Jésus na ndo ti hoto

BÂ JÉSUS ge, lo duti na ndo ti hoto ti Galilée. Lo yeke fa ye na azo so kue. Azo so aduti nduru na tere ti lo so ayeke adisciple ti lo. Lo soro ambeni 12 ti ga abazengele ti lo. Abazengele ayeke adisciple ti Jésus so asara kusala nduru na tere ti lo. Iri ti ala ayeke nyen? Mo hinga ni?

Simon Pierre ayeke dä na ita ti lo André. Jacques na Jean ayeke nga dä, ala yeke aita. Iri ti mbeni bazengele ni nde ayeke Jacques nga, na mbeni ayeke Simon. Ambeni use, iri ti ala ayeke Judas: Judas Iscariote na Judas so a iri lo Thaddée. Philippe na Nathanaël (so a iri nga lo Barthélemy) ayeke dä, na Matthieu na Thomas ayeke dä nga.

Tongana Jésus alondo lani na Samarie lo kiri, lo to nda ti fa tënë ti kozoni, lo tene: ‘Royaume ti yayu aga nduru awe.’ Royaume so ayeke nyen? Mo hinga ni? A yeke ngorogbia ti Nzapa, na a yeke tâ ye. Jésus ayeke gbia ni. Lo yeke ngbâ na yayu kâ ti komande sese kue nga ti ga na siriri na ndo ni. Royaume ti Nzapa ayeke sara si sese kue aga paradis.

Ge, Jésus ayeke fa ye na azo na ndo ti royaume ni so. Lo tene: ‘A lingbi ala sambela tongaso, “Babâ ti e so ayeke na yayu, e ye si iri ti mo aga nzoni-kue. E ye si royaume ti mo aga. E ye si a sara ye so bê ti mo aye, na yayu legeoko nga na sese.” ’ Azo mingi airi sambela so “Sambela ti Babâ ti e so ayeke na yayu.” Tara ti tene sambela so kue e bâ.

Jésus afa nga na azo lege so a lingbi ala sara ye na amba ti ala, lo tene: ‘Ye kue so mo ye azo asara na mo, mo sara na ala tongaso nga.’ Mo ye si azo asara nzoni na mo? Tongaso, sara nzoni na ala nga. A yeke ye so Jésus aye ti tene la. Tongana azo kue asara ye tongaso na yâ ti paradis, gigi ayeke nzere ande pëpe?