ADESŨA 20
DWEIN 7 Yehowa, Yɛn Botan Kɛse
Má Yehowa Kyekye Wɔ Wora
‘Animnyam hã Nyameɛ bɔ ɔte anwumvoinnwunɛ Baba ne aworakyekyerɛ mukoraa Nyameɛ ne.’—2 KOR. 1:3.
BƆ ADESŨA NE KƆHÃ YENWO DWIRƐ Ɔ
Kyɛbɔ Yehowa kyekyele Yudafoɛ bɔ né bɛwɔ ngoasom nu ne wora ne, yɛbaanea bɔ yekosua yekofi nu ɔ.
1. Yudafoɛ bɔ né baayɛ ngoaa wɔ Babilɔn ne, né bɛ dwirɛ te sɛɛ?
YUDAFOƐ bɔ né baayɛ ngoaa wɔ Babilɔn ne, wɔde ɛmɔma yɛnea kyɛbɔ né bɛ dwirɛ asi ayɛ ɔ. Né bɛne bɛ nanamɔ ayɛ bɔne afoɛ pee, yesɔ nati, Yehowa maa Babilɔnfoɛ nemɔ sɛkyele bɛ kuro ne, na bɛfale bɛ bɛhɔle ngoasom nu. (2 Abe. 36:15, 16, 20, 21) Bɛhɔle ne, né bele fanwodie kyɛ bɛyɛ nningyein biemɔ wɔ b’asetena nu. (Yer. 29:4-7) Nakoso ɔnate kyɛ né ɛberɛ tte nekaa bɔ bekuro kyɛ bɛtena nati, né ɔlla ase mma bɛ. Yede, ɔhaw bɔ né bɛfa nu ne, né benwu ye sɛ́? Benu ko bɔ odi nahorɛ hane kyɛ: “Babilɔn asue mɔ noa, berɛ yeɛ yɛtenane ase yɛsuni ɔ, mmerɛ bɔ yɛkayele Sion ɔ.” (Edw. 137:1) Né sɔ mmenia nemɔ aba nu abu paa, yeti ne bekohia awerɛkyekyerɛ, nakoso né bɛkwaafa ye ni?
2-3. (a) Yudafoɛ bɔ né bahɔ ngoasom nu ne, nzu yeɛ Yehowa yɛ mane bɛ ɔ? (b) Nzu yeɛ yekosusu yenwo wɔ adesua he anu ɔ?
2 Yehowa te “aworakyekyerɛ mukoraa Nyameɛ.” (2 Kor. 1:3) Bɛbɔ bɛsõ ye ne, okuro bemukoraati dwirɛ paa, yeti yenye gye yenwo kyɛ ɔkɔkyekye bɛ wora. Yudafoɛ bɔ né bɛkɔhɔ ngoasom nu ne, né Yehowa se kyɛ benu biemɔ konu bɛnwo na basa baasõ ye. (Yes. 59:20) Yeti kɔbo afoɛ ɛyaa kora yeɛ bɛkɔ ngoasom nu ne, ɔmaa diyifoɛ Yesaya hworɔle ye nwomaa ne. Nzuati ɔ? Yesaya hane kyɛ: “Ɛmɔ Nyameɛ nwa nyoo, ‘Ɛ́mɔkyekye, ɛ́mɔkyekye me maen wora.’” (Yes. 40:1) Yeti edwirɛ bɔ diyifoɛ ne hworɔle ne, Yehowa nate naso maa Yudafoɛ bɔ ne bahɔ ngoasom nu ne nyane awerɛkyekyerɛ.
3 Tekyɛ Yudafoɛ bɔ né bahɔ ngoasom nu ne, yɛ koso odwu mmerɛ bie a, yehia awerɛkyekyerɛ. Atee nza bɔ Yehowa nate so kyekyele bɛ wora ne, yekosusu yenwo wɔ adesua he anu. (1) ɔhyɛle bɔ kyɛ bɛbɔ bekonu bɛnwo ne, ɔkɔfa bɛ bɔne kɔhyɛ bɛ, (2) ɔmaa mmenia nemɔ nyane anyelasoɛ, yeɛ (3) ɔhane b’ahone tole bɛ kunu. Mmerɛ bɔ yesusu nu biala nwo ne, yɛkɔnea kyɛbɔ ɔkɔboka yɛ ɔ.
YEHOWA NWU YƐ ANWUMVOIN, NA ƆFA YƐ BƆNE KYƐ YƐ
4. Sɛɛ yeɛ Yehowa hyirele kyɛ ɔte Nyameɛ bɔ onwu anwumvoin ɔ? (Yesaya 55:7)
4 Yehowa te “anwumvoinnwunɛ Baba.” (2 Kor. 1:3) Yeti Yudafoɛ bɔ né bahɔ ngoasom nu ne, ɔhane kyɛ sɛ benu bɛnwo a, ɔkɔfa bɛ bɔne kɔhyɛ bɛ. Ɛhene maa yenwu ye kyɛ onwu anwumvoin amba. (Kenga Yesaya 55:7.) Yehowa hane kyɛ: “Ngɔfa ɔdɔ bɔ olle ayieleɛ ɔ ngonwu wɔ anwumvoin.” (Yes. 54:8) Yede, sɛɛ yeɛ né Yehowa konwu bɛ anwumvoin ɔ? Ɔwɔ nu kyɛ b’asoserɛ ti, né Yehowa kɔhwe bɛso maa bɛkɔɔyɛ ngoaa wɔ Babilɔn. Nakoso, Yehowa hyɛle bɛ bɔ kyɛ bɛngɔha dɔ. (Yes. 40:2) Yudafoɛ bɔ né banu bɛnwo ne, né sɔ dwirɛ ne kɔkyekye bɛ wora paa!
5. Gyidie bɔ yele ye kyɛ Yehowa kɔfa yɛ bɔne kɔhyɛ yɛ ɛnnɛ ne, ɔte piri tra Yudafoɛ bɔ bɛhɔle ngoasom nu ne deɛ ne, nzuati ɔ?
5 Nzu yeɛ yesua yefi nu ɔ? Bɛbɔ bɛsõ Yehowa ne, okuro kyɛ ɔfa bɛ bɔne kyɛ bɛ koraa. Ɛnnɛ, gyidie bɔ yele ye kyɛ Yehowa kɔfa yɛ bɔne kɔhyɛ yɛ ne, ɔte piri tra Yudafoɛ bɔ bɛhɔle ngoasom nu ne deɛ ne. Ofikyɛ bɔ Yehowa gyina so fa yɛ bɔne kyɛ yɛ ne, yɛte yebo paa. Yehowa maa Yesaya hane bɔne fakyɛ nwo dwirɛ afoɛ pee sĩ ne, ɔsomane Ɔwa bɔ okuro ye dwirɛ ne maa ɔɔfale ye ngoa bɔle afɔleɛ mane abɔnefoɛ bɔ bekonu bɛnwo ne mukoraati. Ɔnate Yesu wue nati, Yehowa kɔhora kɔfa yɛ bɔne kɔhyɛ yɛ koraa. (Aso. 3:19; Yes. 1:18; Ɛfe. 1:7) Ɛhe maa yenwu ye kyɛ ɔte anwumvoinnwunɛ Nyameɛ amba!
6. Kyɛbɔ Yehowa fa bɔne kyɛ ne, nzuati yeɛ ɔkyekye yɛwora ɔ? (Nea foto ne koso.)
6 Yenu biemɔ wɔ berɛ a, ɔmva yenwo kyɛ yanu yɛnwo wɔ bɔne biemɔ bɔ yayɛ yapɛ nu nanwo ne, yɛ tiboa kora bua yɛ fɔ. Na sɛ mvomsoɛ bɔ yelili ne, yeté nwu yenwo amaneɛ a, yede né edwirɛ ne asɛkye koraa. Sɛ ɔba sɔ a, edwirɛ bɔ Yehowa hane ye wɔ Yesaya 55:7 ne kɔhora kɔkyekye yɛwora. Sɛ yahã bɔne nanwo yahyire mbanyi nemɔ, na yayɛ nzakrayɛɛ a, yɛkɔhora yekonya gyidie kyɛ Yehowa afa ahyɛ yɛ. Yehowa koso de, sɛ ɔfa yɛ bɔne kyɛ yɛ a, ɔngae ye kõ. (Fatoto Yeremia 31:34 nanwo.) Sɛ Yehowa ngae bɔne bɔ yayɛ ne kõ a, yede yɛ koso odikyɛ yɛye yefi yetianu koraa. Yehowa de, bɔ yenwo hia ye paa yeɛ ole bɔ yɛyɛ ye kesaalae ne, ná ɔtte mvomsoɛ bɔ yayɛ yapɛ nu ne. (Hes. 33:14-16) Ɔhaw biala bɔ ɔnate mvomsoɛ bie bɔ yelili nati yɛfa nu ne, yɛ Baba bɔ ole anwumvoin ne kɔye ye mukoraati kofi berɛ koraa wɔ ewiase foforɛ nanu.
Yehowa de, bɔ yenwo hia ye paa yeɛ ole bɔ yɛyɛ ye kesaalae ne, ná ɔtte mvomsoɛ bɔ yayɛ yapɛ nu ne (Nea ngyekyɛmuɛ 6)
7. Sɛ yayɛ bɔne bie yafea a, nzu yeɛ ɔkɔmaa yɛkɔbɔ mbanyi nemɔ amaneɛ ɔ?
7 Sɛ yayɛ bɔne pirikua bie yafea, na yesɔ nati yɛ tiboa bua yɛ fɔ a, nzu yeɛ odikyɛ yɛyɛ ɔ? Bible ne tu yɛ foɛ kyɛ, yɛbɔ mbanyi nemɔ amaneɛ ma bɛboka yɛ. (Yak. 5:14, 15) Yɛkã ye, ɛyɛ a né ɔlla ase kyɛ yɛkɔyɛ sɔ. Nakoso, sɛ yanu yɛnwo amba a, yɛkɔbɔ mbanyi nemɔ amaneɛ. Afei koso sɛ yɛkae kyɛ, Yehowa ne sɔ mbanyi bɔ waye bɛ ne, bekonwu yɛ anwumvoin na bafi ɔdɔ nu baboka yɛ a, ɛhene kɔhã yɛ maa yɛkɔyɛ sɔ. Ɛmɔma yɛnea kyɛbɔ Yehowa nate mbanyi nemɔ aso bokale aliemaa bie bɔ bɛfrɛ ye Arthur,a mmerɛ bɔ né ye tiboa bua ye fɔ ne. Ɔhane kyɛ: “Mvale kɔyɛ afoɛ ko nneane ponografi. Nakoso mmerɛ bie, bɛmane dwudwolɛ bie bɔ né ɔfa yɛ tiboa nanwo ɔ. Ɔnate ɛhene ati, ngane bɔ mayɛ nanwo dwirɛ ngyirele me ye ne mbanyi nemɔ, na ɛhene maa menwo tɔle me fɔnwoo. Nakoso bɔ nyɛle ne, ne oté ha me. Mbanyi nemɔ maa nwuni ye kyɛ Yehowa polle me, na mmom okuro yɛ dwirɛ nati yeɛ ɔtengyɛ yɛ ɔ. Sɔ dwirɛ ne maa m’ahone tɔle mekunu. Afei ɔmaa nwuni kyɛ Yehowa afa me bɔne ahyɛ me.” Kesaalae Arthur te ateepakyelɛniɛ ne asafo nu somvoɛ. Sɛ yɛyɛ bɔne na yenu yɛnwo a, Yehowa fa kyɛ yɛ, na ɛhe kyekye yɛwora paa!
YEHOWA MAA YENYA ANYELASOƐ
8. (a) Yudafoɛ bɔ né bɛwɔ ngoasom nu ne, anyelasoɛ beni yeɛ Yehowa maa benyane ɔ? (b) Kyɛbɔ Yesaya 40:29-31 kã ne, sɛɛ yeɛ né sɔ anyelasoɛ ne kɔboka Yudafoɛ nemɔ ɔ?
8 Sona nye so de, né anyelasoɛ biala nne berɛ kyɛ Yudafoɛ nemɔ kosa kɔhɔ bekuro ɔ. Ofikyɛ sɛ né Babilɔnfoɛ nemɔ fa ebie yɛ akoaa a, né bɛnyakyi ye ma ɔngɔ ye kuro kõ. (Yes. 14:17) Nakoso, Yehowa maa ye mmenia nemɔ nyane anyelasoɛ. Ɔhyɛle bɛ bɔ kyɛ ɔkɔmaa bɛkɔyakyi bɛ maa bɛkɔhɔ bekuro, bɔ nikyeefee ngɔhora ngosi ye atee ɔ. (Yes. 44:26; 55:12) Yehowa nye so de, né Babilɔnfoɛ nemɔ tekyɛ mvuture. (Yes. 40:15) Sona noanu mvrama mbaen po kɔhora kohu ye maa ɔkɔhɔ. Sɔ anyelasoɛ ne, sɛɛ yeɛ né ɔkɔboka Yudafoɛ nemɔ ɔ? Né ɔkɔkyekye bɛwora. Nna ɛhene ngome, na mmom kyɛbɔ Yesaya hane ne, “bɛ bɔ bɛnwondɛ AWURADE ne de, bekonya anwoserɛ foforɛ.” (Kenga Yesaya 40:29-31.) Amba, ɔnate sɔ anyelasoɛ nati, né bekonya anwoserɛ “bekotu kyɛ kɔleɛ.”
9. Nzu yeɛ né ɔmaa Yudafoɛ nemɔ dé di kyɛ Yehowa koli ye bɔhyɛ so ɔ?
9 Yehowa sa mane Yudafoɛ nemɔ adanzeɛ bɔ né bekogyina so bekonya gyidie kyɛ okoli ye bɔhyɛ so ɔ. Ɔyɛle ye sɛ? Né Yudafoɛ nemɔ se ngɔm biemɔ bɔ Yehowa hyɛle bɔ ɔwale nu ɔ. Ebie yeɛ ole kyɛ, né Asiriafoɛ nemɔ ali Yisrael abusua kure buru naso ngunim, na bafa nu mmenia bahɔ ngoasom nu. (Yes. 8:4) Afei koso, benwuni kyɛbɔ Babilɔnfoɛ nemɔ sɛkyele Yerusalem, ná bɛfale nu mmenia bɛhɔle ngoasom nu ne. (Yes. 39:5-7) Asa koso, mmerɛ bɔ betutuli Ɔhene Sedekia nye, na bɛfale ye bɛhɔle Babilɔn ne, benwuni ye. (Yer. 39:7; Hes. 12:12, 13) Edwirɛ biala bɔ né Yehowa ahã ne, ɔwale nu. (Yes. 42:9; 46:10) Ɛhe mukoraati maa benyane gyidie kyɛ Yehowa kɔye bɛ kofi ngoasom nu, kyɛbɔ né wahyɛ bɛ bɔ ne.
10. Ayieleɛ mmerɛ he anu ne, nzu yeɛ ɔkɔmaa anyelasoɛ bɔ yele nanu kɔyɛ se ɔ?
10 Nzu yeɛ yesua yefi nu ɔ? Sɛ yɛwora bɔ a, anyelasoɛ bɔ yele ne kyekye yɛwora, na ɔmaa yenya anwoserɛ. Yɛte mmerɛ bɔ nningyein nu yɛ se paa nu, na Nyameɛ pɔfoɛmɔ bɔ bele tumi ne koso bɛtane yɛnye. Nakoso, ɔnzɛkyɛ yɛmaa y’aba nu bu, ofikyɛ Yehowa ahyɛ bɔ kyɛ yɛkɔtena ase daa wɔ paradise. Ɛberɛ de yɛnwo kɔtɔ yɛ, na yekonya asomdwee. Odikyɛ yetira sɔ anyelasoɛ nanu yé. Sɛ yanyɛ sɔ a, ɔkɔyɛ tekyɛ bɔ yɛpena kyɛ yɛnea nningyein bɔ ɔyɛ nyemene bɔ ɔwɔ aluo, nakoso yatoto yɛ mboma nu ɔ. Sɛ yekonwu sɔ nningyein nemɔ a, sana yebukye yɛ mboma ne kora. Sɔ ala yeɛ sɛ y’anyelasoɛ nanu kɔyɛ se a, sana yɛyɛ nningyein biemɔ ɔ. Ebie yeɛ ole kyɛ, asetena pá bɔ yekonya ye wɔ ewaise foforɛ nanu ne, odikyɛ yɛtaa yɛdwenedwene yenwo. Afei yɛkɔhora yɛkɔkenga nwomaa, yɛkɔnea vidio, anaa yekotie dwein ahoroɛ bɔ ɔfa sɔ anyelasoɛ nanwo ɔ. Nningyein ahoroɛ bɔ yɛnea atee kyɛ ɔkɔwa nu wɔ paradise ne koso, yɛkɔhora yɛkɔhã yenwo dwirɛ mmerɛ bɔ yɛbɔ mbaeɛ ne.
11. Aliemaa brasua bie bɔ anwonyerɛ ha ye ne, nzu yeɛ waboka ye maa wanya anwoserɛ ɔ?
11 Joy te aliemaa brasua bie bɔ anwonyerɛ ha ye paa. Ɛmɔma yɛnea kyɛbɔ anyelasoɛ bɔ ole ne akyekye yewora, ná waboka ye maa wanya anwoserɛ ɔ. Ɔhane kyɛ: “Sɛ adwenedwene hyɛ me so a, mekã m’ahone nu dwirɛ mukoraa mekyire Yehowa, ofikyɛ ɔse bɔ mefa nu ɔ. Yehowa koso tie me, yeti ɔma me “tumi totohyia” anaa tumi bɔ ɔbo sona deɛ so ɔ.” (2 Kor. 4:7) Afei koso, ɛyɛ a Joy fa ye kyɛ ɔwɔ ewiase foforɛ bɔ ‘Maen baa biala ngɔhã kyɛ, “Mafokyɛ”’ nanu. (Yes. 33:24) Yɛ koso sɛ yɛkã y’ahone nu dwirɛ yekyire Yehowa, na yɛfa yɛnye yesie anyelasoɛ bɔ yele ye naso a, yekonya anwoserɛ.
12. Adanzeɛ bɔ okyire kyɛ Yehowa bɔhyɛ ahoroɛ kɔwa nu ne, ebie yeɛ ole beni? (Nea foto ne koso.)
12 Yudafoɛ bɔ né bɛwɔ ngoasom nu ne, Yehowa mane bɛ adanzeɛ bɔ okyire kyɛ ye bɔhyɛ mukoraati kɔwa nu ɔ. Sɔ ala yeɛ ɛnnɛ koso ɔma yɛ sɔ adanzeɛ ne bie ɔ. Ebie yeɛ ole Britain ne America bɔ bahã babonu bedi tumi ne. Yenwu ye kyɛ ‘b’ahennie ne bue bie nwo yɛ se, na ye bue bie koso yɛ mmerɛ’ kyɛbɔ Bible ne ahã ne. (Dan. 2:42, 43) Afei, yesa yɛte kyɛ ‘aseɛwosolɛ kɔso wɔ nekaa ahoroɛ,’ na yɛ́kã nzɛmba ne koso yekyire “maen maen amukoraa.” (Mat. 24:7, 14) Ɔnate kyɛ sɔ nningyein nemɔ sisi nati, ɔmaa yenya gyidie kyɛ Yehowa bɔhyɛ bɔ waha ne mukoraati kɔwa nu.
Ngɔmhyɛ ahoroɛ bɔ yenwu ye kyɛ ɔba nu ne, ɔmaa yenya gyidie kyɛ Yehowa bɔhyɛ bɔ waha ne mukoraati koso kɔwa nu (Nea ngyekyɛmuɛ 12)
YEHOWA KÃ Y’AHONE TO YƐ KUNU
13. (a) Odwu mmerɛ bɔ né bɛkɔyakyi Yudafoɛ nemɔ a, ɔhaw beni yeɛ né bɛkɔfa nu ɔ? (b) Kyɛbɔ Yesaya 41:10-13 kã ne, sɛɛ yeɛ Yehowa kyekyele Yudafoɛ nemɔ wora ɔ?
13 Yehowa maa Yudafoɛ bɔ né bɛwɔ ngoasom nu ne nyane anyelasoɛ, na ɛhene kyekyele bɛwora. Nakoso, né ɔse kyɛ sɛ mmerɛ sõ kyɛ bɛyakyi bɛ a, né bɛkɔfa ɔhaw nu. Né Yehowa alimoa ahã kyɛ, ɔka kãa maa sɔ mmerɛ ne so a, ɔhene bie bɔ ole tumi koli maen bɔ bapɛ Babilɔn nwo bayia naso ngunim, na ɛhene sĩ ne, wafa kõɛ waatoa Babilɔn bɔbɔ. (Yes. 41:2-5) Aso né odikyɛ Yudafoɛ nemɔ maa bekunu tete bɛ anaa? Yehowa limoa kyekyele ye mmenia nemɔ wora kyɛ: “Nnɛsuro, ofikyɛ ngyi wɔ si, nnɛma ɛserɛ kã wɔ, ofikyɛ me ole wɔ Nyameɛ.” (Kenga Yesaya 41:10-13.) Edwirɛ “me ole wɔ Nyameɛ” bɔ Yehowa hane ne, né ɔpena kyire sɛɛ? Nna kyɛ né Yehowa kã kyɛ bɛsõ ye, ofikyɛ ɛhene de né bɛse ye dada. Mmom né ɔpena kyɛ bɛte yebo kyɛ oté gyi besi.—Edw. 118:6.
14. Yudafoɛ bɔ né bɛwɔ ngoasom nu ne, atee foforɛ beni yeɛ Yehowa nate so hane b’ahone tole bekunu ɔ?
14 Yudafoɛ bɔ né esuronyi ahã bɛ ne, Yehowa maa benwuni kyɛ tumi né nimdeɛ bɔ ole ye ne, olle noa. Ɛhene maa b’ahone tɔle bekunu. Ɔhahyirele bɛ kyɛ bɛto bɛnye anwuro bɛnea nzramaa. Sɔ nzramaa nworanwora bɔ wabɔ ne, ɔmaa benwuni kyɛ osa se benu biala dumaa. (Yes. 40:25-28) Sɛ nzramaa po, Yehowa se bɛ dumaa a, yede bɛbɔ bɛsõ ne koso ɔse benu biala! Afei koso, sɛ Yehowa le tumi bɔ wafa wabɔ nzramaa a, yede ole tumi bɔ ɔkɔfa kɔboka ye mmenia ɔ. Yesɔ nati, né ɔnzɛkyɛ Yudafoɛ nemɔ maa esuronyi kã bɛ koraa.
15. Sɛ né mmerɛ so kyɛ bɛyakyi Yudafoɛ nemɔ a, sɛɛ yeɛ Yehowa maa benwuni bɔ odikyɛ bɛyɛ ɔ?
15 Sɛ né mmerɛ sõ kyɛ bɛyakyi Yudafoɛ nemɔ a, Yehowa maa besa benwuni bɔ odikyɛ bɛyɛ ɔ. Né wamaa Yesaya alimoa ahahyire bɛ kyɛ: “Baawura wɔ pumbu mɔ [anaa sua] nu, ná toto wɔ nwo anoa nu; fa wɔ nwo fea kãa kɔpem kyɛ ahonehulɛ ne kɔtɔ nzue nu ɔ.” (Yes. 26:20) Sɔ dwirɛ ne limoa wale nu mmerɛ bɔ Ɔhene Karose lili Babilɔnfoɛ nemɔ so ngunim ne. Ebie bɔ né ɔtworɔ Greekfoɛ abakɔsɛm hane kyɛ, mmerɛ bɔ Karose ne ye sogyafoɛ nemɔ dwuli Babilɔn ne, ɔhahyirele bɛ kyɛ “sona biala bɔ bekonwu ye wɔ aluo ne, behũ ye.” Wɔde nea kyɛbɔ ne Babilɔnfoɛ nemɔ kunu kɔtete bɛ ɔ! Nakoso, Yudafoɛ nemɔ de betiele Yehowa, na ɔkɔyɛ kyɛ ɛhene yeɛ olɛle bɛ ngoa ɔ.
16. Nzuati yeɛ ɔnzɛkyɛ yɛmaa yekunu tete yɛ wɔ edwirɛ bɔ ɔbasisi nanwo ɔ? (Nea foto ne koso.)
16 Nzu yeɛ yesua yefi nu ɔ? Ɔngɔhyɛ amaneɛnwunɛ piri bɔ ebie walle sona abakɔsɛm nu llé ne, ɔkɔwa. Sɛ ɔhyɛ yebo a, mmenia bɔ bɛwɔ ewiase he anu ne, bɛnye so kɔtã na esuronyi kɔhã bɛ. Nakoso, yɛbɔ yɛsõ Yehowa ne de, esuronyi ngɔhã yɛ, ofikyɛ yɛse kyɛ ye yeɛ ɔte yɛ Nyameɛ ɔ. Sɔ mmerɛ ne, yɛkɔma yɛ ti so yɛkɔnea anwuro, ofikyɛ ‘yɛ lelɛ ne, né wapingye.’ (Luka 21:28) Maen biemɔ bɔ bahã bɛnwo babɔ nu ne, sɛ bɛto bewura yɛ so po a, yekogyina pindinn. Yehowa nate ye abɔfo nemɔ aso kɔbɔ yɛnwo waen, na okosa kɔma yɛ akwangyerɛ bɔ okole yɛ ngoa ɔ. Yede, atee beni yeɛ ɔkɔfa so kɔfa sɔ akwangyerɛ ne kɔma yɛ ɔ? Ɛhene de sɛ odwu berɛ a, yeɛ yekonwu ye ɔ. Nakoso, ebiaa ɔnate yɛ asafo nemɔ aso yeɛ ɔkɔyɛ sɔ ɔ. Atee bie aso ne, bɛkɔyɛ tekyɛ yɛ “pumbu mɔ” bɔ ɔkɔbɔ yɛnwo waen ɔ. Yede, yɛkɔyɛ sɛɛ né yaboa yɛnwo yama sɔ dwirɛ bɔ ɔbasisi ne? Odikyɛ yɛkã yɛkɔ yeliemamɔ nwo, yetie asafo ne akwangyerɛ, ná yede yɛtonu kyɛ Yehowa yeɛ okyire y’ahyehyɛdeɛ ne atee ɔ.—Heb. 10:24, 25; 13:17.
Sɛ yɛkae kyɛ Yehowa le tumi bɔ ɔkɔfa kole yɛ a, esuronyi ngɔhã yɛ mmerɛ bɔ amaneɛnwunɛ piri ne ahyɛ yebo ne (Nea ngyekyɛmuɛ 16)b
17. Ɛkɔyɛ sɛɛ né amaa Yehowa akyekye wɔ wora?
17 Sɛ né Yudafoɛ nemɔ kɔ ngoasom nu a, né bɛkɔfa ɔhaw pee nu. Nakoso Yehowa kyekyele bɛwora. Yɛkoso sɔ ala yeɛ ɔkɔyɛ kɔma yɛ ɔ. Yeti ɔmva yenwo ne bɔ okosi biala ne, kɔso fa wɔnwo to Yehowa so ma ɔkyekye wɔ wora. Nya gyidie kyɛ ye anwumvoinwunnɛ sone. Afei anyelasoɛ bɔ ele ye ne, kɔso tira nu yé. Kae kyɛ Yehowa yeɛ ɔte wɔ Nyameɛ ɔ, yeti ɔnzɛkyɛ esuro nikyefee.
DWEIN 3 Yɛn Ahoɔden, Yɛn Anidaso ne Yɛn Ahotoso
a Dumaa ne bie wɔ berɛ a, basesã ye.
b BƆ FOTO NE KÃ YENWO DWIRƐ Ɔ: Aliemaamɔ kãa bie ayia nu wɔ sua bie nu. Bele gyidie kyɛ Yehowa le tumi bɔ ɔkɔfa kɔbɔ ye mmenia nwo waen, ɔmva yenwo ne nekaa biala bɔ bɛwɔ ne.