Chapitre 39

Azo ti taa-be-ti-molenge na azo ti baba

TONGANA lo sala tene ti anzoni lengo ti Jean Wabatizengo zo awe, na pekoni Jésus asala tene ti azo ti baba, azo so agbian tene ti ala lakue so angoro lo. Lo tene: “Azo ti wagame so ayeke tongana amolenge so aduti na gala, ala hiri afo ala, ala tene: ‘E hulu flute teti i, na i dodo pepee; e sala bia ti toto kua, na i pika libe ti i pepee.’ ”

Jésus aye ti tene nyen ge? Lo fa nda ti tene ni: “Teti Jean aga, lo te mapa pepee na lo nyon vin pepee, na ala tene: ‘Lo yeke na yingo sioni’; Molenge ti zo aga, lo te na lo nyon, na ala tene: ‘Baa, zo ti tengo kobe mingi na zo ti nyongo vin mingi, lo yeke ndeko ti azo ti kamata lapo na ti awasiokpari.’”

Lege ti mu ngia na be ti azo so ayeke pepee. Ye oko anzere na be ti ala pepee. Jean ayeke na mara ti fini so ayeke ngangu tongana naziréen, lo gbanzi ye mingi na tele ti lo mveni, lo sala ye alingbi na tene ti ange so atene ‘a lingbi lo nyon vin wala samba pepee’. Me, azo atene lo yeke na yingo sioni. Nde na Jean, Jésus asala ye lege-oko na tanga ti azo kue, lo gbanzi ye mingi na tele ti lo pepee, me azo atene lo sala ye ahon ndoni.

A yeke ngangu mingi ti mu ngia na be ti azo ni! Ala yeke tongana amolenge so ambeni ake ti dodo tongana amba ti ala ahulu flute, wala ala duti na vundu pepee tongana amba ti ala atoto kua. Me, Jésus atene: “Me azo ahinga ndara ayeke mbilimbili na lege ti kusala ti lo.” Biani, kusala ti ala afa so tene so ala diko na ndo ti Jean na Jésus ayeke mvene.

Na pekoni, Jésus azingo ngangu mingi na akodoro ti Chorazin, Bethsaïda na Capernaüm, na ndo so lo sala ye ti kpene mingi da. Jésus atene, tongana lo sala kusala so na Tyr na Sidon, ka akodoro ti Phénice so agbian be ti ala giriri, na ala duti na bongo ti mua na mbiwa. Ti fa ngbanga na ndo Capernaüm, kodoro so lo kiri da mingi na ngoi ti kusala ti fango tene ti lo, Jésus atene: “Na La ti Fango Ngbanga, fade ngbanga ti mo ayeke kota ahon ngbanga ti sese ti Sodome.”

Na pekoni, na gbele azo Jésus agunda Baba ti lo na yayu. Ye so apusu lo ti sala ni ayeke so Nzapa ahonde ataa tene na lege ti yingo so ayeke na ngere ngangu na awandara na azo so ahinga ye mingi, na lo fa ndani na azo senge so ayeke tongana akete molenge.

Na ndani, Jésus amu pendere hiringo ndo so: “I ga na mbi, i kue so i sala kusala na i yeke na kungba so ane, na fade mbi mu na i lege ti wo tele. I yo joug ti mbi, i ga adisciple ti mbi, teti mbi yeke na taa-be-ti-molenge na be ti mbi ayeke kota pepee, na fade i wara lege ti wo âme ti i. Teti joug ti mbi ayeke nzoni, na kungba ti mbi ane pepee.”

Na lege wa si Jésus aye ti mu na ala maboko ti wo tele? Lo zi azo na gbe ti ngbaa ti tene ti akotara so amokonzi ti nzapa azia na ndo go ti ala, tongana andia so ane teti la ti sabbat. Na nga, lo fa lege ti wo tele na azo so komandema ti azo ti poroso ane ala na azo so siokpari ti ala asala si yingo-ti-hinga ti ala aduti na vundu. Lo fa na azo so abaa pasi tongaso tongana nyen ala lingbi ti wara pardon teti siokpari ti ala na tongana nyen ala lingbi ti wara nzoni dutingo na Nzapa.

Joug ti be-nzoni so Jésus aye ti mu na azo ayeke ti mu tele ti e kue na Jéhovah, si e lingbi ti sala kusala teti Baba ti e na yayu so abaa mawa ti azo na asala be-nzoni na ala. Kungba so ane pepee so Jésus aye ti mu na azo so aga na lo ayeke ti bata andia so Nzapa amu na azo so aye ti wara fini. Batango komandema ti lo ane biani pepee. Matthieu 11:16-30; Luc 1:15; 7:31-35; 1 Jean 5:3.

▪ Na lege wa si azo ti wagame ti Jésus so asala baba mingi akpa amolenge?

▪ Ye nyen apusu Jésus ti gunda Baba ti lo na yayu?

▪ Ngbanga ti nyen a lingbi ti tene so azo ayo kungba so ane? Jésus aye ti sala nyen ti tene ala wo tele?