Chapitre 68
Jésus angba ti fa tene na lango mbasambala ni
E DE na lango mbasambala ni so ayeke tanga ti lango ti matanga ti Akpangba. Jésus ayeke fa tene na ya ndo so ahiri ni “da ti mosoro”, mbeni mbage ti temple so ayeke na ya Sedu ti Awali. A yeke na ndo so si sanduku ti kamata amatabisi ti nginza ti azo kue aduti da.
Lakue na la kui na ngoi ti matanga ni kue, mbeni wa so ayeke nde aza na ya ti gbagba ni so. Aleke akota fotoforo osio na sedu so. Fotoforo oko oko kue ayeke na akota sembe osio so atuku mafuta na ya ni. Tongana mafuta na ya asembe bale oko na omene so agbi, a mu lumière so ayeke ngangu mingi so angoro na ndo ni kue na bi. Atene ti Jésus na gbe ni ge adabe awamango lo na wa so: “Mbi yeke lumière ti sese so. Zo so aga na peko ti mbi, fade lo tambela na ya bingo pepee, me fade lo yeke na lumière so amu fini.”
A-Farizien ake: “Mo sala tene ti témoin ti mo mveni; tene ti témoin ti mo ayeke taa tene pepee.”
Ti kiri tene na ala, Jésus atene: “Même tongana mbi sala tene ti témoin ti mbi mveni, tene ti témoin ti mbi ayeke taa tene, teti mbi hinga ndo so mbi londo da, na mbi hinga ndo so mbi yeke gue da. Me i, i hinga pepee ndo so mbi londo da, wala ndo so mbi yeke gue da.” Lo kiri lo tene nga: “Mbi yeke lo so asala tene ti témoin ti mbi mveni, na Baba so ato mbi asala tene ti témoin ti mbi.”
A-Farizien aye ti hinga: “Baba ti mo ayeke na ndo wa?”
Jésus akiri tene na ala: “I hinga mbi pepee, na i hinga Baba ti mbi pepee. Tongana i hinga mbi, ka i hinga Baba ti mbi nga.” Kamême so aFarizien aye lakue ti gbu Jésus, zo oko awara lege ti zia maboko na ndo lo pepee.
Jésus atene mbeni: “Mbi yeke gue ti mbi, (...). Na ndo so mbi yeke gue da, i lingbi ti si ka pepee.”
Tongana ala ma tene so, aJuif ahunda tele ti ala: “Nyen? Fade lo fa tele ti lo mveni? teti lo tene, ‘Na ndo so mbi yeke gue da, i lingbi ti si ka pepee’.”
Jésus afa nda ti tene ni na ala: “I yeke ti gbe ni, mbi yeke ti nduzu. I yeke ti sese so; mbi yeke ti sese so pepee.” Na pekoni lo tene: “Tongana i ma na be pepee so mbi yeke lo, fade i kui na ya siokpari ti i.”
Jésus asala tene ge ti fini ti lo na nduzu kozoni si lo ga na sese, na nga so lo yeke Messie, wala Christ, ti zendo ni. Me, ala hunda na baba mingi: “Mo yeke zo wa?”
Teti so ala ke lo, Jésus akiri tene tongaso: “Ngbanga ti nyen mbi ngba ti sala tene na i?” Me lo zia mbeni tene da: “Lo so ato mbi, lo yeke Nzapa ti taa tene, na tene so mbi ma na yanga ti lo awe, mbi fa na azo ti sese so.” Lo kiri lo tene: “Tongana i kanga Molenge ti zo na nduzu, na la ni ka, fade i hinga mbi yeke lo, na mbi sala ye oko na be ti mbi pepee; me, mbi tene gi ye so Baba afa na mbi. Na lo so ato mbi, lo yeke na mbi; lo zia mbi pepee, teti mbi sala ye so amu ngia na lo lakue.”
Tongana Jésus asala tene tongaso awe, azo mingi ama na be na lo. Na azo so lo tene: “Tongana i ngba ti duti na ya tene ti mbi, i yeke adisciple ti mbi biani, na fade i hinga taa tene, na fade taa tene azi i.”
Awato ti lo atene: “E yeke hale ti Abraham, na e sala ngbaa na mbeni zo la oko pepee. A yeke tongana nyen si mo tene: ‘Fade taa tene azi i’?”
Kamême so na ambeni ngoi aJuif aduti na gbe ti komandema ti awande, ala yeda pepee na ngangu ti komande ti awalombe tongaso. Ala ke teti adi iri ti ala ngbaa. Me Jésus afa na ala so ala yeke biani angbaa. Na lege wa? Jésus atene: “Mbi tene na i biani, zo so asala siokpari lo yeke ngbaa ti siokpari.”
Tongana ala ke ti yeda so ala yeke ngbaa ti siokpari, aJuif ayoro tele ti ala na sioni ye. Jésus afa nda ti tene so na ala, lo tene: “Ngbaa ni aduti na da lakue pepee, me molenge ni aduti na da lakue.” Biani, ngbaa alingbi pepee ti kamata ye ti héritier na ngangu, teti na mbeni ngoi alingbi ti tomba lo na da ni. A yeke gi molenge ni so adu lo na da ni wala lo so abata lo si alingbi ti “ngba lakue” wala na ngoi ti fini ti lo kue.
Jésus akiri atene: “Tongaso, tongana Molenge ni azi i, ka i yeke taa na liberté.” Tongaso, taa tene so azi azo ayeke taa tene na ndo ti Molenge ni, Jésus Christ. Sadaka ti fini ti lo ti nzoni-kue, gi ni oko, a lingbi ti zi zo na gbe ti siokpari so ague na kui. Jean 8:12-36.
▪ Jésus afa tene na lango mbasambala ni na ndo wa? Nyen asi na ndo so na bi, nga kamba wa ayeke da na popo ti ye so na tene so Jésus ayeke fa?
▪ Jésus atene nyen na ndo so lo londo da, na tene so afa nyen na ndo lo mveni?
▪ Na lege wa aJuif ayeke angbaa? Me taa tene wa alingbi ti zi ala?