Nhwehwɛmuɛ Ma Abrabɔ Ne Asɛnga Adesũa Nwomaa
© 2025 Watch Tower Bible and Tract Society of Pennsylvania
SEPTEMBER 1-7
NYAMEƐ DWIRƐ NANU ASUADEƐ ANYANDERA 29
Gyidihunu Ne Amammerɛ Bɔ Oggyi Bible So Ne, Twe Wɔnwo Fi Yenwo
wp16. 06 6, box
Mmeni pee wɔ berɛ a, gyidihunu ne sunzummɔne afa bɛ ayɛ ngoaa tekyɛ prizinfoɛ bɔ kyein la bɛ sa ne. Bɛfa nningyein biemɔ tekyɛ banzere ne nzɛbɛ bɛbɔ bɛnwo waen, na ebiemɔ koso kɔtɔ anɔntin ɔyɛl. Nakoso wɔde, ɔmvata kyɛ ɛyɛ bie. Ofikyɛ Bible ne ka y’ahone to yɛ kunu kyɛ: ‘AWURADE nye wɔ aseɛ ye aso amukoraa, kyɛ bɛ bɔ bedi nahorɛ bɛma ye ne, okogyina bɛ si.’ (2 Aberɛso Dwirɛ 16:9) Yehowa nwo yɛ se tra Satan koraa, yeti sɛ ɛfa wɔnwo to ye so a, ɔkɔbɔ wɔnwo waen.
Nakoso sɛ Yehowa kɔbɔ wɔnwo waen a, sana esua bɔ okuro nanwo nikye na ɛfa bɔ wɔ bra. Bɔ yɛka ye, Kristofoɛ bɔ ne bɛ wɔ tete Ɛfeso ne yɛle bie. Bɛyerale bɛ nwomaa bɔ ne bɛfa bɛye ngonyaa ne. (Asomafoɛ 19:19, 20) Wɔ koso, sɛ ɛpena kyɛ Yehowa bɔ wɔnwo waen a, nikyee biala bɔ bɛfa bɛye ngonyaa ne, odikyɛ ɛtwe wɔnwo fi yenwo. Ebie yeɛ ole banzere, nzɛbɛ, kaa, buuk, abaduaba, ɔne bɔ ɔboka so ɔ.
w19. 04 17 ¶13
Sɛ ɛnze kyɛ amammerɛ bie te pa anaa ɔttemaye a, bɔ Yehowa mbaeɛ kyɛ ɔma wɔ nyanza. (Kenga Yakobo 1:5.) Afei yɛ nhwehwɛmuɛ wɔ asafo nwomaa nu. Sɛ ɔkɔyɛ yé a, kɔ w’asafo nu mbanyi berɛ. Bengohyire wɔ bɔ odikyɛ ɛyɛ ɔ, na mmom bɛkɔma wɔ tworɔnzɛm bie bɔ ɔkɔboka wɔ ɔ. Ɛyɛ bɔ yabobɔ so ye a, ɛkɔtete w’adwene maa ‘okonwu nzonzoleɛ bɔ ɔwɔ pa ne tɛɛ nu ɔ.’—Heb. 5:14.
w18. 11 11 ¶12
Gyidihunu ne amammerɛ bɔ oggyi Bible so. Sɛ y’abusuafoɛ, bɛbɔ yɛne bɛyɛ adwuma, ɔne yɛ sukuufoɛ di afahyɛ bie a, ɛyɛ a ne bɛpena kyɛ yedi bie. Sɛ bedi bɛ hɔlidey anaa bɛyɛ amaneɛ bie bɔ Yehowa nguro, na bɛprɛsha yɛ kyɛ yɛyɛ bie a, yɛkɔyɛ sɛɛ na yahwe yɛnwo? Kyɛbɔ Yehowa bu sɔ nningyein nemɔ ne, sana yɛmaa ɔtena yɛ tianu. Nekaa bɔ hɔlidey nemɔ fi wale ne, yahyirehyire bie nu wɔ yɛ nwomaa nu, sɛ yɛkenga a ɔkɔboka yɛ. Sɛ yɛmaa bɔ yeti yeɛ Bible ne nwa nnɛmaa yedi sɔ hɔlidey nemɔ tena yɛ tianu a, okyire kyɛ yɛyɛ “bɔ ɔsɔ Awurade nye.” (Ɛfe. 5:10) Sɛ yɛfa yɛnwo yɛto Yehowa, ɔne ye dwirɛ Bible naso a, ‘yengosuro sona.’—Any. 29:25.
Bible Nu Dwirɛ Titire
it “Adɛfɛdɛfɛ” ¶1
Adɛfɛdɛfɛ
Bɛka kyɛ ebie dɛfɛdɛfɛ ebie a, okyire kyɛ ɔkamvo sona ne, koso ɔttelle ye lle. Ɛkɔnea po ne, ne wayɛ maa wabo so, anaa ɔgoro sona nanwo. Adwene ne yeɛ ole kyɛ ɔmaa sona ne tianu yɛ ye nufaa, nakoso ne opira ye, ofikyɛ ɔkɔmaa ɔkɔyɛ kokotii. Ɛkɔnea po ne, ne ɔpena sona ne nyunu animnyam anaa bɔ okonya kofi ye berɛ ti ɔ. Ɔmaa bɔ bɛdɛfɛdɛfɛ ye ne nya adwene kyɛ, kyɛbɔ asomasi kamvo me ye de, má nyɛ nikyee bie ma ye. Nna anwu kyɛ wasua ye ngaen ne? (Any 29:5) Ebie dɛfɛdɛfɛ mmenia a, ne olle nworɛ bɔ ofi Nyameɛ berɛ ne bie, na mmom ɔte ewiase adwene. Ewiase adwene koso de, ɔne pɛsɛmangomenya, mmenia nu nyeyemuɛ ɔne nyaatwom yeɛ bɛnate ɔ. (Yak 3:17) Yehowa kyi ebie bɔ ɔfa yenoa fa mmenia nwo, ɔte animnyampɛ, na ɔmaa mmenia yɛ kokotii ɔ.—2Ko 1:12; Gal 1:10; Ɛfe 4:25; Kol 3:9; Nye 21:8.
SEPTEMBER 8-14
NYAMEƐ DWIRƐ NANU ASUADEƐ ANYANDERA 30
“Nnɛmaa Medi Hiaa, Yeɛ Nnɛmaa Menya Me Nwo Tam”
w18. 01 24-25 ¶10-12
Mbanyi ka kyɛ esikaa te mogya a, bɛnnaka. Esikaa bɔ sona nwo waen. (Nwo. 7:12) Nakoso yebisa kyɛ, esikaa bɔ ele ye ne, ye ala yeɛ ɛfa yɛ totɔ-bi-di a, wɔnye kɔhora kɔgye anaa? Yoo! (Kenga Nworɛ Dwirɛhanɛniɛ 5:12.) Yake awa Agure hworɔle kyɛ: “Nnɛmaa medi hiaa, yeɛ nnɛmaa menya me nwo tam, na mmom, ma me me noa aleɛ bɔ mehia ɔ.” Ɛmɔma yɛha, sɛ ne onguro kyɛ okoli hiaa a, ndeaseɛ wɔ nu! Ofikyɛ okyirekyire ye dwirɛ nanu ne, ɔhane kyɛ, ehiaa soma wɔ a ɛkɔyɛ sɛɛ na aha kyɛ ɛngɔhɔ? Ye koso de, ne onguro kyɛ okowua na wagua Yehowa dumaa nwo fiɛ. Yede, nzuati yeɛ ɔbɔle mbaeɛ kyɛ nnɛmaa onya yenwo tam koso ɔ? Ɔtoale so kyɛ: “Amaa ɔnate so mannya me nwo tam, ná mambo wɔ manga kyɛ, “Nwa ole AWURADE?”” (Any. 30:8, 9) Yɛka ye, ebiaa ɛse ebiemɔ bɔ bafa esikaa bayɛ bɛ Nyameɛ ɔ.
Bɛbɔ bafa esikaa bayɛ bɛ Nyameɛ ne, bɛngɔhora bɛngɔso Nyameɛ. Yesu nwa: “Sona biala ngora nzo meneɛ nyɔ; ofikyɛ ɔba ye sɔ a, ɔkɔpɔ ko, né wahuro ko dwirɛ; anaakyɛ ɔkɔso ko nahorɛ nu, né wabu ko animtia. Ɛmɔngɔhora ngɔso Nyameɛ ne anwonyadeɛ.” Kora bɔ yeɛ ɔka sɔ dwirɛ ne, ɔhane kyɛ: “Nnɛma ɛmɔboaboa agyapadeɛ noa bɛma bɛ nwo wɔ aseɛ ye aso, nekaa bɔ mvrɔlɔ di ná odi naakye, ná awuefoɛ bubu kɔ nu bekowua ne. Na mmom ɛ́mɔboaboa ɛmɔ agyapadeɛ noa bésie nyameɛso, nekaa bɔ mvrɔlɔ nni, ná onni naakye, ná awuefoɛ mmubu ngɔ nu ngonwua ɔ.”—Mat. 6:19, 20, 24.
Mmeni pee anwu ye kyɛ sɛ bɛtete nningyein so wɔ b’asetena nu a, ɔmaa bɛnye gye, na benya mmerɛ bɛfa bɛso Yehowa. Jack ne ɔye wɔ United states. Ne ɔpena kyɛ ɔne ɔye bɔnu yɛ ateepakyelɛ adwuma ne, yeti ɔtɔnene ye awuro pirikua, ɔne ye adwuma. Ɔnwa: “Ne ɔtte bɛtɛɛ kyɛ yɛkɔyɛ sɔ. Dáa ne, ngofi adwuma ngɔwa awuro biala, ne mayɛ basaa. Nakoso meye de, ateepakyelɛ adwuma nati, daa ne yenye agye. Ne me ye taa ka kyɛ ‘me bɔss de, ɔtra bɔss biala.’ Kesaalae me koso meyɛ ateepakyelɛ adwuma ne bie, yeti yemu yɛ bɔss te ko; yeɛ ole Yehowa.”
w87 5/15 30 ¶8
◆ Anyandera 30:15, 16—Aba beni yeɛ ɔwɔ tworɔnzɛm he anu ɔ?
Ɔmaa yenwu kyɛbɔ ebie nye boro nikyee a, ɔyɛ ye nikyee ɔ. Kyɛbɔ mimina twe mogya a ye ko nyi ne, sɔ ala yeɛ bɔ yenye boro esikaa ne te hɔ ɛne; bɔ okonya ye biala nzɔ yenye. Sɔ ala yeɛ ɛborɔ koso abukye yenoa nu balaa yeɛ ode awufoɛ gua nu ɔ, koso ye ko nyi. Yeɛ mmotaen koso ‘su’ pena mmaa. (Gyenesise 30:1) Aseɛ bɔ nu awo wosee ne, sɛ nzue tɔ a ɔngyɛ ne ye mu ameme ahɔ; ɛnwa gya nzue tɔlle lle. Sẽe koso, nikyee biala bɔ ɛkɔfa kɔto nu ne, ɔkɔyera. Ɛkɔnea po ne, nikyee bie pingye ye a, ne wasɔ nu sɔa wom! Sɔ ala yeɛ ebie bɔ yenye boro nikyee te hɔ ɛne. Nakoso ebie bɔ ole nworɛ bɔ ofi anwuro ne de, ɔmma sɔ anyeborolɛ ne mvofo ye.
w11 6/1 10 ¶4
Sie sikaa kora na atɔ nikye. Ebiemɔ adwene yɛ bɛ kyɛ sɔ nikyee ne apɛ nu. Nakoso sɛ esie sikaa kora na atɔ nikyee a, ɔboka wɔ na anzoa ɛkerɛ angua wɔnwo so. Ofikyɛ sɛ efiri anaa ɛbɔ bosea fa tɔ a bekosi yenwo bɛkɔma wɔ, yeti ɛhene koso kɔɔboka nikyee ne nyɔboɛ naso. Bible ka kyɛ ngyiregyira se nworɛ, ɔnate kyɛ “bɛpena aleɛ besie” nati.—Anyandera 6:6-8; 30:24, 25.
18 Adwene bɔ yele ye wɔ esikaa nwo ne, ɔwɔ nu alaa a, odikyɛ yɛdwene yenwo bieku. Bisa wɔnwo kyɛ: ‘Aso metaa medwene esikaa, ɔne nningyein bɔ ngɔtotɔ nanwo anaa? Sɛ ebie bɔ me bosea a, ɛyɛ a memaa mmerɛ bɔ odikyɛ mefa metua ne pa yenwo, ofikyɛ mesusu kyɛ ole sikaa hɔ ɔ? Me sikaa ti, memva bɛbɔ belle bie ne menyɛ huu anaa? Nde ebie bɔ mesa bo yɛ se hɔ ɔ? Aliemaamɔ bɔ bele sikaa ne, ɛyɛ a menya adwene kyɛ bɛ sikaa nwo hia bɛ tra nikyee biala anaa? Asikafoɛ yeɛ mene bɛfa adamvoa ɔ, na ahiafoɛ de, menga mengɔ bɛnwo anaa?’ Ɔte yenwo atee pirikua paa kyɛ yɛwɔ Yehowa tena sua nanu ɔ. Sɛ yɛkɔhora yɛkɔsɔ nu yé a, ɔnzɛkyɛ yɛmaa yɛnye boro esikaa. Sɛ yɛyɛ sɔ a, Yehowa ɔngɔyakyi yɛ nu llé!—Kenga Hebrifoɛ 13:5.
Bible Nu Dwirɛ Titire
it-1 115 ¶1-2
‘Bafa Nworɛ Bawura Bɛ Nu.’ ‘Nworɛ’ bɔ ngyiregyira le ye ne, banzua, na mmom sɔ ala yeɛ bɛbɔle bɛ ɔ. Bible ne ka ngyiregyira nwo dwirɛ kyɛ, sɛ ‘odwu ahuhuro mmerɛ a, ɔpena ye aleɛ sie, yeɛ fieso aleɛ falɛ dwu a, ɔboaboa aleɛ noa.’ (Any 6:8) Ɛkɔ Palestine a, ngyiregyira ko bie de, ɔnyɛ nna berɛ. Bɛyɛ bɛ nikyee tekyɛ kuaniɛ. Odwu ahuhuro mmerɛ a, bɛboaboa aleɛ bɔ ayire ba a bekoli noa. Ofikyɛ odwu sɔ mmerɛ ne a, ɔyɛ se kyɛ bekofite bɛkɔɔpena aleɛ. Ɛtaa nwu sɔ ngyiregyira ne wɔ nekaa bɔ bɛboro atokoɔ, ofikyɛ ɛberɛ de aleɛ nyɛ nna. Sɛ nzue tɔ maa b’aleɛ nanu yɛ frɔlɔɔ a, bɛsesa begua eyia nu, na baworɛ nu. Bɔ ɔkɔyɛ na aleɛ bɔ baboaboa yenoa ne amvifi ne, bɛfa bɛ gyé bɛka nekaa bɔ ofifi ne. Bɔ ɔmaa benwu nekaa bɔ bɛla yeɛ ole kyɛ, atee bɔ bɛfa so ne, bahwi so alaa maa watɔ so. Afei, ɛyɛ a bɛfa aleɛ boen bɛto bɛ bɔen ne noa.
Bɔ Ɔyɛ Nyeme Wɔ Bɛnwo Ɔ. Ngyiregyira nwo nikyee kaa bɔ yasua nati, ɔnyɛ nwanwa kyɛ betu yɛ fo kyɛ: “Ɛfoen sona, kɔ ngyiregyira berɛ, nea kyɛbɔ ɔyɔ ye nningyein ɔ, ná sua nworɛ.” (Any 6:8) Bɔ yɛfa yɛse bɛ paa yeɛ ole kyɛbɔ bɛboaboa aleɛ noa besie ne. Nakoso nikyee foforɛ bɔ ɔwɔ bɛnwo yeɛ ole kyɛ, sɛ adwuma ne te sɛɛ oo, sɛ ɔte sɛɛ oo, bemia bɛnye bɛyɛ; bɛmma b’abanu mmu. Nikyee bɔ nu yɛ no tra bɛ po ne, bɛkora bɛpagya anaa bɛtwe ye ase. Sɛ bɛnate nekaa bɔ ɛberɛ yɛ ndono a, ekonwu ye ne, né befi ase ná bedwɔso, né bebu bɛfa so; koso baha kyɛ bɛkɔhɔ ne de, ɛyɛ bɛ sɛɛ, bɛkɔhɔ. Nikyee ko koso yeɛ ole kyɛ, bɛbokaboka bɛnwo paa. Nekaa bɔ bɛla ne, bɛbɔnu besiesie berɛ maa ɛberɛ te waenn. Afei sɛ benu bie pira anaa olle anwoserɛ a, bɛsosɔ ye nu fa ye ba nekaa bɔ bɛla ne.
SEPTEMBER 15-21
NYAMEƐ DWIRƐ NANU ASUADEƐ ANYANDERA 31
Maame Bie Tu Ɔwa Fo—Bɔ Yesua Yefi Nu Ɔ
w11 2/1 19 ¶7-8
Nikyee deinn bɔ ɔwɔ brienzua ne brasua nnaa nu ne, ma benwu ye. Ɔte pa kyɛ ɛkɔboka bɛ maa bɛkɔyɛ ahwɛyie. (1 Korintofoɛ 6:18; Yakobo 1:14, 15) Nakoso maa benwu kyɛ, Bible ne ka nnaa nwo dwirɛ kyɛ ɔte akyɛdeɛ bɔ ofi Nyameɛ berɛ, na ɔtte Satan ngaen. (Anyandera 5:18, 19; Edwein Nu Dwein 1:2) Ɛka nnaa nwo dwirɛ a, nnɛka asane bɔ ɔwɔ nu ne ngome, wannyɛ sɔ a ɛwa ne konya nnaa nwo adwene bɔ ɔne Bible ne nyia ɔ. Taluwa bie fi France bɔ bɛfrɛ ye Corrina. Ɔnwa: “M’awofoɛ ka nnaa nwo dwirɛ a, asane bɔ ɔwɔ nu ne yeɛ babɔ berɛ dededede. Ɛhe maa nyane brienzua ne brasua nnaa nwo adwene bɔ ɔttemaye.”
Nikyee deinn bɔ ɔwɔ brienzua ne brasua nnaa nu ne, má wɔ mmaamɔ nwu ye. Sɔ ala yeɛ maame bie bɔ ofi Mexico bɔ bɛfrɛ ye Nadia yɛle ɔ. Ɔnwa, “me ne me mmaamɔ bɔ nnaa nwo ngɔmmɔ a, me maa benwu kyɛ ɔte akyɛdeɛ bɔ ofi Yehowa berɛ, na ɔyɛ fɛ paa. Nakoso Yehowa fa mane bɛbɔ bagya ne ngome. Sɛ ɔkɔmaa wɔnye kɔgye oo, wɔ wora kɔbɔ oo, ogyi kyɛbɔ ekotie mmraa bɔ ɔla yenwo naso.”
ijwhf article 4 ¶11-13
Ɛne wɔ mmaamɔ bɔ nzaa nwo ngɔmmɔ. Baba bie bɔ ofi Britain bɔ bɛfrɛ ye Mark hane kyɛ, “sɛ ɛne ngwalaa bɔ nzaanonɛ nwo ngɔmmɔ a, ɛyɛ a ne wayɛ nikyee bie bɔ ɔwɔ berɛ ɔ. Mmisale mma abɛɛmaa bɔ wali afoɛ 8 ne kyɛ, ɔnea a ɔte pa kyɛ ebie kɔno nzaa, anaa ɔttemaye? Mamma wanya adwene kyɛ mebaasɔ ye menea, yeti wamva nikyefee wamvea me.”
Ɛtaa ne ɛwa bɔ nzaa nwo ngɔmmɔ a, okonwu kyɛ ɔte ahiasɛm. Ma ɛwa ne nwu kyɛ sɛ ɔka kar na ɔno nzaa a, ɔkɔhora konya asedɛnt. Yeɛ wannea ye nzaanonɛ yé a, ɔkɔhora kɔbɔ adwaman.
Ma besua wɔ. Kyɛbɔ eminae nono nzue ne, sɔ ala yeɛ ngwalaa te hɔ ɛne; bɔ ɛyɛ biala besua. Nhwehwɛmuɛ kyire kyɛ bɛbɔ ngwalaa sua bɛ paa yeɛ ole b’awofoɛ. Yeti sɛ ɛwa hyɛ ye nzorɛ kyɛ ɛno nzaa fa te wɔ fɛɛ ne w’adwenedwene so a, okonya adwene kyɛ saa ɛhene ati yeɛ bɛno nzaa ɔ. Yeti nea wɔ nzaanonɛ yé na besua wɔ.
g17. 6 9 ¶5
Ma benwu kyɛ ekuro adɔyɛ. Fa wɔ subaen kyire wɔ mmaamɔ kyɛ ‘ɔte nhyiraa pee kyɛ ɛkɔma tra kyɛ ekole ɔ.’ (Asomafoɛ 20:35) Ɛkɔyɛ ye sɛ? Ekuro a ɛne ɛwa ne bɛhworɔ bɛbɔ yenwo kohia kyɛ ekodi dwaa ma bɛ, ɛfa wɔ kar kɔfa bɛ, anaa ɛboka maa besiesie nningyein bɔ wasɛkye wɔ b’awuro ne dumaa. Ɛkɔ a, na ɛne ye abɔnu ahɔ. Ma ɛwa ne nwu kyɛ bɔ ɛyɛ ne, wɔnye gye yenwo. Ɛyɛ sɔ a, ne ɛfa wɔ nneyɛɛ kyire wɔ mmaamɔ ahobrɛaseɛ.—Tworɔnzɛm bɔ ogyi so ɔ: Luka 6:38.
Bible Nu Dwirɛ Titire
w92 11/1 11 ¶7-8
Wɔ tete Yisrael ne, ne maame ne baba namu kyirekyire bɛ mmaamɔ fi bɛ ngwalaa nu pɛɛ. (Deuteronomi 11:18, 19; Anyandera 1:8; 31:26) Ebie bɔ wabe paa wɔ Bible nu bɔ bɛfrɛ ye Mangenot hworɔle kyɛ: “Akwalaa ne hyɛ yebo kyɛ odwudwo pɛ, osua Mmraa nanu dwirɛ kaa. Ye maame kenga kaa kyire ye a, ne wamaa wabobɔ so alaa maa yenoa atɔ so. Onwu ye pɛ, na bahɔ foforɛ so. Odwu nekaa bie a, tworɔnzɛm bɔ wali ye baba wagua ye tianu ne, ne bafa bawura ye sa nu kyɛ ɔkenga. Sɔ atee ne yeɛ ne bɛfa so bekyire akwalaa ne akengalɛ ɔ. Yeti sɛ onyi a, ne ye bɔbɔ ɔkora kenga Bible ne dwenedwene yenwo.”
SEPTEMBER 22-28
NYAMEƐ DWIRƐ NANU ASUADEƐ NWORƐ DWIRƐHANƐNIƐ 1-2
Kɔso Tete Ngwalaa Bɔ Bɛba Ne
w17. 01 27-28 ¶3-4
Adwuma bɔ owura yɛ sa wɔ asafo nanu ne, yenu pee wɔ berɛ a yɛnye gye yenwo alaa maa yenyane a ahaa yayɛ yahɔ ewue nu. Nakoso yengonya ye sɔ. Ofikyɛ ofi Adam aberɛso tɔnn, aworɛ ndoatoasoɛ kɔ, na aworɛ ndoatoasoɛ awa. (Nwo. 1:4) Ɛhe afa ɔhaw pee abrɛ nahorɛ Kristofoɛ ɛlɛsaen. Adwuma bɔ Yehowa mmenia yɛ ne, ɛhɔlɛ ala yeɛ ɔkɔ ye nyunu ɔ. Ɔkɔ ye nyunu ne, ne nzakrayɛɛ pee ba. Ngaen bɔ bɛfa bɛyɛ adwuma koso, daa foforɛ ba. Yeti odikyɛ yesua kyɛbɔ yɛkɔfa yɛkɔyɛ adwuma ɔ. Ɔba sɔ a mbanyi-mbanyi nemɔ pee nnwu so. (Luka 5:39) Sɛ bɛse ngaen nanu po a, b’anwoserɛ de ondwu mmrandeɛ nemɔ deɛ. (Any. 20:29) Ɛhene ati yeɛ odikyɛ bɛtete mmrandeɛ nemɔ maa bɛbasɔ adwuma nanu ne.—Kenga Edwein 71:18.
Bɛbɔ dwumadie wura bɛ sa wɔ asafo nanu ne, ɔtɔ mmerɛ bie a ne wayɛ se wama bɛ kyɛ bɛkɔyakyi bie nu bɛkɔma mmrandeɛ ne. Ɛyɛ a ne b’adwene yɛ bɛ kyɛ bekole b’adwuma bekofi bɛ sa nu. Ebiemɔ koso adwene yɛ bɛ kyɛ mmrandeɛ nemɔ ngɔyɛ ye yé. Ebiaa ebiemɔ koso kɔha kyɛ belle alagye bɔ bɛfa bɛtete ebie ɔ. Mmrandeɛ ne koso, sɛ banyakyi adwuma nanu bamma bɛ a, odikyɛ benya aboterɛ.
Bible Nu Dwirɛ Titire
it “Nworɛ Dwirɛhanɛniɛ” ¶1
Nworɛ Dwirɛhanɛniɛ
Bekyire Hebrew dumaa Qo·heʹleth bo kyɛ, “ebie bɔ ɔboaboa mmenia noa ɔ.” Ahemvo bɔ ne bedi Yisrael maen naso ne, sɛ ne bɛfa sɔ dumaa ne bɛfrɛ bɛ a, ɔfata paa. (Nwd 1:1, 12) Ofikyɛ, ne b’adwuma yeɛ ole kyɛ bɛkɔboaboa Nyameɛ mmenia bɔ bahyira bɛnwo so ne noa, na baboka bɛ maa bali nahorɛ bama ye. (1Ah 8:1-5, 41-43, 66) Ɛhe ati, sɛ ne ɔhene bie di Yisraelfoɛ nemɔ nyunu maa bɛso Yehowa a, bɛka kyɛ ɔte ɔhene pa. Wangora wannyɛ sɔ a, bɛnwa ɔte ɔhene bɔne. (2Ah 16:1-4; 18:1-6) Mmerɛ bɔ ne Solomon te ɔhene ne, ɔboaboale Yisraelfoɛ, ɔne ɛwɔfoɛ amukoraa noa, na ɔmaa bɛsone Yehowa wɔ asɔre awuro berɛ. Wɔ Nworɛ Dwirɛhanɛniɛ nwomaa nanu ne, ne ɔpena kyɛ ɔboka Nyameɛ mmenia maa bɛtwe bɛnwo befi nningyein bɔ mvasoɛ nne so bɔ ɔwɔ ewiase nanu nanwo. Ofikyɛ ne bahyira bɛnwo so bama Nyameɛ, yeti ne odikyɛ bɛyɛ bɔ okuro ɔ. Dumaa Qo·heʹleth ne, yenya yefili Greek Septuagint nanu, na ɛhene yeɛ bekyire yebo wɔ borɔfo Bible nanu kyɛ Ecclesiastes anaa Nworɛ Dwirɛhanɛniɛ wɔ Sehwi Bible nanu ne; na yebo kyire “ebie bɔ ɔboka mmenia bɔ baboaboa bɛnoa naso.”
SEPTEMBER 29–OCTOBER 5
NYAMEƐ DWIRƐ NANU ASUADEƐ NWORƐ DWIRƐHANƐNIƐ 3-4
Nyamaa Bɔ Ɔbɔ Yenwo Nza Ne, Ɛmɔma Nu Yɛ Se
ijwhf article 10 ¶2-8
● Sɛ bɛbɔ b’agya ne yusu fon, tablɛt anaa kɔmpita yé a, ɔkɔmaa b’agyaa ne kosó. Sɛ aleɛ kye na benu biala kɔ adwuma a, bɛfa bedi ngɔmmɔ kyɛbɔ ɔkɔyɛ a ebiala konwu kyɛbɔ ye mmango nwo si te ɔ.
“Sɛ ɛtworɔ mɛsegye tikaape kyɛ ‘me dɔ wɔ’ anaa ‘me wora adɔ wɔ’ kɔma ehu anaa ɛye a, ɔboka paa.”—Jonathan.
● Sɛ anyusu fon yé a, ɔkɔhora kɔmaa w’agyaa kɔyɛ basaa. Ebiemɔ wɔ berɛ a, bekuro fon soma, yeti bennya mmerɛ bɛmma bɛye anaa bɛhu.
“Ɔtɔ mmerɛ bie a, ahaa mehu nyane a ɔne me kɔbɔ ngɔmmɔ paa, koso fon bɔ memiemia so nati, ne wapena nekaa wafa.”—Julissa.
● Ebiemɔ nwa sɛ bemiemia fon so po a, bɛkɔhora ne bɛye anaa bɛhu kɔbɔ ngɔmmɔ maa ɔkɔyɛ yé. Bɛfrɛ maame bie Sherry Turkle; wasua mmenia daadaa asetena nwo dwirɛ wahɔ siɛ. Yenwa, “ɛkɔhora kɔyɛ ɛhe, na asa ayɛ ɛhe wɔ mmerɛ komapɛ nu. Nakoso sɛ ɛka kyɛ nu biala kɔyɛ kama de a, ná ɛlaka wɔnwo.” Ebiemɔ adwene yɛ bɛ kyɛ sɛ ɛkora keka adwuma pee bɔ so sɔ a, okyire kyɛ wɔnwo apɛ, koso bɛlaka. Maame ne sa hane kyɛ, “ɛyɛ sɛɛ alaa a, ɛngɔhora ngɔyɛ nu biala yé.”
“Me ne mehu bɔ ngɔmmɔ a, menye gye, nakoso nna mmerɛ bɔ ɔyɛ nikyee foforɛ ɔ. Sɛ yɛbɔ ngɔmmɔ na osa miemia ye fon so a, ne ɔpena kyire kyɛ ye fon yeɛ ɔmaa yenye gye ɔ, na nna me ɔ.”—Sarah.
Bɔ yɛka ye, ye tendenn ne ye tikaape yeɛ ole sɛɛ? Eyusu fon yé a, ɔkɔboka ɛmɔ agyaa ne, anyusu ye yé a, okogyigya.
Ɔdɔ Bɔ Ɔwɔ Agyaa Nu Ne, Ɔte Kyɛ Sẽe. Nnɛmaa Onua
12 Sɛ agya a, nzu yeɛ ɛkɔhora kosũa kofi bɔ Akwila ne Prisilla yɛle nanu ɔ? Ɛmɔyere bɛnwo kyɛ ɛmɔkɔbɔ nu bɛkɔyɛ nningyein. Sɛ ɛmɔyɛ sɔ a, ɔkɔmaa ɛmɔnye kɔgye. Né Akwila ne Prisilla bɔ nu yɛ asɛnga adwuma ne, na ɛmɔkɔhora bekosuesũa bɛ. Afei koso, né Akwila ne Prisilla yɛ adwuma kõ. Ebia wɔ de, ɛne ehũ anaa ɛye nyɛ adwuma kõ, nakoso ɛmɔkɔhora bɛkɔbɔ nu bɛkɔyɛ adwuma wɔ awuro. (Nwo. 4:9) Sɛ ɛmɔbɔ nu bɛyɛ adwuma bie a, ɔkɔmaa ɛmɔ konya mmerɛ bɛkɔbɔ ngɔmmɔ. Robert ne Linda gyale ne, kɔbo afoɛ 50 ɛhe. Robert hãne kyɛ: “Ɔwɔ nu, yellé mmerɛ pẽe bɔ yɛfa yɛgye yɛnye ɔ, nakoso sɛ menwunzi nningyein, ná meye kyikyi yenwo, anaa metutu ndire wɔ awuro ná meye boka me a, ɔmaa menye gye paa. Ɔnate sɔ nningyein bɔ yebɔ nu yɛyɛ nati, ɔmaa yenya mmerɛ yɛbɔ ngɔmmɔ, na ɛhẽne amaa yahɔ so yanya ɔdɔ yama yɛnwo.”
13 Sɛ bɛbɔ bagya ne aanea yé a, nhyehyɛɛ bɔ bayɛ kyɛ bɛkɔbɔ nu bɛkɔyɛ nningyein ná babɔ ngɔmmɔ ne, bɛkɔfa bɛkɔyɛ nikyee foforɛ. Maame bie bɔ ɔwɔ Brazil hãne kyɛ: “Bɔ mahyɛ ye nzorɛ yeɛ ole kyɛ, ɔnate nningyein bɔ ɔwɔ ewiase he anu ɛnnɛ nati, nhyehyɛɛ bɔ bɛbɔ bagya ne ayɛ kyɛ bɛkɔfa bɛkɔbɔ ngɔmmɔ ne, nningyein biemɔ tekyɛ fon anaa TV kɔhora kole kɔbɔ so. Yeti sɛ banyere bɛnwo a, ɔwɔ nu kyɛ bɛte sua kõ anu de, nakoso bengonya mmerɛ pó, né bafa babɔ ngɔmmɔ. Ɛhẽne ati, sɛ odwu mmerɛ bɔ odikyɛ mene mehũ bɔ ngɔmmɔ a, mebɔ mmɔden kyɛ mengɔma sɔ nningyein ne ngosi me atẽe.” Sɔ ala yeɛ Bruno ne ɔye Tays koso yɛ ɔ. Bruno hãne kyɛ: “Sɛ odwu mmerɛ bɔ odikyɛ yɛbɔ ngɔmmɔ a, yemmiemia yɛ fon so, anaa yɛnyɛ nikyee foforɛ biala.”
14 Yede, yɛfa ye kyɛ ebia ɛne ehũ anaa ɛye, ɛmɔngora bɛndena ase bɛmmɔ ngɔmmɔ, na kyẽa bɔ ɛmɔ kɔbɔ ngɔmmɔ ne koso, né wakakyi ɛyaafɛlɛ. Sɛ ɔba sɔ a, nzu yeɛ ɔkɔhora kɔboka ɛmɔ ɔ? Ɛmɔma yɛnea sẽe bɔ yɛhãne yenwo dwirɛ wɔ adesũa he ahyɛaseɛ ne biekũ. Sɛ sẽe ne kɔhɔso kɔsɔ bɔ ongonua a, odikyɛ ɛkɔso fa eyein wura nu. Ɛmɔ koso, ɛmɔkɔhora bɛkɔfa mmerɛ kãa bie kɔbɔ nningyein bɔ ɛmɔnye gye yenwo nanwo ngɔmmɔ kyẽa biala. Afei nningyein bɔ ɔkɔfa ɛyaafɛlɛ kɔwa ne, ɛmɔbɔ mmɔden kyɛ, ɛmɔ ngɔhã ɛhẽne anwo dwirɛ. (Yak. 3:18) Sɛ ɛmɔ yɛ sɔ a, ɛmɔkosa bekonya ɔdɔ bɛkɔma ɛmɔ nwo, na ɛmɔ agyaa ne kosó.
Ɔdɔ Bɔ Ɔwɔ Agyaa Nu Ne, Ɔte Kyɛ Sẽe. Nnɛmaa Onua
3 Sɛ bɛbɔ bagya ne kɔhɔso konya ɔdɔ kɔma bɛnwo a, sana bɛyere bɛnwo kyɛ bɛkɔhɔso bekopingyé Yehowa. Sɛ bɛyɛ sɔ a, sɛɛ yeɛ ɔkɔboka bɛ wɔ bɛ agyaa nanu ɔ? Yehowa yeɛ ɔhyehyɛle agyaa ɔ, yeti sɛ bɛbɔ bagya ne kɔso fa ye afutuo bɛyɛ adwuma a, ɔkɔboka bɛ maa bekogyina ɔhaw biala bɔ beyia ye wɔ bɛ agyaa nanu ne noa. Ɛhe kɔmaa bɛkɔhɔso bekonya ɔdɔ bɛkɔma bɛnwo. (Kenga Nworɛ Dwirɛhanɛniɛ 4:12.) Sɛ ebie yere yenwo suesũa Yehowa a, ɔmaa onya subaen bie te kyɛ, anwuvoinnwunɛ, aboterɛ, ɔne bɔne fakyɛ. (Ɛfe. 4:32–5:1) Yeti, sɛ bɛbɔ bagya ne nya sɔ subaen he bie a, ɔkɔmaa bɛkɔhɔ so bekonya ɔdɔ bɛkɔma bɛnwo. Aliemaa brasua bie bɔ bɛfrɛ ye Lena bɔ wagya kɔbo afoɛ 25 ɛhe ne, ɔhãne kyɛ: “Sɛ ebie le subaen pá a, ɔmaa ekuro ye dwirɛ, na ebu ye paa.”
Bible Nu Dwirɛ Titire
it “Ɔdɔ” ¶39
Ɔdɔ
“Ɔdɔ Le Ye Mmerɛ.” Bɛbɔ Yehowa nwu bɛ kyɛ ɔdɔ mvata bɛ, anaa bɛnwa bɔne alaa yeɛ bɛkɔyɛ ne, bɛ ngome yeɛ Yehowa nnɔ bɛ ɔ. Nyameɛ de ɔdɔ ebiala, nakoso sɛ onya nwu ye kyɛ ebie kyi ye de a, ɔnnɔ ye ko. Yehowa ne Yesu Kristo amukoraa dɔ tenenee, na bekyi bɔne. (Edw 45:7; Heb 1:9) Bɛbɔ bekyi Yehowa ne de, bɛmvata kyɛ ɔdɔ bɛ. Ye mia bɛmva ye dɔ bɛnyɛ huu, yeti mvasoɛ beni yeɛ ɔwɔ so kyɛ ɔdɔ bɛ ɔ? (Edw 139:21, 22; Yes 26:10) Yeti sɛ Nyameɛ nwa okyi bɛ a, ɔhanne bɔne, na ole mmerɛ bɔ ɔkɔfa kɔsɛkye bɛ ɔ.—Edw 21:8, 9; Nwd 3:1, 8.
OCTOBER 6-12
NYAMEƐ DWIRƐ NANU ASUADEƐ NWORƐ DWIRƐHANƐNIƐ 5-6
Bɔ Yɛyɛ Yɛfa Yekyire Kyɛ Yebu Yehowa
w08 8/15 15-16 ¶17-18
Sɛ yɛkɔ Yehowa nyunu a, odikyɛ yɛmaa obuo ba nu paa. Nworɛ Dwirɛhanɛniɛ 5:1 ka kyɛ, ‘sɛ ɛkɔ Nyameɛ awuro a, nea wɔ nwo yé wɔ bɔ ɛkɔyɛ nwo.’ Nyameɛ ha hyirele Mose ne Yosua kyɛ bɛye bɛ mmaboa mmerɛ bɔ ne begyi aseɛ krongron so ne. (Ɛks. 3:5; Yos. 5:15) Ne odikyɛ bɛyɛ sɔ bɛfa bekyire kyɛ bɛbu Yehowa. Yisrael asɔfo nemɔ koso, ne odikyɛ bewura pieto bɛfa ‘bɛkata bɛ bienzua so.’ (Ɛks. 28:42, 43) Né ɛhe boka bɛ maa bɛyɛ adwuma wɔ asɔre awuro berɛ a, bɛnwo ngua berɛ. Ne odikyɛ sɔfo biala fa sɔ akwangyerɛ ne yɛ adwuma fa kyire kyɛ obu Yehowa.
Nikyee biala bɔ yɛyɛ yɛfa yɛso Yehowa ne, odikyɛ yɛmaa obuo ba nu. Ebu wɔnwo a, yeɛ ebie bu wɔ ɔ. Nna yɛ ndaadeɛ ngome yeɛ yɛfa yekyire kyɛ yebu nikyee ɔ, yeɛ nna kyɛ yenwu mmenia a yeɛ yɛkɔyɛ yɛnwo kyɛ yebu nikyee ɔ. Kyɛbɔ Yehowa nwu yɛ ne yeɛ ohia ɔ, na nna nhwehwɛanim biala. (1 Sam. 16:7; Any. 21:2) Bɔ yɛyɛ biala odikyɛ yɛmaa obuo ba nu, kyire kyɛ odikyɛ yɛmaa ɔbaboka yɛ subaen so. Ɔba sɔ a, kyɛbɔ yɛne mmenia di, ɔne kyɛbɔ yebu yɛnwo ne, okohyire kyɛ yebu nikye. Yɛnoa dwudwolɛ koso, odikyɛ yɛmaa obuo ba nu. Sɛ ɔba yɛ subaen, kyɛbɔ yebu yɛnwo, ɔne kyɛbɔ yesiesie yɛnwo a, odikyɛ yɛfa Pɔɔlo afutue he yɛyɛ adwuma: “Yɛndo ebiala sundidua, ná ebiala angã yɛ som ne nwo dwirɛ tɛɛ. Na mmom yɛye yɛ nwo ali yekyire kyɛ yɛte Nyameɛ asomvoɛ wɔ atee biala so.” (2 Kor. 6:3, 4) ‘Yɛmaa yɛ Ngoadefoɛ Nyameɛ ngyerɛkyerɛ ne nya anidie wɔ nikyee biala nu.’—Tito 2:10.
w09 11/15 11 ¶21
Gyidie ne obuo yeɛ Yesu fa bɔle mbaeɛ ɔ. Kora bɔ yeɛ otingye Lasarɔso ne, “Yesu neane anwuro hane kyɛ, ‘Baba, meda wɔ ase kyɛ atie me ɔ. Me de, mese kyɛ etie me daa.’”(Yoh. 11:41, 42) Sɔ obuo ne gyidie ne bie yeɛ ɛfa bɔ mbaeɛ anaa? Yesu mbaeɛ bɔ ohyirele yɛ ne, sɛ ɛnea nu yé paa a, ekonwu kyɛ nningyein titire nza he yeɛ ɔwɔ nu ɔ: Yehowa dumaa bɔ yenwo kɔte, ye Ahennie bɔ ɔkɔwa, ɔne ye apɛdeɛ bɔ ɔkɔyɛ berɛ ne. (Mat. 6:9, 10) Enwu wɔ mbaeɛ sɛɛ? Aso okyire kyɛ Yehowa Ahennie, ye apɛdeɛ, ɔne ye dumaa bɔ yenwo kɔte ne, yenwo hia wɔ anaa? Sɔ yeɛ odikyɛ ɔyɛ ɔ.
w17. 04 6 ¶12
Yɛbɔ asu a, nna yeyielle. Odikyɛ yɛkɔso yedi nahorɛ yɛma Yehowa yɛfa yekyire kyɛ yahyira yɛnwo so amba. Yɛkɔhora yekobisa yɛnwo kyɛ: ‘Ofi mmerɛ bɔ mmɔle asu dee bɔ ɔbaadwu bekye ne, mahɔ me nyunu wɔ Yehowa soen nu anaa? Mvi m’ahone amukoraa nu yeɛ meso Yehowa anaa? (Kol. 3:23) Metaa mebɔ mbaeɛ? Mekenga Bible daabiala? Mekɔ adesua daa? Meyɛ asɛnga adwuma ne kyɛbɔ m’anwoserɛ kɔhora? Kyɛbɔ meyɛ sɔ nningyein nemɔ ne, so ate anaa?’ Somafoɛ Petro maa yɛte yebo kyɛ, sɛ yenguro kyɛ yɛkɔte yɛkɔla a, yɛfa nimdeɛ, animia, ɔne nyamesom pa yɛboka yɛ gyidie so.—Kenga 2 Petro 1:5-8.
Bible Nu Dwirɛ Titire
w20. 09 31 ¶3-5
Nworɛ Dwirɛhanɛniɛ 5:8 ne, ɔka panyi bie bɔ ɔhyɛ ahiafoɛ so, na odi edwirɛ tia bɛbɔ bɛ dwirɛ yɛ fɛ nanwo dwirɛ. Odikyɛ panyi ne kae kyɛ, ebie wɔ berɛ bɔ ɔnea ye ɔ; na sɔ sona ne le tumi wɔ awaen nu tra ye koraa. Ebiaa ebiemɔ koso wɔ berɛ bɔ bele tumi bɛtra sɔ awaen nu panyi ne. Sona awaen nu de, ɔkɔhora kɔwa kyɛ sɔ mbanyi namu, awue ngome. Ɔba sɔ a, kuro mma ne fɛ.
Sɛ ɔkɔba kyɛ yelle ebiala bɔ ɔka bie ma yɛ po a, odikyɛ yɛka y’ahone yɛto yɛ kunu. Ofikyɛ Yehowa ‘nea sɔ mbanyi’ bɔ bɛwɔ awaen nu ne. Yɛkɔhora yekosu yekohyire Nyameɛ kyɛ oli yɛ dwirɛ ma yɛ. (Edw. 55:22; Flp. 4:6, 7) Ye mia Bible ne po nwa: ‘AWURADE nye kyini aseɛ ye aso amukoraa, kyɛ bɛ bɔ bedi nahorɛ bɛma ye ne, okogyina bɛ si.’—2 Abe. 16:9.
Nworɛ Dwirɛhanɛniɛ 5:8 ne, ɔmaa yenwu bɔ ɔkɔso wɔ sona awaen nu ɔ. Yeɛ ole kyɛ, ebiala le ye masta. Nakoso sɔ tworɔnzɛm ne maa yenwu kyɛ bemu bɛ masta yeɛ ole Yehowa, ofikyɛ ole tumi tra ebiala. Kesaalae wafa Ahennie ne wama Ɔwa Yesu, yeti ye yeɛ odi hene ɔ. Tumi amukoraa Nyameɛ ne, yenye ta bɔ ebiala yɛ ɔ. Yeti sɛ wɔ dwirɛ yɛ fɛ a, ongosisi wɔ lle; na sɔ ala yeɛ Ɔwa Yesu koso te ɔ.
OCTOBER 13-19
NYAMEƐ DWIRƐ NANU ASUADEƐ NWORƐ DWIRƐHANƐNIƐ 7-8
‘Kɔ Awuro Bɔ Bedi Aworabɔlɛ Nu’
it “Esuɛ” ¶9
Esuɛ
Esuɛ Le Ye Mmerɛ. Nworɛ Dwirɛhanɛniɛ 3:1, 4 ka kyɛ, “esuɛ le ye mmerɛ, yeɛ ɛserelɛ le ye mmerɛ, awuyebɔlɛ le ye mmerɛ, yeɛ abiliegolɛ le ye mmerɛ.” Ebie bɔ ɔse nworɛ ne, okuro kyɛ ɔkɔhɔ ‘awuro bɔ bɛyɛ sɛen nu’ tra nekaa bɔ bɛgye bɛnye ɔ. Ofikyɛ, ɔse kyɛ ewue la berɛ ma ebiala. (Nwd 7:2, 4; fa toto Any 14:13 nanwo.) Kyɛ ahaa ɔkɔɔgye yenye ne, ɔfa yenwo atee ne kɔkyekye bɛbɔ nikyee atɔ bɛnye ne wora. Ofikyɛ awerɛkyekyerɛ fi sona nwo. Ɛhe maa onya yenwo atee dwene kyɛ, sɔ ala yeɛ ɔkɔto ye ɔ, yeti odikyɛ ɔbrɛ yenwo ase ma Yehowa.
w19. 06 23 ¶15
William aye wuli ne, afoɛ kaa apɛ nu. Ɔhane kyɛ: “Sɛ mmenia ka nningyein pa bɔ bɛkae bɛfa meye nwo a, ɔmaa menye gye. Ɔmaa menwu kyɛ, ne bekuro ye dwirɛ na ne bebu ye. Sɛ ngɔha a, ɛhe bokale me paa. Ɔmaa m’ahone tɔle me kunu, ofikyɛ meye de, ne menni yenwo angorɛ koraa; ɔnne nu a, ahaa mawu.” Bianca koso te kunaniɛ. Ɔhane kyɛ: “Sɛ aliemaamɔ ne me bɔnu bɔ mbaeɛ, na bɛne me kenga tworɔnzɛm ko anaa nyɔ bie a, ɔkyekye me wora. Sɛ bɛka mehu nwo dwirɛ a, ɔmaa menye gye, yeɛ sɛ meka yenwo dwirɛ na bɛyɛ asoɛ betie me a, ɛhene koso boka me paa.”
w17. 07 16 ¶16
Sɛ nikyee tɔ aliemaa bie nye na yɛne ye bɔnu bɔ mbaeɛ a, ɔkora kyekye ye wora. Aworabɔlɛ ti, ahyɛaseɛ ne, engonwu bɔ ɛha po ɔ. Ebiaa wɔkomvi kɔwoso, anaa ekosu po. Nakoso sɛ emia wɔnye a, wɔ mbaeɛ ne kɔhora kɔkyekye sona ne wora. Dalene hane kyɛ: “Sɛ aliemaa mmrasua biemɔ basra me a, meka mekyire bɛ kyɛ, sɛ ɔkɔyɛ yé a, bɛne me bɔnu bɔ mbaeɛ. Ahyɛaseɛ ne de, ɛyɛ a bennwu bɔ bɛha po. Nakoso ɔngyɛ ne bɛnoa atɔ so, na bɛkora bɛbɔ mbaeɛ maa m’ahone tɔ me kunu. Bɛ gyidie, bɛ dɔ, ɔne kyɛbɔ bɛdwene menwo ne, wamaa mahora magyina me gya so.”
w17. 07 16 ¶17-19
Ebiemɔ dɔfo wu a, bedi aworabɔlɛ bɛkyɛ paa, nakoso ebiemɔ de, ɔngyɛ sɔ. Sɛ ebie wu a, ahyɛaseɛ ne de, abusuafoɛ ne adɔfo bagyamo bɛbɔ nikyee atɔ bɛnye ne. Nakoso ɔngyɛ na bemu bahɔ. Yeti sɔ mmerɛ ne yeɛ odikyɛ ɛmaa wɔ gya yɛ ndika-ndika wɔ berɛ ɔ. Bible ne ka kyɛ: “Adamvoa kuro wɔ dwirɛ mmerɛ biala, yeɛ w’amaneɛnwunɛ nu ti yeɛ bɛwole eliɛma ɔ.” (Any. 17:17) Yeti sɛ ɔkyɛ kora ne aworabɔlɛ ne ate ahɔ oo, sɛ wangyɛ oo, odikyɛ aliemaamɔ kɔkyekye ye wora.—Kenga 1 Tɛsalonikafoɛ 3:7.
Ebie dɔfo wu na ɔkaekae nningyein biemɔ a, ɔkora maa ye wora bɔ. Ebie yeɛ ole kyea bɔ begyale, edwein, foto, adwuma bie, nikyee bie fona, nyegyeyɛɛ anaa odwu kyea pɔtee bie wɔ afoɛ nanu a. Nningyein bɔ ne ɔne ohu anaa ɔye bɔnu bɛyɛ ne, kesaalae de, ye ngome yeɛ ɔkɔyɛ ɔ. Ɔba sɔ a, ye wora kɔbɔ paa. Ebie yeɛ ole mmerɛ bɔ ɔkɔ manzini nhyiamu anaa Yesu Wue Afahyɛ ne. Aliemaa bie hane kyɛ, “ne mese kyɛ odwu kyea bɔ yegyale ne a, me wora kɔbɔ paa. Na amba koso, sɔ kyea ne dwuli ne, mamva ye ahogono. Nakoso aliemaa biemɔ yɛle paati kaa bɛmane me, na bɛtole asaa bɛfrɛle me damvo biemɔ bɔ bepingye me paa. Yeti menye anyɛ me totɔtotɔ.”
Kae kyɛ, nna kyea pɔtee bie ngome yeɛ bekohia yɛ ɔ, na mmom mmerɛ biala. Junia hane kyɛ: “Sɛ aliemaamɔ ba wɔ berɛ mmerɛ biala, na wannyɛ kyɛ kyea pɔtee bie ngome a, ɔboka paa. Bɛba wɔ berɛ sɔ a, ɔmaa enya awerɛkyekyerɛ.” Nahorɛ dwirɛ yeɛ ole kyɛ, aworabɔlɛ bɔ sona ne di ne, yɛngɔhora yɛngɔye ye mu yengofi berɛ. Nakoso sɛ yɛyɛ nningyein biemɔ yɛfa yɛboka ye a, ɔmaa ye ahone tɔ ye kunu. (1 Yoh. 3:18) Gaby hane kyɛ: “Meda mbanyi nemɔ ase paa kyɛ, bɔ mvale nu amukoraa ne, banyakyi me nu ɔ. Ɔte kyɛ bɔ Yehowa ayɛ me awaawaa atuu!”
Bible Nu Dwirɛ Titire
w23. 03 31 ¶18
Sɛ yeliema bie yɛ yɛ nikyee a, ɔtɔ mmerɛ bie a yenya adwene kyɛ yɛhɔ ye berɛ na yesiesie. Nakoso kora bɔ yɛkɔhɔ ne, yɛkɔhora yekobisa yɛnwo kyɛ: ‘Mese edwirɛ nanu yé?’ (Any. 18:13) ‘Ɔkɔhora kɔwa kyɛ wanhyɛ da anaa?’ (Nwo. 7:20) ‘Me koso, mayɛ sɔ nikyee ne bie le anaa?’ (Nwo. 7:21, 22) ‘Mekɔ ye berɛ a, ɔngɔsɛkye edwirɛ ne koraa anaa?’ (Kenga Anyandera 26:20.) Sɛ yɛto yɛ boase yɛdwene sɔ nzɛmmisa nanwo a, ebiaa ɔdɔ bɔ yele yɛma yeliema nati yekobu yɛnye yekogua bɔ ɔyɛle naso.
OCTOBER 20-26
NYAMEƐ DWIRƐ NANU ASUADEƐ NWORƐ DWIRƐHANƐNIƐ 9-10
Edwirɛ To Wɔ A, Nya Yenwo Adwene Pa
w13 8/15 14 ¶20-21
Nwu nekaa bɔ ɔhaw ne fi ɔ. Nzuati yeɛ odikyɛ yenwu nekaa bɔ ɔhaw ne fi ɔ? Ofikyɛ ɔhaw ne bie wɔ berɛ a ofi yɛ bɔbɔ deinn. Sɛ ofi yɛ bɔbɔ a, odikyɛ yede yɛto nu. (Gal. 6:7) Nnɛmaa yɛbɔ Yehowa somoɛ. Nzuati yeɛ nyanza nne nu kyɛ yɛkɔyɛ sɔ ɔ? Ma yɛyɛ mvandoho bie: Kar bie wɔ berɛ a ɔkɔ spiid paa. Fa ye kyɛ drava bie twi sɔ kar ne, nakoso odwuli kɛɛf nu ne, wando ye boase, yeɛ kar ne fini ase ɔ. Ɔba ye sɔ a, odikyɛ ɔfa somoɛ ne bɔ sona bɔ ɔyɛle kar ne anaa? Daabi! Sɔ ala yeɛ Yehowa bɔ ɔbɔle yɛ ne, wama yɛ atee kyɛ yɛyɛ bɔ yekuro ɔ. Nakoso wama yɛ akwangyerɛ bɔ yɛkɔnea so yekosisi gyinayɛɛ pa. Yeti sɛ yedi mvomsoɔ a, nzuati yeɛ odikyɛ yɛfa yenwo somoɛ yɛbɔ bɔ ɔbɔle yɛ ne ɔ?
Ɛhe ngyire kyɛ ɔhaw biala bɔ ɔkɔto yɛ ne, ofi yɛ bɔbɔ. Bible ne amaa yate yebo kyɛ “mmerɛ tɛɛ” anaa asane kora to yɛ nu biala. (Nwo. 9:11) Nakoso nnɛmɔmaa yɛ wora fi ye lle kyɛ bɔne amukoraa fi Satan. (1 Yoh. 5:19; Nye. 12:9) Ye yeɛ ɔte yɛ pɔfoɛ, na nna Yehowa ɔ.—1 Pet. 5:8.
w19. 09 5 ¶10
Sɛ yɛbrɛ yɛnwo ase a, ɔmaa yɛmva nningyein biemɔ yɛnha yɛnwo. Ebiaa yekonwu kyɛ asisie ngome yeɛ ɔkɔso ɔ. Ɔhene Solomon bɔ ɔse nworɛ ne hane kyɛ: “Manwu nganga bɔ bɛtete mbɔngɔ so ɔ, wɔ aberɛ bɔ nnehyeɛ bɛnate ase kyɛ nganga ɔ.” (Nwo. 10:7) Bɛbɔ bɛbɔ bɛnwo mmɔden ne, nna daa amu yeɛ mmenia kamvo bɛ ɔ. Ɛkɔnea ne, na bɛbɔ bɛmmɔ bɛnwo mmɔden ne mmom yeɛ mmenia sosɔ bɛ so ɔ. Solomon hane kyɛ, sɛ sɔ yeɛ edwirɛ ne te po a, nnɛmaa yɛfa yenwo adwenedwene yɛha yɛnwo, na mmom kaa biala bɔ yele ne, yɛfa ye sɔ. (Nwo. 6:9) Sɛ yɛbrɛ yɛnwo ase a, yɛngɔnea atee kyɛ nningyein kɔhɔ kyɛbɔ yekuro ɔ, na mmom kyɛbɔ nningyein kɔhɔ biala ne, odikyɛ yɛfa ye sɔ.
w11 10/15 8 ¶1-2
Yɛnea Bible nu a, yenwu adanzeɛ pee bɔ okyire kyɛ Yehowa pena kyɛ yɛnye gye wɔ abrabɔ nu. Ko yeɛ ole edwirɛ bɔ ɔwɔ Edwein 104:14, 15 ne. Ɛberɛ nwa, Yehowa maa sona ‘nya aleɛ fi aseɛ nu, ɔne nzaa bɔ ɔma sona nye gye, ɔne sakyeɛ bɔ ɔma sona nyunu yɛ mmenanwo mmenanwo, yeɛ aleɛ bɔ ɔma sona wora kyekye ɔ.’ Yehowa maa nningyein fifi kyɛbɔ ɔkɔyɛ a yekonya aleɛ, ngoo ɔne nzaa, na yahora yatena ngoa nu. Ɔwɔ nu, sɛ ebie annya nzaa wanno a ongowu, nakoso ‘ɔmaa sona nye gye.’ (Nwo. 9:7; 10:19) Yehowa pena kyɛ yɛnye gye na “yɛ kunu dwo yɛ fɔnn.”—Aso. 14:16, 17.
Yeti ɔtte bɔne kyɛ ɔwɔ nu alaa a yɛkɔɔtena nekaa bie dinn na ‘yanea ewienu nnomaa’ ɔne “eburo sukooko,” anaa yɛkɔyɛ nningyein foforɛ bie kɔfa kɔgye yɛnye ɔ. (Mat. 6:26, 28; Edw. 8:3, 4) Anigye te “Nyameɛ akyɛdeɛ.” (Nwo. 3:12, 13) Sɛ yenwu ye kyɛ mmerɛ bɔ yɛfa yɛgye yɛnye ne, ɔboka sɔ akyɛdeɛ naso a, yɛkɔfa yɛkɔyɛ adwuma maa ɔkɔsɔ Yehowa nye.
Bible Nu Dwirɛ Titire
it “Ngɔngɔnzaa, Dumaasɛkyelɛ” ¶4, 8
Nworɛ Dwirɛhanɛniɛ 10:12-14 ka kyɛ: “Kwaseaa de, ye noa dwirɛ maa onya dwirɛ. Ngwaseasɛm yeɛ ɔfa hyɛ ye dwirɛ bo ɔ, na ye dwirɛ n’ayieleɛ te gyimikekã. Kwaseaa dwudwo pee bɔ ye noa mbe ɔ.”
Bɛka kyɛ ebie te ngɔngɔnzaa a, okyire kyɛ ɔkeka mmenia nwo dwirɛ. Ebiaa nna adwene ne yeɛ ole kyɛ ɔfa sɛkye sona ne dumaa, nakoso ɔkeka-keka ne, ɛhe kɔhora kosi. Nakoso dumaa sɛkyelɛ de ɔttemaye koraa. Ofikyɛ oku sona sunzum, na ɔfa dwudwolɛ ba mmenia afia. Sɛ wahyɛda kyɛ ɔsɛkye sona ne dumaa oo, sɛ wanhyɛda oo, wannea yé a ɔkɔɔyɛ Yehowa pɔfoɛ. Ofikyɛ ebie bɔ ‘ɔkekã aliɛmaa mɔ ti bobɔ nu’ ne, ɔte Yehowa akyiwadeɛ ne bie. (Any 6:16-19) Greek dwirɛ bɔ behyirele yebo “dumaasɛkyelɛ” anaa ebie bɔ “ɔpɛ edwirɛ to ebie so” ne, yeɛ ole di·aʹbo·los. Bɛfa sɔ dumaa ne bɛfrɛ Satan “Abɔnzam” wɔ Bible nu, ofikyɛ ɔsɛkye Nyameɛ dumaa. (Yoh 8:44; Nye 12:9, 10; Gye 3:2-5) Ɛhe maa yenwu nekaa bɔ dumaasɛkyelɛ fi wale ɔ.
OCTOBER 27–NOVEMBER 2
NYAMEƐ DWIRƐ NANU ASUADEƐ NWORƐ DWIRƐHANƐNIƐ 11-12
Nea Wɔnwo So Yé, Na Ma Wɔnye Gye
g 3/15 13 ¶6-7
Ngaka mmaammaa bɔ bɛfa anwonyerɛ bɛba ne, eyia kora bɛ paa. Nwomaa bie bɔ bɛfrɛ ye Journal of Hospital Infection ka kyɛ, “ngaka mmaammaa bɔ bɛnate mvrama nu bɔ yennwu bɛ, nakoso bɛmaa yɛfokyɛ ne, pee ngora eyia nu tena.”
Ɛkɔyɛ sɛɛ na anya eyia naso mvasoɛ? Ɛkɔhora kɔfite kaa kɔɔnate eyia nu, na ale mvrama. Ɛhe kɔmaa ekonya anwoserɛ.
w23. 02 21 ¶6-7
Bible ne, ɔtte apɔmuden nwomaa, yeɛ ongyire yɛ aleɛ bɔ odikyɛ yedi, ɔne bɔ ɔnzɛkyɛ yedi ɔ. Nakoso ɔmaa yenwu Yehowa adwene wɔ sɔ nningyein nanwo. Otu yɛ fo kyɛ “anwoɔnaen nu ateetee” anaa nningyein bɔ ɔkɔhora kopira yɛ ne, yɛhwe yɛnwo yefi yenwo. (Nwo. 11:10) Bible ne dwudwo tia adifuu, ɔne nzaa bɔ yɛkɔno ye pee, ofikyɛ ɔkɔhora kohu yɛ. (Any. 23:20) Sɛ yedidi oo, yɛno nzaa oo, Yehowa pena kyɛ yɛhyɛ yɛnwo so na wammo so.—1 Kor. 6:12; 9:25.
Sɛ y’adwene nu la berɛ a, yɛkɔyɛ nningyein bɔ okyire kyɛ yɛnye sɔ ngoa bɔ Yehowa afa ahyɛ yɛ ne. (Edw. 119:99, 100; kenga Anyandera 2:11.) Nu bie yeɛ ole kyɛ yɛkɔnea yɛ adidie yé. Sɛ yekuro aleɛ bie, nakoso yɛse kyɛ yedi a yɛkɔfokyɛ a, sɛ y’adwene nu la berɛ a yengoli. Afei koso, sɛ yɛda yé, yɛtengyɛ-tengyɛ y’aporɛ nu, yedi yɛnwo ni, na yesiesie y’awuro maa ɛberɛ te waenn a, okyire kyɛ y’adwene nu la berɛ.
“Ɛ́mɔyɔ Bɔ Edwirɛ Ne Kã Ne”
2 Yehowa asomvoɛ de, yɛnye gye paa. Nzuati ɔ? Nningyein pee yeɛ ɔmaa yɛnye gye ɔ. Nakoso ko bɔ yenwo hia paa yeɛ ole kyɛ, yɛkenga Nyameɛ Dwirɛ ne, na yɛyere yɛnwo kyɛ yɛkɔfa bɔ yasua ne yɛkɔbɔ yɛ bra.—Kenga Yakobo 1:22-25.
3 Sɛ ‘yɛyɛ bɔ edwirɛ ne kã ne’ a, mvasoɛ pee yeɛ yekonya yekofi so ɔ. Ebie yeɛ ole kyɛ, yɛse kyɛ sɛ yɛyɛ sɔ a, ɔmaa yɛsɔ Yehowa nye, na ɛhene maa yɛnye gye. (Nwo. 12:13) Afei koso, sɛ yɛyere yɛnwo yɛfa Nyameɛ Dwirɛ ne yɛbɔ yɛ bra a, ɔkɔmaa yɛne y’abusuafoɛ ne aliemaamɔ afia kɔyɛ kama. Ebieku koso, ɔhaw bɔ bɛbɔ bɛmva Yehowa mmraa bɛnyɛ hwee ne fa nu ne, ebie ndo yɛ. Ebia yedwudwo ye, edi yenwo adanzeɛ sɔ. Ɛhene ati, yɛne Ɔhene Dawide yɛ adwene. Mmerɛ bɔ ɔhane Yehowa mmraa ne ye ahyɛdeɛ nwo dwirɛ yiele ne, ɔhane kyɛ: “Sona di so a, onya akatuaa piri.”—Edw. 19:7-11.
Bible Nu Dwirɛ Titire
it “Nyameɛ Sunzum” ¶10
Nyameɛ Sunzum
Bɛbɔ Nyameɛ maa bɛhworɔle Bible ne, nna kyɛ Nyameɛ ka a na bahworɔ tekyɛ bɔ basɛte robɔt bie ne. Yohane sɔa, Yehowa fale ye tianu dwirɛ somane abɔfo maa “ɔɔye hyirele ye.” Na ye koso, ‘Nyameɛ dwirɛ ne adanzeɛ bɔ Yesu Kristo fa mane ye ne, ɔne bɔ onwuni ye amukoraa, olili yenwo adanzeɛ.’ (Nye 1:1, 2) Bɔ osili ɛhe: “Sunzum” ne wale Yohane so, na ne wayɛ tekyɛ bɔ ɔwɔ ‘Awurade kyẽa nanu ne.’ Na ɔtele komviɛ bie kyɛ: ‘Twerɛ bɔ enwu ye ne gua nwomaa nu.’ (Nye 1:10, 11) Ɛhe kyire kyɛ, Nyameɛ mane bɛbɔ bɛhworɔle Bible ne atee kyɛ nyekyire bɔ benyane ye ne, bɛ bɔbɔ bɛfa bɛ dwirɛ bɛhworɔ. (Hab 2:2) Nakoso Yehowa anyakyi bɛ sɔ. Bɔ bɛtele na benwuni ye ne, ɔneane kyɛ ye ala yeɛ bahworɔ ne, ɔte nahorɛ, na ɔne bɔ wabɔ ye tianu kyɛ ɔkɔyɛ ne yia. (Any 30:5, 6) Ɛhe kyire kyɛ bɛbɔ bɛhworɔle Bible ne, bandena berɛ mbaen. Ɛhene yeɛ Nworɛ Dwirɛhanɛniɛ 12:9, 10 ka yenwo dwirɛ ne. Nworɛ Dwirɛhanɛniɛ ne, ɔdwenedwenene nningyein nwo yɛle nhwehwɛmuɛ hɔle siɛ, ɔhyehyɛle nikyee biala nnidisoɛ-nnidisoɛ, kyɛbɔ ɔkɔyɛ a ɔkɔhworɔ ‘edwirɛ bɔ ɔtɔ asoɛ nu, na ɔte nahorɛ turoloo.’—Fa toto Luk 1:1-4 nanwo.