NÉHÉMIE

1 Tënë ti yanga ti Néhémie*+ molenge ti Hacaliah: A yeke lani na nze ti Kislev,* na yâ ti ngu 20* ni na ngoi so mbi yeke na Suse,+ gbata ti gbia.* 2 Na ngoi ni so, Hanani+ so ayeke mbeni oko ti aita ti mbi, lo na ambeni koli, alondo na Juda aga. Mbi hunda ala na ndö ti tanga ti aJuif so a gue na ala ândö na ngbâa+ si ala kiri na Jérusalem so; mbi hunda ala nga na ndö ti Jérusalem. 3 Ala tene na mbi: “Tanga ti aJuif so alondo na ngbâa akiri si ayeke kâ na yâ ti kodro-komanda ti Juda so ala yeke na yâ ti pasi nga na yâ ti kamene.+ A kungbi gbagba ti Jérusalem na sese+ na wâ agbi ayanga ti gbagba ni kue.”+

4 Gï so mbi mä tënë ni so, mbi duti na mbi komanse ti toto; na yâ ti alango mingi mbi ngbâ gï ti sara mawa, ti mû jeûne+ nga ti sambela na gbele Nzapa ti yayu. 5 Mbi tene: “Jéhovah, Nzapa ti yayu, mo so mo yeke kota Nzapa so amû mbeto mingi na zo, mo Nzapa so mo yeke sara ye alingbi na mbele ti mo nga mo yeke fa tâ ndoye na azo so aye mo na so ayeke bata acommandement ti mo,+ 6 zia mo dengi mê ti mo nga mo bâ ndo na mbage ti wakua ti mo ti mä sambela so mbi yeke sara na gbele mo laso so. Bï na lâ+ mbi yeke sambela ngbanga ti awakua ti mo azo ti Israël, mbi fa na gigi asiokpari kue so azo ti Israël asara na terê ti mo. E sara siokpari awe, mbi na ahale ti akotara ti mbi.+ 7 E sara sioni na terê ti mo+ na lege so e bata pëpe acommandement, andia nga na ambela so mo mû lani na wakua ti mo Moïse.+

8 “Mbi voro mo, mo dabe ti mo na tënë so mo tene lani na lege ti wakua ti mo Moïse, mo tene: ‘Tongana ala sara ye na lege ni pëpe, fade mbi yeke kangbi ala kirikiri na popo ti amara nde.+ 9 Me tongana ala kiri na mbage ti mbi, ala bata acommandement ti mbi nga ala sara ye alingbi na ni, atâa so ala gue kirikiri na popo ti amara nde juska na nda ti yayu kâ, fade mbi bungbi ala+ kâ mbi ga na ala na ndo so mbi soro ti zia iri ti mbi dä.’+ 10 Ala yeke awakua ti mo nga azo ti mo, ala so mo zi ala na lege ti kota ngangu ti mo nga na lege ti maboko ti mo so ayeke ngangu mingi.+ 11 Jéhovah, mbi voro mo, dengi mê ti mo, mo mä sambela ti wakua ti mo nga na sambela ti awakua ti mo so anzere na bê ti ala ti sara mbeto ti iri ti mo, mo sara si ye aga nzoni na wakua ti mo laso, nga mo sara si gbia abâ mawa ti mbi.”+

Andâ kua ti mbi lani ayeke ti mû sämba na gbia.+

2 Na yâ ti ngu 20 ni+ ti komandema ti Gbia Artaxerxès,+ na nze ti Nisan, vin ayeke na devant ti gbia, tongana ti so mbi yeke sara ka, mbi mû vin mbi mû na lo.+ Me lâ oko mbi sara mawa tongaso na devant ti lo pëpe. 2 Tongaso gbia atene na mbi, atene: “Mo sara mawa tongaso ngbanga ti nyen, so terê ti mo ason ape so? Âmanke mbeni tënë agbu bê ti mo, ni la mo sara mawa tongaso so.” Na mango tënë so, mbeto ahon ndö ti mbi.

3 Tongaso mbi tene na gbia: “Zia gbia angbâ na fini lakue! Mawa asara mbi ape tongana nyen? tongana gbata ti akotara ti mbi, ndo so a lu ala dä, abuba kue na wâ agbi ayanga ti gbagba ni kue so?”+ 4 Gbia akiri tënë na mbi: “Mo ye mbeni ye?” Hio, mbi ngbâ mbi sambela Nzapa ti yayu.+ 5 Tongaso mbi tene na gbia: “Tongana mo gbia mo ye, si bê ti mo aye ti sara nzoni na mbi zo ti kua ti mo, gbia, mo zia mbi gue na Juda, na gbata so a lu akotara ti mbi dä, si mbi lingbi ti kiri ti leke ni.”+ 6 Na pekoni, gbia ahunda mbi, na ndembe ni so wali ti lo ayeke na terê ti lo, atene: “Tambela ti mo ni ayeke sara lango oke? Mo yeke kiri lawa?” Tongaso, a nzere na bê ti gbia ni ti tene mbi gue,+ nga mbi fa na lo alango kue so mbi yeke sara.+

7 Mbi tene na gbia: “Tongana a nzere na bê ti mo gbia, zia mo mû na mbi alettre ti tene mbi gue na ni na agouverneur ti ando so ayeke na Mbage ti ngu ni,*+ si ala zia lege na mbi ti gue juska mbi si na Juda, 8 mbeni lettre ni nga ti tene mbi mû na Asaph zo ti batango Gbako ti gbia, si lo lingbi ti mû na mbi akeke ndali ti acharpente ti véranda ti Ngangu gbagba+ so ayeke na terê ti Kota Da ni,* ndali ti amur ti gbagba ni+ nga ndali ti da so mbi yeke gue ti lango na yâ ni.” Ndali ti so maboko ti Nzapa ti mbi ayeke na ndö ti mbi,+ gbia amû na mbi alettre so.+

9 Tongaso, mbi si na agouverneur ti ando so ayeke na Mbage ti ngu ni na mbi mû alettre ti gbia ni na ala. Gbia azia na terê ti mbi ambeni mokonzi ti aturugu nga na ambeni zo so ayeke kpe na ambarata. 10 Na ngoi so Sanballat,+ zo ti gbata ti Beth-Horon nga na Tobiah+ mbeni kota zo ti kodro,* so lo yeke zo ti mara ti Ammon,+ amä tënë so, bê ti ala ason ndali ti so mbeni zo aga ti sara ye ti nzoni na azo ti Israël.

11 Tongana mbi si na Jérusalem, mbi sara lango ota. 12 Na pekoni, mbi londo na bï, mbi na ambeni koli na terê ti mbi. Tënë ti ye so Nzapa azia na bê ti mbi ti sara ndali ti Jérusalem so mbi sara tënë ni na zo oko pëpe; mbeni nyama nde ayeke na terê ti mbi pëpe gï kororo so mbi monté na ndö ti lo. 13 Na bï, mbi sigi na yanga ti gbagba so a di iri ni Yanga-ti-gbagba-ti-popo-hoto,+ mbi hon na devant ti dungu so a iri ni Dungu-ti-kota-ngbo juska mbi si na yanga ti gbagba so a iri ni Yanga-ti-gbagba-ti-gba-ti-amburu-ti-wa,+ mbi bâ gbagba ti Jérusalem mbi bâ so akungbi, na wâ agbi ayanga ti gbagba ni kue.+ 14 Mbi hon mbi si na ndo so a iri ni Dungu-ti-yanga-ti-gbagba,+ na mbi gue mbi si na ndo so a leke ni ti bata ngu ti gbia dä, me lege ni akono pëpe ti tene kororo so mbi yeke na ndö ti lo so ahon dä. 15 Me gï na bï, mbi gue juska mbi si na popo-hoto ni,*+ mbi ngbâ ti tambela ti bâ gbagba ni, na pekoni mbi tourné mbi lï na yanga ti gbagba so a iri ni Yanga-ti-gbagba-ti-Popo-hoto, na mbi kiri.

16 Akota zo ti kodro ni+ ahinga fade tënë ti ndo so mbi gue dä so pëpe nga na tënë ti ye so mbi yeke sara so, ndali ti so ade mbi sara mbeni tënë oko pëpe na aJuif, atâa aprêtre, amokonzi, akota zo ti kodro ni nga na tanga ti azo ti kua ni. 17 Na nda ni mbi tene na ala: “Ala bâ tâ mawa so e yeke na yâ ni so ma! ala bâ tongana nyen la Jérusalem abuba kue nga tongana nyen la si wâ agbi ayanga ti gbagba ni. Ala ga e kiri e leke gbagba ti Jérusalem, si ye ti kamene so angbâ ti gue tongaso pëpe.” 18 Na pekoni mbi fa na ala tongana nyen la maboko ti Nzapa ti mbi ayeke na ndö ti mbi,+ mbi fa nga na ala atënë so gbia atene lani na mbi.+ Na mango tënë so, ala tene: “Zia e londo e leke gbagba ni.” Tongaso, ala kpengba mba na popo ti ala ti leke terê ti ala ngangu ti sara pendere kua so.+

19 Na ngoi so Sanballat, zo ti gbata ti Beth-Horon na Tobiah+ mbeni kota zo ti kodro ni,* so lo yeke zo ti mara ti Ammon+ nga na Guéshem zo ti Arabie,+ amä tënë so, ala komanse ti he e+ nga ala bâ e tongana ambumbuse zo na ala tene: “Nyen la ala yeke sara so? Ala yeke sara kpengba-li na gbia?”+ 20 Ye oko, mbi tene na ala, mbi tene: “Nzapa ti yayu ayeke sara si kua so aga nzoni,+ e awakua ti lo e yeke londo ti sara gbagba ni. Me mbeni ye ti ala oko ayeke na Jérusalem pëpe, ala yeke na droit na ndö ti mbeni ye na Jérusalem oko pëpe, nga mbeni zo na Jérusalem ti dabe ti lo na ala ayeke dä pëpe.”+

3 Kota prêtre Éliashib+ nga na amba ti lo aprêtre alondo ti leke mbage ti gbagba ni so a iri ni Yanga-ti-gbagba-ti-ataba.+ Ala mû ni na Nzapa+ nga ala leke aporte ni. Ala mû ni na Nzapa, na ala ngbâ ti leke mbage ti gbagba ni ague juska asi na Tour ti Méah,+ nga juska na Tour ti Hananel.+ 2 Na terê ti ala, azo ti Jéricho+ nga kue ayeke sara ti ala kua ti lekengo gbagba ni. Na terê ti azo ti Jéricho, Zaccur, molenge ti Imri, ayeke sara nga kua ni.

3 Amolenge ti Hassénaah aleke ti ala mbage ti gbagba ni so a iri ni Yanga-ti-gbagba-ti-asusu.+ Ala leke acadre ni na keke+ nga ala leke alê ti porte ni, ala zia aclé ni dä nga na abarre ni. 4 Na terê ti amolenge ti Hassénaah, Mérémoth+ ayeke sara ti lo kua ni, lo yeke molenge ti Urie, Urie ayeke molenge ti Haccoz. Na terê ti Mérémoth, Méshullam+ ayeke sara ti lo kua ni, lo yeke molenge ti Bérékiah, Bérékiah ayeke molenge ti Méshézabel. Na terê ti Méshullam, Zadoc ayeke sara ti lo kua ni, lo yeke molenge ti Baana. 5 Na terê ti lo, azo ti kodro ti Técoa+ ayeke sara ti ala kua ni, me akota zo ti ala aye pëpe ti woko terê ti ala* ti mû mbage ti ala na yâ ti kua ni so na gbe ti azo so ayeke na li ti ala.

6 Joïada molenge ti Paséah nga Méshullam molenge ti Bésodéïah aleke ti ala mbage ti gbagba ni so a iri ni Yanga-ti-gbagba-ti-ngbene-gbata.+ Ala leke acadre ni na keke nga ala leke alê ti porte ni, ala zia aclé ni dä nga na abarre ni. 7 Na terê ti ala, Mélatiah zo ti Gabaon+ na Jadon zo ti gbata ti Méronoth ayeke sara ti ala kua ni, azo ti Gabaon nga na azo ti Mizpah+ so ayeke na gbe ti komandema ti gouverneur ti ando so ayeke na Mbage ti ngu ni.*+ 8 Na terê ti ala, Uzziel ayeke sara ti lo kua ni, lo yeke molenge ti Harhaïah zo ti lekengo aye na lor; na terê ti lo, Hananiah ayeke sara ti lo kua ni, lo yeke mbeni zo ti sarango amafuta so afun pendere;* ala sara dalle na atênë, a londo na Jérusalem juska a si na mbage ti gbagba ni so a iri ni Kota-gbagba.+ 9 Na terê ti ala, Réphaïah molenge ti Hur, lo yeke sara ti lo kua ni, lo yeke mbeni mokonzi na ndö ti ndambo ti kodro-komanda ti Jérusalem. 10 Na terê ti Réphaïah, Jédaïah molenge ti Harumaph ayeke sara ti lo kua ni na devant ti da ti lo; na terê ti Jédaïah, Hattush molenge ti Hashabnéïah ayeke sara ti lo kua ni.

11 Malkijah molenge ti Harim+ na Hashub molenge ti Pahath-Moab+ asara ti ala kua ti lekengo mbeni mbage ti mur ni nde,* ala leke nga ndo so a iri ni Tour-ti-Four.+ 12 Na terê ti ala, Shallum molenge ti Hallohesh ayeke sara ti lo kua ni, lo yeke mokonzi na ndö ti ndambo ti kodro-komanda ti Jérusalem, lo na amolenge ti lo ti wali la ayeke sara kua ni.

13 Hanun molenge ti Zanoah+ aleke yanga ti gbagba ni so a iri ni Yanga-ti-gbagba-ti-popo-hoto.+ Ala leke yanga ti gbagba ni nga na alê ti porte ni, ala zia aclé ni dä nga na abarre ni, amur so ala leke alingbi mètre 445 juska ti si na Yanga-ti-gbagba-ti-gba-ti-amburu-ti-wa.+ 14 Malkijah molenge ti Récab, lo yeke mbeni mokonzi na ndö ti kodro-komanda ti Beth-Hakkérem,+ lo leke Yanga-ti-gbagba-ti-gba-ti-amburu-ti-wa. Lo leke yanga ti gbagba ni nga na alê ti porte ni, lo zia aclé ni dä nga na abarre ni.

15 Shallun molenge ti Colhozéh, lo yeke mbeni mokonzi na ndö ti kodro-komanda ti Mizpah,+ lo leke ti lo Yanga-ti-gbagba-ti-li-ti-ngu.+ Lo leke yanga ti gbagba ni, li ni nga na alê ti porte ni, lo zia aclé ni dä nga na abarre ni, lo leke nga amur ti ndo so a iri ni Ndo-so-a-leke-ni-ti-bata-ngu-ti-gbia-da,+ ti gue na jardin ti gbia+ juska ti si na Escalier+ so alondo na Gbata ti David si adescend.+

16 Na terê ti lo, Néhémie molenge ti Azbuc, lo yeke mbeni mokonzi na ndö ti ndambo ti kodro-komanda ti Beth-Zur,+ lo sara ti lo kua ni alondo na ndo so abâ ndo lê na lê na Cimetière-ti-agbia so a lu gbia David dä+ juska ti si na ndo so a leke ni lani ti bata ngu dä+ juska na ndo so a iri ni Da-ti-awangangu.

17 Na terê ti lo, azo ti mara ti Lévi asara ti ala kua ni: Réhum molenge ti Bani la abâ ndo na ndö ti kua ni so. Na terê ti lo, Hashabiah, mbeni mokonzi na ndö ti ndambo ti kodro-komanda ti Kéïlah,+ lo sara kua ni na iri ti kodro-komanda ti lo. 18 Na terê ti Hashabiah, aita ti azo ti mara ti Lévi asara ti ala kua ni, Bavvaï molenge ti Hénadad, mbeni mokonzi na ndö ti ndambo ti kodro-komanda ti Kéïlah, la ayeke bâ ndo na ndö ti kua ni so.

19 Na terê ti Bavvaï, Ézer molenge ti Jéshua,+ mbeni mokonzi ti Mizpah, lo yeke leke ti lo mbeni mbage ti gbagba ni so abâ ndo lê na lê na ndo so amonté ti gue na ndo ti Batango-aye-ti-bira dä, na ndo so Pilier ti gbagba ni ayeke dä.+

20 Na terê ti Ézer, a yeke Baruch molenge ti Zabbaï,+ lo sara kua ni na bê ti lo kue nga lo leke ti lo mbeni mbage ti gbagba ni so alondo na ndo so Pilier ti gbagba ni ayeke dä juska na yanga-da ti kota prêtre Éliashib.+

21 Na terê ti Baruch, Mérémoth+ molenge ti Urie, Urie ayeke molenge ti Haccoz; Mérémoth aleke mbeni mbage ti gbagba ni ti londo na yanga-da ti kota prêtre Éliashib juska ti si na fin ti da ni.

22 Na terê ti Mérémoth, aprêtre, azo ti kodro-komanda ti Jourdain,*+ ala nga kue asara kua ti lekengo gbagba ni. 23 Na terê ti ala, Benjamin na Hashub, ala sara ti ala kua ti lekengo gbagba ni na ndo so abâ ndo lê na lê na yanga-da ti ala wani. Na peko ti ala, a yeke Azariah molenge ti Maaséïah, Maaséïah ayeke molenge ti Ananiah. Azariah asara ti lo nga kua ti lekengo mbage ti gbagba ni so ayeke nduru na da ti lo. 24 Na terê ti lo a yeke Binnui molenge ti Hénadad, lo sara kua ti lekengo mbeni mbage ti gbagba ni so alondo na da ti Azariah juska ti si na Pilier ti gbagba ni+ nga ague juska na coin ti gbagba ni.

25 Na terê ti Binnui a yeke Palal molenge ti Uzaï, lo sara kua ti lekengo mbage ti gbagba ni, ti londo na ndo so abâ ndo lê na lê na pilier ti gbagba ni nga na tour so alondo na terê ti Da* ti gbia+ si ahon, ndo so ayo na nduzu si ayeke na yâ ti Lacour-ti-agarde+ so. Na terê ti lo a yeke Pédaïah molenge ti Parosh.+

26 Azo ti kua ti temple*+ so alango na Ophel+ asara ti ala kua ti lekengo gbagba ni juska na ndo so abâ ndo lê na lê na Yanga-ti-gbagba-ti-ngu,+ so ayeke na mbage ti est juska na tour so asigi na terê ti gbagba ni.

27 Na terê ti ala a yeke azo ti kodro ti Técoa,+ ala sara ti ala kua ti lekengo mbeni mbage ti gbagba ni ti londo na ndo so abâ ndo lê na lê na kota tour so asigi na terê ti gbagba ni na ala gue na ni juska na mur ti Ophel.

28 Aprêtre asara ti ala kua ni na li ti Yanga-ti-gbagba-ti-ambarata;+ zo oko oko asara kua ni na ndo so abâ ndo lê na lê na da ti lo.

29 Na terê ti ala a yeke Zadoc+ molenge ti Immer, lo sara kua ti lekengo gbagba ni na ndo so abâ ndo lê na lê na da ti lo.

Nga na terê ti lo a yeke Shémaïah molenge ti Shécaniah, lo so lo yeke bata Yanga-ti-gbagba-ti-mbage-ti-est.+ Lo kue lo sara kua ti lekengo gbagba ni.

30 Na terê ti lo a yeke Hananiah molenge ti Shélémiah nga na Hanun omene molenge ti Zalaph, lo kue lo sara kua ti lekengo mbeni mbage ti gbagba ni.

Na terê ti lo a yeke Méshullam+ molenge ti Bérékiah, lo sara kua ti lekengo mbeni mbage ti gbagba ni na ndo so abâ ndo lê na lê na ndo ti lango ti lo.

31 Na terê ti Méshullam, Malkijah mbeni oko ti azo so ayeke leke aye na lor, lo sara kua ti lekengo gbagba ni, ti londo na da ti azo ti kua ti temple*+ nga na da ti awadengo buze, so abâ ndo lê na lê na Yanga-ti-gbagba-ti-bango-ndo-na-ndo-ti-kua-so-a-sara, lo gue na ni juska ti si na chambre so ayeke na nduzu na coin ti gbagba ni.

32 Azo so ayeke leke aye na lor nga na azo ti dengo buze asara ti ala kua ti lekengo mbeni mbage ti gbagba ni so ayeke na popo ti chambre so ayeke na nduzu na coin ti gbagba ni nga na Yanga-ti-gbagba-ti-ataba.+

4 Gï so Sanballat+ amä so e kiri e yeke leke gbagba ni, ngonzo agbu lo na terê ti e nga bê ti lo ason mingi na lo yeke he aJuif. 2 Tongaso, na lê ti amba ti lo nga na lê ti aturugu ti Samarie, lo tene: “Nyen la awokongo Juif so ayeke sara so? Ala wani alingbi ande ti sara kua so? Ala yeke mû ande asandaga? Ala yeke hunzi kua ni na yâ ti lango oko? Atênë so wâ agbi ni si ala ro na yâ ti gbâ ti asaleté so, fade ala kiri ti sara kua na ni?”+

3 Âdu ti Tobiah,+ zo ti mara ti Ammon,+ so ayeke na terê ti Sanballat, lo tene: “Même tongana mbeni mbo ti gonda* amonté na ndö ti ye so ala yeke leke so, lo yeke kungbi mur ti tênë ti ala so na sese.”

4 Nzapa ti e, zia mo mä e, ndali ti so ala yeke bâ e tongana ambumbuse zo,+ zia kamene so ala yeke zia na lê ti e akiri na li ti ala wani.+ Mo sara si ala ga tongana aye so azo agbu na peko ti bira na yâ ti mbeni kodro so a gbu ala si a gue na ala na ngbâa dä. 5 Mo girisa asioni so ayeke na li ti ala so pëpe wala mo pardonné siokpari ti ala pëpe+ ngbanga ti so ala yeke zonga azo ti lekengo gbagba ni.

6 Tongaso, e ngbâ ti sara kua ti lekengo gbagba ni ti gue na ni, na amur ni atingbi terê kue na asi na ndambo ti yongo ni na nduzu, na azo ni amû bê ti ala kue na kua ni.

7 Gï so Sanballat, Tobiah,+ azo ti Arabie,+ azo ti mara ti Ammon nga na azo ti Ashdod+ amä so kua ti lekengo gbagba ni ayeke gue na li ni nzoni, na so a ngbâ ti kanga adû ti terê ti gbagba ni, ngonzo agbu ala mingi. 8 Tongaso, ala mä terê na hondengo ni ti ga ti sara bira na azo ti Jérusalem nga ti bi wusuwusu na yâ ti gbata ni. 9 Me e sambela Nzapa ti e, nga lakue e zia asinziri ti duti bï na lâ ti kanga lege na ala.

10 Me azo ti Juda atene: “Ngangu ti azo ti sarango kua ni ahunzi awe, gbâ ti afango brique ahon ndö ni; e yeke wara lege lâ oko pëpe ti sara kua ti lekengo gbagba ni.”

11 Awato ti e ayeke tene: “E yeke lï na popo ti ala kozo ti tene ala hinga tënë ni wala kozo ti tene ala bâ e, e yeke fâ ala na e yeke sara si kua ti lekengo gbagba ni aluti.”

12 Lakue, aJuif so ayeke na ando nde nde na so asara kodro nduru na awato ti e aga na Jérusalem ala yeke tene na e fani mingi,* ala tene: “Awato ni ayeke londo na ando nde nde kue ti ga ti sara bira na e.”

13 Tongaso, mbi zia akoli aluti na ando so ayeke na gbe ni na peko ti gbagba ni, ando so terê ni ayeke senge, mbi zia ala alingbi na asewa ti ala oko oko, ala yeke na a-épée, alikongo nga na akokora na terê ti ala. 14 Tongana mbi bâ so mbeto asara ala, mbi londo hio mbi tene na akota zo ti kodro ni,+ na akete gouverneur nga na tanga ti azo ni, mbi tene: “Ala sara mbeto ti azo so pëpe.+ Ala dabe ti ala na Jéhovah, lo so lo yeke kota mingi nga so lo mû mbeto na zo.+ Ala tiri ndali ti aita ti ala, ndali ti amolenge ti ala ti koli na ti wali, ndali ti awali ti ala nga ndali ti ada ti ala.”

15 Tongana awato ti e ni amä so e hinga tënë ti ye so ala ye ti sara so awe, nga so tâ Nzapa abuba yâ ti ye so ala ye ti sara so, e kue e kiri na terê ti kua ti lekengo gbagba ni. 16 Ti londo na lango ni so, mbeni ndambo ti azo ti mbi ayeke sara kua ti lekengo gbagba ni,+ na mbeni ndambo ni ayeke gbu alikongo, avala, akokora nga na abongo ti wen. Amokonzi+ ayeke na peko ti azo ti Juda kue ti mû maboko na ala, 17 azo ti Juda so angbâ ti sara kua ti lekengo gbagba ni. Ti ala so ayeke yô anengo kungba, ala yeke sara kua ni na mbage ti maboko ti ala oko na ala gbu aye ti bira na mbeni mbage ti maboko ti ala. 18 Ti azo so ayeke sara kua ti lekengo gbagba ni, ala kanga épée ti ala na terê ti yâ ti ala na ngoi so ala yeke sara kua ni. Zo ti hurungo didi+ aluti na terê ti mbi.

19 Mbi tene na akota zo ti kodro ni, akete gouverneur nga na tanga ti azo ni, mbi tene: “Kua ni ayeke kota kua nga ayeke mingi, na e kangbi terê ti e nde nde na terê ti gbagba ni nga e yo na mba. 20 Me tongana ala mä totongo ti didi, ala kue aga abungbi terê ti ala na ndo so mbi yeke dä. Nzapa ti e ayeke tiri ngbanga ti e.”+

21 Tongaso, na ngoi so e yeke sara kua ni, ti londo na kota ndapre juska ti si na bï na ngoi so atongoro asigi, mbeni ndambo ti azo ni ayeke gbu ti ala alikongo. 22 Na ndembe ni so mbi tene na azo ni, mbi tene: “Zia akoli oko oko kue na azo ti kua ti ala alango na yâ ti Jérusalem na bï, tongaso na bï ala yeke sara sinziri ti e me na kota lâ ala yeke sara kua ni.” 23 Tongaso, atâa mbi wala aita ti mbi, azo ti kua ti mbi+ wala asinziri so amû peko ti mbi, zo oko azi bongo ti lo pëpe na zo oko oko angbâ ti gbu ye ti bira ti lo na maboko ti lo ti koli.

5 Me akoli nga na awali ti ala alondo na kota toto na terê ti aita ti ala aJuif.+ 2 Ambeni ayeke tene: “E na amolenge ti e ti koli na amolenge ti e ti wali, li ti e ayeke mingi. E ye ti wara alê ti kobe ti tene e te tongaso si e ngbâ na fini.” 3 Ambeni nga ayeke tene: “E mû ayaka ti e, ayaka ti vigne ti e nga na ada ti e, e mû na ambeni zo awe si e wara alê ti kobe na ngoi ti kota nzara so.” 4 Ambeni zo ni nde nga ayeke tene: “Ti tene e wara nginza ti futa na douane na gbia, a lingbi e mû ayaka ti e nga na ayaka ti vigne ti e na ambeni zo na bon si.+ 5 E na aita ti e, e yeke mitele oko nga mênë oko,* amolenge ti e ayeke nga tongana amolenge ti ala. Me ti e, e yeke kä amolenge ti e ti koli na ti wali na ngbâa, e kä ambeni molenge ti e ti wali même na ngbâa awe.+ Ye oko, e yeke na ngangu pëpe ti kanga lege na mara ti sarango ye tongaso, ngbanga ti so ayaka ti e na ayaka ti vigne ti e aga ti ambeni zo nde awe.”

6 Na ngoi so mbi mä toto ti ala nga na atënë so ala tene, ngonzo agbu mbi ngangu. 7 Tongaso mbi gbu li ti mbi nzoni na ndö ti kpale so, na mbi ke na akota zo ti kodro ni, akete gouverneur ni, mbi tene na ala: “Bâ, ala oko oko kue ayeke sara bon na aita ti ala na ala yeke hunda mbeni ye na ndö ni.”+

Nga, mbi iri azo ni ti sara mbeni kota bungbi ti leke tënë ti ye so ala sara so. 8 Mbi tene na ala, mbi tene: “Aita ti e aJuif so a kä ala lani na ngbâa na ambeni mara nde, e sara kue e mû ala e kiri na ni. Me fadeso ala wani la ayeke kä aita ti ala na ngbâa?+ Na ala yeke kä ala na ngbâa ni na e?” Tongana ala mä tënë so, yanga ti ala akanga, ala wara mbeni tënë oko ti tene pëpe. 9 Mbi kiri mbi tene: “Ye so ala yeke sara so ayeke nzoni pëpe. A lingbi ala kpe mbeto ti Nzapa+ lakue tongaso si azo ti amara nde, awato ti e, awara lege pëpe ti zia kamene na lê ti e. 10 Mbi, aita ti mbi na azo ti kua ti mbi nga kue e yeke sara bon ti nginza na ti alê ti kobe na azo. Pardon, e zia lege ti sarango bon ti hunda mbeni ye na ndö ni.+ 11 Pardon, laso laso ala kiri na aita ti ala ayaka ti ala,+ ayaka ti vigne ti ala, ayaka ti olive ti ala nga na ada ti ala. Ala kiri na ala nga akete mbage* ti nginza so ala hunda na ndö ti bon so ala sara na ala, akete mbage ti ye so ala zia na ndö ti alê ti kobe, na ndö ti vin nga na ndö ti amafuta so ala sara bon ni na aita ti ala si ala hunda na ndö ni so.”

12 Tongaso ala tene: “E yeke kiri na aye so na ala na e yeke hunda mbeni ye na maboko ti ala pëpe. E yeke sara gï tongana ti so mo tene so.” Tongaso, mbi iri aprêtre na mbi sara si azo ni so adeba yanga ti ala ti sara ye alingbi na zendo so ala mû so. 13 Nga, mbi yengi yâ ti bozo ti kate ti kota bongo ti mbi, na mbi tene: “Zo so ayeke sara ye alingbi na deba ti yanga ti lo pëpe na ndö ti tënë so, a yeke tongaso la Nzapa ayeke yengi zo ni ti zi lo na yâ ti da ti lo nga na ndö ti akungba so lo wara; zia a yengi lo tongaso si lo ngbâ na ye oko pëpe.” Tongaso congrégation ni kue angbâ atene: “Amen!”* Ala gonda Jéhovah na azo ni asara tongana ti so ala mû zendo ni.

14 Nga, ti londo na lango so a iri mbi lani ti ga gouverneur ti kodro ti Juda,+ ti londo na ngu 20 ni+ juska ti si na ngu 32+ ti komandema ti Gbia Artaxerxès,+ so ti tene a sara ngu 12 awe, atâa mbi wala aita ti mbi e te lâ oko pëpe kobe so gouverneur ayeke na droit na ni.+ 15 Me agouverneur so ahon kozo na mbi azia nengo kungba na ndö ti go ti azo ni, lango oko oko ala hunda na azo ti mû na ala sicle* ti argent 40 ti vo na kobe nga na vin. Azo so ayeke sara kua na terê ti ala nga ayeke sara pasi na azo ti kodro ni. Me mbi sara tongaso pëpe+ ngbanga ti so mbi kpe mbeto ti Nzapa.+

16 Mbi mû maboko na kua ti lekengo gbagba so, azo ti kua ti mbi kue abungbi terê ti ala kâ ndali ti kua ti lekengo gbagba ni, na e wara même mbeni sese pëpe.+ 17 A-Juif nga na akete gouverneur so ayeke te kobe na table ti mbi, li ti ala ayeke 150, azo ti ambeni mara nde nga kue ayeke ga ti te kobe na table ti mbi. 18 Lango oko oko, a yeke tö na mbi* bagara oko, apendere taba omene nga na andeke, fani oko na yâ ti lango bale-oko e yeke wara mara ti avin nde nde kue gbani gbani. Atâa so kue mbi hunda pëpe ti tene a mû na mbi kobe so gouverneur ayeke na droit na ni, ngbanga ti so kua so azo ni ayeke sara ane na ndö ti ala awe. 19 Nzapa ti mbi, mo dabe ti mo ti sara nzoni bê na mbi ngbanga ti aye kue so mbi sara ndali ti azo so.+

6 Gï so Sanballat, Tobiah,+ Guéshem zo ti kodro ti Arabie+ nga na tanga ti awato ti e kue amä so mbi kiri mbi leke gbagba ni awe+ na so adû ayeke na terê ti mur ni encore ape, (atâa so mbi de mbi zia acadre ti yanga ti gbagba ni dä pëpe),+ 2 hio, Sanballat na Guéshem atokua ndo na mbi, atene: “Mo ga e mä terê ti wara terê na yâ ti akete kodro so ayeke na Popo-hoto ti Ono.”+ Andâ ala ye ti handa mbi ti sara sioni na mbi la. 3 Tongaso mbi tokua azo na ala, mbi tene: “Mbi yeke na kua mingi ti sara, mbi lingbi ti descend na mbage ti ala kâ pëpe. Tongana mbi gue na ala kâ kua ni ayeke luti.” 4 Ala tokua ndo na mbi tongaso fani osio, me lakue mbi kiri gï oko tënë ni na ala.

5 Na pekoni, Sanballat atokua zo ti kua ti lo na mbi na oko tënë ni so ti fani oku ni na mbeni lettre so lo kanga yanga ni pëpe. 6 Lo tene na yâ ti lettre ni, lo tene: “Azo ti amara nde ayeke tene na popo ti ala atene so mo na aJuif la ayeke gi lege ti ke yanga ti akota zo ti kodro.+ Guéshem+ nga kue atene tongaso. Ndani la mo yeke leke gbagba so. Atënë ni so kue afa so mo ye ti ga gbia ti aJuif. 7 Nga, mo soro ambeni zo mo zia ala aprophète ti to mbela na iri ti mo na tënë so na yâ ti Jérusalem kue: ‘Mbeni gbia ayeke na Juda fadeso!’ Me tënë so ayeke gue ti tï na mê ti gbia. Ni la, a yeke nzoni mo ga e na mo e bâ tënë so si.”

8 Me, mbi kiri tënë so na lo, mbi tene: “Atënë ti mo so kue ayeke tënë ti mvene; so atënë ti yâ ti li ti mo* wani la mo yeke sigi na ni so.” 9 Ala kue ayeke gi lege ti zia mbeto na yâ ti e, ala tene: “Ala yeke woko na yâ ti kua ni, na kua ni ayeke luti ande.”+ Me fadeso Nzapa, mbi sambela mo ti mû ngangu na mbi.+

10 Na pekoni, mbi gue na da ti Shémaïah na ngoi so a kanga lege na lo ti sigi. (Shémaïah ayeke molenge ti Délaïah, Délaïah ayeke molenge ti Méhétabel). Shémaïah atene na mbi: “Zia e mä terê ti wara terê na yâ ti da ti tâ Nzapa, e lï na yâ ti temple, na e kanga yanga ti temple ni na ndö ti e ngbanga ti so ala yeke ga ande ti fâ mo. Bâ, ala yeke ga na bï so ti fâ mo.” 11 Mbi tene na lo, mbi tene: “Zo tongana mbi so alingbi ti kpe? Zo tongana mbi so alingbi ti lï na yâ ti temple na lo ngbâ na fini?+ Mbi yeke lï kâ pëpe!” 12 Na pekoni, mbi ga ti hinga so Nzapa la atokua lo pëpe, andâ Tobiah na Sanballat+ la amû na lo nginza ti tene lo tene prophétie ni so na ndö ti mbi. 13 Ala mû nginza na lo ti tene lo ga lo zia mbeto na yâ ti mbi na lo pusu mbi ti sara siokpari, si ala wara tënë so alingbi ti mû lege na ala ti buba na iri ti mbi si ala bi nengo ti mbi na sese.

14 Nzapa ti mbi, mo girisa pëpe aye so Tobiah+ na Sanballat asara, mo girisa nga pëpe prophète-wali Noadiah nga na tanga ti aprophète ni so lakue ala yeke gi lege lani ti zia mbeto na yâ ti mbi.

15 Tongaso, kua ti lekengo gbagba ni ahunzi na lango 25 ti nze ti Élul;* a sara kua ni kue na yâ ti lango 52.

16 Gï so awato ti e kue amä so a hunzi ti leke gbagba ni awe, nga amara nde so angoro e abâ ni, kota kamene agbu ala+ na ala hinga so Nzapa ti e la amû maboko na e si e sara kua ni so. 17 Na yâ ti alango ni so kue, amokonzi+ ti Juda angbâ ti tokua alettre na peko ti terê na Tobiah, ala nga kue ayeke wara alettre so Tobiah atokua na ala. 18 Ndali ti so Tobiah ayeke kogara ti Shécaniah so ayeke molenge ti Arah,+ azo mingi na Juda adeba yanga ti ala ti sara songo na Tobiah. Nga molenge ti lo ti koli Jéhohanan asara mariage na molenge ti Méshullam,+ Méshullam so ayeke molenge ti Bérékiah. 19 Nga, lakue, azo ni so ayeke tene anzoni tënë ti Tobiah na mê ti mbi, na pekoni ala yeke mû atënë so mbi tene, ala gue ala fa peko ni na lo. Ni la Tobiah ayeke tokua ambeti ti sara si mbeto agbu mbi.+

7 Gï so a hunzi ti leke gbagba ni awe,+ mbi zia aporte ni dä.+ Na pekoni, mbi zia azo ti batango yanga ti gbagba ni,+ azo ti hengo bia+ nga na azo ti mara ti Lévi+ na kua ti ala. 2 Na pekoni, mbi zia ita ti mbi Hanani+ ti bâ ndo na ndö ti Jérusalem, lo na Hananiah mokonzi ti Ngangu gbagba ni,+ ndali ti so Hananiah ayeke zo ti confiance nga lo kpe mbeto ti tâ Nzapa+ ahon ambeni zo mingi. 3 Tongaso mbi tene na ala: “Yanga ti gbagba ti Jérusalem adoit ti zi pëpe juska lâ asu ngangu si, nga na ngoi so ala yeke sara sinziri na ndo ni, ala doit ti pusu aporte ni dä nga ala kanga ni na barre. Ala mû azo ti Jérusalem ti sara kua ti sinziri, zo oko oko na ndo so lo yeke sara sinziri ni dä, nga zo oko oko na devant ti da ti lo.” 4 Gbata ni akono mingi, me azo ayeke dä mingi pëpe+ nga ade a kiri a leke ada na yâ ni pëpe.

5 Âdu ti mbi, Nzapa ti mbi azia na yâ ti bê ti mbi ti tene mbi bungbi akota zo ti kodro ni, akete gouverneur nga na azo ti kodro ni ti sû iri ti ala na mbeti alingbi na iri ti akotara ti ala.+ Tongaso, mbi wara mbeni mbeti ti iri ti azo so alondo lani si akiri kozo so, mbeti ni atene:

6 So ayeke aJuif so ayeke lani na kodro-komanda* ni so la, ala so asigi na gbe ti ngbâa. Ala so Nébucadnezzar,+ gbia ti Babylone, agbu ala ândö ague na ala na ngbâa na Babylone,+ si na pekoni zo oko oko kue akiri na gbata ti lo na Jérusalem nga na sese ti Juda.+ 7 Ala so asigi legeoko na Zorobabel,+ na Jéshua,+ na Néhémie, na Azariah, na Raamiah, na Nahamani, na Mardochée, na Bilshan, na Mispéreth, na Bigvaï, na Néhum nga na Baanah.

Wungo ti akoli ti Israël so ayeke na popo ti ala kue so akiri ayeke so:+ 8 Ahale ti Parosh ayeke 2 172; 9 ahale ti Shéphatiah ayeke 372; 10 ahale ti Arah+ ayeke 652; 11 ahale ti Pahath-Moab+ so aga na lege ti ahale ti Jéshua na Joab+ ayeke 2 818; 12 ahale ti Élam+ ayeke 1 254; 13 ahale ti Zattu ayeke 845; 14 ahale ti Zaccaï ayeke 760; 15 ahale ti Binnui ayeke 648; 16 ahale ti Bébaï ayeke 628; 17 ahale ti Azgad ayeke 2 322; 18 ahale ti Adonicam ayeke 667; 19 ahale ti Bigvaï ayeke 2 067; 20 ahale ti Adin ayeke 655; 21 ahale ti Ater ti sewa ti Ézéchias ayeke 98; 22 ahale ti Hashum ayeke 328; 23 ahale ti Bézaï ayeke 324; 24 ahale ti Hariph ayeke 112; 25 ahale ti Gabaon+ ayeke 95; 26 akoli ti Bethléhem na ti gbata ti Nétophah ayeke 188; 27 akoli ti gbata ti Anathoth+ ayeke 128; 28 akoli ti gbata ti Beth-Azmaveth ayeke 42; 29 akoli ti gbata ti Kiriath-Jéarim,+ ti Képhirah na ti Béeroth+ ayeke 743; 30 akoli ti gbata ti Ramah na ti Guéba+ ayeke 621; 31 akoli ti gbata ti Micmas+ ayeke 122; 32 akoli ti gbata ti Béthel+ na ti Aï+ ayeke 123; 33 akoli ti gbata ti mbeni Nébo ni ayeke 52; 34 ahale ti mbeni Élam ni ayeke 1 254; 35 ahale ti Harim ayeke 320; 36 ahale ti gbata ti Jéricho ayeke 345; 37 ahale ti Lod, Hadid nga na Ono+ ayeke 721; 38 ahale ti Sénaah ayeke 3 930.

39 Wungo ti aprêtre so akiri:+ ahale ti Jédaïah ti sewa ti Jéshua ayeke 973; 40 ahale ti Immer ayeke 1 052; 41 ahale ti Pashur+ ayeke 1 247; 42 ahale ti Harim+ ayeke 1 017.

43 Wungo ti azo ti mara ti Lévi so akiri:+ ahale ti Jéshua, ti Cadmiel,+ ti Hodévah ayeke 74. 44 Azo ti hengo bia so akiri:+ ahale ti Asaph+ ayeke 148. 45 Azo ti batango yanga ti gbata so akiri:+ ahale ti Shallum, ahale ti Ater, ahale ti Talmon, ahale ti Accub,+ ahale ti Hatita, ahale ti Shobaï, ala kue ayeke 138.

46 Azo ti kua ti temple* so akiri:+ ahale ti Ziha, ahale ti Hasupha, ahale ti Tabbaoth, 47 ahale ti Kéros, ahale ti Sia, ahale ti Padon, 48 ahale ti Lébanah, ahale ti Hagabah, ahale ti Salmaï, 49 ahale ti Hanan, ahale ti Guiddel, ahale ti Gahar, 50 ahale ti Réaïah, ahale ti Retsin, ahale ti Nécoda, 51 ahale ti Gazzam, ahale ti Uzza, ahale ti Paséah, 52 ahale ti Bésaï, ahale ti Méunim, ahale ti Néphushésim, 53 ahale ti Bacbuc, ahale ti Hacupha, ahale ti Harhur, 54 ahale ti Bazlith, ahale ti Méhida, ahale ti Harsha, 55 ahale ti Barcos, ahale ti Siséra, ahale ti Témah, 56 ahale ti Néziah, ahale ti Hatipha.

57 Ahale ti azo ti kua ti Salomon so akiri:+ ahale ti Sotaï, ahale ti Sophéreth, ahale ti Périda, 58 ahale ti Jaala, ahale ti Darcon, ahale ti Guiddel, 59 ahale ti Shéphatiah, ahale ti Hattil, ahale ti Pokéreth-Hazzébaïm, ahale ti Amon. 60 Wungo ti azo kue so asara kua na temple*+ nga na ahale ti azo ti kua ti Salomon so akiri ayeke 392.

61 Bâ, azo so alondo lani na Tel-Mélah, Tel-Harsha, Kérub, Addon na Immer si ala kiri la, me ala lingbi ti fa iri ti ahale ti akotara ti ala pëpe, ti tene azo ahinga wala ala yeke azo ti Israël wala pëpe; a yeke wara:+ 62 ahale ti Délaïah, ahale ti Tobiah, ahale ti Nécoda, ala yeke 642. 63 Na yâ ti ahale ti aprêtre so akiri, a yeke wara nga ahale ti Habaïah, ahale ti Haccoz,+ ahale ti Barzillaï, lo so lo mû lani wali na popo ti amolenge ti Barzillaï,+ zo ti Galaad, si a zia iri ti sewa ti wali ti lo ni so na li ti lo. 64 Ti ahale ti aprêtre ni so, ala gi mbeti so afa molongo ti airi ti akotara ti ala me ala wara ni pëpe, tongaso a zi ala na yâ ti kua ti prêtre.*+ 65 Gouverneur*+ atene na ala ti te pëpe akobe so a zia ni nde ndali ti Nzapa,+ me ala yeke ku juska ti tene mbeni prêtre aga si, lo so lo lingbi ti hunda tënë ni na lege ti Urim na Thummim.+

66 Wungo ti bungbi ti azo ni kue ayeke 42 360,+ 67 a diko angbâa ti koli na ti wali na yâ ni pëpe,+ ti angbâa ni, wungo ti ala ayeke 7 337; a yeke wara nga akoli na awali ti hengo bia so wungo ti ala ayeke 245.+ 68 Ambarata ti ala ayeke 736, avuko kororo* ti ala ayeke 245, 69 achameau ti ala ayeke 435, na akororo ti ala ayeke 6 720.

70 Ambeni mokonzi ti ahale ti akotara ti ala amû amatabisi ndali ti kua ti da ni.+ Gouverneur* ni amû drachme* ti lor 1 000, adû ti sembe 50 nga na ayongoro bongo 530 ndali ti aprêtre,+ lo mû ni na matabisi na da ti mosoro ni. 71 Ambeni mokonzi ti ahale ti akotara ti ala amû drachme ti lor 20 000 nga na mine* ti argent 2 200, ala mû ni na azo so ayeke bâ lege ti nginza ti sarango na kua ni. 72 Tanga ti azo ni amû drachme ti lor 20 000, mine ti argent 2 000 nga na ayongoro bongo 67 ndali ti aprêtre.

73 Aprêtre ni, azo ti mara ti Lévi, azo ti batango yanga ti gbata ni, azo ti hengo bia,+ ambeni zo ti Israël, azo ti kua ti temple* nga na tanga ti azo ti Israël kue* asara kodro na yâ ti agbata ti ala.+ Tongana nze mbasambala ni asi,+ andâ azo ti Israël asara kodro na yâ ti agbata ti ala awe.+

8 Azo ni kue abungbi terê ti ala tongana zo oko na ndo so azo ayeke gue ka dä mingi, so abâ ndo lê na lê na Yanga-ti-gbagba-ti-ngu,+ na ala tene na Esdras,+ wasungo peko ti mbeti, ti tene lo ga na mbeti ti Ndia ti Moïse,+ so Jéhovah amû lani na azo ti Israël.+ 2 Tongaso, na kozo lango ti nze mbasambala ni,+ prêtre Esdras aga na mbeti ti Ndia ni na devant ti congrégation ni so+ abungbi akoli, awali nga na azo kue so alingbi ti mä tënë si ala lingbi ti mä yâ ni. 3 Esdras aluti na devant ti ndo so azo ayeke gue ka dä mingi, ndo ni so abâ ndo lê na lê na ndo so a iri ni Yanga-ti-gbagba-ti-ngu, lo diko mbeti ni+ ti londo na ngoi so ndo ayeke gue ti han juska ti si na midi. Lo diko ni na mê ti akoli, awali nga na azo kue so alingbi ti mä tënë na ti mä yâ ni. Azo ni kue adengi mê ti ala nzoni ti mä atënë+ ti Ndia so lo yeke diko ni so. 4 Esdras, wasungo peko ti mbeti, aluti na ndö ti mbeni ye so a leke ni na keke so a leke ni gï ndali ti lango ni so. Mattithiah, Shéma, Anaïah, Urie, Hilkiah na Maaséïah aluti na terê ti lo na mbage ti maboko ti lo ti koli; Pédaïah, Mishaël, Malkijah,+ Hashum, Hashbaddanah, Zacharie na Méshullam aluti na terê ti lo na mbage ti maboko ti lo ti wali.

5 Ndali ti so Esdras ayeke na ndö ti ye na nduzu na li ti azo ni kue, lo zi yâ ti mbeti ni na azo ni kue abâ lo. Na ngoi so lo zi yâ ti mbeti ni, azo ni kue alondo aluti. 6 Na pekoni, Esdras agonda Jéhovah tâ Nzapa, lo so lo yeke kota, na azo ni kue so amä lo, atene: “Amen!* Amen!”+ na ala yôro maboko ti ala na nduzu. Ala kuku, na ala kpo li ti ala na sese na devant ti Jéhovah. 7 So azo ni angbâ ti luti, Jéshua, Bani, Shérébiah,+ Jamin, Accub, Shabbéthaï, Hodiah, Maaséïah, Kélita, Azariah, Jozabad,+ Hanan na Pélaïah, so ayeke azo ti mara ti Lévi, ayeke fa nda ti Ndia ni na ala.+ 8 Ala yeke diko tënë ti yâ ti mbeti ti Ndia ti tâ Nzapa ni na kota go, ala yeke fa ndani nzoni nga ala sara si azo amä yâ ti ye so a diko so; tongaso ala sara si azo ni ahinga nda ti ye so a ngbâ ti diko na ala so.+

9 Na pekoni, Néhémie so ayeke gouverneur,* Esdras+ so ayeke prêtre nga wasungo peko ti mbeti* nga na azo ti mara ti Lévi so angbâ ti fa ye na azo ni, atene na azo ni kue, atene: “Lango so ayeke lango so a zia ni nde ndali ti Jéhovah Nzapa ti ala.+ Ala sara vundu wala ala toto pëpe.” Ndali ti so azo ni kue ayeke toto na ngoi so ala yeke mä tënë ti Ndia so a yeke diko so. 10 Néhémie atene na ala: “Ala gue na yanga-da ti ala, ala te anzoni kobe nga ala nyon aye so anzere nzerengo, ala tokua mbeni mbage ti kobe ni+ na amba ti ala so ayeke na mbeni ye ti tö pëpe ngbanga ti so lango ti laso ayeke mbeni lango so a zia ni nde ndali ti Seigneur ti e. Ala sara mawa pëpe ngbanga ti so ngia so alondo na Jéhovah la ayeke ngangu gbagba so ayeke bata ala.” 11 Azo ti mara ti Lévi ayeke kaï azo ni kue, ala tene: “Ala kaï toto ni ngbanga ti so lango ti laso ayeke mbeni lango so ayeke nde, ala sara mawa pëpe.” 12 Tongaso, azo ni kue ague na yanga-da ti ala ti te na ti nyon nga ambeni atokua kobe na amba ti ala, na ala sara kota ngia,+ ngbanga ti so ala mä yâ ti atënë so a fa ni na ala.+

13 Na use lango ni, amokonzi ti ahale ti akotara ti azo ti Israël kue, aprêtre na azo ti mara ti Lévi abungbi na terê ti Esdras so ayeke wasungo peko ti mbeti* ti tene ala kiri amä yâ ti atënë ti Ndia ni nzoni. 14 Tongaso, ala wara na yâ ti Ndia ni, mbeni tënë so Jéhovah afa ni lani na lege ti Moïse so atene azo ti Israël adoit ti lango na gbe ti akpangba* na ngoi ti matanga so a yeke sara ni na nze mbasambala ni.+ 15 A tene nga so azo ti Israël adoit ti to mbela+ na tënë so, ala fa ni na yâ ti agbata kue nga na yâ ti Jérusalem kue, ala tene: “Ala gue na ando so ahoto ayeke dä, ala fâ amaboko ti keke ti olive, ti keke ti pin, ti keke ti myrte, ti keke ti mbûrü nga na amaboko ti ambeni keke, akeke kue so kugbe ni ayeke mingi ala ga na ni, na ala leke na akpangba, a lingbi na tënë so a sû na yâ ti mbeti ni.”

16 Tongaso, azo ti Israël ague ala fâ amaboko ti akeke so ala ga na ni na ala leke na akpangba ti ala oko oko kue. Ala leke akpangba ni na li ti da ti ala, na yâ ti gbagba ti ala, na yâ ti gbagba ti da ti tâ Nzapa.+ Ala leke ni nga na ndo so azo ayeke gue ka dä mingi na so abâ ndo lê na lê na Yanga-ti-gbagba-ti-ngu+ nga na ndo so azo ayeke gue ka dä mingi na terê ti Yanga-ti-gbagba-ti-Éphraïm.+ 17 Tongaso, bungbi ti azo so kue si a gue na ala ândö na ngbâa si ala kiri so, ala leke akpangba na ala lango na gbe ti akpangba ni, ngbanga ti so ngbene ye na ngoi ti Josué+ molenge ti Nun juska fadeso, azo ti Israël ade asara Matanga ti Akpangba tongana ti so ni so pëpe; ni la si terê ti ala anzere mingi.+ 18 Lango oko oko a yeke diko tënë ti Ndia ti tâ Nzapa na ala,+ ti londo na kozo lango ni juska ti si na tanga ti lango ni. Ala sara Matanga ti Akpangba na yâ ti alango mbasambala; a si na lango miombe ni, ala sara mbeni kota bungbi tongana ti so Ndia ni afa.+

9 Na lango 24 ti oko nze ni so, azo ti Israël abungbi terê ti ala, ala mû jeûne, ala yü abongo ti vundu na ala tuku sese na li ti ala.+ 2 Na pekoni, ahale ti Israël azi terê ti ala na awande kue ala luti ti ala nde,+ ala luti ti tene asiokpari ti ala na gigi na ti fa nga asioni so akotara ti ala asara.+ 3 Ala ngbâ ti luti na ndo so ala yeke dä na a diko na ala mbeti ti Ndia+ ti Jéhovah Nzapa ti ala a sara ngbonga ota. Nga ala kuku na sese, ala tene asiokpari ti ala na gigi na gbele Jéhovah Nzapa ti ala akiri a sara ngbonga ota.

4 Jéshua, Bani, Cadmiel, Shébaniah,+ Bunni, Shérébiah, Bani na Kénani aluti na ndö ti mbeni ye so a leke na nduzu na keke+ ndali ti azo ti mara ti Lévi, na ala dekongo ngangu na Jéhovah Nzapa ti ala. 5 Jéshua, Cadmiel, Bani, Hashabniah, Shérébiah, Hodiah, Shébaniah na Péthahiah so ayeke azo ti mara ti Lévi atene: “Ala londo, ala gonda Jéhovah Nzapa ti ala lakue lakue nga kpu na kpu.*+ Zia ala gonda iri ti mo so ayeke na gloire, so ahon atufa kue so e wara nga agonda kue so e mû na mo alingbi na ni ape.

6 “Gï mo oko, mo yeke Jéhovah.+ Mo la mo sara yayu, même yayu so ayo kâ na aye kue so ayeke na yâ ni,* mo la mo sara sese na aye kue so ayeke na ndö ni, mo sara angu-ingo na aye kue so ayeke na yâ ni. Mo bata aye so kue na fini. Aye kue so ayeke na yayu* akuku na gbe ti mo. 7 Mo yeke Jéhovah tâ Nzapa, mo la mo soro Abram+ na mo sara si lo sigi na gbata ti Ur+ ti azo ti Chaldée na mo mû na lo iri ti Abraham.+ 8 Mo bâ so bê ti lo avuru,+ ni la mo te mbele na lo ti mû na lo sese ti azo ti Canaan, ti azo ti mara ti Heth, ti azo ti mara ti Amori, ti azo ti Périzzi, ti azo ti mara ti Jébus na ti azo ti mara ti Guirgashi; na mo te mbele ti mû ni nga na hale* ti lo.+ Mo sara ye alingbi na azendo so mo mû ndali ti so mo yeke mbilimbili.

9 “Mo bâ lani pasi so akotara ti e ayeke na yâ ni na Égypte,+ na mo mä toto ti ala na yanga ti Ngu-Bengba. 10 Tongaso, mo sara aye so asara si bê ti zo adö nga na aye ti kpene na terê ti Pharaon na azo ti kua ti lo kue nga na terê ti azo ti kodro ti lo kue,+ ndali ti so mo hinga so ala sara ye lani na baba+ na mbage ti akotara ti e. Mo sara si iri ti mo awu na angbâ juska laso.+ 11 Mo kangbi yâ ti ngu-ingo na devant ti ala, si ala fâ ngu ni na ndö ti kuru sese.+ Mo bi azo so ayeke tomba peko ti ala na yâ ti ngu so alï, tongana ti so a bi tênë na yâ ti ngu so asua na ngangu.+ 12 Mo fa lege na ala na kota lâ na lege ti mbeni mbinda, na bï na lege ti mbeni kota wâ so ayeke za ti fa na ala lege so a lingbi ala mû.+ 13 Mo ga na ndö ti Hoto ti Sinaï,+ mo ngbâ na yayu kâ+ mo sara tënë na ala na mo mû na ala andia so ayeke mbilimbili, ambela so ayeke na lege ti tâ tënë,* andia so ayeke nzoni ti fa lege na azo nga na acommandement.+ 14 Mo sara si ala hinga Sabbat ti mo so ayeke nzoni-kue.+ Nga, na lege ti wakua ti mo Moïse, mo mû na ala acommandement, ambela nga na ndia. 15 Tongana nzara asara ala,+ mo mû na ala mapa* so alondo na yayu; tongana nzara ti ngu asara ala,+ mo mû na ala ngu so asigi na yâ ti kota tênë, na mo tene na ala ti lï na yâ ti kodro ni ti mû ni, kodro so mo deba yanga ti mo* ti mû ni na ala.

16 “Me akotara ti e la asara ye lani na baba,+ ala sara kpengba-li,*+ na ala sara ye alingbi na acommandement ti mo pëpe. 17 Ala ke ti mä yanga ti mo,+ ala dabe ti ala pëpe na aye ti dongo bê so mo sara lani na popo ti ala, me ala sara kpengba-li, ala soro mbeni mokonzi na ndö ti ala ti tene ala kiri na gbe ti ngbâa na Égypte.+ Me mo yeke Nzapa so mo yeke nduru ti pardonné zo, mo yeke bâ mawa ti zo na mo yeke sara nzoni bê na zo, mo yeke sara ngonzo hio hio pëpe nga mo si singo na tâ ndoye,+ ni la mo zia ala lani gï tongaso pëpe.+ 18 Atâa so ala sara lani mbeni statue ti kete bagara na lor na ala tene: ‘Bâ Nzapa ti mo la, lo so asigi na mo na kodro ti Égypte,’+ na ala sara aye ti sioni so afa so ala ne mo oko pëpe; 19 me na lege ti kota nzoni bê ti mo, mo zia ala ngbâ na yâ ti benyama pëpe.+ Mbinda so ayeke dä na kota lâ ti fa lege na ala so ahon yongoro na ala pëpe, wala kota wâ so ayeke za na bï ti fa na ala lege so a lingbi ala mû so ahon nga yongoro na ala pëpe.+ 20 Mo mû na ala yingo ti mo, yingo ti mo so ayeke nzoni, si ala sara ye na ndara,+ mo gbanzi manne ti mo na ala pëpe,+ nga tongana nzara ti ngu asara ala, mo mû na ala ngu.+ 21 Ngu 40 so ala sara na yâ ti benyama,+ mo mû na ala kobe. Ye oko amanke ala pëpe. Bongo ti ala aga gbagbara bongo pëpe,+ gere ti ala asuku nga pëpe.

22 “Mo mû na ala aroyaume na amara, mo kangbi yâ ti aroyaume nga na amara ni so kete kete na ala;+ ni la ala mû sese ti Sihon,+ so ti tene sese ti gbia ti Hesbon,+ nga na sese ti Og+ gbia ti Basan. 23 Mo sara si ahale ti ala aga gbani gbani tongana atongoro ti yayu.+ Na pekoni, mo sara si ala lï na sese so mo mû zendo ni lani na akotara ti ala ti tene ala gue ala mû ni aga ti ala.+ 24 Tongaso, ahale ti ala alï na yâ ti sese ni ala mû ni,+ mo sara si ala sö benda na ndö ti azo ti sese ti Canaan,+ na mo zia azo ni na maboko ti azo ti Israël, même agbia ni nga na azo ti sese ni, si azo ti Israël asara na ala ye so bê ti ala aye. 25 Ala mû agbata so angangu gbagba+ ayeke na terê ni nga na asese so aye alë dä nzoni.+ Ala mû nga ada so asi singo na amara ti anzoni ye nde nde kue, adû so a yeke bata ngu dä si a zi ni kozo awe, ayaka ti vigne na ti olive+ nga na gbâ ti akeke so a yeke te alengo ni. Tongaso ala te, yâ ti ala asi, ala kono pendere na ala duti nzoni ndali ti kota nzoni bê ti mo.

26 “Ye oko, ala mä yanga ti mo pëpe, ala sara kpengba-li na mo+ na ala tourné peko ti ala na Ndia ti mo. Ala fâ aprophète ti mo so ayeke gboto mê ti ala ti tene ala kiri na mbage ti mo, nga ala sara aye ti sioni so afa so ala ne mo oko pëpe.+ 27 Ndali ti aye so, mo zia ala na maboko ti awato ti ala,+ na awato ti ala asara aye ti vundu na ala.+ Me na yâ ti angoi ti vundu ti ala, ala toto na mo, na mo ngbâ na yayu kâ mo mä ala; tongaso na lege ti nzoni bê ti mo so ayeke kota, mo mû na ala asauveur so asö ala na maboko ti awato ti ala.+

28 “Me gï so ala bâ so pupu aya ala awe, ala kiri ala sara ye ti sioni na lê ti mo,+ ye oko, mo kiri mo zia ala na maboko ti awato ti ala so asara komandema na ndö ti ala.+ Me tongana ala kiri na mbage ti mo, ala iri mo ti mû maboko na ala,+ mo ngbâ na yayu kâ mo mä ala na mo zi ala fani mingi alingbi na nzoni bê ti mo so ayeke kota.+ 29 Atâa so mo gboto mê ti ala ti tene ala kiri na mbage ti Ndia ti mo, ala sara ye na baba na ala ke ti sara ye alingbi na acommandement ti mo.+ Ala sara siokpari ti ke andia so mo lu, andia so tongana zo akpe ni, lo yeke ngbâ na fini ngbanga ni.+ Na ngangu-li, ala tourné peko, ala sara kpengba-li, ala mä ndo pëpe. 30 Me mo kanga bê ti mo na ala+ na yâ ti angu mingi, na lege ti yingo ti mo, mo ngbâ ti gboto mê ti ala na lege ti aprophète ti mo, me ala ke ti mä mo. Na nda ni, mo zia ala na maboko ti azo ti akodro* so angoro ala.+ 31 Me na lege ti nzoni bê ti mo so ayeke kota, mo hunzi ala kue pëpe+ nga mo dö ala mo zia pëpe, ndali ti so mo yeke Nzapa so mo yeke bâ mawa ti zo nga mo yeke sara nzoni bê na zo.+

32 “Ti fadeso, Nzapa ti e, mo yeke Nzapa so mo yeke kota, mo yeke ngangu nga mo mû mbeto na zo. Mo ngbâ ti bata mbele ti mo nga ti fa tâ ndoye+ ti mo na mbage ti azo, mo bâ tongana senge ye pëpe aye ti ngangu kue so asi na e, na agbia ti e, na amokonzi ti e,+ na aprêtre ti e,+ na aprophète ti e,+ na akotara ti e nga na azo ti mo kue, ti londo na ngoi ti agbia ti Assyrie+ juska laso. 33 Na yâ ti aye kue so asi na e, mo yeke ti mo mbilimbili, ndali ti so mo sara ye na lege ni, me e la e sara ye ti sioni.+ 34 Âdu ti agbia ti e, amokonzi ti e, aprêtre ti e nga na akotara ti e, ala kpe Ndia ti mo pëpe, ala sara ye alingbi na acommandement ti mo pëpe wala atënë so mo tene lani ti gboto mê ti ala. 35 Même na ngoi so ala yeke lani na yâ ti royaume ti ala, si ala yeke bâ nzoni ndali ti anzoni ye so mo mû na ala gbani gbani nga so ala yeke na yâ ti kota kodro so mo mû na ala, kodro so sese ni alë pendere, ala ke ti voro mo+ na ala ke lege ti asioni sarango ye ti ala pëpe. 36 Bâ, laso e yeke angbâa,+ angbâa na ndö ti sese so mo mû na akotara ti e ti tene ala te lengo ni na anzoni ye ti yâ ni. 37 Gbâ ti akobe so sese ni ayeke lë ni ayeke ti agbia so mo zia ala na ndö ti e ndali ti asiokpari ti e.+ Ala yeke sara komandema na ndö ti e nga na ndö ti anyama ti e tongana ti so bê ti ala aye, na e yeke na yâ ti kota vundu.

38 “Ni la na bango aye so kue, e mû yanga+ si e sû tënë ni na mbeti, na amokonzi ti e, azo ti e so ayeke ti mara ti Lévi nga na aprêtre ti e, akpo nzoroko dä.”+

10 Ala so ayeda si ala kpo nzoroko ti ala na ndö ti mbeti ni+ ayeke azo tongana:

Gouverneur* Néhémie, molenge ti Hacaliah,

na Sédécias, 2 Séraïah, Azariah, Jérémie, 3 Pashhur, Amariah, Malkijah, 4 Hattush, Shébaniah, Malluk 5 Harim,+ Mérémoth, Obadiah, 6 Daniel,+ Guinnéthon, Baruch, 7 Méshullam, Abijah, Mijamin, 8 Maaziah, Bilgaï na Shémaïah; ala so ayeke aprêtre so la.

9 Azo ti mara ti Lévi: Jéshua molenge ti Azaniah, Binnui so lo yeke na popo ti ahale ti Hénadad, Cadmiel,+ 10 na ita ti ala Shébaniah, Hodiah, Kélita, Pélaïah, Hanan, 11 Mica, Réhob, Hashabiah, 12 Zaccur, Shérébiah,+ Shébaniah, 13 Hodiah, Bani na Béninu.

14 Amokonzi na ndö ti azo ni: Parosh, Pahath-Moab,+ Élam, Zattu, Bani, 15 Bunni, Azgad, Bébaï, 16 Adonijah, Bigvaï, Adin, 17 Ater, Ézéchias, Azzur, 18 Hodiah, Hashum, Bézaï, 19 Hariph, Anathoth, Nébaï, 20 Magpiash, Méshullam, Hézir, 21 Méshézabel, Zadoc, Jaddua, 22 Pélatiah, Hanan, Anaïah, 23 Hoshéa, Hananiah, Hashub, 24 Hallohesh, Pilha, Shobec, 25 Réhum, Hashabnah, Maaséïah, 26 Ahijah, Hanan, Anan, 27 Malluk, Harim, Baanah.

28 Tanga ti azo ni: so ti tene aprêtre, azo ti mara ti Lévi, azo ti batango yanga ti gbagba, azo ti hengo bia, azo ti kua ti temple* nga na azo kue so azi terê ti ala na azo ti akodro so angoro ala* ti tene ala sara ye alingbi na Ndia ti tâ Nzapa,+ ala na awali ti ala nga na amolenge ti ala ti koli na amolenge ti ala ti wali, azo kue so ahinga ndo nga so ala mä yâ ti ye nzoni,* 29 ala ga ala tingbi na aita ti ala, na akota zo ti kodro ni na ala deba yanga ti ala kue ti sara ye alingbi na Ndia ti tâ Nzapa, so lo mû ni lani na lege ti Moïse, wakua ti lo, nga ti bâ nzoni si ala sara ye biani alingbi na acommandement kue ti Jéhovah, Seigneur ti e, ambela ti lo nga na andia so lo lu. 30 Tongaso, e yeke mû amolenge ti e ti wali ti mû na azo ti akodro so angoro e so pëpe, e yeke mû nga amolenge ti ala ti wali ti mû na amolenge ti e ti koli pëpe.+

31 Tongana azo ti akodro so angoro e aga na aye ti kango ni nga na alê ti kobe nde nde ti kä ni na e na lango ti Sabbat+ wala na lango ti mbeni matanga,+ fade e yeke vo ni pëpe. Nga, e yeke fâ yaka pëpe na ngu mbasambala ni+ na e yeke zi bon kue na li ti azo kue so bon ti e ayeke na li ti ala.+

32 E lu mbeni ndia ndali ti e wani ti tene ngu oko oko, zo oko oko kue amû sicle* ota ti argent na lo zi oko ti mû ndali ti kua ti da* ti Nzapa ti e.+ 33 A yeke mû ni ti vo na mapa ti ziango na gbele Nzapa,+ na sandaga ti lê ti kobe so a yeke yâa ni lakue,+ na sandaga so lakue a zö ni agbi kue na lango ti aSabbat.+ A yeke mû ni ti sara na aye so andu lango ti fini nze,+ amatanga so a fa lango ni awe,+ ndali ti aye so a zia ni nde ndali ti Nzapa, sandaga ndali ti siokpari+ ti tene a zi siokpari ti azo ti Israël, a yeke mû ni nga ti sara na akua kue ti da ti Nzapa ti e.

34 Nga, e bi mbeni ye so amû lege na e ti fa na popo ti aprêtre, azo ti mara ti Lévi nga na tanga ti azo ti Israël, azo wa la ayeke ga na akeke na da ti Nzapa ti e, ala yeke ga na akeke ni na lege ti iri ti akotara ti ala, na ngoi so a yeke fa na ala na yâ ti ngu oko oko, ti tene a mû ni a sara na wâ na yâ ti gbalaka ti Jéhovah Nzapa ti e, a lingbi na tënë so a sû na yâ ti Ndia.+ 35 E lu ndia nga ti tene ngu oko oko, e ga nga na akozo lengo ti alê ti keke ti sese ti e so abe awe nga akozo lengo ti alê ti keke nde nde kue so abe awe, e yeke ga na ni na da ti Jéhovah.+ 36 E lu ndia nga ti tene e mû akozo molenge ti e ti koli, akozo molenge ti anyama ti e,+ akozo molenge ti abagara ti e nga na ti ataba ti e, e ga na ni na da ti Nzapa ti e, e mû na aprêtre so ayeke sara kua na da ti Nzapa ti e; a lingbi na tënë so a sû na yâ ti Ndia.+ 37 E yeke mû nga ande afuku ti akozo lê ti kobe ti e so lê ni angbâ dä,+ amatabisi ti e, alengo ti alê ti keke nde nde kue,+ afini vin na fini mafuta ti e+ ti gue na ni na aprêtre na yâ ti ando ti batango aye* so ayeke na yâ ti da ti Nzapa ti e,+ e yeke gue na ni legeoko na dîme ti sese ti e ti mû na azo ti mara ti Lévi,+ ndali ti so azo ti mara ti Lévi la ayeke bungbi adîme ti agbata ti e kue so azo ni ayeke azo ti fango yaka.

38 A lingbi prêtre, so ayeke hale ti Aaron, aduti na terê ti azo ti mara ti Lévi na ngoi so ala yeke ro adîme ni. Azo ti mara ti Lévi ayeke mû dixième ti dîme ni ti gue na ni na da ti Nzapa ti e,+ na yâ ti akubu* ti ando so a yeke bata aye dä. 39 Ndali ti so azo ti Israël nga na azo ti mara ti Lévi ayeke ga na amatabisi+ ti alê ti kobe, afini vin na fini mafuta+ ti zia ni na ando ti batango aye dä, ndo so a yeke bata akungba ti ndo so ayeke nzoni-kue dä; a yeke nga na ndo so la si aprêtre, azo ti batango yanga ti gbagba nga na azo ti hengo bia ayeke sara kua dä. E yeke zia ande da ti Nzapa ti e angbâ tongaso pëpe.+

11 Amokonzi ti azo ti Israël asara kodro fadeso na Jérusalem.+ Me tanga ti azo ni abi mbeni ye+ ti bâ zo wa na popo ti azo bale-oko alingbi ti gue ti sara kodro na Jérusalem, gbata so ayeke nzoni-kue, na tanga ti azo ni gumbaya ayeke ngbâ ti ala na yâ ti ambeni gbata ni nde. 2 Nga, azo ni airi tënë nzoni na ndö ti azo kue so ayeda na bê ti ala wani ti sara kodro na Jérusalem.

3 So ayeke iri ti amokonzi ti kodro-komanda ni so asara kodro na Jérusalem la. (Tanga ti azo ti Israël, aprêtre, azo ti mara ti Lévi, azo ti kua ti temple,*+ nga na ahale ti azo ti kua ti Salomon+ so asara kodro na yâ ti ambeni gbata ni nde ti Juda, zo oko oko aduti na ndö ti sese ti lo na yâ ti gbata so lo yeke dä.+

4 Ambeni zo ti mara ti Juda na ti Benjamin nga asara kodro na Jérusalem). Na popo ti azo ti mara ti Juda a wara Athaïah molenge ti Ozias, Ozias ayeke molenge ti Zacharie, Zacharie ayeke molenge ti Amariah, Amariah ayeke molenge ti Shéphatiah, Shéphatiah ayeke molenge ti Mahalalel, Mahalalel ayeke molenge ti Pérès.+ 5 A yeke wara nga Maaséïah molenge ti Baruch, Baruch ayeke molenge ti Colhozéh, Colhozéh ayeke molenge ti Hazaïah, Hazaïah ayeke molenge ti Adaïah, Adaïah ayeke molenge ti Joïarib, Joïarib ayeke molenge ti Zacharie, Zacharie ayeke molenge ti Shiloni. 6 Amolenge ti Pérès kue so asara kodro na Jérusalem ayeke lani 468, ala kue ayeke angangu-koli.

7 Azo ti Benjamin ayeke: Sallu+ molenge ti Méshullam, Méshullam ayeke molenge ti Joëd, Joëd ayeke molenge ti Pédaïah, Pédaïah ayeke molenge ti Colaïah, Colaïah ayeke molenge ti Maaséïah, Maaséïah ayeke molenge ti Ithiel, Ithiel ayeke molenge ti Jéshaïah; 8 na peko ti lo ayeke Gabbaï na Sallaï, ala kue ayeke 928; 9 Joël molenge ti Zicri la ayeke zo so ayeke bâ ndo na ndö ti ala, na Juda molenge ti Hassénuah la ayeke use zo so ayeke bâ ndo na ndö ti gbata ni.

10 Ti aprêtre ayeke: Jédaïah molenge ti Joïarib, Jakin,+ 11 Séraïah molenge ti Hilkiah, Hilkiah ayeke molenge ti Méshullam, Méshullam ayeke molenge ti Zadoc, Zadoc ayeke molenge ti Méraïoth, na Méraïoth ayeke molenge ti Ahitub,+ mbeni mokonzi na da* ti tâ Nzapa; 12 ala na aita ti ala 822 so asara kua ti da ti tâ Nzapa; Adaïah molenge ti Jéroham, Jéroham ayeke molenge ti Pélaliah, Pélaliah ayeke molenge ti Amzi, Amzi ayeke molenge ti Zacharie, Zacharie ayeke molenge ti Pashhur,+ Pashhur ayeke molenge ti Malkijah, 13 na aita ti lo so ayeke amokonzi na ndö ti ahale ti akotara ti ala, ala kue ayeke 242; nga Amashsaï molenge ti Azarel, Azarel ayeke molenge ti Ahzaï, Ahzaï ayeke molenge ti Méshillémoth, Méshillémoth ayeke molenge ti Immer, 14 ala na aita ti ala ni so ayeke angangu-koli, azo so asara mbeto pëpe, ala kue ayeke 128; na zo so abâ ndo na ndö ti ala ayeke Zabdiel, zo ti mbeni sewa so iri ni awu.

15 Ti azo ti mara ti Lévi ayeke: Shémaïah+ molenge ti Hashub, Hashub ayeke molenge ti Azricam, Azricam ayeke molenge ti Hashabiah, Hashabiah ayeke molenge ti Bunni; 16 Shabbthaï+ na Jozabad,+ ala yeke na popo ti amokonzi ti azo ti mara ti Lévi, a yeke ala si ayeke bâ lege ti kua so ayeke na gigi ti da ti Nzapa; 17 Mattaniah,+ Bacbukiah na Abda. Mattaniah ayeke molenge ti Michée, Michée ayeke molenge ti Zabdi, Zabdi ayeke molenge ti Asaph.+ Mattaniah ayeke zo so ayeke mû li ti bia nga na atënë ti sepela na ngoi ti sambela.+ Bacbukiah ayeke use zo so ayeke mû li ni na popo ti aita ti lo. Abda ayeke molenge ti Shammua, Shammua ayeke molenge ti Galal, Galal ayeke molenge ti Jéduthun.+ 18 Azo ti mara ti Lévi kue so ayeke na yâ ti gbata so ayeke nzoni-kue ayeke lani 284.

19 Azo ti batango yanga ti gbagba ayeke Accub, Talmon+ nga na aita ti ala so ayeke sara nga kua ti batango yanga ti gbagba ni, ala kue ayeke 172.

20 Tanga ti azo ti Israël, aprêtre na azo ti mara ti Lévi ayeke na yâ ti agbata kue ti Juda, zo oko oko na ndö ti sese ti lo wani. 21 Azo ti kua ti temple*+ asara ti ala kodro na Ophel;+ Ziha nga na Guishpa la ayeke bâ ndo na ndö ti ala.

22 Zo ti bango ndo na ndö ti azo ti mara ti Lévi so ayeke na Jérusalem ayeke Uzzi molenge ti Bani, Bani ayeke molenge ti Hashabiah, Hashabiah ayeke molenge ti Mattaniah,+ Mattaniah ayeke molenge ti Mica, Mica ayeke na popo ti amolenge ti Asaph, so kua ti ala ayeke ti hengo bia; Uzzi ayeke bâ ndo na ndö ti akua nde nde so a yeke sara na yâ ti da ti Nzapa. 23 Gbia amû lani mbeni mbela ndali ti+ azo ti hengo bia ni, na a leke mbeni mbilimbili ye ti sara ti bâ lege ti azo ti hengo bia ni, a lingbi na abezoin ti ala ti lango oko oko. 24 Péthahiah molenge ti Méshézabel, Méshézabel ayeke na popo ti ahale ti Zérah, Zérah ayeke molenge ti Juda; Péthahiah ayeke wamungo wango na gbia na ndö ti atënë kue so andu azo ti Israël.

25 Ti akete kodro nga na ayaka so ayeke na terê ni, ambeni zo ti Juda asara kodro na Kiriath-Arba+ na agbata so ayeke na gbe ti Kiriath-Arba,* na Dibon na agbata so ayeke na gbe ti Dibon, na Jécabzéel+ na akete kodro so ayeke na terê ni, 26 na Jéshua, na Moladah,+ na Beth-Pélet,+ 27 na Hazar-Shual,+ na Béer-Shéba na agbata so ayeke na gbe ti Béer-Shéba,* 28 na Ziclag,+ na Méconah na agbata so ayeke na gbe ti Méconah,* 29 na En-Rimmon,+ na Zorah+ nga na Jarmuth, 30 na Zanoah,+ na Adullam na akete kodro so ayeke na terê ni, na Lakish+ na ayaka ti ndo ni, nga na Azécah+ na agbata so ayeke na gbe ti Azécah.* Ala sara kodro* a londo na Béer-Shéba juska ti si na Popo-hoto ti Hinnom.+

31 Azo ti Benjamin ayeke na Guéba,+ Micmash, Aija, Béthel,+ nga na agbata so ayeke na gbe ti Béthel,* 32 Anathoth,+ Nob,+ Ananiah, 33 Hazor, Ramah,+ Guittaïm, 34 Hadid, Zéboïm, Néballat, 35 Lod na Ono,+ popo-hoto ti azo so ahinga ti sara kua ti maboko nzoni. 36 Na popo ti agroupe ti azo ti mara ti Lévi so ayeke na Juda, a soro ambeni groupe ti duti ndo oko na azo ti Benjamin.

12 So ayeke iri ti aprêtre nga na azo ti mara ti Lévi so asigi lani legeoko na Zorobabel+ molenge ti Shéaltiel+ nga na Jéshua+ la: a yeke Séraïah, Jérémie, Esdras, 2 Amariah, Malluk, Hattush, 3 Shécaniah, Réhum, Mérémoth, 4 Iddo, Guinnéthoï, Abijah, 5 Mijamin, Maadiah, Bilgah, 6 Shémaïah, Joïarib, Jédaïah, 7 Sallu, Amoc, Hilkiah na Jédaïah. Ala so ayeke amokonzi na ndö ti aprêtre nga na ndö ti aita ti ala na ngoi ti Jéshua.

8 Ti azo ti mara ti Lévi, a yeke Jéshua, Binnui, Cadmiel,+ Shérébiah, Juda, na Mattaniah+ lo so amû li ni na yâ ti bia ti kiringo singila na Nzapa, lo legeoko na aita ti lo. 9 Bacbukiah, Unni na aita ti ala so na ngoi ti kua ti sinziri ti ala, ala luti na mbage ge na ala yeke bâ ala lê na lê na mbage kâ. 10 Jéshua adü Joïakim, Joïakim adü Éliashib,+ Éliashib adü Joïada.+ 11 Joïada adü Jonathan, Jonathan adü Jaddua.

12 So ayeke iri ti azo so ayeke lani prêtre nga mokonzi na ndö ti ahale ti akotara ti ala na ngoi ti Joïakim la: Ti ahale ti Séraïah,+ a yeke Méraïah; ti ahale ti Jérémie, a yeke Hananiah; 13 ti ahale ti Esdras,+ a yeke Méshullam; ti ahale ti Amariah, a yeke Jéhohanan; 14 ti ahale ti Malluki, a yeke Jonathan; ti ahale ti Shébaniah, a yeke Joseph; 15 ti ahale ti Harim,+ a yeke Adna; ti ahale ti Méraïoth, a yeke Helcaï; 16 ti ahale ti Iddo, a yeke Zacharie; ti ahale ti Guinnéthon, a yeke Méshullam; 17 ti ahale ti Abijah,+ a yeke Zicri; ti ahale ti Miniamin, . . . ;* ti ahale ti Moadiah, a yeke Piltaï; 18 ti ahale ti Bilgah,+ a yeke Shammua; ti ahale ti Shémaïah, a yeke Jéhonathan; 19 ti ahale ti Joïarib, a yeke Matténaï; ti ahale ti Jédaïah,+ a yeke Uzzi; 20 ti ahale ti Sallaï, a yeke Callaï, ti ahale ti Amoc, a yeke Éber; 21 ti ahale ti Hilkiah, a yeke Hashabiah; ti ahale ti Jédaïah, a yeke Néthanel.

22 A sû na mbeti iri ti azo so ayeke lani amokonzi na ndö ti ahale ti akotara ti mara ti Lévi na ngoi ti Éliashib, Joïadah, Johanan na Jaddua;+ a sû nga iri ti aprêtre ni (ti londo na ngoi ni so) juska ti si na ngoi so Darius gbia ti Perse ayeke komande.

23 A sû na yâ ti mbeti ti mbaï ti ngoi ni so, iri ti azo ti mara ti Lévi so ayeke amokonzi na ndö ti ahale ti akotara ti mara ti ala; a sara ni juska ti si na ngoi ti Johanan molenge ti Éliashib. 24 Amokonzi ti ahale ti akotara ti mara ti Lévi ayeke lani Hashabiah, Shérébiah, Jéshua+ molenge ti Cadmiel.+ Aita ti ala, so ayeke asinziri aluti na mbage ge na ala yeke bâ ala lê na lê na mbage kâ. Ala yeke luti tongaso ti he bia ti sepela Nzapa na ti kiri singila na lo alingbi na yanga so David,+ wakua ti tâ Nzapa, amû lani. Groupe ti ala ayeke nde nde. 25 Mattaniah,+ Bacbukiah, Obadiah, Méshullam, Talmon na Accub+ ayeke azo ti batango yanga ti gbagba,+ ala yeke bata yanga ti ada ti batango aye so ayeke nduru na ayanga ti gbagba ti temple ni. 26 Ala yeke sara lani kua ni na ngoi ti Joïakim molenge ti Jéshua+ so lo yeke molenge ti Jozadac; a yeke nga na ngoi ti gouverneur Néhémie na Esdras+ so ayeke prêtre nga wasungo peko ti mbeti.*

27 Na ngoi ti matanga ti zingo yanga ti gbagba ti Jérusalem, ala gi azo ti mara ti Lévi na ando kue so ala yeke dä ti ga na ala na Jérusalem ti tene ala sara matanga ti zingo yanga ti gbagba ni; ala sara ni na yâ ti ngia, ala he abia ti kiringo singila na Nzapa,+ ala he abia ni na acymbale, na ambeni ye ti pikango na mozoko so ayeke na kamba nga na aharpe. 28 Amolenge ti azo ti hengo abia ni aga ala bungbi terê ti ala ndo oko, ala londo na yâ ti akodro-komanda kue so angoro Jérusalem, na akete kodro so ayeke na terê ti Nétopha,+ 29 na Beth-Guilgal,+ na ayaka so ayeke na terê ti Guéba+ nga na Azmaveth+ ndali ti so ala leke akete kodro ti ala wani na ando so angoro Jérusalem kue. 30 Aprêtre na azo ti mara ti Lévi azi sioni ye na terê ti ala wani, ala zi sioni ye na terê ti azo ti mara ni,+ na terê ti ayanga ti gbagba ni+ nga na terê ti gbagba ni.+

31 Na pekoni, mbi ga na amokonzi ti mara ti Juda, mbi zia ala na nduzu na li ti gbagba ni. Mbi leke groupe use ti gbâ ti azo ti hengo bia ti kiringo singila na Nzapa, nga na azo so ayeke kpo molongo ti tambela na peko ti ala, mbeni groupe ni oko atambela na mbage ti gbagba ni na mbage ti koli ti gue na ndo so a iri ni Yanga-ti-gbagba-ti-gba-ti-amburu-ti-wa.+ 32 Hoshaïah na ndambo ti amokonzi ti mara ti Juda ayeke tambela na peko ti ala; 33 na terê ti lo a yeke wara Azariah, Esdras, Méshullam, 34 Juda, Benjamin, Shémaïah na Jérémie. 35 Ambeni molenge ti aprêtre so ayeke na atrompette+ ayeke na terê ti ala, a yeke zo tongana Zacharie (lo yeke molenge ti Jonathan, Jonathan ayeke molenge ti Shémaïah, Shémaïah ayeke molenge ti Mattaniah, Mattaniah ayeke molenge ti Micaïah, Micaïah ayeke molenge ti Zaccur, Zaccur ayeke molenge ti Asaph),+ 36 lo na aita ti lo Shémaïah, Azarel, Milalaï, Guilalaï, Maaï, Néthanel, Juda nga na Hanani; ala gbu aye ti hengo na bia ti David,+ zo ti tâ Nzapa. Esdras+ wasungo peko ti mbeti* ayeke tambela na devant ti ala. 37 Ala si na ndo so a iri ni Yanga-ti-gbagba-ti-li-ti-ngu,+ ala monté Escalier+ so ayeke na ndö ti Da ti David+ si ala gue na Yanga-ti-gbagba-ti-ngu,+ na ala gue na ndo so a iri ni Escalier ti Gbata ti David na mbage ti est.

38 Mbeni use groupe ti azo ti hengo bia ni atambela ti ga na devant ti kozo groupe ni, mbi na ndambo ti azo ti kodro ni e yeke tambela na peko ti ala na ndö ti gbagba so ayeke na ndö ti Tour ti Four+ juska ti si na ndö ti Kota gbagba ni,+ 39 e hon na ndö ti Yanga-ti-gbagba-ti-Éphraïm+ ti gue na ndo so a iri ni Yanga-ti-gbagba-ti-ngbene-gbata,+ e si na Yanga-ti-gbagba-ti-asusu,+ e si na Tour ti Hananel,+ Tour ti Méah, juska na ndö ti Yanga-ti-gbagba-ti-ataba;+ na e gue e luti na Yanga-ti-gbagba-ti-asinziri.

40 Na nda ni, agroupe use kue ti azo ti hengo bia ti mungo singila na Nzapa aluti na devant ti da ti tâ Nzapa. Mbi na ndambo ti akete gouverneur ni na terê ti mbi e nga kue e ga e luti na ndo so, 41 legeoko na aprêtre Éliakim, Maaséïah, Miniamin, Micaïah, Élioénaï, Zacharie nga na Hananiah; ala gbu atrompette, 42 na terê ti ala Maaséïah, Shémaïah, Éléazar, Uzzi, Jéhohanan, Malkijah, Élam na Ézer. Azo ti hengo bia ni ahe bia na kota go, na Israhiah la ayeke bâ ndo na ndö ti ala.

43 Na lango ni so, ala mû gbâ ti asandaga na ala yeke na ngia+ ndali ti so tâ Nzapa asara si ala yeke na kota ngia. Awali na amolenge nga kue ayeke na ngia,+ ye so asara si zo angbâ ayo lo lingbi ti mä ngia so azo ti Jérusalem ayeke sara.+

44 Na lango ni so, a zia azo ti tene ala bâ ndo na ndö ti ada ti batango aye+ so a mû na matabisi,+ akozo lê ti keke+ nga na adîme.+ Ala yeke bungbi na yâ ti ada ni so, akobe ti yaka so alondo na ando nde nde so angoro agbata ni, akobe ti yaka so azo amû ndali ti aprêtre nga ndali ti azo ti mara ti Lévi tongana ti so Ndia afa.+ Bê ti azo ti Juda anzere mingi ngbanga ti so aprêtre na azo ti mara ti Lévi+ ayeke sara kua na temple. 45 Ala komanse ti bâ lege ti akua ti Nzapa ti ala nzoni nga ye so a hunda na ala ti sara ti zi sioni ye na terê ti ala, azo ti hengo bia nga na azo ti batango yanga ti gbagba asara tongaso nga, ti gue oko na yanga so David na molenge ti lo Salomon amû lani. 46 Ndali ti so ândö na ngoi ti David nga na Asaph, a yeke wara lani azo so ayeke bâ ndo na ndö ti azo* ti hengo bia nga na ndö ti abia ti gonda Nzapa nga ti kiri singila na lo.+ 47 Na ngoi ti Zorobabel+ nga na ngoi ti Néhémie, azo kue ti Israël ayeke mû ye na azo ti hengo bia+ nga na azo ti batango yanga ti gbagba+ alingbi na bezoin ti ala ti lâ oko oko. Ala nga ala zi mbeni mbage ni ala zia ni nde ti mû na azo ti mara ti Lévi;+ azo ti mara ti Lévi nga kue azi mbage ni ala zia ni nde ti mû na ahale ti Aaron.

13 Na lango ni so, a diko mbeti ti Moïse na mê ti azo ni,+ na a wara na yâ ni tënë so a tene a lingbi azo ti mara ti Amori wala azo ti Moab+ alï lâ oko pëpe na popo ti congrégation ti azo ti tâ Nzapa,+ 2 ndali ti so ala ga lani ti mû mapa nga na ngu na azo ti Israël pëpe, me ala mû nginza na Balaam ti tene lo deba azo ti Israël.+ Nzapa ti e asara si deba ni achangé aga tufa.+ 3 Gï so ala mä atënë ti Ndia ni so awe, ala komanse ti zi ahale ti awande* kue na popo ti azo ti Israël.+

4 Me kozo si ye so asi, prêtre Éliashib+ la ayeke bâ ndo lani na ndö ti ando ti batango aye ti da* ti Nzapa ti e,+ na mbeni songo ti fami atingbi lo na Tobiah.+ 5 Éliashib amû na Tobiah mbeni kota kubu ti batango aye dä,* na ndo so a yeke bata ândö na yâ ni sandaga ti lê ti kobe, adukane, akungba, dîme ti lê ti kobe, fini vin nga na mafuta+ so azo ti mara ti Lévi,+ azo ti hengo bia nga na azo ti batango ayanga ti gbagba ayeke na droit na ni; a yeke bata nga na yâ ni amatabisi so a mû ni ndali ti aprêtre.+

6 Me na yâ ti angoi ni so kue, mbi yeke lani na Jérusalem pëpe ndali ti so mbi gue lani na terê ti Artaxerxès+ gbia ti Babylone na yâ ti ngu 32+ ti komandema ti lo. Ambeni ngoi na pekoni, mbi hunda na gbia ni ti zia lege na mbi ti hon. 7 Na peko ti so mbi kiri na Jérusalem la mbi ga ti bâ ye ti sioni so Éliashib+ asara ndali ti so lo mû mbeni kubu ti batango aye dä lo mû na Tobiah+ na yâ ti gbagba ti da ti tâ Nzapa. 8 Ye so lo sara so ason bê ti mbi mingi, tongaso mbi mû akungba ti Tobiah kue na yâ ti kubu ni* mbi tuku na gigi. 9 Na pekoni, mbi mû yanga, na a sukula yâ ti akubu so a yeke bata aye na yâ ni so,* na mbi mû akungba ti da ti tâ Nzapa,+ sandaga ti lê ti kobe nga na adukane mbi kiri na ni na yâ ni.+

10 Mbi bâ nga so amatabisi so a yeke mû ka na azo ti mara ti Lévi,+ a mû ni na ala pëpe;+ tongaso azo ti mara ti Lévi na azo ti hengo bia adö kua ti ala azia, na ala oko oko kue ague na ayaka ti ala.+ 11 Tongaso, mbi suku na akete gouverneur+ mbi tene: “Ngbanga ti nyen ala zia da ti tâ Nzapa angbâ gï tongaso?”+ Na pekoni, mbi iri azo ti mara ti Lévi na azo ti hengo bia mbi kiri na ala na kua ti ala. 12 Azo ti Juda kue aga na dîme+ ti alê ti kobe, ti fini vin nga na ti mafuta, ala zia ni na yâ ti akubu so a yeke bata aye dä.+ 13 Mbi soro prêtre Shélémiah, Zadoc wasungo peko ti mbeti* nga na Pédaïah so ayeke mbeni zo ti mara ti Lévi ti tene ala bâ ndo na ndö ti akubu so a yeke bata aye dä so, na Hanan molenge ti Zaccur, lo yeke âta ti Mattaniah, lo la lo yeke sara kua na terê ti ala, ndali ti so a bâ ala tongana azo so zo alingbi ti sara confiance na ala. Kua ti ala ayeke ti kangbi aye ni na aita ti ala.

14 Nzapa ti mbi, mo dabe ti mo na mbi+ na ndö ti tënë so, na mo girisa pëpe akua so mbi sara so afa tâ ndoye so mbi yeke na ni ndali ti da ti Nzapa ti mbi nga ndali ti akua so a yeke sara na yâ ni.*+

15 Na alango ni so, mbi bâ azo ti Juda so ayeke dö alê ti vigne na yâ ti dû ti sarango na vin na lango ti Sabbat,+ ala yeke yô gbâ ti alê ti kobe ala zia na ndö ti alele, ala yeke mû vin, alê ti vigne, alê ti figue nga na mara ti akungba nde nde kue, ala yeke linda na ni na Jérusalem na lango ti Sabbat.+ Tongaso, mbi gboto mê ti ala na ndö ti tënë ti kango ye na lango ti Sabbat.* 16 Nga, azo ti kodro ti Tyr so ayeke lango na gbata ti Jérusalem ayeke ga na asusu na mara ti aye ti kango ni nde nde kue na ala yeke kä ni na azo ti Juda nga na yâ ti Jérusalem na lango ti Sabbat.+ 17 Tongaso, mbi suku na amokonzi ti mara ti Juda, mbi tene: “Mara ye ti sioni ti nyen la ala yeke sara tongaso so? ala sara même si lango ti Sabbat aga sioni? 18 A yeke mara ti ye so lani akotara ti ala asara si Nzapa ti e aga lani na aye ti sioni na ndö ti e nga na ndö ti gbata so la ape? Ti so ala yeke sara si lango ti Sabbat aga sioni so, ala yeke sara ti tene kota ngonzo ti Nzapa akiri alondo ngangu na terê ti azo ti Israël la.”+

19 Gï so ndo akomanse ti vuko na ayanga ti gbagba ti Jérusalem kozo si lango ti Sabbat alingbi, mbi mû yanga si a kanga ayanga ti gbagba ni. Mbi tene nga na azo ni, mbi tene ala zi yanga ti gbagba ni pëpe juska lango ti Sabbat ni ahon si, na mbi zia ambeni zo ti kua ti mbi na ayanga ti gbagba ni ti bâ si zo alï na mbeni kungba na yâ ti gbagba ni na lango ti Sabbat pëpe. 20 Ye so asara si azo ti dengo buze nga na azo so ayeke kä mara ti akungba nde nde kue alango na gigi ti Jérusalem fani oko wala fani use tongaso. 21 Na pekoni, mbi gboto mê ti ala mbi tene: “Ala yeke lango na yanga ti gbagba ni ngbanga ti nyen? Tongana ala kiri ala lango na yanga ti gbagba ni, mbi yeke tomba ala na ngangu.” Ti londo na lango ni so ti gue na ni, ala kiri aga na lango ti Sabbat encore ape.

22 Mbi tene na azo ti mara ti Lévi ti zi lakue asioni ye na terê ti ala, ti ga ti bata ayanga ti gbagba ni si azo abâ lango ti Sabbat tongana lango so a zia ni nde ndali ti Nzapa.+ Nzapa ti mbi, mo dabe ti mo na mbi ndali ti aye so nga, na mo bâ mawa ti mbi alingbi na tâ ndoye ti mo so ayeke mingi.+

23 Na ngoi ni so, mbi bâ nga aJuif so asara mariage na* awali ti kodro ti Ashdod,+ ti Ammon na ti Moab.+ 24 Ndambo ti amolenge ti ala ayeke tene yanga ti kodro ti Ashdod nga ndambo ni ayeke tene ayanga ti kodro ti ambeni mara nde; me mbeni molenge oko so ahinga ti tene yanga ti kodro ti aJuif ayeke dä pëpe. 25 Tongaso, mbi suku na ala, mbi deba ala nga mbi pika ambeni+ na mbi gboto kuä ti li ti ala, na mbi hunda na ala ti deba yanga ti ala na iri ti Nzapa na tënë so: “Ala yeke mû amolenge ti ala ti wali ti ga awali ti amolenge ti azo so pëpe nga a lingbi ala yeda pëpe ti tene amolenge ti ala ti koli wala ala wani amû amolenge ti wali ti azo so ti ga awali ti ala.+ 26 A yeke ndali ti sarango mara ti aye tongaso la si Salomon gbia ti Israël asara lani siokpari so ape? Na popo ti amara kue mbeni gbia so alingbi lani na lo ayeke dä pëpe;+ Nzapa ti lo aye lo lani mingi,+ tongaso lo zia Salomon gbia na ndö ti azo ti Israël kue. Me a yeke awali wande la asara si même lo kue lo sara siokpari lani.+ 27 Li ti zo akpe ti mä so ala sara mara ti kota sioni tongaso, ti ke Nzapa ti e na sarango mariage na awali-wande. Ni la ape?”+

28 Joïada+ ayeke molenge ti kota prêtre Éliashib,+ so mbeni molenge ti lo ti koli ayeke kogara ti Sanballat+ zo ti kodro ti Beth-Horon. Tongaso, mbi tomba molenge ni so yongoro na terê ti mbi.

29 Nzapa ti mbi, mo girisa ye so ala sara so pëpe, ndali ti so ala sara si kua ti aprêtre aga sioni na ala sara nga si mbele so mo te na aprêtre+ nga na azo ti mara ti Lévi+ aga sioni.

30 Tongaso, mbi sukula ala na yâ ti asioni ye kue ti awande, mbi fa na aprêtre kua ti ala, mbi fa nga na azo ti mara ti Lévi kua ti ala; zo oko oko na yanga ti kua ti lo,+ 31 na mbi leke si azo aga na akeke ti wâ+ na ngoi so a fa ni awe nga na akozo lê ti akeke so abe awe.

Nzapa ti mbi, mo dabe ti mo na mbi na mo sara nzoni bê* na mbi.+