Ɛyɛ A Nya Aboterɛ

Bɔ Yesu Yɛle Ɔ

VIDIO: Yesu Nyane Oliema Ne Nwo Aboterɛ

1. Nea VIDIO ne, anaa kenga Yohane 7:​3-5 ɔne 1 Korintofoɛ 15:​3, 4, 7. Eyie a susu nzɛmmisa hemɔ nwo:

1. Yesu hãne nzɛmba ne hyirele oliema nemɔ ne, ahyɛaseɛ ne nzu yeɛ bɛyɛle ɔ?

2. Nzu yeɛ ɔmaa yenwu kyɛ Yesu hɔle so bokale oliema Yakobo ɔ?

Bɔ Yesu Yɛle Ne, Nzu Yeɛ Yesũa Yefi Nu Ɔ?

2. Ebiemɔ wɔ berɛ a, yɛkã nzɛmba ne yekyire bɛ a bɛyɛ nzakrayɛɛ ndɛ. Ebiemɔ koso wɔ berɛ a ɔkyɛ paa, yeti odikyɛ yenya bɛnwo aboterɛ.

Suesũa Bɔ Yesu Yɛle Ne

3. Sesã kyɛbɔ ɛne sona ne bɔ ngɔmmɔ nanu. Sɛ ɛne ebie bɔ ngɔmmɔ, na onguro kyɛ ɛne ye kɔyɛ Bible adesũa a, ɛyɛ a nnɛhyɛ ye. Ɔwɔ nu alaa a, fa vidio ne nwomaa ahoroɛ ne bie boka ye maa onwu kyɛbɔ yɛne mmenia yɛ Bible adesũa ɔ. Afei koso, maa onwu ye kyɛ sɛ osũa Bible ne a, ɔkɔboka ye.

4. Nnɛfa ebie toto ebie nwo. Ɔsonõ kyɛbɔ sona biala si te ɔ. Mmenia biemɔ wɔ berɛ a, yɛtaa ne bɛbɔ ngɔmmɔ nakoso benguro kyɛ yɛne bɛ kɔyɛ Bible adesũa. Benu biemɔ koso, ɛyɛ a né ɔyɛ se ma bɛ kyɛ bɛkɔfa bɔ besũa ne bɛkɔyɛ adwuma. Sɛ ɔba sɔ a, to wɔ boase susu bɔ yeti yeɛ ɔyɛ sɔ nanwo. Ebia yenye gye asɔre bɔ ɔkɔ nanwo, yeti onguro kyɛ ɔkɔyakyi. Anaa ebia y’abusũafoɛ ne ye nnamvo bɛhyɛ ye kyɛ, nnɛmaa ɔne wɔ sũa Bible ne. Yeti ɛyɛ a ma ye mmerɛ ma ɔfa susu nningyein nwo. Ɛhẽne kɔmaa okonwu kyɛ, sɛ ɔfa bɔ osũa ne yɛ adwuma a, ɔkɔboka ye.

5. Kã yenwo dwirɛ kyire Yehowa. Srɛ Yehowa kyɛ ɔboka wɔ ma enwu sona ne kyɛ, ebie bɔ ɔkɔhora kɔyɛ nzakrayɛɛ ɔ. Ebia ɛkora nwu kyɛ sona ne nye ngye edwirɛ nanwo pá. Nakoso ennwu bɔ ɛyɛ ɔ, kyɛ ebia ɛtoa ngɔmmɔ naso, anaa ɛyakyi. Sɛ ɔba sɔ a, srɛ Yehowa kyɛ ɔboka wɔ ma enwu bɔ ɛkɔyɛ ɔ.—1 Kor. 9:26.