Sala kusala na bible ti kiri na tënë

TONGANA azo ahunda na e tënë na ndo atënë ti mabe ti e, gigi ti e, abango ndo ti e na ndo aye so ayeke si, beku ti e teti kekereke, e yeke sala ngangu ti sala kusala na Bible ti kiri na atënë ni. Ngbanga ti nyen? Ngbanga ti so a yeke Tënë ti Nzapa. Atënë ti mabe ti e alondo na yâ ti Bible. E yeke duti na fini alingbi na ye so ayeke na yâ ti Bible. E yeke zia lege na ni ti leke bango ndo ti e na ndo aye so ayeke si na sese. Gere ti beku ti e teti kekereke aluti ngangu na yâ azendo ti Bible so a sû na gbe ti yingo.​—2 Tim. 3:16, 17.

E hinga nzoni mingi kungba so yongo iri ti e azia na ndogo ti e. E yeke aTémoin ti Jéhovah (Es. 43:12). Tongaso e yeke kiri tënë pëpe na lutingo na ndo senda-ndara ti azo, me na ndo ye so Jéhovah afa na yâ Tënë ti lo so a sû na gbe ti yingo. Tâ tënë, teti so e yeke azo, e yeke na abango ndo ti e na ndo ambeni tënë, me e yeke zia lege na Tënë ti Nzapa ti sala ngangu na ndo ni ngbanga ti so e hinga na bê kue so a yeke tâ tënë. Biani, Bible azia na e lege ti fa aye ti bê ti e na ndo atënë mingi. Ahon ti tene e hunda na azo ti ye aye so e ye, nzara ti bê ti e ayeke ti fa akpengba-ndia so ayeke na yâ Mbeti ti Nzapa. Tongaso, a yeke mû lege na azo so amä e ti sala kusala na oko liberté ti sorongo ye so e yeke na ni. Legeoko tongana bazengele Paul, e yeke gi ti sala si azo ‘amä na bê si ala mä yanga’.​—aRom. 16:26, Fini Mbuki, 2001.

Na Apocalypse 3:14, a fa Jésus tongana “tâ Témoin ti biani”. Lo yeke kiri tënë lani tongana nyen na lo yeke sala ye tongana nyen na yâ ti ambeni ye so atï gi tongaso na gbele lo? Na ambeni ngoi, lo yeke sala kusala na atapande so ayeke pusu azo ti gbu li ti ala. Na ambeni ngoi nde, lo yeke hunda na zo so ahunda tënë ni tongana nyen lo gbu nda ti mbeni versê. Fani mingi, lo yeke fa peko ti atënë ti aversê, lo yeke fa angbongboro tënë ti yâ ni wala lo yeke sala tënë ni (Mat. 4:3-10; 12:1-8; Luc 10:25-28; 17:32). Na ngoi so Jésus ayeke lani na sese, mingi ni a yeke bata ambeti ti Nzapa na yâ ti asynagogue. Ye oko afa pëpe so Jésus abungbi ambeti so teti lo mveni, me lo hinga Mbeti ti Nzapa nzoni mingi na lo yeke sala tënë ni fani mingi na ngoi so lo yeke fa ye na azo (Luc 24:27, 44-47). Lo lingbi tâ na lege ni ti tene so ye so lo yeke fa alondo na lo mveni pëpe. Lo tene gi ye so lo mä na mbage ti Babâ ti lo.​—Jean 8:26.

Ye so e ye ayeke ti mû peko ti tapande ti Jésus. E mveni e mä Nzapa tâ na mê ti e pëpe tongana ti so Jésus amä. Me Bible ayeke Tënë ti Nzapa. Tongana e mû ni ti kiri na atënë, e yeke kpe ti gboto lê na ndo e mveni. E yeke fa so ahon ti fa atënë ti bê ti mbeni zo so ayeke mbilimbili-kue pëpe, e leke tâ na bê ti e ti zia Nzapa si afa ye so ayeke tâ tënë.​—Jean 7:18; aRom. 3:4.

Biani, ye so e ye ayeke pëpe gi ti sala kusala na Bible, me ti sala tongaso na mbeni lege so ayeke ga na ye ti nzoni mingi na zo so ayeke mä e. E ye si lo zi bê ti lo ti mä e. A lingbi na bango ndo ti zo ni, mo lingbi ti fa ambeni tënë ti Bible na tenengo: “Ti mo, mo yeke yeda so ye so Nzapa atene si ayeke biani kota ye?” Wala mo lingbi ti tene: “Mo hinga so Bible asala tënë na ndo ti ye so?” Tongana mo yeke sala tënë na mbeni zo so abâ ti lo Bible na nene ni pëpe, a lingbi peut-être mo to nda ti tënë ni nde kete. Mo lingbi ti tene: “Zia mbi fa na mo ngbele prophétie so” wala: “Buku so a kangbi ni ahon atanga ni kue na yâ ti mbaï atene ye so . . . ”

Na yâ ti ambeni ye, mo lingbi ti soro ti fa gi angbongboro tënë ti mbeni versê. Ye oko, na ndo so a lingbi ti sala ni, a yeke nzoni mingi ti zi gi Bible na ti diko ye so lo tene. Na ngoi kue so a lingbi ti sala tongaso, fa versê ni na zo ni na yâ ti Bible ti lo mveni. Mingi ni, salango kusala tâ gi na Bible tongaso ayeke sala ngangu mingi na ndo azo.​—aHéb. 4:12.

A-ancien ayeke mbilimbili na kungba ti sala kusala na Bible ti kiri na tënë. Mbeni oko ti aye so amû lege na zo ti sala kusala tongana ancien ayeke so ita ni ayeke “gbu tâ tënë [tongana a ndu tënë ti kode ti lo ti fango ye, NW ]”. (Tite 1:9). Mbeni zo ti kongregation alingbi ti mû mbeni kota desizion na yâ fini ti lo na pekoni so mbeni ancien amû na lo wango. So tâ kota ye ti tene wango so aluti ngangu na ndo Mbeti ti Nzapa! Tapande ti mbeni ancien na yâ salango ye so alingbi ti sala ngangu na ndo ambeni zo nde na yâ lege so ala yeke fa na ye.