɔ yɛ kunu.—Nworɛ Dwirɛhanɛniɛ 5:12.
Solomon bisale edwirɛ nyɔ bie bɔ ɔkɔboka ebie bɔ ɔte akwadworɔ maa yenye kɔwa yenwo so ɔ. Yeɛ ɛhe: “O, ɛfoen sona, ɛkɔla maa okoodwu kyinzu? Mmerɛ beni yeɛ ekofi wɔ nnafelɛ nu kodwɔso ɔ?” Afei, né Solomon suesua kyɛbɔ kwadwofoɛ yɛ ye nikyee ne. Ɔnwa: “‘Maa nna kãa, maa ndɔ ngosie kãa, maa ndengyɛ me nu kãa.’ Na ehiaa kɔwa wɔ so kyɛ awerɔm awueniɛ, yeɛ anwokyere kɔwa wɔ so kyɛ koɛhonɛniɛ bɔ otira akokyɛm ɔ.” (Anyandera 6:9-11) Ɔnate kyɛ daa kwadwofoɛ ala kagyaa nati, ehiaa kɔwa ye so putupuru tekyɛ awueniɛ, na ahokyerɛ kɔwa ye so komapɛ tekyɛ sogyaniɛ. Ebie bɔ ɔte foen ne, ndire kole ye boo kɔfa, na nu amu kɔyɛ ndetema satuu. (Anyandera 24:30, 31) Sɛ odi dwaa a, ɔngyɛ na wabɔ kerɛ susuroo. Sɛ ebie fa ye adwuma a, ɔkɔsosɔ ye so koodwu mmerɛ beni? Na sukuuniɛ bɔ onguro adesua ne, ɔkɔhora kɔnea atee kyɛ ɔkɔbɔ mmɔden wɔ sukuu nu anaa?
Bible Nu Dwirɛ Titire
w00 9/15 27 ¶3
Bɔ Wɔ Dumaa Nwo Waen
Bɔne nzoo bɔ anyandera nwomaa ne hane yenwo dwirɛ ne, sɛ ɛnwa ɛbaye nu a, ɔfa bɔne bɔ waha namu nwo. Wɔde, ma yetutu ye ngoko. “Anyeɛ bɔ ɔtra ye ndo nwiaa” ɔne “sona bɔ adwene tɛɛ ali ye ti ɔ,” ɔte bɔne bɔ ɔkɔso wɔ ebie tianu. “Noa bɔ ɔnga nahorɛ” ɔne “sona bɔ odi adanzewia,” ɔte bɔne bɔ ofi yɛ noa nu ba ɔ. “Asaa bɔ ɔkã mogya bɔ odi be gua,” ɔne “agyirɛ bɔ ye nwo yɛ nyera wɔ bɔneyɔlɛ nwo,” ɔte atianuserɛ. Na bɔ Yehowa kyi ye kɔkɔɔkɔ yeɛ ole ebie bɔ ɔkeka mmenia ti bobɔ nu ɔ. Ko bɔ ɔfa bokale so maa ɔyɛle nzoo ne kyire kyɛ, nningyein bɔ Yehowa kyi ne, nna ye ala ɛne, na mmom pee boka so. Ofikyɛ daa sona kɔso yɛ bɔne.
MARCH 31–APRIL 6
NYAMEƐ DWIRƐ NANU ASUADEƐ ANYANDERA 7
Nea Wɔnwo Yé Na Andɔ Asane Nu
w00 11/15 29 ¶5
“Di Me Mmeraa Dwirɛ So, Ná Nya Ngoa”
Mboma bɔ Solomon tole yenye neane nu ne, ɔkɔyɛ kyɛ né bafa mmakaa bahyehyɛ ye kyɛ ngada-ngadaen. Né eyia kwaatɔ, yeti ne ewienu ahyɛ yebo opinipini. Onwuni abrandeɛ bie bɔ onnwu yenye so ɔ. Abrandeɛ ne de, né ɛkora nwu kyɛ wataba! Nna kyɛ né ɔnze nekaa bɔ ɔnate ne oo; ɔse berɛ paa, yeɛ ɔse bɔ ɔkɔhora kɔto ye wɔ berɛ ɔ. Ɔɔfale dwaaso nekaa bie bɔ opingye “braa n’awuro.” Nwa yeɛ ole sɔ brasua ne? Na nzu yeɛ ɔpena ɔ?
w00 11/15 30 ¶4-6
“Di Me Mmeraa Dwirɛ So, Ná Nya Ngoa”
Brasua ne noa yɛ fɛ. Ɛnea ye nyunu a, ɛkora nwu kyɛ ɔse bɔ ɔka ɔ. Ɔyeye ye dwirɛ ngokongoko, kyɛbɔ ɔkɔyɛ a ɔkɔlakalaka abrandeɛ ne. Ɔha hyirele abrandeɛ ne kyɛ wabɔ asomdwee afɔleɛ, yeɛ watua ye bɔhyɛ sɔ kyea nala. Bɔ né ɔpena kyire yeɛ ole kyɛ, ɔtte nipabɔne, na ɔmva ye nyamesom nni angorɛ. Né bɛfa naen, esam, ngoo ɔne bobe nzaa yeɛ bɛbɔ asomdwee afɔleɛ wɔ Yerusalem asɔre awuro berɛ ɔ. (Lewitikɔso 19:5, 6; 22:21; Numeri 15:8-10) Sɛ ebie bɔ asomdwee afɔleɛ a, né ɔne ye abusua le yenwo atee kyɛ bedi aleɛ ne bie. Yeti ne taluwa ne pena kyire kyɛ, sɛ abrandeɛ ne ba ye awuro a, aleɛ ne nzaa de ɔkɔfa ye mbaen. Edwirɛ nanu la berɛ; abrandeɛ ne ba a, yenye kɔgye! Ɔha hyirele abrandeɛ ne kyɛ, ye ti alaa yeɛ ɔwale dwaaso berɛ ɔ. Edwirɛ he de ɔyɛ fɛ, nakoso wayɛ kyɛ ɔfa yenoa fa abrandeɛ nanwo. Ebie bɔ ɔse Bible nu hane kyɛ: “Ɔte amba kyɛ ne taluwa ne pena ebie, nakoso ede di kyɛ abrandeɛ he ala yeɛ né ɔpena ye anaa? Sana ebie bɔ wagyimi tekyɛ abrandeɛ he ala yeɛ okole sɔ dwirɛ he koli ɔ.”
Taluwa ne ataadeɛ maa yenwo yɛle abrandeɛ ne akɔnnɔ. Ɔyɛle abrandeɛ ne atuu, ɔfale yenoa fale yenwo, yeɛ ɔfele yenoa ɔ. Afei ɔhane nningyein bɔ ɔbo fona nwo dwirɛ. Ɔnwa: “Mafa bomo masɛ me bɛen, yeɛ Misraim mbasotam bɔ bali adwii bagua nu ɔ. Mafa korobo, pɛprɛ ne ayirefona mapete me mba so fonafona.” (Anyandera 7:16, 17) Wafa Misraim tena wato ye bɛen kama, yeɛ wafa korobo anaa ɛyɛɛ, pɛprɛ ne ayirefona wapete so maa wabo fona ɔ.
Brasua ne toale so kyɛ: “Bra ma yɛɛgye yɛ nye mba so toonn kɔpem ngyerɛmɔ, maa yɛɛsɛpɛ yɛ nwo.” Ɛhe de, nna aleɛ mbaen yeɛ bɛkwaali ɔ, na mmom adwaman nwo dwirɛ yeɛ né ɔka ɔ. Abrandeɛ ne de, né ɔkɔyɛ ye fɛ kyɛ ɔkwaayɛ sɔ nikyee ne. Ɔhɔle so lakalakale abrandeɛ ne kyɛ: “Me hu nne awuro, watia ye gya si wahɔ dedeede. Ɔfale bɔtɔ bɔ sikaa dɔnn wɔ nu yeɛ ɔhɔle ɔ, sana bɛpakye bosome nu koraka né wasa wawa awuro.” (Anyandera 7:18-20) Ɔha hyirele abrandeɛ ne kyɛ, nnɛmaa osuro ye si koraa, ofikyɛ ohu kwaali dwaa, na nna ɛnnɛ ne ɛhema yeɛ ɔkɔwa ɔ. Taluwa ba se kyɛbɔ bɛyɔɔbo ebie ɔ! “Ɔfale ye noa dwirɛ menemene pee tole ye mmralɛ, ɔfale ye noa dwirɛ menemene ne nyane ye.” (Anyandera 7:21) Sɔ dwirɛ he paa de, sɛ ɛttekyɛ Yosef a, ɛlaka; okonya wɔ. (Gyenesise 39:9, 12) Yeti abrandeɛ ne kɔhora kɔha kyɛ ɔngɔhɔ ɛne?
w00 11/15 31 ¶2
“Di Me Mmeraa Dwirɛ So, Ná Nya Ngoa”
Abrandeɛ ne ambopo yeti. Obuli yenye guale nikyee biala so, yeɛ otu lili ye si “kyɛ nandwie bɔ bɛfa ye bɛkɔ akumyɛɛ,” anaa bɛkwaahu ye ɔ. Kyɛbɔ bɛfa kyein begua ebie a, ɔngora nné yenwo ne, sɔ alaa yeɛ abrandeɛ ne koso, nekaa bɔ wadwu ne de, bɔne ala yeɛ ɔkɔyɛ ɔ. Onnwu asane biala wɔ bɔ ɔyɛ nanu kodwu kyɛ, “agyaen kosina ye fure nu,” kyire kyɛ okopira maa okowu ɔ. Ɔkɔhora konya nnaa nu anwonyerɛ. Ɔne Yehowa afia koso kɔsɛkye. Sɛ yɛkɔha a, “ɔkɔfa ye ngoa kɔpɛ so,” ofikyɛ ɔkɔyɛ bɔne pirikua paa kotia Nyameɛ. Ɔpere yenwo kɔ ewue nu tekyɛ anomaa bɔ ɔpere yenwo kowura ngaen nu ɔ.
Bible Nu Dwirɛ Titire
w00 11/15 29 ¶1
“Di Me Mmeraa Dwirɛ So, Ná Nya Ngoa”
Solomon hane kyɛ, “kyekye [me mmraa] fa bɔ wɔ sa mmɛseka, ná kyerɛ ye wɔ w’ahone nu.” (Anyandera 7:3) Yɛ sa mmɛseka de, daa yɛnye tua ye, na ɛhene ala koso yeɛ yɛfa yɛyɛ nikyee biala ɔ. Sɔ ala yeɛ nningyein bɔ yesua yefi Bible nu ne, daa odikyɛ yɛmaa ɔkaekae yɛ, na okyire yɛ atee wɔ nikyee biala nu. Ɔsa hane kyɛ yɛhworɔ yegua yɛ ahone so. Ɛhene koso kyire kyɛ, yɛkɔmaa ɔkɔboka yɛ subaen so.
APRIL 7-13
NYAMEƐ DWIRƐ NANU ASUADEƐ ANYANDERA 8
Nworɛ Dwudwo—Tie Ye!
cf 131 ¶7
“Mekuro Baba Ne Dwirɛ”
Wɔ Anyandera 8:22 ne, nworɛ ka kyɛ: “AWURADE ɔ́hyɛ ye adwuma bo ne yeɛ ɔbɔle me ɔ, koraka yeɛ ɔ́hyɛ ye adwuma bɔ ofi tetetete ne abo ɔ.” Sɛ yɛkɔha a, nna nworɛ nwo dwirɛ yeɛ ɔka ye wɔ wa ɔ, ofikyɛ nworɛ de, nna ebiala yeɛ “ɔbɔle” ɔ. Nworɛ lle ahyɛaseɛ, ofikyɛ Yehowa lle ahyɛaseɛ, yeɛ daa ɔse nworɛ. (Edwein 90:2) Nakoso Nyameɛ awa ne yeɛ ɔte abɔdeɛ amukoraa nu pesie ɔ. Ye yeɛ Nyameɛ limoa bɔle ye ɔ. (Kolosefoɛ 1:15) Kyɛbɔ Anyandera nwomaa ne ka ne, né Nyameɛ Awa ne wɔ berɛ kora yeɛ bɛbɔ anwuro ne aseɛ ɔ. Ye ala koso yeɛ bɛfrɛ ye Edwirɛ ne, anaa Nyameɛ kyeame. Nikyee biala bɔ ɔyɛle ne, ɔmaa yenwu Nyameɛ nworɛ.—Yohane 1:1.
cf 131-132 ¶8-9
“Mekuro Baba Ne Dwirɛ”
Nyameɛ awa ne tenane anwuro afoɛ pee kora yeɛ ɔba aseɛ he aso ɔ. Sɔ mmerɛ ne, né ɔyɛ nzu dɔ? Anyandera 8:30 ka kyɛ, né ɔwɔ Nyameɛ nwo berɛ kyɛ “dwumvoɛ titire,” anaa ebie bɔ ɔse adwuma paa. Sɔ dwirɛ ne kyire sɛɛ? Kolosefoɛ 1:16 kyirekyire nu kyɛ: “Ye nu yeɛ bɛbɔle nningyein amukoraa, bɔ ɔwɔ nyameɛso ne aseɛ so ɔ; . . . nningyein mukoraa bɛnate ye so yeɛ bɛbɔle ɔ, na bɛbɔle bɛ bɛmane ye.” Sɔ dwumayɛniɛ bɔ ɔse adwuma ne, Yehowa nate ye so yeɛ ɔbɔle nningyein amukoraa ɔ. Ebie yeɛ ole honhom abɔdeɛ bɔ bɛwɔ anwuro, amanzaen ne, nningyein bɔ ɔyɛ nwanwa wɔ aseɛ he aso tekyɛ mmakaa ne ngaka, ɔne kuro sona bɔ ɔsombo wɔ aseɛ he aso ne. Abusuabɔ bɔ ɔla Baba ne ne Ɔwa ne afia ne, yɛkɔhora yɛkɔfa yɛkɔtoto ebie bɔ ɔdrɔ sua plan ɔne kɔntrata nwo. Sɛ kɔntrata ne nwu plan ne a, ná wanea so wasi sua ne pɛpɛɛpɛ. Sɛ yɛnea abɔdeɛ bie maa yɛnye gye a, ná yɛfa animnyam yɛma bɔ ole sua silɛ nwo nimdeɛ tra ebiala ne. (Edwein 19:1) Osa maa yɛkae abusuabɔ kamakama bɔ ɔla Ɔbɔadeɛ ne ne “dwumvoɛ titire paa” ne b’afia ne.
Sɛ mmenia nyɔ bonu yɛ adwuma a, ɔnate kyɛ bɔne wɔ bɛnwo nati, ɔtɔ mmerɛ bie a né b’afia asɛkye. Nakoso Yehowa ne Ɔwa ne de, ɔtte sɔ koraa! Baba ne ne Ɔwa ne bɔle nu yɛle adwuma afoɛ pee, koso Ɔwa ne hane kyɛ: “Né medi ahurusi wɔ ye nyunu mmerɛ biala.” (Anyandera 8:30) Yoo, yenye gyele kyɛ ɔne ye Baba bɔle nu yɛle adwuma ɔ, na anigye de, né bɛfa ye mbaen. Nyameɛ Awa ne suesuane ye Baba alaa maa ɔyɛle tekyɛ ye Baba pɛpɛɛpɛ. Yeti ɔnyɛ nwanwa kyɛ né mvrama mva b’afia ɔ. Ɛhe ati, sɛ yɛpena ɔdɔ bɔ wasɔ twaenn, na wahyɛ paa a, yeɛ ole Nyameɛ ne Ɔwa ne.
w09 4/15 31 ¶14
Dé Yesu To Nu Kyɛ Ɔte Dawide Pirikua Ne Solomon Pirikua
Sona komapɛ yeɛ né ɔse nworɛ tra Solomon ɔ. Yeɛ ole Yesu Kristo. Yesu bɔbɔ hane kyɛ “odi mu tra Solomon.” (Mat. 12:42) Yesu hane “daa ngoa dwirɛ.” (Yoh. 6:68) Bokaa so Asɛnga ne sɔa, ɔmaa yɛte anyandera bɔ Solomon buli ne pee bo. Nningyein bɔ ɔmaa ebie bɔ ɔso Yehowa nye gye ne, Solomon hane pee nwo dwirɛ. (Any. 3:13; 8:32, 33; 14:21; 16:20) Yesu maa yenwu bɔ ebie yɛ a, ɔkɔmaa okonya anigye pá paa ɔ. Yeɛ ole nningyein bɔ ɔfa Yehowa soen nwo, ɔne ye bɔhyɛ bɔ ɔkɔwa nu ne. Ɔnwa: “Sunzum nu ehiafoɛ banya saleɛ, ofikyɛ bɛ yeɛ nyameɛso ahennie ne te bɛ deɛ ɔ.” (Mat. 5:3) Bɛbɔ bɛfa Yesu ngyerɛkyerɛ bɛbɔ bɛ bra ne, bepingye Yehowa bɔ ɔte “ngoa asue ti” ne. (Edw. 36:9; Any. 22:11; Mat. 5:8) Kristo te ‘Nyameɛ nworɛ.’ (1 Kor. 1:24, 30) Yesu Kristo bɔ ɔte Mɛsaya Ahennie naso hene ne, ole ‘nworɛ sunzum.’—Yes. 11:2.
Bible Nu Dwirɛ Titire
g 5/14 16
‘Nworɛ Teanu’—Ɛte Ye Nga?
▪ Nwomaa bie ka kyɛ Bible te “nwomaa bɔ bakyekyɛ ye pee batra nwomaa biala ɔ. Na ɛhene yeɛ bahyire yebo bahɔ dwudwolɛ pee nu ɔ.” (The World Book Encyclopedia) Kesaalae bahyire Bible namu anaa ye bue bie bo bahɔ dwudwolɛ kɔyɛ 2,600 nu. Yeti sɛ ɛye mmenia 10 biala sie berɛ a, nu 9 le Bible.
▪ ‘Nworɛ teanu’ wɔ atee foforɛ so, na ɛhene de ɔtte anyandera, na mmom ɔte edwirɛ paa. Mateo 24:14 kenga kyɛ: “Bɛkɔhã ahennie ne nwo nzɛmba he wɔ ewiase amukoraa maa ɔkɔyɛ adanzeɛ kɔma maen maen amukoraa; koraka ná afei ayieleɛ ne awa.”
APRIL 14-20
NYAMEƐ DWIRƐ NANU ASUADEƐ ANYANDERA 9
Yɛ Nyanzaniɛ—Nna Ebie Bɔ Ɔgoro Mmenia Nwo Ɔ
w22. 02 9 ¶4
“Tie Nworɛfoɛ Noa Dwirɛ”
Sɛ ebie tu yɛ fo na ɔka ye pein a, ɔtɔ mmerɛ bie a ɔyɛ se kyɛ yekole yɛkɔto nu. Ɛkɔnea po ne, né yafɛ yaa. Nzu yeɛ ɔmaa ɔba ye sɔ ɔ? Yedé yɛto nu kyɛ mvomsoɛ wɔ yɛnwo, nakoso sɛ ebie twe y’adwene sie nikyee bie bɔ ɔngoye wɔ yenwo a, ɔkɔhora kɔyɛ se kyɛ yekole yɛkɔto nu. (Kenga Nworɛ Dwirɛhanɛniɛ 7:9.) Ebiaa yɛkɔyɛ nyeyeanoɛ po. Ebiaa yɛkɔha kyɛ sona bɔ otu yɛ fo ne nguro yɛ dwirɛ, anaa wandwudwo yé. Anaa ebiaa yɛkɔha kyɛ: ‘Wɔnwo nyɛɛ bɔ ɛbaatu mefo ɔ? Sɛ ɛse afutue a, tu wɔnwo fo!’ Sɛ yɛnye ngye afutue nanwo a, annea a yekopia yɛkɔto nekaa bie, anaa yɛkɔɔpena ebie bɔ ɔkɔha bɔ ɔkɔyɛ yɛ so anu fɛ ɔ.
w22. 02 12 ¶12-14
“Tie Nworɛfoɛ Noa Dwirɛ”
Nzu yeɛ ɔkɔboka yɛ maa yekole afutue yɛkɔto nu ɔ? Odikyɛ yɛbrɛ yɛnwo ase, na yɛkae kyɛ bɔne wɔ yɛnwo, na ɔtɔ mmerɛ bie a yɛ dwirɛ mva atee nu. Sɔ ala yeɛ Yob yɛle ɔ; ɔhane edwirɛ biemɔ bɔ né ɔmva atee nu ɔ. Nakoso, nziɛen ɔsesane ye adwene, na Yehowa koso hyirale ye. Nzuati ɔ? Ofikyɛ né Yob brɛ yenwo ase. Ɔwɔ nu kyɛ né wanyi watra Elihu koraa, nakoso mmerɛ bɔ otuli ye fo ne, otiele. Ɛhe kyire kyɛ né ɔbrɛ yenwo ase. (Yob 32:6, 7) Yɛ koso, sɛ ebie tu yɛ fo, na yɛte nga kyɛ ɔmvata yɛ, anaa yanyi yatra sona ne po a, anwobrɛaseɛ kɔmaa yekole yɛkɔto nu. Asafo nu panyi bie bɔ ɔwɔ Canada hane kyɛ, “Kyɛbɔ yenwu yɛnwo ne, nna sɔ koraa yeɛ mmenia nwu yɛ ɔ. Yeti sɛ ebie andu yɛ fo a, ɔkɔyɛ sɛɛ na yahɔ yɛ nyunu?” Yenu nwa yeɛ ɔkɔhora kɔha kyɛ nekaa bɔ wasu honhom ne mmaa ne wadwu nala te pa, na asɛnga adwuma ne koso kyɛbɔ ɔyɛ ye nala te pa, yeti yenwo nhia kyɛ ɔkɔ ye nyunu ko ɔ?—Kenga Edwein 141:5.
Sɛ Yehowa tu wɔ fo a, fa ye kyɛ ɔdɔ wɔ ti ɔ. Yehowa pena kyɛ osi yɛ yé. (Any. 4:20-22) Atee bɔ ɔfa so da ye dɔ adi kyire yɛ ne, ebie ɛhe: Ɔnate ye Dwirɛ ne, asafo nwomaa, ɔne aliemaamɔ bɔ bɛnwo akokwa so tu yɛ fo. Hebrifoɛ 12:9, 10 ka kyɛ: “yɛ yeeyɛlɛ ti yeɛ ɔtea yɛ,” anaa otu yɛ fo.
Fa w’adwene sie aba bɔ ɔwɔ nu naso, na nna atee bɔ ɔfale so hane edwirɛ ne. Ɔtɔ mmerɛ bie a, yɛte nga kyɛ atee bɔ bɛfale so betuli yɛ fo ne angɔ yé. Sɛ yɛkwaatu ebie fo a, ɔnzɛkyɛ yɛmaa ɔyɛ se ma sona ne kyɛ okole kɔto nu. (Gal. 6:1) Sɛ yɛ koso yeɛ betu yɛ fo a, ɔnzɛkyɛ yɛfa y’adwene yɛkɔ kyɛbɔ sona ne kɔha edwirɛ naso, na mmom aba bɔ ɔwɔ nu ne. Yenu biala kɔhora kobisa yenwo kyɛ: ‘Sɛ menye ngye afutue nanwo po a, nahorɛ bie wɔ bɔ sona ne ka nanu anaa? Ngɔhora ngɔye m’adwene ngofi ye mvomsoɛ so, na mafa masie mvasoɛ bɔ ɔwɔ edwirɛ bɔ ɔka naso anaa?’ Afutue biala bɔ bɛkɔfa bɛkɔma yɛ ne, odikyɛ yɛnea aba bɔ ɔwɔ nu ne, na yɛfa yɛyɛ adwuma. Yɛyɛ sɔ a, okyire kyɛ yɛse nworɛ.—Any. 15:31.
w01 5/15 30 ¶1-2
Nworɛ Kɔmaa ‘Yekonyi Yɛkɔhyɛ’
Kyɛbɔ ebie bɔ ɔse nworɛ yɛ ye nikyee wɔ afutue nwo ne, nna sɔ koraa yeɛ ebie bɔ ɔgoro mmenia nwo yɛ ɔ. Solomon hane kyɛ: “Sɛ etwi nworɛniɛ nyunu a, okohuro wɔ dwirɛ. Tu nworɛniɛ foɛ, na ɔkɔhɔ so konwu nworɛ.” (Anyandera 9:8b, 9a) Ebie bɔ ɔse nworɛ se kyɛ, “ɛtealɛ [anaa afutue] biala nne berɛ bɔ ɔma yɛ nye gye ɔ, na mmom ɔma yɛ wora bɔ. Nakoso ɛhe asi ne, bɛ bɔ bafa sɔ ɛtealɛ ne batea bɛ ne, bɛ sa kã akatuaa bɔ ɔte tenenee ne asomdwee ɔ.” (Hebrifoɛ 12:11) Ɔwɔ nu kyɛ afutue kɔhora kɔyɛ yea de, nakoso sɛ yɛse kyɛ ɔkɔmaa yekonwu nworɛ a, nzuati yeɛ odikyɛ yɛyɛ nyeyeanoɛ ɔ?
Solomon sa hane kyɛ, “kyirekyire teneneeniɛ nikye, na ɔkɔhɔ so konya nimdeɛ.” (Anyandera 9:9b) Ebiala nne berɛ bɔ wapa afutue nwo ɔ. Sɛ yenwu kyɛ bɛbɔ bayɛ mbanyi po ba nahorɛ nanu, na behyira bɛnwo so bɛma Yehowa a, nea kyɛbɔ ɔyɛ anika ɔ! Yeti, ɛmɔma yɛhɔ so yesua nikye, kyɛbɔ ɔkɔyɛ a yekonwu nworɛ ɔ.
w01 5/15 30 ¶5
Nworɛ Kɔmaa ‘Yekonyi Yɛkɔhyɛ’
Nyanza de, bɛmbena bɛmma ebie, odikyɛ yɛ bɔbɔ yeɛ yɛpena ye si atee ɔ. Bɔ yɛka ye, Solomon maa yenwu kyɛ ɔte nahorɛ. Ɔnwa: “Sɛ enwu nworɛ a, enwu ma wɔ bɔbɔ wɔ nwo, yeɛ sɛ ɛyɛ ngorohoɛ a, ɔkɔbɔ wɔ ngome wɔ ti so.” (Anyandera 9:12) Ebie se nworɛ a, ɔboka ye bɔbɔ deinn, yeɛ bɔ ɔgoro mmenia nwo ne, ye bɔbɔ yeɛ ɔtwetwe amaneɛ ma yenwo ɔ. Nahorɛ dwirɛ yeɛ ole kyɛ, bɔ ebie kolua ne, ɛhene ala yeɛ ɔkɔpɛ ɔ. Yeti, ɛmɔma yɛyɛ ‘asoɛ yetie nworɛ dwirɛ.’—Anyandera 2:2.
Bible Nu Dwirɛ Titire
w06 9/15 17 ¶5
Anyandera Nwomaa Nanu Dwirɛ Titire
Anyandera 9:17—Nzu yeɛ ole “awue nzue,” na nzuati yeɛ “ɔyɛ fɛ” ɔ? Sɛ agyaafoɛ da a, anigye bɔ benya ye ne, Bible ne fa toto abura nu nzue bɔ ɔyɛ fɛ nwo. Yeti nzue bɔ bewia bɛno ne gyi berɛ ma adwaman bɔ bɛbɔ besie ne. (Anyandera 5:15-17) Ɛyɛ a, b’adwene yɛ bɛ kyɛ bafa bɛnwo bali, yeti yeɛ ɔmaa sɔ nzue ne yɛ bɛ fɛ ne.
APRIL 21-27
NYAMEƐ DWIRƐ NANU ASUADEƐ ANYANDERA 10
Nzu Yeɛ Ɔmaa Osi Ebie Yé Ɔ?
w01 7/15 25 ¶1-3
Yehowa hyira bɛbɔ bɛte ateneneefoɛ ne. Bible ne ka kyɛ, “asaa bɔ ɔte foen ne, ɔne ehiaa yeɛ bɛnate ɔ, nakoso asaa bɔ okuro adwuma ne de, ɔmaa enya wɔ nwo. Sona bɔ ɔboaboa fieso aleɛ noa wawa mmerɛ ne, ɔte baa nworɛniɛ, nakoso bɔ ɔdafe wɔ mmerɛ bɔ bɛfa fieso aleɛ ne de, ɔte nyanzoen baa.”—Anyandera 10:4, 5.
Né ɔhene ne dwirɛ ne kɔ ma bɛbɔ bɛpɛ fie so aleɛ sɔ mmerɛ ne. Sɛ odwu mmerɛ bɔ bɛpɛ fieso aleɛ a, bɛnnafe, benni angorɛ, na bɛfa nnɔnhwere pee bɛyɛ adwuma. Né odikyɛ bɛyɛ ye ndɛndɛ.
Yesu ha hyirele ye asuafoɛ nemɔ kyɛ: “Nnɔbaeɛtelɛ adwuma ne sone, nakoso adwumayɔlɛfoɛ nemɔ bɛte kãa. Yiti ɛ́mɔsrɛ nnɔbaeɛtelɛ Mene ne, ná ɔma adwumayɔlɛfoɛ bɛbra ye nnɔbaeɛtelɛ adwuma ne anu.” (Mateo 9:35-38) Nna aleɛ nwo dwirɛ yeɛ né Yesu ka ɔ, na mmom né ɔka mmenia nwo dwirɛ. Wɔ afoɛ 2000 nu ne, mmenia miliɔn 14 yeɛ bɛwale Yesu wue afahyɛ ne bie ɔ. Né bɛ dodoɔ ne bo Yehowa Adanzefoɛ bɔ bɛwɔ berɛ sɔ mmerɛ naso pɛen nyɔ. Yeti sɛ Yesu ka kyɛ ‘fieso nningyein nemɔ bati kyɛ bebu’ a, ɔnnaka! (Yohane 4:35) Nahorɛ Kristofoɛ srɛ bɛ Mene ne kyɛ ɔma mmeni pee bra adwuma nanu. Nakoso bɛndena berɛ mbaen, bɛyere bɛnwo bɛyɛ asuafoɛ adwuma ne. (Mateo 28:19, 20) Yehowa ahyira bɛ mmɔdenmɔ naso paa. Wɔ afoɛ 2000 soen afoɛ nanu ne, mmenia kɔbo 280,000 yeɛ bɛbɔle asu ɔ. Sɔ mmenia nemɔ koso fa Nyameɛ Dwirɛ ne kyirekyire mmenia. Ɛmɔma yɛfa yɛnwo yewura asuafoɛ adwuma nanu. Ɔba sɔ a, yɛnye kɔgye, na y’ahone kɔtɔ yɛ kunu.
w01 9/15 24 ¶3-4
Fa “Atimbire Frɛtɛɛ” Anaa Tenenee Atee So
Solomon maa yenwu mvasoɛ bɔ ɔwɔ so kyɛ yɛkɔyɛ nikyee bɔ ɔtengyɛ ɔ. Ɔnwa: “Sikaniɛ anwonya yeɛ ɔte ye kuro bɔ wato ye nwo fasue ɔ, yeɛ ehianiɛ ye hiaa yeɛ ɔte ye aworabɔlɛ ɔ. Teneneeniɛ akatuaa fa ye kɔ ngoa nu, nakoso bɔnefoɛ de, ye mvasoɛ fa ye kɔ bɔne nu.”—Anyandera 10:15, 16.
Sɛ nikyee bie bɔ yɛnnea atee si a, sikaa kora bɔ yɛnwo waen kyɛbɔ kuro bɔ bato yenwo fasue bɔ nu mmenia nwo waen ne. Nakoso sɛ elle bie, na nikyee bie bɔ ɛnnea atee to wɔ a, ɔyɛ yea kyɛ! (Nworɛ Dwirɛhanɛniɛ 7:12) Nakoso ɔhene nyanzaniɛ ne maa yenwu kyɛ, esikaa ne ehiaa mukoraati, asane wɔ nu. Sikaniɛ kɔhora kɔfa yenwo kɔto ye sika so, na wanya adwene kyɛ gya ɛhene yeɛ ɔkɔbɔ yenwo waen tekyɛ “fasue tendenn.” (Anyandera 18:11) Hianiɛ koso, ebia ye adwene kɔyɛ ye kyɛ ehiaa bɔ odi nati, ye anyelasoɛ amukoraa ayie. Ɔba sɔ a, bemu bengonya dumaa pá wɔ Yehowa nyunu.
it-1 340
Nhyiraa
Kyɛbɔ Yehowa Hyira Sona. “AWURADE saleɛ [anaa nhyiraa] yeɛ ɔma sona nya ye nwo ɔ, na ɔmva aworabɔlɛ biala mmoka so.” (Any 10:22) Bɛbɔ Yehowa de bɛ to nu ne, atee bɔ ɔfa so hyira bɛ ne, ebie ɛhe: Ɔbɔ bɛnwo waen, ɔmaa osi be yé, ɔnea bɛ so, ɔmaa nningyein kɔye ma bɛ, anaa ɔmaa bɛ sa ka bɔ behia ɔ. Yeti sɛ yɛkɔha a, ebie nya Yehowa hyiraa a, né wayie koraa!
Bible Nu Dwirɛ Titire
w06 5/15 30 ¶18
“AWURADE saleɛ” anaa nhyiraa yeɛ wamaa wasi ye mmenia ye wɔ honhom nu ɔ. Na ɔmaa yenya gyidie kyɛ “ɔmva aworabɔlɛ biala mmoka so.” (Anyandera 10:22) Sɛ sɔ ahɔ de a, nzuati yeɛ bɛbɔ bedi nahorɛ bɛma ye ne, benwu amaneɛ ɔ? Nningyein titire nza he ati ɔ. (1) Bɔne bɔ ɔwɔ yɛnwo ne. (Gyenesise 6:5; 8:21; Yakobo 1:14, 15) (2) Satan ne ye sunzummɔne. (Ɛfesofoɛ 6:11, 12) (3) Ewiase bɔne ne. (Yohane 15:19) Yehowa ma atee maa yenwu amaneɛ de, nakoso nna ye yeɛ ɔfa ba yɛ so ɔ. Bible po ka kyɛ, “akyɛdeɛ paa amukoraa ne akyɛdeɛ bɔ odi mu amukoraa fi nyameɛso, na ofi kanea Baba ne berɛ yeɛ ɔba ase ɔ.” (Yakobo 1:17) Yehowa de, ohyira wɔ a na wahyira wɔ; ɔmva aworabɔlɛ biala mmoka ye.
APRIL 28–MAY 4
NYAMEƐ DWIRƐ NANU ASUADEƐ ANYANDERA 11
Ka Wɔ Noa Tonu!
w02 5/15 26 ¶4
Ebie Di Nahorɛ A, Ɔmaa Ye Atee Tengyɛ
Ebie bɔ odi nahorɛ ne, nikyee pá bɔ ɔyɛ ne kora boka mmenia, yeɛ bɔnefoɛ bɔ ɔyɛ nningyein tɛɛ ne koso, bɔ ɔyɛ ne kora ha ebie. Yisrael hene ne hane kyɛ, “amumuyɛɛniɛ fa ye noa sɛkye obiɛngo, nakoso teneneeniɛ nimdeɛ yeɛ ɔpepɛ de ye ɔ.” (Anyandera 11:9) Nwa yeɛ ɔkɔhora kɔha kyɛ, nzekure bɔne, dwudwolɛ fiɛ, ɔne ebie bɔ odwudwo soma ngɔhora ngɔsɛkye ebie dumaa ɔ? Teneneeniɛ de, ɔdwene mmenia nwo, yeti kora bɔ okobukye yenoa ne, ɔdwene yenwo yé. Ɛhe maa yenoa dwudwolɛ yɛ fɛ. Na nimdeɛ bɔ ole ye ne pepɛ dé ye, ofikyɛ bɛbɔ benguro ye dwirɛ ne, sɛ bɛka edwirɛ bɔ ɔtte nahorɛ a, onwu ye.
w02 5/15 27 ¶2-3
Ebie Di Nahorɛ A, Ɔmaa Ye Atee Tengyɛ
Ebiemɔ bɔ bra pa wɔ kuro bie nu a, ɔmaa kuro nanu mmenia so anu dwo bɛ, osi bɛ yé, na ɔhyɛ bɛ ngunaen. Ɔba sɔ a, ɔmaa nningyein kɔ ye wɔ kuro nanu. Nakoso, bɛbɔ bɛsɛkye mmenia dumaa, bɛyɛ nningyein bɔ ɔttemaye, na bɛha mmenia ne, bɛsɛkye asomdwee, bɛmaa mmenia di yealɛ, na benwu amaneɛ. Sɛ sona ne le tumi wɔ kuro nu berɛ po de a, yede booboo. Ɔba sɔ a, nningyein yɛ basaa wɔ kuro naso, bɛhyɛ mmenia so, bebu brabɔne, na ebiaa bekoli hiaa po.
Edwirɛ bɔ ɔwɔ Anyandera 11:11 ne, ɔfa Yehowa asomvoɛ nwo. Ofikyɛ, bɛne bɛnwo yianu wɔ asafo ahoroɛ bɔ ɔtekyɛ kuro nanu. Asafo bɔ nu mmenia ne Yehowa afia te kama na bedi nahorɛ ne, anigye wɔ nu, nu yɛ hye, bɛboka bɛnwo, na ɛhene hyɛ Nyameɛ animnyam. Yehowa hyira asafo bɔ ɔte sɔ ne, na bɛkɔ bɛ nyunu wɔ honhom nu. Nakoso benu kaa bie bɔ nikyefee nzɔ bɛnye, ná nikyee biala benya yenwo dwirɛ bɛka ne, bɛ tekyɛ “bakaa ndii weewee.” Ofikyɛ bɛ subaen ne kɔhora kɔsɛkye bɛbɔ bele subaen pa ne po. (Hebrifoɛ 12:15) Mmerɛ pee ne, sɔ mmenia nemɔ kuro tumi ne animnyam. Bɛne ye nate kyɛ bɛbu atɛnkyea anaa bɛyeye mmenia nu wɔ asafo ne anaa mbanyi nanu. Ɛhe kora fa mbakye-mbakyemuɛ ba asafo nanu. Sɛ yɛmaa yɛnwo kokwa, na yandie edwirɛ bɔ bɛkeka ne a, ɔkɔmaa asomdwee kɔwa asafo nanu.
w02 5/15 27 ¶5
Ebie Di Nahorɛ A, Ɔmaa Ye Atee Tengyɛ
Ebie bɔ “adwene nne ye ti anu” de, ɔkora fa ɔhaw ba paa. Ɔkeka edwirɛ bɔ mvasoɛ nne so fa sɛkye mmenia dumaa. Odikyɛ mbanyi ne yɛ nikyee bie ndɛ fa si sɔ subaen tɛɛ ne noa, ná wanzɛkye afoforɛ subaen. Nakoso ebie bɔ yenye la berɛ de, ɔse mmerɛ bɔ odikyɛ ɔka yenoa to nu ɔ. Edwirɛ bɔ ɔnzɛkyɛ ɔbɔ so ne, ɔnga yenwo dwirɛ ngyire ebiala. Ebie bɔ yenye la berɛ ne, ɔse kyɛ sɛ ebie ngora nga yenoa ndo nu a, ɔkora fa ɔhaw ba. Yeti “ɛkora fa wɔ wora wura ye nu.” Odi ye mango Kristofoɛ nahorɛ, yeti edwirɛ biala bɔ ɔkɔfa bɛ kɔto edwirɛ nu ne, ɔmva yenoa mmɔ so. Sona bɔ ɔte sɔ ne, sɛ yenya ye wɔ y’asafo nu a, yayie koraa!
Bible Nu Dwirɛ Titire
g20. 1 11, box
Kyɛbɔ Ekogyina Adwenedwene Noa Ɔ
“YƐ PA FA TU W’ADWENEDWENE BO”
Bible ne ka kyɛ: “Sona bɔ ɔyɛ paa ne, ɔyɛ paa ma ye kra, nakoso atianuserɛniɛ de, ɔyɛ ye bɔbɔ ye nwo.”—ANYANDERA 11:17.
Nwomaa bie wɔ berɛ bɔ bɛfrɛ ye Overcoming Stress. Ɛnea sɔ nwomaa nanu a, edwirɛtire bie wɔ nu bɔ yenwa, “Yɛ Pa Fa Tu W’adwenedwene Bo.” Dr. Tim Cantopher yeɛ ɔhworɔle sɔ nwomaa ne. Ɔnwa, sɛ yɛyɛ mmenia pá a, ɔmaa yenya anwoserɛ, na yɛnye gye. Nakoso sɛ ebie tianu yɛ se, anaa ebiala dwirɛ mva ye nu a, anigye bɔ bɛfrɛ ye anigye de, ongonya bie. Ofikyɛ ebiala nguro kyɛ okopingye ye.
Nikyee foforɛ bɔ ɔkɔboka yɛ maa y’adwenedwene so kɔte yeɛ ole kyɛ, yɛngohu yenwo pee. Ɛhe kyire kyɛ nikyee bɔ ɛngɔhora ye yɛ ne, nnɛha wɔnwo. Afei, nnebu wɔnwo kyɛ wɔ so lle mvasoɛ. Yesu Kristo hane kyɛ: “Kuro ebiɛngo dwirɛ kyɛ wɔ bɔbɔ wɔ nwo.”—Marko 12:31.