Ye ti Manda 9

A Lingbi Awakua ti Nzapa Aduti na Sioni Oko Pepe

Ngbanga ti nyen a lingbi e duti na sioni oko pepe na yâ aye kue? (1)

A ye ti tene nyen ti duti na sioni oko pepe na lege ti yingo? (2) ti salango ye? (3) ti bibe? (4) ti mitele? (5)

Amara ti salango tene wa so ayeke sioni a lingbi e kpe ni? (6)

1. Jéhovah Nzapa ayeke nzoni-kue nga na sioni oko pepe. Lo ku ti tene awavorongo lo angbâ ti duti na sioni oko pepe​—na lege ti yingo, ti salango ye, ti bibe, na ti mitele. (1 Pierre 1:16) A hunda biani ti sala ngangu mingi ti ngbâ ti duti na sioni oko pepe na lê ti Nzapa. E yeke na yâ ti mbeni sese so aduti na sioni. A lingbi e tiri nga na nzala ti e mveni ti sala sioni. Me a lingbi e zia pepe.

2. Dutingo na Sioni Oko Pepe na Lege ti Yingo: Tongana e ye ti voro Jéhovah, a lingbi e bata pepe ambeni fango ye nga na angobo ti salango ye ti lege ti vorongo ti wataka. A lingbi e sigigi na yâ lege ti vorongo ti wataka na e mu maboko na lo na yâ ye oko pepe. (2 aCorinthien 6:14-18; Apocalypse 18:4) Gi so e manda tâ tene na ndo Nzapa awe, a lingbi e bata nzoni si azo so afa tene ti wataka ahanda e pepe.​—2 Jean 10, 11.

3. Dutingo na Sioni Oko Pepe na Lege ti Salango Ye: Jéhovah aye si awavorongo lo atambela tongana atâ Chrétien na ngoi kue. (1 Pierre 2:12) Lo ba ye kue so e sala, atä na lingo. (aHébreu 4:13) A lingbi e kpe ye ti pitan na ambeni salango ye so ayeke sioni ti sese so.​—1 aCorinthien 6:9-11.

4. Dutingo na Sioni Oko Pepe na Lege ti Bibe: Tongana e sala si li ti e asi na abibe so ayeke mbilimbili nga na sioni oko pepe, fade tambela ti e nga ayeke na sioni oko pepe. (aPhilippien 4:8) Me tongana e bi bê ti e lakue na ndo aye so ayeke na sioni, fade akusala ti sioni ayeke ga na pekoni. (Matthieu 15:18-20) A lingbi e kpe amara ti salango ngia so alingbi ti sala si bibe ti e aga sioni. E lingbi ti sala si yâ ti li ti e asi na abibe so ayeke na sioni oko pepe na lege ti mandango Tene ti Nzapa.

5. Dutingo na Sioni Oko Pepe na Lege ti Mitele: Teti so ala yeke awatokua ti Nzapa, a lingbi aChrétien abata tele nga abongo ti ala na saleté pepe. A lingbi e sukula maboko ti e tongana e londo na kabiné, na a lingbi e sukula ala kozoni si e te kobe wala e ndu kobe. Tongana mo yeke na mbeni nzoni kabiné pepe, a lingbi mo lu azende ti mo na dû. (Deutéronome 23:12, 13) Ti bata tele na sioni oko pepe aga na nzoni seni. A lingbi da ti mbeni Chrétien aduti na lege ni nga na saleté pepe na yâ ni nga na gigi. A lingbi da ni aduti polele tongana mbeni nzoni tapande na lê ti azo kue.

6. Salango Tene so Ayeke na Sioni Oko Pepe: A lingbi awakua ti Nzapa atene tâ tene lakue. Fade awamvene alï na yâ Royaume ti Nzapa pepe. (aEphésien 4:25: Apocalypse 21:8) A-Chrétien ayeke na sioni yanga pepe. Ala mä wala ala tene pepe atene ti ngia so ayeke sioni wala afango peko ti atene so ayeke sioni. Ndali ti salango tene ti ala so ayeke na sioni oko pepe, ala duti nde na ndo ti kusala wala na da-mbeti nga na vaka ti ala.​—aEphésien 4:29, 31; 5:3.

[Afoto na alembeti 18, 19]

A lingbi awakua ti Nzapa aduti na sioni oko pepe na yâ aye kue