Fa Obuo Ma Mmenia

1. Nzuati yeɛ ebiala pena kyɛ mmenia bu ye ɔ? (Anyandera 22:1)

SƐ ENWU ye kyɛ mmenia bu wɔ a, aso ɛyɛ a wɔnye ngye anaa? Yedé yedi kyɛ ɔmaa wɔnye gye, ofikyɛ ebiala pena kyɛ bebu ye. Sɛ yenwu ye kyɛ mmenia bu yɛ a, ɔmaa y’ahone tɔ yɛ kunu. Ɔnyɛ nwanwa kyɛ Bible ne nwa ‘sɛ bebu wɔ a, ɔte paa tra ɛdwetɛ ne sikaa kɔkorɛ’ ɔ.—Kenga Anyandera 22:1.

2-3. Nzuati yeɛ ɔlla ase kyɛ yɛkɔfa obuo yɛkɔma mmenia ɔ, na nwamɔ yeɛ odikyɛ yebu bɛ ɔ?

² Ɔlla ase kyɛ yɛkɔfa obuo yɛkɔma mmenia mmerɛ biala ɔ. Nzuati ɔ? Ofikyɛ ɛyɛ a yɛtaa yenwu mvomsoɛ bɔ ɔwɔ bɛnwo ne. Afei koso, ɛnnɛ mmeni pee nala mmu nikye. Nakoso yɛde, ɔnzɛkyɛ yesuesua bɛ. Nzuati ɔ? Ofikyɛ Yehowa pena kyɛ yɛfa anidie anaa obuo yɛma “mmenia amukoraa.”—1 Pet. 2:17.

³ Sɛ bɛkã kyɛ yɛfa obuo yɛma mmenia a, adesua he kɔmaa yekonwu bɔ okyire ɔ. Afei koso yɛkɔnea kyɛbɔ yɛkɔmaa (1) y’abusuafoɛ, (2) yeliemamɔ Kristofoɛ, ɔne (3) bɛbɔ bɛnne asafo nanu ne konwu ye kyɛ yebu bɛ ɔ. Kyɛbɔ yɛkɔfa obuo yɛkɔma mmenia mmerɛ po bɔ ɔyɛ se ma yɛ kyɛ yɛkɔyɛ sɔ ne, ɛhene yeɛ adesua ne kɔhã yenwo dwirɛ paa ɔ.

BƐKÃ KYƐ ƐFA OBUO MA EBIE A, OKYIRE SƐƐ?

4. Nzu yeɛ okohyire kyɛ yebu ebie ɔ?

⁴ Adwene bɔ yele ye wɔ ebie nwo, ɔne kyɛbɔ yɛne sona ne di ne yeɛ okohyire kyɛ yɛfa obuo anaa anidie yɛma ye ɔ. Sɛ yenwu kyɛ ebie le subaen pá biemɔ, wahora wayɛ nikyee pá bie, anaa ole dibea bie a, yɛtaa yɛfa anidie anaa obuo yɛma ye. Nakoso anidie bɔ yɛfa yɛma mmenia ne, ɔnzɛkyɛ ɔyɛ sona nye so deɛ, na mmom odikyɛ ofi y’ahone nu.—Mat. 15:8.

5. Nzu yeɛ ɔkɔboka yɛ maa yɛkɔfa obuo yɛkɔma mmenia ɔ?

⁵ Yehowa pena kyɛ yɛfa obuo yɛma ebiala. “Maen mbanyi” nemɔ po de, wahyɛ da wahã kyɛ yɛfa obuo yɛma bɛ. (Rom. 13:​1, 7) Nakoso ebiaa ebiemɔ kɔhã kyɛ: “Mede sɛ ebu wɔnwo a, yeɛ me koso ngobu wɔ ɔ.” Aso ɔte pá kyɛ ebie kɔhã sɔ? Yɛ bɔ yɛsõ Yehowa ne de, yɛse kyɛ nna bɔ ebie kɔyɛ ne ngome yeɛ yegyina so yɛfa obuo yɛma ye ɔ. Na mmom ɔnate kyɛ yɛdɔ Yehowa na yɛpena kyɛ yɛyɛ bɔ ɔsɔ yenye nati yeɛ ɔmaa yɛyɛ sɔ ɔ.—Yos. 4:14; 1 Pet. 3:15.

6. Sɛ ebie mmu wɔ a, aso odikyɛ ɛfa obuo ma ye anaa? Kyirekyire nu. (Nea foto ne koso.)

⁶ Ebiaa ebiemɔ kobisa kyɛ, ‘Sɛ ebie mmu me a, aso odikyɛ mefa obuo mema ye anaa?’ Yoo. Wɔde ɛmɔma yɛnea bɔ yeti yeɛ yɛkã sɔ ɔ. Ɔhene Sɔɔlo guale ɔwa Yonatan nyunu ase wɔ mmenia nu. (1 Sam. 20:​30-34) Nakoso Yonatan hɔleso fale obuo mane ye, na ɔtale ye si wɔ kõɛ nu oodwuli kyɛ Sɔɔlo wuli ɔ. (Ɛks. 20:12; 2 Sam. 1:23) Sɔfo panyi Eli koso, ɔhahyirele Hana kyɛ wano nzaa wabo. (1 Sam. 1:​12-14) Nakoso Hana ne ye dwudwole wɔ obuo nu, ɔmva yenwo kyɛ ne ebiala se ye wɔ Yisrael kyɛ sɔfo panyi Eli te abahyɛ bɔne ne. (1 Sam. 1:​15-18; 2:​22-24) Atense mmrienzua nemɔ wora, bɛbɔle somafoɛ Pɔɔlo alapaa kyɛ “ɔnze hwee.” (Aso. 17:18) Ɛhe mukoraati nu ne, Pɔɔlo ne bɛ dwudwole wɔ obuo nu. (Aso. 17:22) Ɛhe maa yenwu kyɛ, sɛ yɛdɔ Yehowa ná yɛmbena kyɛ yɛyɛ nikyee bɔ onguro a, yɛkɔfa obuo yɛkɔma mmenia mmerɛ po bɔ ɔyɛ se ma yɛ kyɛ yɛkɔyɛ sɔ ne. Yede ɛmɔma yɛnea bɛbɔ odikyɛ yɛfa obuo yɛma bɛ, ɔne bɔ yeti yeɛ odikyɛ yɛyɛ sɔ ɔ.

FA OBUO MA W’ABUSUAFOƐ

7. Nzu yeɛ ɔmaa ɔkora yɛ se kyɛ yɛkɔfa obuo yɛkɔma y’abusuafoɛ ɔ?

⁷ Bɔ ɔmaa ɔyɛ se ɔ. Y’abusuafoɛ de, daa yɛne bɛ ala yeɛ ɛte ɔ. Ɛhene ati yɛse bɛ mmɔdenbɔ ɔne bɛ sintɔ paa. Ebiemɔ wɔ berɛ a, anwonyerɛ bie bɔ ɔwɔ bɛ so nati ɔmaa bɛnwo yɛ ahomete, yeti ɔyɛ se kyɛ yɛkɔnea bɛ. Ebiemɔ koso, adwenedwene ahyɛ bɛ so. Yeɛ ebiemɔ wora, bɛkora bɛkã edwirɛ bie anaa bɛyɛ yɛ nikyeebie maa ɔkɔ yɛnwo paa. Abusua bie nu koso, ɔnate kyɛ bɛmva obuo bɛmma bɛnwo nati, kyɛ ahaa asomdwee kɔwa berɛ ne, daa ne sẽe la awuro berɛ. Sɛ ɔba sɔ a, b’afia ndwo lle. Yɛkɔhora yɛkɔfa abusua yɛkɔtoto nipadua nanwo. Sɛ anwonyerɛ bie bɔ yɛ a, ɔmma nningyein ngɔ yé wɔ yɛ nipadua nanu. Sɔ ala yeɛ abusua nanu koso, sɛ bamva obuo bamma bɛnwo a, ɔngɔmma bɛngɔyɛ kõ ɔ. Anwonyerɛ pee nala wɔ berɛ a, bɛkora benya yenoa ayire. Sɔ ala yeɛ abusua nanu koso, sɛ besua kyɛ bɛkɔfa obuo bɛkɔma bɛnwo a, ɔkɔmaa asomdwee kɔwa b’afia ɔ.

8. Nzuati yeɛ yenwo hia kyɛ yɛfa obuo yɛma y’abusuafoɛ ɔ? (1 Timoteo 5:​4, 8)

⁸ Nzuati yeɛ odikyɛ yɛfa obuo yɛma bɛ ɔ? (Kenga 1 Timoteo 5:​4, 8.) Pɔɔlo krataa bɔ olimoa bɔ ɔhworɔ ɔɔmane Timoteo nanu ne, ɔhane kyɛ odikyɛ bɛbɔ bɛwɔ abusua nanu ne boka bɛnwo maa ebiala sa kã bɔ ohia ɔ. Ohyirele nu kyɛ, sɛ yɛyɛ sɔ a ne yɛfa anidie yɛma bɛ. Nakoso nna kyɛ ɔte yɛ asɛdeɛ nati yeɛ odikyɛ yɛyɛ ɔ, na mmom ɔboka “nyamesom paa” so. Ɛhe kyire kyɛ ɔdɔ bɔ yele yɛma Nyameɛ ne yeɛ ɔkɔmaa yɛkɔyɛ sɔ ɔ, na ɔboka soen bɔ yɛfa yɛma ye naso. Yehowa yeɛ ɔhyehyɛle abusua ɔ. (Ɛfe. 3:​14, 15) Yeti sɛ yɛfa anidie yɛma y’abusuaniɛ bie a, ɔte kyɛbɔ Yehowa yeɛ yɛfa anidie yɛma ye ne. (1 Tim. 5:4) Ɛhe maa yenwu ye kyɛ yenwo hia paa kyɛ yɛfa obuo yɛma y’abusuafoɛ.

9. Brienzua ne brasua bɔ bagya ne, bɛkɔyɛ sɛɛ ne bafa obuo bama bɛnwo? (Nea foto ne koso.)

⁹ Kyɛbɔ ɛkɔla obuo ali ɔ. Brienzua bɔ ɔfa anidie ma ɔye ne, sɛ bɛwɔ mmenia nu oo, sɛ ɔka bɛ ngome oo, ɔmaa onwu ye kyɛ yenwo hia ye. (Any. 31:28; 1 Pet. 3:7) Yeti ɔngɔbo ye, ongogua ye nyunu ase, anaa ɔngɔmaa ongonya adwene kyɛ mvasoɛ nne ye so. Aliemaa bie bɔ ɔwɔ Argentina bɔ bɛfrɛ ye Ariela hane kyɛ: “Anwonyerɛ bie wɔ meye so, yeti sɛ odwu mmerɛ bie a, ɔmaa ɔkekã edwirɛ yeayea kyire me. Ɔba sɔ a, mekã mekyire menwo kyɛ, ‘Anwonyerɛ nati yeɛ wamaa ɔyɛ sɔ ɔ, na mmom nna sɔ yeɛ ɔte ɔ.’ Sɛ odwu nekaabie ná edwirɛ ne kɔ menwo paa a, mekae 1 Korintofoɛ 13:5 ne, na ɛhene boka me maa mene ye dwudwo wɔ obuo nu, na memmu ye animtia.” (Any. 19:11) Brasua koso, sɛ ɔkã ohu nwo dwirɛ pá kyire mmenia a, okyire kyɛ ɔfa anidie ma ye. (Ɛfe. 5:33) Brasua bɔ ɔte sɔ ne, ɔmmɔ ohu alapaa, na ɔngoro yenwo. Ofikyɛ ɔse kyɛ sɛ ɔyɛ sɔ a, ɔte kyɛ nnakye bɔ ɔkora sɛkye buralɛ ne, ngakangaka ɔkɔhora kɔsɛkye ye agyaa ne. (Any. 14:1) Aliemaa brasua bie wɔ Italy, na ɛyɛ a adwenedwene taa hyɛ ohu so. Ɔhane kyɛ: “Ɔtɔ mmerɛ bie a, ne yenwo yɛ me ahi, ofikyɛ menwu ye kyɛ nikyeebiala ɔkɔhã yenwo dwirɛ. Daa ne sɛ ɔyɛ sɔ a, kyɛbɔ mene ye kodwudwo, ɔne menye bie bɔ ngɔfa ngɔnea ye ne, ne ongyire obuo. Nakoso maanwu ye kyɛ sɛ metaa mefa menwo mebɔ bɛbɔ bɛkã mmenia nwo dwirɛ pá ne a, ɔmaa mekora mefa obuo mema mehu.”

10. Nzu yeɛ ngwalaa yɛ a okyire kyɛ bebu b’awofoɛ ɔ?

¹⁰ Ngwalaa, mmraa bɔ ɛmɔ awofoɛ ahyehyɛ ama ɛmɔ ne, ɛmɔli so. (Ɛfe. 6:​1-3) Ɛmɔ dwudwo bɛnwo wɔ obuo nu. (Ɛks. 21:17) Sɛ bɛyɛ mbanyi koso a, ebiaa bekohia ɛmɔ mmokalɛ paa. Yeti ɛyɛ a ɛmɔyere bɛnwo bɛnea bɛ. Ɛmɔma yɛnea aliemaa brasua bie bɔ bɛfrɛ ye María. Ye baba tte Yehowa Danzeniɛ. Mmerɛ bɔ ɔbɔle anwonyerɛ ne, ne ɔyɛ se ma Maria kyɛ ɔkɔnea ye ofikyɛ ɛyɛ a ne biaa ne bɔ ye alapaa. Ɔhane kyɛ: “Mmɔle Yehowa mbaeɛ kyɛ ɔboka me ma ngora mva obuo mma me baba. Ngangyirele menwo kyɛ sɛ Yehowa bɔbɔ yeɛ yenwa mva obuo mma m’awofoɛ a, yede ɔkɔboka me maa ngɔhora ngɔyɛ sɔ. Maanwu ye kyɛ ɔnzɛkyɛ menea atee kyɛ me baba kɔsesã ye subaen kora ne mafa obuo mama ye.” Sɛ ɔyɛ se kyɛ yɛkɔfa anidie yɛkɔma y’abusuafoɛ po na yɛyere yɛnwo yɛyɛ sɔ a, okyire kyɛ yebu Yehowa bɔ ɔhyehyɛle abusua ne.

FA OBUO MA ELIEMAMƆ KRISTOFOƐ

11. Odwu mmerɛ bie a, nzuati yeɛ ɔkɔhora kɔyɛ se kyɛ yɛkɔfa obuo yɛkɔma yeliemamɔ Kristofoɛ ɔ?

¹¹ Bɔ ɔmaa ɔyɛ se ɔ. Yeliemamɔ Kristofoɛ fa Bible nu dwirɛ bɔ bɛ bra. Nakoso odwu mmerɛ bie a, ebiaa benu biemɔ ne yɛ koli ye yeayea, bekonya yɛnwo adwene bɔ ɔttemaye ɔ, bɛkɔkekã yɛnwo dwirɛ, anaa bɛkɔyɛ nikyeebie maa yɛkɔfɛ yaa. Sɛ yɛne aliemaa bie nya ‘edwirɛ’ a, ɔkɔhora kɔyɛ se kyɛ yɛkɔhɔso yɛkɔfa obuo yɛkɔma ye ɔ. (Kol. 3:13) Ɔba sɔ a, nzu yeɛ ɔkɔboka yɛ ɔ?

12. Nzuati yeɛ yenwo hia kyɛ yɛfa obuo yɛma yeliemamɔ Kristofoɛ ɔ? (2 Petro 2:​9-12)

¹² Nzuati yeɛ odikyɛ yɛfa obuo yɛma bɛ ɔ? (Kenga 2 Petro 2:​9-12.) Wɔ Petro krataa bɔ ɔtɔ so nyɔ nanu ne, ɔhane tete Kristofoɛ nanu biemɔ nwo dwirɛ kyɛ, bedwudwo betia “animnyamfoɛ” bɔ bɛ yeɛ bele asafo nu mbanyi nemɔ ne. Mmerɛ bɔ abɔfo bɔ bedi nahorɛ ne nwuni bɔ ne ɔkɔso ne, nzu yeɛ bɛyɛle ɔ? Ɔnate ‘obuo bɔ bele bɛma Yehowa’ nati, banga edwirɛ komapɛ po bandia bɛbɔ ne bɛyɛ sɔ ne. Wɔde nea oo, abɔfo bɔ bɔne biala nne bɛnwo ne po, banga edwirɛ biala bandia sɔ mmrienzua bɔ bɛte ahandaen ne. Na mmom bɛyakyi bɛmane Yehowa kyɛ ye bɔbɔ obua bɛ ndɛen, na ohwi bɛ nyunu. (Rom. 14:​10-12; fatoto Yuda 9 nanwo.) Yɛkɔhora yekosuesua bɔ abɔfo nemɔ yɛle ne. Sɛ bɛbɔ bedwɔso betia yɛ ne po odikyɛ yɛfa obuo yɛma bɛ a, yede yeliemamɔ Kristofoɛ yeɛ ɔnzɛkyɛ yɛfa obuo yɛma bɛ anaa? Odikyɛ ‘yedimoa yɛfa’ anidie yɛma bɛ. (Rom. 12:10) Sɛ yɛyɛ sɔ a, okyire kyɛ yebu Yehowa.

13-14. Yɛkɔyɛ sɛɛ ne yafa obuo yama bɛbɔ bɛwɔ asafo nanu ne? Ma yenwo nhwɛsoɛ. (Nea foto ne koso.)

¹³ Kyɛbɔ ɛkɔla obuo ali ɔ. Asafo nu mbanyi, sɛ ɛmɔ kyirekyire aliemaamɔ a, ɛmɔma benwu ye kyɛ ɛmɔkuro bɛ dwirɛ. (Flm. 8, 9) Sɛ odikyɛ etu ebie foɛ a, nnɛyɛ sɔ mmerɛ bɔ afɛ yaa ɔ, na ɛhene kohyire kyɛ ɛdwene sona nanwo. Aliemaa mmrasua mɔ koso, sɛ ɛmɔ angekã mmenia nwo dwirɛ, anaa ɛmɔ anzɛkye bɛ dumaa a, ɔkɔmaa ebiala kɔfa obuo kɔma obiɛngo wɔ asafo nanu. (Tito 2:​3-5) Sɛ yɛyɛ sotie yɛma mbanyi nemɔ, na yɛmaa yɛnye sɔ adwuma serɛ bɔ bɛyɛ ne a, okyire kyɛ yebu bɛ. Adwuma bɔ bɛyɛ ne bie yeɛ ole kyɛ bekyirekyire yɛ wɔ adesua bo, bedi asɛnga adwuma ne nyunu, na besa bɛboka bɛbɔ bayɛ “bɔne” ne.—Gal. 6:1; 1 Tim. 5:17.

¹⁴ Ɛmɔma yɛnea aliemaa brasua bie bɔ bɛfrɛ ye Rocío. Asafo nu panyi bie tuli ye foɛ, na ɛhene maa ɔyɛle se mane ye kyɛ ɔkɔfa obuo kɔma ye ɔ. Ɔhane kyɛ: “Ne menwu ye kyɛ ɔne me andwudwo yé. Yeti sɛ nwɔ awuro a, ne mekekã yenwo dwirɛ tɛɛ. Ne m’adwene yɛ me kyɛ onguro me dwirɛ, yeti mamva ye afutue ne manyɛ húu, nakoso manyɛ nikyeebiala maa wannwu yesi.” Yede, nzu yeɛ ɔbokale ye ɔ? Ɔhane kyɛ: “Mmerɛ bɔ ne mekenga Bible ne, nwuni edwirɛ bie wɔ 1 Tɛsalonikafoɛ 5:​12, 13 ne. Ɛhe maa nwuni kyɛ memmu sɔ aliemaa ne, yeti me tiboa buale me fɔ paa. Mmɔle Yehowa mbaeɛ na nza nyɛle nhwehwɛmuɛ wɔ asafo nwomaa ahoroɛ nu, kyɛbɔ ɔkɔyɛ a ngonya edwirɛ pɔtee bie bɔ ɔkɔboka me maa ngɔsesã me subaen ɔ. Mmanwuni kyɛ aliemaa ne de ɔyɛle hwee, me mmom yeɛ mepena meyɛ ahandaen ɔ. Kesaalae maate yebo kyɛ sɛ ngɔhora ngɔfa obuo ngɔma mmenia a, sana mebrɛ menwo ase. Meguso me yere menwo kyɛ ngɔfa obuo ngɔma mmenia, na mese kyɛ ɛhene kɔmaa mene Yehowa afia kɔyɛ kama.”

FA OBUO MA BƐBƆ BƐNNE ASAFO NANU NE

15. Bɛbɔ bɛnne asafo nanu ne, nzuati yeɛ ɔkɔhora kɔyɛ se kyɛ yɛkɔfa obuo yɛkɔma bɛ ɔ?

¹⁵ Bɔ ɔmaa ɔyɛ se ɔ. Yɛtaa yeyia mmenia bɔ bɛmva Bible nu dwirɛ bɛnyɛ hwee wɔ asɛnga nu. (Ɛfe. 4:18) Ebiemɔ koso bɛnye ngye edwirɛ bɔ yɛkã nanwo, yeti bendie yɛ. Afei koso, ebiaa bɔ yɛkɔyɛ biala y’adwumawura anaa yɛ tikya nye nzɔ. Yeɛ bɛbɔ yɛne bɛ wɔ adwuma nu anaa bɛbɔ yɛne bɛ kɔ sukuu ne koso, ebiemɔ nguro yɛ dwirɛ. Ɔba sɔ a obuo bɔ yele yɛma bɛ ne, ebiaa ngakangaka so kɔte, na yɛngɔfa bɛ yɛngɔyɛ húu.

16. Bɛbɔ bɛnzo Yehowa ne, nzuati yeɛ odikyɛ yɛfa obuo yɛma bɛ ɔ? (1 Petro 2:12; 3:15)

¹⁶ Nzuati yeɛ odikyɛ yɛfa obuo yɛma bɛ ɔ? Nwu ye kyɛ kyɛbɔ yɛne bɛbɔ bɛnzo Yehowa ne di ne, yenwo hia ye paa. Somafoɛ Petro kaele Kristofoɛ nemɔ kyɛ, sɛ mmenia nwu b’abrabɔ pá ne a, ɔkɔmaa bɛkɔhyɛ “Nyameɛ animnyam.” Ɛhene ati otuli bɛ foɛ kyɛ sɛ bekyirekyire bɛ gyidie nu a, bɛyɛ sɔ wɔ “anwobrɛaseɛ ne anidie nu.” (Kenga 1 Petro 2:12; 3:15.) Nyameɛ de onwu bɔ ɔkɔso biala, na edwirɛ biala bɔ yɛkã, ɔne atee bɔ yɛfaso yɛkã ye ne koso, ɔte. Yeti sɛ Kristofoɛ kyirekyire bɛ gyidie nu bekyire awaen mbanyi anaa sona foforɛ biala a, odikyɛ bɛfa obuo bɛma bɛ tekyɛ bɔ begyi Nyameɛ nyunu bedwudwo nala. Ɛhe maa yenwu ye kyɛ bɛbɔ bɛnne asafo nanu ne, odikyɛ yɛfa obuo yɛma bɛ paa.

17. Bɛbɔ bɛnne asafo nanu ne, yɛkɔyɛ sɛɛ ne yafa obuo yama bɛ?

¹⁷ Kyɛbɔ ɛkɔla obuo ali ɔ. Sɛ yɛwɔ asɛnga nu a, bɛbɔ bɛnze Bible nanu pá ne, yenguro kyɛ yɛkɔmaa bekonya adwene kyɛ bɛde babɔno. Na mmom yɛpena kyɛ yenwu bɛ kyɛ bɛsombo bɛma Yehowa, na bɛtra yɛ. (Hag. 2:7; Flp. 2:3) Yeti sɛ wɔ gyidie ti ebie pɛ wɔ nzoaa a, hyɛ wɔnwo so ná ambɛ ye bie anaa anwɔ ye safure. (1 Pet. 2:23) Sɛ ɛkã edwirɛ bie na enwu ye kyɛ anga ye yé a, ndɛen nala pa kyerɛ. Bɛbɔ ɛne bɛ wɔ adwuma nu ɔne bɛbɔ ɛyɛ adwuma ma bɛ ne koso, ɛkɔyɛ sɛɛ ne afa obuo ama bɛ? Bɔ mmɔden kyɛ ekonya bɛnwo adwene pá, na nnɛfa w’adwuma di angorɛ. (Tito 2:​9, 10) Sɛ edi nahorɛ na ɛyere wɔnwo yɛ adwuma a, ebiaa ɔkɔmaa ebiemɔ kohuro wɔ dwirɛ. Nakoso sɛ wamma ye sɔ po a, nwu ye kyɛ Nyameɛ de, okole wɔ kɔto nu.—Kol. 3:​22, 23.

18. Nzuati yeɛ ɔte pá kyɛ yɛkɔfa obuo yɛkɔma mmenia ɔ?

¹⁸ Ɔte pá paa kyɛ yɛkɔfa obuo yɛkɔma mmenia. Yaanwu ye kyɛ sɛ yɛfa obuo yɛma y’abusuafoɛ a, ne yɛfa anidie yɛma Yehowa bɔ ɔhyehyɛle abusua ne. Afei koso, sɛ yɛfa obuo yɛma yeliemamɔ Kristofoɛ a, ne yɛfa anidie yɛma yɛ Baba bɔ ɔwɔ anwuro ne. Sɔ ala koso yeɛ sɛ yɛfa obuo yɛma bɛbɔ bɛnne asafo nanu ne a, ɔkɔmaa ɔngɔyɛ se kyɛ bɛkɔhyɛ yɛ Nyameɛ bɔ ɔte piri ne animnyam ɔ. Sɛ mmenia amva obuo amma yɛ po a, yɛde ɔte pá kyɛ yɛkɔfa obuo yɛkɔma bɛ ɔ. Nzuati ɔ? Sɛ yɛyɛ sɔ a, Yehowa koyira yɛ. Ofikyɛ wahyɛ yɛ bɔ kyɛ: “Bɛ bɔ bedi me ni ne, me koso ngoli bɛ ni.”—1 Sam. 2:30.