Psaume
Na mokonzi ti azo ti pikango mozoko. Psaume ti David.
14 Zo ti buba* atene na bê ti lo, atene:
“Jéhovah ayeke dä pëpe.”+
Asarango ye ti ala abuba awe nga sarango ye ti ala na mbage ti azo ayeke sioni mingi.
Zo oko ti sara nzoni ye ayeke dä pëpe.+
2 Me Jéhovah angbâ na yayu kâ lo bâ amolenge ti azo,
ti bâ wala mbeni zo ahinga ti bâ yâ ti aye nzoni, wala mbeni zo ayeke gi Jéhovah.+
3 Ala kue amû mbeni lege nde,+
sarango ye ti ala kue aga sioni awe;
zo oko ti sara nzoni ye ayeke dä pëpe,
même zo oko tongaso ayeke dä pëpe.
4 Mbeni zo na popo ti azo ti sioni so ahinga ndo ayeke dä ape?
Ala hunzi azo ti mbi tongana ti so ala te mapa ahunzi.
Ala di iri ti Jéhovah pëpe.
5 Me mbeto ayeke gbu ala ngangu,+
ndali ti so Jéhovah ayeke na popo ti groupe ti azo ti mbilimbili.
6 Ala azo ti sioni, ala gi ti buba yâ ti aye so zo ti mawa aleke ti sara,
me Jéhovah ayeke ndo ti batango terê ti lo.+
7 Zia si salut ti Israël alondo na mbage ti Sion aga!+
Na ngoi so Jéhovah akiri abungbi azo ti lo so a gue na ala na ngbâa,
zia si Jacob aduti na ngia nga zia si Israël asara ngia.