Suesua Abɔfo Bɔ Bedi Nahorɛ Ne

1-2. (a) Sɛɛ yeɛ yɛte sorongo wɔ abɔfo nemɔ nwo ɔ? (b) Nningyein benimɔ yeɛ ɔwɔ bɛnwo bɔ yɛkoso yele bie ɔ?

SƐ YEHOWA twe wɔ ba asafo nanu a, ɛbaboka abusua kandinga bie bɔ nu mmenia dodɔ bɛnwo naso. Aliemaamɔ bɔ bɛwɔ ewiase mukoraati ne abɔfo miliɔn pee yeɛ bɛwɔ sɔ abusua nanu ɔ. (Dan. 7:​9, 10) Sɛ bɛkã abɔfo nwo dwirɛ a, ebiaa bɔ ɔba yetianu yeɛ ole kyɛ bɛte sorongo befi sona nwo. Ebie ole kyɛ, bɛbɔle abɔfo nemɔ afoɛ pee kora yeɛ bɛbɔ sona ɔ. (Yob 38:​4, 7) Afei koso bele tumi, na bɛnwo yɛ se tra yɛ. Ebieku koso, bɔne nne bɛnwo, yeti bɛte krongron na bɛtengyɛ bɛtra yɛ.—Luka 9:26.

² Ɔwɔ nu kyɛ abɔfo nemɔ te sorongo de, nakoso nningyein pee wɔ bɛnwo bɔ yɛkoso yele bie ɔ. Ebie ole kyɛ, tekyɛ abɔfo nemɔ ne, yɛkora yɛda Yehowa subaen ahoroɛ bɔ ɔyɛ nyemene ne bie ali. Afei yɛbɔbɔ yɛkora yesi yɛ gyinayɛɛ. Asa koso, yenu biala le ye dumaa, ye subaen, ɔne dwumadie bɔ owura ye sa wɔ asafo nanu ɔ. Bɔ ɔboka so yeɛ ole kyɛ, yɛkoso yɛsõ Yehowa tekyɛ abɔfo nemɔ ala.—1 Pet. 1:12.

3. Nzu yeɛ yɛkɔhora yekosua yekofi abɔfo nemɔ berɛ ɔ?

³ Kyɛbɔ yanwu ye ne, yɛne abɔfo nemɔ te kõ wɔ nningyein pee nu. Ɛhene ati, yɛkɔhora yekosuesua bɛ subaen pá ne maa ɔkɔboka yɛ. Adesua he anu ne, yɛkɔnea kyɛbɔ yekosuesua anwobrɛaseɛ bɔ abɔfo nemɔ le ye ne, kyɛbɔ bekuro sona dwirɛ, bɛ animia, ɔne kyɛbɔ bɛyere bɛnwo kyɛ bɛkɔmaa asafo nanwo kɔte ne.

ABƆFO NEMƆ BRƐ BƐNWO ASE

4. (a) Nzu yeɛ abɔfo nemɔ yɛ fakyire kyɛ bɛbrɛ bɛnwo ase ɔ? (b) Nzuati yeɛ abɔfo nemɔ brɛ bɛnwo ase ɔ? (Edwein 89:7)

⁴ Abɔfo nemɔ atena ase ahyɛ paa, yeti bele suahu pee. Afei bele tumi na bɛse nworɛ paa. Nakoso, betie Yehowa dwirɛ ofikyɛ bɛbrɛ bɛnwo ase. (Edw. 103:20) Sɛ bɛ́yɛ adwuma bie bɔ Yehowa afa awura bɛsa a, tumi bɔ bele ye ne, bɛmva bɛnhoahoa bɛnwo kyɛbɔ ɔkɔyɛ a, mmenia adwene kɔwa bɛ so ɔ. Bɛfa anigye bɛyɛ adwuma biala bɔ Nyameɛ kɔfa kɔma bɛ ne, ɔmva yenwo kyɛ bɛmma mmenia nnwu bɛ dumaa ne.a (Gye. 32:​24, 29; 2 Ahe. 19:35) Afei koso, animnyam bɔ Yehowa ngome yeɛ odikyɛ yɛfa yɛma ne, benne bɛmma bɛnwo. Yede, nzuati yeɛ abɔfo nemɔ brɛ bɛnwo ase sɔ ne? Ofikyɛ bɛdɔ Yehowa, na bebu ye paa.—Kenga Edwein 89:7.

5. Mmerɛ bɔ ne abɔfo bie tengyɛ somafoɛ Yohane adwene ne, nzu yeɛ ɔyɛle bɔ okyire kyɛ ɔbrɛ yenwo ase ɔ? (Nea foto ne koso.)

⁵ Ɛmɔma yɛnea adanzeɛ ko bɔ ɔmaa yenwu kyɛ abɔfo nemɔ brɛ bɛnwo ase ɔ. Kɔyɛ afoɛ 96 Y.A (Yɛ Aberɛ So) ne, abɔfo bie bɔ yɛnze ye dumaa yele nyekyire bie bɔ ɔyɛ nwanwa ali hyirele somafoɛ Yohane. (Nye. 1:1) Mmerɛ bɔ Yohane nwuni sɔ nningyein nemɔ ne, nzu yeɛ ɔyɛle ɔ? Ɔkotole abɔfo ne gyabo kyɛ ɔsõ ye. Nakoso ndɛ ne ala, abɔfo ne hahyirele ye kyɛ: ‘Nea, nnɛyɔ sɔ! Ofikyɛ me koso nde ebiɛngo akoaa, tekyɛ ɛne eliɛma mɔ . . . Sɔne Nyameɛ!’ (Nye. 19:10) Anwobrɛaseɛ beni ala ɛhe! Né abɔfo ne nguro kyɛ ode animnyam anaa anidie ma yenwo. Ɛhene ati yeɛ ndɛ ne ala, ɔhahyirele Yohane kyɛ ɔsõ Yehowa ne. Afei koso, abɔfo ne annya adwene kyɛ odimu tra Yohane. Né sɔ abɔfo ne aso Yehowa ahyɛ paa, na né ole tumi koso tra Yohane bam. Nakoso ɔnate kyɛ ɔbrɛ yenwo ase nati, ɔhahyirele somafoɛ ne kyɛ ɔte obiɛngo akoaa. Afei, ɔwɔ nu kyɛ né odikyɛ abɔfo ne tengyɛ Yohane adwene de, nakoso wandeɛtea ye. Mmom, ɔyɛle sɔ wɔ obuo nu. Onwuni kyɛ ɔnate kyɛ né Yohane nwo adwiri ye nati, yeɛ ɔmaa ɔyɛle sɔ ɔ.

6. Yɛkɔyɛ sɛɛ né yasuesua anwobrɛaseɛ bɔ abɔfo nemɔ le ye ne?

⁶ Yɛkɔyɛ sɛɛ né yasuesua anwobrɛaseɛ bɔ abɔfo nemɔ le ye ne? Sɛ yɛkora yɛyɛ adwuma bie bɔ bafa bawura yɛsa wɔ asafo nanu a, yɛmbena kyɛ yɛfa yɛhoahoa yɛnwo anaa yedwa yɛnoa nu tekyɛ gyamia yɛbɔbɔ y’anwoserɛ yeɛ yafa yayɛ ne. (1 Kor. 4:7) Afei koso, sɛ yafa afoɛ pee yasõ Yehowa, anaa yanya yenwo atee sorongo bie wɔ asafo nanu a, ɔnzɛkyɛ ɛhene ati yebu aliemaamɔ kyɛ yedimu yɛtra bɛ. Nahorɛ dwirɛ yeɛ ole kyɛ, sɛ yenya yenwo atee pee wɔ asafo nanu a, sɔ mmerɛ ne paa yeɛ odikyɛ yɛbrɛ yɛnwo ase ɔ. (Luka 9:48) Tekyɛ abɔfo nemɔ ne, yɛpena kyɛ yɛsõ yeliemamɔ, tra kyɛ yɛkɔmoma yɛnwo so ɔ.

7. Sɛ yétu ebie foɛ a, yɛkɔyɛ sɛɛ né yahyire kyɛ yɛbrɛ yɛnwo ase?

⁷ Ebiaa yenwo kohia kyɛ yetu ebie foɛ, kyɛ ebiaa ɔte aliemaa anaa yɛ wa bie. Sɛ ɔba ye sɔ a, yɛkɔhora yekohyire kyɛ yɛbrɛ yɛnwo ase. Sɛ yétu ebie foɛ a, ɔnzɛkyɛ yɛkata nahorɛ bɔ ɔwɔ edwirɛ nanu naso. Nakoso yɛkɔhora yekosuesua kyɛbɔ abɔfo ne tole ye boase tengyɛle Yohane adwene ne. Yɛyɛ sɔ a, sona ne ngonya adwene kyɛ yetwi ye nyunu. Sɛ yammu mmenia kyɛ yedimu yɛtra bɛ a, ɔkɔmaa sɛ yɛfa Bible nu afutue bie yɛma bɛ a, yɛkɔyɛ ye wɔ obuo ne ɔdɔ nu.—Kol. 4:6.

ABƆFO NEMƆ KURO SONA DWIRƐ

8. (a) Kyɛbɔ Luka 15:10 kyire ne, nzu yeɛ abɔfo nemɔ yɛ fakyire kyɛ bekuro sona dwirɛ ɔ? (b) Nzu yeɛ abɔfo nemɔ yɛ faboka yɛ wɔ asɛnga adwuma nanu ɔ? (Nea foto bɔ ɔwɔ Ɛwɛnelɛ Waen ne nyunu ne.)

⁸ Abɔfo nemɔ mmu mmenia kyɛ mvasoɛ biala nne bɛ so, na mmom bekuro bɛ dwirɛ. Yeti, sɛ ebie yɛ bɔne pirikua bie na onu yenwo, anaa ofi asafo nanu na siɛ ye osa ba a, bɛnye gye paa. Afei sɛ ebie sua Bible ne, ná ɔyɛ nzakrayɛɛ baso Yehowa a, ɛhene koso bedi ahurusi. (Kenga Luka 15:10.) Asa koso, bɛboka yɛso maa yɛyɛ asɛnga adwuma ne. (Nye. 14:6) Ɔwɔ nu kyɛ bɛbɔbɔ bɛngɔ mmenia berɛ tee, nakoso bɛkora bɛboka yɛ maa yɛkɔ bɛbɔ bɛpena kyɛ besua Yehowa nwo nikyee ne berɛ. Yɛngɔhora yengosi ye pi kyɛ abɔfo nemɔ yeɛ bekyire yɛ atee maa yɛkɔ ebiala berɛ ɔ. Ofikyɛ Yehowa kɔhora kɔfa ye sunzum krongron naso kɔboka sɔ mmenia nemɔ, anaa okohyire yɛ atee maa yɛkɔhɔ bɛ berɛ. (Aso. 16:​6, 7) Yemukoraati sĩ ne, ɔnate ye abɔfo nemɔ aso boka yɛ. Yeti sɛ yɛkã nzɛmba ne a, yɛkɔhora yekonya gyidie kyɛ abɔfo nemɔ boka yɛ so.—Kenga edwirɛ bɔ ɔwɔ alaka nanu bɔ yenwa: “Benyane Bɛ Mbaeɛ Nwo Mmuayɛɛ” ne.b

9. Kyɛbɔ abɔfo nemɔ kuro sona dwirɛ ne, yɛkɔyɛ sɛɛ né yasuesua?

⁹ Kyɛbɔ abɔfo nemɔ kuro sona dwirɛ ne, yɛkɔyɛ sɛɛ né yasuesua? Tekyɛ abɔfo nemɔ ne, sɛ yɛte ngaebɔ kyɛ basa bale aliemaa bie bawa asafo nanu a, yɛkɔhora yekoli ahurusi. Yeti yɛkɔhora yɛkɔyɛ nningyein biemɔ yɛkɔma sɔ aliemaa ne maa okonwu kyɛ, ɔyɛ yɛ fɛ kyɛ wasa wawa ɔ. (Luka 15:​4-7; 2 Kor. 2:​6-8) Yɛkɔhora koso yekosuesua abɔfo nemɔ, na yayere yɛnwo yayɛ asɛnga adwuma ne. (Nwo. 11:6) Afei kyɛbɔ abɔfo nemɔ boka yɛ maa yɛkã nzɛmba ne, yɛkoso yɛkɔhora yɛkɔboka aliemaamɔ wɔ asɛnga nu. Ebie yeɛ ole kyɛ, bɛbɔ bahyɛ asɛnga bo foforɛ ne, yɛkɔhora yɛkɔyɛ nhyehyɛɛ yɛne bɛ kɔnate asɛnga nu. Yeɛ aliemaamɔ bɔ bayɛ mbanyi anaa anwonyerɛ ha bɛ ne koso, yɛkɔhora yɛne bɛ kɔhɔ asɛnga.

10. Nzu yeɛ yɛkɔhora yekosua yekofi Sara dwirɛ nanu ɔ?

¹⁰ Sɛ ɔnate ɔhaw bie ti yɛngora yɛnyɛ pee wɔ asafo nanu koso ɛɛ? Sɛ ɔba sɔ a, yɛkɔhora yɛkɔfa atee foforɛ so yɛkɔyɛ sɔ, na yɛse kyɛ abɔfo nemɔ kɔboka yɛ. Aliemaa brasua bie bɔ bɛfrɛ ye Sarac wɔ India, ɛmɔma yɛnea bɔ ɔyɛle ɔ. Ɔfale kɔyɛ afoɛ 20 yɛle ateepakyelɛ adwuma ne. Nakoso, anwonyerɛ bie bɔle ye maa ɔhale sua nu. Ɔwale sɔ ne, yewora bɔle paa. Nakoso, aliemaamɔ bokale ye, na ye bɔbɔ koso né ɔkenga Bible ne daa. Ɛhene maa osa nyane anigye. Ɔnate anwonyerɛ nati né ɔngora bia so tena po, yeti né ɔyɛ se kyɛ ɔkɔhworɔ krataa koli mmenia adanzeɛ ɔ. Ɛhene ati ɔyɛle ye wɔ atee foforɛ so. Yeɛ ole kyɛ ɔfale fon so lili mmenia adanzeɛ. Sɛ ɔfrɛ bɛbɔ ɔne bɛ sua Bible ne a, né bɛkoso bafa mmeni foforɛ baaboka so maa ɔne bɛ asua nikyee. Yede nzu yeɛ ofili nu wale ɔ? Bosome kãa bie sĩ ne, onyane mmenia kɔbo 70. Né ɔyɛ se po kyɛ ɔkɔhora ne bɛmukoraati kosua nikyee ɔ. Yeti ɔkakyili adesua ne bie mane aliemaa biemɔ. Kesaalae bɛbɔ ɔne bɛ sua nikyee ne, benu pee ba asafo nhyiamu. Aliemaamɔ bɔ bɛte kyɛ Sara bɔ bɛyere bɛnwo bɛyɛ asɛnga adwuma ne, abɔfo nemɔ nye gye yenwo paa kyɛ bɛkɔboka bɛ!

ABƆFO NEMƆ MIA BƐNYE

11. Abɔfo bɔ bedi nahorɛ ne, nningyein benimɔ yeɛ bemia bɛnye kyɛ bekogyina yenoa ɔ?

¹¹ Abɔfo bɔ bedi nahorɛ ne, yɛkɔhora yekosuesua b’animia ne. Afoɛ pee ɛhe yeɛ bamia bɛnye bagyina ndɛengyea ne nningyein tɛɛ bɔ ɔkɔso ne noa ɔ. Mmerɛ bɔ Satan ne abɔfo nanu biemɔ bɔ bɛne bɛsõ Yehowa ne dwɔso tiale ye ne, benwuni ye. (Gye. 3:1; 6:​1, 2; Yuda 6) Bible ne maa yenwu ye kyɛ mmerɛ bie, sunzummɔne bie bɔ ole tumi paa sili abɔfo bie atee wɔ adwuma bie bɔ ne ɔkwaayɛ nanwo. (Dan. 10:13) Ɛhene la ahameɛ a, abɔfo nemɔ anwu ye kyɛ ofi tete ɔbaadwu ɛnnɛ mukoraati ne, mmeni kãa bie yeɛ bɛsõ Yehowa ɔ. Ɛhe mukoraati si ne, sɔ abɔfo bɔ bedi nahorɛ ne, begu so bɛfa anigye ne anwokeka bɛsõ Yehowa. Bɛse kyɛ Nyameɛ bɔbɔ deinn ye mmerɛ bɔ ɔsɛ nu ne, ɔkɔye ndɛengyea mukoraati kofi berɛ.

12. Nzu yeɛ ɔkɔboka yɛ maa yekomia yɛnye yekogyina yɛ haw noa ɔ?

¹² Yɛkɔyɛ sɛɛ né yasuesua abɔfo nemɔ animia ne? Kyɛbɔ ɔtole abɔfo nemɔ ne, ebiaa yɛkoso yekonwu ndɛengyea bɔ ɔkɔso ne, anaa mmenia kɔpɔ yɛ. Nakoso, ‘yɛmvɛ paayɛlɛ nwo.’ (Gal. 6:9) Ofikyɛ yele gyidie kyɛ Nyameɛ kɔye nningyein tɛɛ kofi berɛ wɔ mmerɛ bɔ ɔsɛ nu. Afei koso, Nyameɛ ahyɛ bɔ kyɛ ɔkɔboka yɛ maa yekomia yɛnye yekogyina yɛ haw noa. (1 Kor. 10:13) Yɛkɔhora yɛkɔbɔ Yehowa mbaeɛ kyɛ ɔfa ye sunzum ne boka yɛ ma yenya subaen biemɔ te kyɛ aboterɛ ɔne anigye. (Gal. 5:22; Kol. 1:11) Yede sɛ bɛtane wɔnye koso ɛ? Sɛ ɔba sɔ a, nnesuro, na mmom fa wɔnwo to Yehowa so, ofikyɛ ɔkɔboka wɔ maa ekonya anwoserɛ bɔ ɛkɔfa kogyina yenoa ɔ.—Heb. 13:6.

ABƆFO NEMƆ BOKA MAA ASAFO NANWO TE

13. Ayieleɛ mmerɛ he anu ne, adwuma titire beni yeɛ abɔfo nemɔ yɛ ɔ? (Mateo 13:​47-49)

¹³ Wɔ ayieleɛ mmerɛ he anu ne, Yehowa afa adwuma titire bie awura abɔfo nemɔ sa. (Kenga Mateo 13:​47-49.) Asɛnga adwuma bɔ yɛyɛ ne, mmenia pee yeɛ bɛnye gye yenwo ɔ. Ɔnate ɛhene ati, benu biemɔ wɔ berɛ a baayɛ Kristofoɛ, nakoso ebiemɔ de bɛyɛlle sɔ. Bafa bawura abɔfo nemɔ sa kyɛ ‘bɛye bɔnefoɛ befi teneneefoɛ nu.’ Bɔ ɛhe kyire yeɛ ole kyɛ bafa bawura bɛsa kyɛ bɛma asafo nanwo te. Ɛhene ngyire kyɛ sɛ ebie yakyi Yehowa soen a, ɔngɔhora ngɔwa asafo nanu kõ, anaa ɔhaw biala ngɔwa asafo nanu lle. Nakoso yɛkɔhora yekonya gyidie kyɛ, abɔfo nemɔ yɛ adwuma serɛ kyɛbɔ ɔkɔyɛ a, asafo nanwo kɔte ɔ.

14-15. Mmɔden bɔ abɔfo nemɔ bɔ kyɛ bɛkɔmaa asafo nanwo kɔte ne, yɛkɔyɛ sɛɛ né yasuesua? (Nea foto ne koso.)

¹⁴ Mmɔden bɔ abɔfo nemɔ bɔ kyɛ bɛkɔmaa asafo nanwo kɔte ne, yɛkɔyɛ sɛɛ né yahora yasuesua? Odikyɛ yɛkɔso yɛyere yɛnwo kyɛ yɛkɔboka maa asafo nanwo kɔte. Sɛ yɛkɔhora yɛkɔyɛ sɔ a, sana yɛfa mmenia bɔ bele subaen pá ne adamvoa, na afei yɛtwe yɛnwo yefi nikyeebiala bɔ ɔkɔsɛkye yɛne Yehowa afia nanwo, ɛhene kɔmaa yɛkɔbɔ y’ahone nwo waen. (Edw. 101:3) Yɛkɔhora koso yɛkɔboka aliemaamɔ maa bɛkɔhɔso bekoli nahorɛ bɛkɔma Yehowa. Ebie yeɛ ole kyɛ, sɛ yele adanzeɛ bɔ okyire kyɛ aliemaa bie ayɛ bɔne pirikua bie a, nzu yeɛ odikyɛ yɛyɛ ɔ? Ɔnate kyɛ yekuro ye dwirɛ nati, odikyɛ yɛhyɛ ye ngunaen maa ɔkɔbɔ asafo nu mbanyi nemɔ amaneɛ. Sɛ sona ne anyɛ sɔ a, odikyɛ yɛbɔbɔ yɛkɔbɔ bɛ amaneɛ. Bɔ yeti yeɛ yɛyɛ sɔ yeɛ ole kyɛ, yeliema bɔ ɔne Yehowa afia asɛkye ne, yɛpena kyɛ yɛboka ye maa osa gyina ye gya so!—Yak. 5:​14, 15.

¹⁵ Bɔ ɔyɛ aworabɔ ne, bɛbɔ bɛyɛ bɔne pirikua ne, benu biemɔ wɔ berɛ a, né odikyɛ bɛye bɛ befi asafo nanu. Sɛ ɔba sɔ a, mmenia bɔ bɛte sɔ ne, ɔnzɛkyɛ ‘yɛne besã’ kõ.d (1 Kor. 5:​9-13) Sɔ nhyehyɛɛ ne boka maa asafo nanwo te. Afei koso, sɛ yɛne bɛbɔ bɛte sɔ ne ammɔ a, okyire kyɛ yekuro bedwirɛ. Sɛ yɛyɛ sɔ a, ebiaa ɔkɔmaa bɛnye kɔwa bɛnwo so, na basa baasõ Yehowa. Ɛhene kɔmaa yɛne Yehowa ne ye abɔfo nemɔ nye kɔgye.—Luka 15:7.

16. Sɛɛ yeɛ ɛpena kyɛ ɛyere wɔnwo suesua abɔfo nemɔ ɔ?

¹⁶ Yehowa alo yɛ paa kyɛ wamaa yanwu abɔfo nemɔ nwo dwirɛ, na yɛne bɛ bonu yɛ adwuma ɔ. Ɛmɔma yesuesua subaen pá bɔ ɔwɔ bɛnwo ne. Ebie yeɛ ole b’anwobrɛaseɛ, kyɛbɔ bekuro mmenia dwirɛ, b’animia, ɔne mmɔden bɔ bɛbɔ kyɛ bɛkɔmaa asafo nanwo kɔte ne. Sɛ yesuesua abɔfo bɔ bedi nahorɛ ne a, yɛkoso yɛkɔhora yɛkɔboka Yehowa abusua bɔ bɛso ye naso daa!