Exode
1 So ayeke iri ti amolenge ti Israël so aga lani na Égypte legeoko na Jacob, koli oko oko aga lani na azo ti da ti lo:+ 2 Ruben, Siméon, Lévi, na Juda;+ 3 Issacar, Zabulon na Benjamin; 4 Dan, Nephtali, Gad na Aser.+ 5 Azo* kue so abâ gigi na lege ti Jacob ayeke 70, me Joseph ayeke ti lo na Égypte kâ kozo awe.+ 6 Na pekoni, Joseph akui,+ aita ti lo kue akui nga. Azo ti ngoi ti lo ni so kue akui. 7 Azo ti Israël adü amolenge gbani na ala wu mingi. Ala ngbâ ti dü gï dungo nga ngangu ti ala ayeke gue gï guengo na li ni na mbeni lege so apika bê mingi, ye so asara si ala mû yâ ti kodro ni kue.+
8 Na pekoni, mbeni fini gbia so ahinga Joseph pëpe la si akomanse ti komande na ndö ti Égypte. 9 Ni la, lo tene na azo ti lo: “Ala bâ! Azo ti Israël awu mingi nga ala yeke ngangu mingi ahon e.+ 10 Zia e sara mbeni ye na ala si ala ngbâ ti dü pëpe. Tongana e sara mbeni ye pëpe, ala yeke ngbâ ti dü gï dungo, si tongana mbeni bira aga na ndö ti e, ala yeke tï na peko ti awato ti e ti tiri na e, na ala yeke zia kodro ni ti hon.”
11 Tongaso, ala zia amokonzi na ndö ti azo ti Israël ti sara pasi na ala na lege ti angangu kua;+ azo ti Israël aleke agbata ti batango aye dä ndali ti Pharaon, gbata ti Pithom na ti Ramsès.+ 12 Me so a yeke sara pasi na ala, ala kiri adü mingi nga ala yeke mû ndo. Ni la, mbeto ti azo ti Israël agbu azo ti Égypte mingi.+ 13 Tongaso, azo ti Égypte aforcé azo ti Israël ti sara ngangu kua ti ngbâa.+ 14 Ala sara si na lege ti angangu kua, gigi ni akpengba mingi na azo ti Israël. Ala yeke sara popoto ti sese, abrique nga na mara ti akua ti ngbâa nde nde kue na yaka. Biani, azo ti Égypte asara pasi na ala na sarango akua ti ngbâa nde nde kue.+
15 Na pekoni, gbia ti Égypte atene na Shiphrah na Puah so ayeke amatrone Hébreu, 16 atene: “Tongana ala yeke mû molenge na terê ti awali Hébreu+ si ala bâ awali ni adü molenge-koli, ala fâ molenge ni; me tongana a yeke molenge-wali, ala zia lo ngbâ na fini.” 17 Ye oko, amatrone ni akpe mbeto ti tâ Nzapa, na ala sara ye so gbia ti Égypte atene na ala so pëpe. Ala zia amolenge-koli ni angbâ na fini.+ 18 Na pekoni, gbia ti Égypte airi amatrone ni na lo hunda ala: “Ala zia amolenge-koli ni angbâ na fini ngbanga ti nyen?” 19 Amatrone ni atene na Pharaon: “Awali Hébreu ayeke tongana awali ti Égypte pëpe. Ala yeke ngangu mingi; kozoni si matrone alï na ndö ti ala, ala dü ti ala awe.”
20 Tongaso, Nzapa asara nzoni na amatrone ni; wungo ti azo ti Israël angbâ gï ti gue na li ni nga ala ga ngangu mingi. 21 So amatrone ni akpe mbeto ti tâ Nzapa, lo sara si sewa ti ala awu. 22 Na nda ni, Pharaon amû yanga na azo ti lo kue, lo tene: “Molenge-koli kue so a dü lo fini fini, ala bi lo na yâ ti Ngu ti Nil, me ala zia amolenge-wali ni angbâ na fini.”+