Chapitre 81

A tara ti fa Jésus mbeni

A YEKE ngoi ti de. Tongaso, Jésus atambela na gbe ti veranda ti Salomon. A yeke na tele ti temple. Na ndo so aJuif angoro lo na ala tene na lo: “Mo ye e ku tene ti mo la oke? Tongana mo yeke Christ, mo tene na e biani.”

Jésus akiri tene na ala, lo tene: “Mbi tene na i awe, me i ma mbi pepee.” Jésus atene na ala polele pepee so lo yeke Christ, lege-oko tongana so lo tene na wali ti Samarie ndulu na du ti ngu. Me, lo fa tele ti lo na ala na lege so lo tene na ala so lo londo na nduzu si lo ga na sese, na kozoni si a du Abraham lo yeke.

Jésus aye si azo ahinga ala mveni so lo yeke Christ na lege ti zia kamba na popo ti akusala ti lo na kusala so Mbeti ti Nzapa atene zo so ayeke Christ alingbi ti sala ni. Ndani laa si lo zingo kozoni na adisciple ti lo ti fa na azo pepee so lo yeke Christ. Teti tene so nga lo sala tene na aJuif so ake lo tongaso: “Kusala so mbi sala na iri ti Baba ti mbi, kusala so asala tene ti témoin ti mbi. Me i ma na be pepee.”

A-Juif ama na be pepee ngbanga ti nyen? Ala yeke na afa pepee so afa na gigi so Jésus ayeke Christ? Ala yeke na ni, me Jésus afa nda ti kpengba be ti ala: “I yeke angasangbaga ti mbi pepee. Angasangbaga ti mbi ama yanga ti mbi, na mbi hinga ala, na ala tambela na peko ti mbi. Mbi mu na ala fini ti lakue lakue, na fade ala kui kete pepee, na zo oko alingbi gboto ala na ti ti mbi pepee. Ye so Baba ti mbi amu na mbi ayeke kota ahon ambeni ye kue, na zo oko alingbi gboto ala na ti ti Baba pepee.”

Na pekoni, Jésus afa na ala kamba so atingbi lo na Baba ti lo: “Mbi na Baba, e yeke oko.” Lo ye ti tene pepee so lo so ayeke na ndo ti sese nga Baba ti lo so ayeke na yayu abungbi aga zo oko wala tele oko. Lo ye ti fa so ala use abungbi oko na lege ti bibe oko na kusala oko.

Tene so asala si ngonzo ti aJuif alondo, na ala kiri ala kamata tene ti bolo lo, lege-oko tongana ala sala kozoni, na la ti matanga ti Akpangba. Na lege ti mbito pepee, Jésus akiri tene na azo so aye ti fa lo: “Mbi fa na i nzo kusala mingi ti Baba ti mbi. I ye ti bolo mbi na tene teti kusala nyen?”

A-Juif akiri tene na lo: “E ye ti bolo mo na tene teti nzo kusala pepee, me teti mo zonga Nzapa, na mo so mo yeke zo, mo tene mo mveni mo yeke mbeni nzapa.” Ngbanga ti nyen ala sala tene tongaso? tongana Jésus atene la oko pepee so lo yeke mbeni nzapa?

Peut-être a yeke ngbanga ti so Jésus afa so lo yeke na ambeni ngangu so, na lege ti awato ti lo, a lingbi gi na Nzapa. Mbeni tapande, lo tene fade na lege ti “angasangbaga” ti lo: “Mbi mu na ala fini ti lakue lakue”, ye so mbeni zo ti sese alingbi ti sala la oko pepee. A-Juif aglisa so Jésus afa so lo wara ngangu so na Baba ti lo.

Na lege ti mbeni hundango tene Jésus afa polele so Baba ti lo ayeke kota ahon lo. Lo hunda tene so: “Ndia ti i atene pepee [na Psaume 82:6]: ‘Mbi tene: “I yeke anzapa” ’? Tongana lo di iri ti ala ‘anzapa’, azo so tene ti Nzapa aga na li ti ala giriri, (...) i sala tene ti lo so Baba abata nde teti lo mveni, na lo to lo na sese so, i tene: ‘Mo zonga Nzapa’? teti mbi tene: Mbi yeke Molenge ti Nzapa?”

Tongana Mbeti ti Nzapa ahiri awafango ngbanga so ayeke na sese na so ala yeke mbilimbili kue pepee “anzapa”, ka tene ti sioni wa aJuif alingbi ti diko na ndo Jésus, so atene lo yeke gi “Molenge ti Nzapa”? Jésus akiri atene: “Tongana mbi sala kusala ti Baba ti mbi pepee, i ma mbi pepee. Me, tongana mbi sala kusala so, kamême i ma mbi pepee, i ma tene ti kusala ni si i lingbi hinga na ya be ti i biani, Baba ayeke na ya mbi, na mbi yeke na ya Baba.”

Tongana ala ma tene so, aJuif atara ti gbu lo, me lo kpe, lege-oko tongana lo sala kozoni na la ti matanga ti Akpangba. Lo zia Jérusalem na lo gue na mbengu ti Jourdain, na ndo so Jean atonda ti batisé azo a sala fadeso ndulu na ngu osio awe. Ndo so ayeke peut-être ndulu na yanga ti ngu ti Galilée ti mbage ti mbongo, ti londo na Jérusalem ti si ka zo ayeke tambela la use na lege.

Azo mingi ague na lo na ndo so, na ala tene: “Jean asala fa oko pepee, me ye kue so lo tene tene ti zo so ayeke taa tene.” Na azo mingi ama na be na lo. Jean 10:22-42; 4:26; 8:23, 58; Matthieu 16:20.

▪ Na lege wa Jésus aye si azo ahinga lo tongana Christ?

▪ Na lege ti nyen Jésus na Baba ti lo ayeke oko?

▪ Ngbanga ti nyen aJuif atene so Jésus asala lo mveni Nzapa?

▪ Na lege ti dikongo mbeni Psaume, tongana nyen Jésus afa so lo tene pepee so lo lingbi na Nzapa?