Chapitre 38

Mabe ti Jean awoko?

JEAN Wabatizengo zo, lo so ayeke na da ti kanga a sala fadeso ngu oko awe, ama so Jésus azingo na kui molenge ti koli ti mbeni womua ti kodoro ti Naïn. Me, lo ye si Jésus mveni afa na lo nda ti ye ti kpene so; teti so, lo to use ti adisciple ti lo ti hunda Jésus: “Mo yeke Lo so ayeke ga? Wala a lingbi e ku mbeni zo nde?”

Peut-être e lingbi ti baa so hundango tene so ayeke na lege ni pepee, teti kozoni, na la ni so Jean abatizé Jésus aninga ndulu na ngu use fadeso awe, lo baa yingo ti Nzapa azu na ndo Jésus, na lo ma so Nzapa asala tene nzoni na ndo Jésus. Hundango tene ti Jean alingbi peut-être ti pusu ambeni zo ti tene so mabe ti lo awoko. Me, a yeke tongaso pepee. Jésus alingbi pepee ti gunda Jean, ye so lo sala na ngoi ni so, tongana kite ayeke na be ti lo. Tongaso, Jean ahunda tene so ngbanga ti nyen?

Jean aye peut-être si Jésus ayeda polele so lo yeke Messie. Ye so alingbi ti mu ngangu mingi na Jean so anzee na ya da ti kanga. Me, Jean ayeke peut-être na ambeni raison ti hunda tene so. Biani, lo ye ti hinga tongana mbeni zo nde alingbi ti ga, mbeni zo ti sanzé Jésus, so ayeke sala si atene kue so afa ni kozoni, aye so Messie alingbi ti sala, aga taa tene.

Na lege ti ambeni prophétie ti Mbeti ti Nzapa so Jean ahinga ni, Lo so Nzapa asa ye na ndo lo alingbi ti ga gbia, na lo yeke zo ti zi zo. Kamême na ye so, anze mingi na peko ti batême ti Jésus, Jean angba na da ti kanga lakue. Tongaso Jean ahunda na Jésus: “Mo yeke lo so akiri royaume ti Nzapa biani wala a lingbi e ku ye so na lege ti mbeni zo so asanzé mo, Lo so asala si aprophétie kue so asala tene ti gloire ti Messie aga taa tene?”

Jésus atene pepee na adisciple ti Jean: ‘Biani, mbi yeke lo so alingbi ti ga!’ Me na gbe le ti ala Jésus alungula mara ti kobela nde nde ti azo mingi. Na pekoni, lo tene na ala: “I gue i tene na Jean ye so i baa na ye so i ma: awaziba abaa ndo, awazin atambela, azo ti ngiba aga nzoni, awambongi ama ndo, a yaa awakinda, na a fa nzo tene na awazinga.”

Hundango tene ti Jean afa na gigi so lo ye si Jésus asala ye mingi ahon, lo ye peut-être si azi lo na kanga. Me Jésus awa lo ti ku pepee mbeni ye ahon afa so lo yeke sala.

Tongana adisciple ti Jean ague awe, Jésus agi tele ti lo na mbage ti azo mingi na lo tene na ala so Jean ayeke “watokua” ti Jéhovah so asala tene ti lo kozoni na Malachie 3:1, 10, lo yeke nga prophète Elie so asala tene ti lo na Malachie 4:5, 6. Na lege so Jésus agunda Jean, lo fa so Jean alingbi na aprophète so aduti na fini kozoni na lo. Lo fa ndani tongaso: “Biani, mbi tene na i: Na popo ti ala so awali adu ala, mbeni zo so ayeke kota ahon Jean Wabatizengo zo ayeke pepee; me zo so ayeke kete kete na royaume ti yayu ayeke kota ahon lo. Na a tondani na la ti Jean Wabatizengo zo juska fadeso, royaume ti yayu ayeke ye so azo asala ngangu ti wara.”

Na ndo so Jésus afa so fade Jean ayeke duti pepee na ya Royaume so ayeke na yayu, teti zo so ayeke kete na ya Royaume ti yayu lo yeke kota ahon Jean. Jean aleke lege ti Jésus, me lo kui kozoni si Christ ate mbele na adisciple ti lo, wala lo yeke songo na ala, si ala lingbi komande lege-oko na lo na ya Royaume ti lo. A yeke teti ye so si Jésus atene fade Jean aduti na ya Royaume ti yayu pepee. Fade lo yeke duti na ndo sese na gbe ti Royaume ti Nzapa. Luc 7:18-30; Matthieu 11:2-15.

▪ Ngbanga ti nyen Jean ahunda ti hinga tongana Jésus ayeke Lo so ayeke ga wala a lingbi ala ku mbeni zo nde?

▪ Jésus atene Jean asala si aprophétie wa aga taa tene?

▪ Ngbanga ti nyen fade Jean Wabatizengo zo ayeke duti na yayu lege-oko na Jésus pepee?