Wa azo ni na mû na ala ngangu

ATÂA kpale wa ala yeke wara, a lingbi awakua ti Nzapa awara ngangu na yâ kongregation ti aChrétien. Ti tene a duti tongaso, a lingbi a-ancien mbilimbili asala kue si adiskur na awango ti ala amû ngangu na zo. A lingbi a-ancien aduti “tongana ndo ti honde tele ngbanga ti kota pupu, . . . ndo ti bata tele ngbanga ti pupu ti ngangu. Ala yeke tongana angu so asua na ndo kuru sese, ala yeke tongana gbede ti kota tênë na yâ sese so zo anze dä.”​—Es. 32:2.

Tongana mo yeke mbeni ancien, adiskur ti mo ayeke dë bê ti zo na ayeke lungula vundu na bê ti lo? A yeke mû ngangu na azo so ayeke sala kue ti sala na Jéhovah na dutingo be-ta-zo? A yeke mû ngangu na ala ti ngbâ lakue ti sala ye so bê ti Nzapa aye atâa so azo asala nzara ti ye pëpe wala a kanga lege na ala? Ka tongana ambeni zo ni ayeke na vundu na bê, ala yeke bâ pasi ndali ti akota kpale ti nginza wala ala yeke tiri na mbeni kota kobela so a lingbi ti sava ni laso pëpe? Mo lingbi ti ‘sala si aita ti mo awara ngangu na lege ti yanga ti mo’.​—Job 16:5.

Teti so mo yeke mbeni wamungo diskur, sala kusala na kungba so ti mû maboko na aita ti mo ti wara beku nga na ngangu na mbage ti Jéhovah nga na ti aye so lo leke awe.​—aRom. 15:13; aEph. 6:10.

Dabe ti azo na ye so Jéhovah asala awe. Mbeni kota lege ti mû ngangu na zo ayeke ti fa tongana nyen Jéhovah amû maboko giriri na azo ti lo na yâ ti kpale.​—aRom. 15:4.

Jéhovah atene na Moïse ti “wa” Josué na ti “mû ngangu” na lo kozoni si Israël alï na Sese ti Zendo so na ngoi ni kâ ayeke na gbe ti amara so ayeke awato ti Israël. Moïse asala ye so tongana nyen? Na lê ti Josué, Moïse adabe ti mara ni kue na aye so Jéhovah asala lani awe ndali ti ala na ngoi so ala zia Egypte ahon (Deut. 3:28; 7:18). Moïse afa nga peko ti alege so Jéhovah amû na ala ti hon azo ti Amori na ngangu. Na pekoni lo wa Josué, lo tene: “Mo gbu ngangu, na bê ti mo akpengba dä.” (Deut. 31:1-8). Tongana mo yeke gi lege ti wa aita ti mo, mo yeke mû maboko na ala ti wara ngangu na lege ti ye so Jéhovah asala awe ndali ti ala?

Na ambeni ngoi, kpale ti azo amene ala ngangu si ala yeke hunda tele ti ala wala ala yeke wara mbeni lâ adeba nzoni ti Royaume. Dabe ti ala so zo alingbi ti zia bê ti lo kue na azendo ti Jéhovah.​—Jos. 23:14.

Na yâ ti ambeni kodoro, aita ayeke na gbele kpale ndali ti ambela ti ngorogbia so akanga lege na fango nzo tënë. Na yâ ti mara ti aye tongaso, a-ancien so ayeke na ndoye alingbi ti mû maboko na amba ti ala ti wara ngangu na lege ti ye so asi na abazengele ti Jésus Christ (Kus. 4:1–5:42). Nga gbotongo lê na ndo lege so Nzapa aleke na aye, tongana ti so a fa pekoni na yâ buku ti Esther, ayeke pusu biani aita ti gbu ngangu.

Na ambeni ngoi, azo ayeke gue na abungbi ti kongregation, me ala yeke gue na li ni pëpe. Ala lingbi peut-être ti bâ so Nzapa alingbi lâ oko pëpe ti pardone ala ndali ti so kozo salango ye ti ala ayeke sioni mingi. Peut-être mo lingbi ti fa tongana nyen Jéhovah asala ye lani na Gbia Manassé (2 Chron. 33:1-16). Wala mo lingbi ti sala tënë ti azo ti gbata ti Corinthe ti giriri so agbian salango ye ti ala, ala ga aChrétien na Nzapa adiko ala mbilimbili.​—1 aCor. 6:9-11.

Ambeni zo ayeke dä so abâ so akpale so ala yeke na ni afa so Nzapa ayeda na ala mbeni pëpe? Mo lingbi peut-être ti dabe ti ala na ye so asi na Job nga tongana nyen lo wara deba nzoni mingi ndali ti so lo ngbâ be-ta-zo na Jéhovah (Job 1:1-22; 10:1; 42:12, 13; Ps. 34:20). Azo ti dengo bê ti wataka so aga na Job atene na lege ni pëpe so Job asala gi mbeni siokpari (Job 4:7, 8; 8:5, 6). Nde na ala, na ngoi so Paul na Barnabas ayeke kpengba adisciple nga ala yeke “wa ala ti duti na mabe lakue,” ala tene: “A lingbi e lï na yâ royaume ti Nzapa na lege ti ye ti vundu mingi.” (Kus. 14:21, 22). Legeoko nga laso, mo lingbi ti kpengba azo so ayeke na gbele akpale na lege so mo fa na ala so a hunda na aChrétien kue ti gbu ngangu na gbele tara, nga so ye so ayeke na ngele ngangu na lê ti Nzapa.​—aProv. 27:11; Mat. 24:13; aRom. 5:3, 4; 2 Tim. 3:12.

Wa azo so ayeke mä mo ti gbu li na ndo alege so Jéhovah asala awe si azendo ti lo aga tâ tënë na yâ fini ti ala. Ndali ti so mo sala kusala na atënë ti dabe ti azo ni, ala lingbi peut-être ti bâ tongana nyen Jéhovah asala ye awe na mbage ti ala mveni, gi tongana ti so lo mû zendo ni. E diko na Psaume 32:8: “Fade Mbi wa mo, na Mbi fa na mo lege so a lingbi mo tambela dä; fade Mbi wa mo, na lê ti Mbi angbâ na ndo mo.” Tongana mo mû maboko na azo so ayeke mä mo ti dabe ti ala na ndo tongana nyen Jéhovah afa lege na ala wala amû ngangu na ala, ye so ayeke mû ande lege na ala ti bâ ala mveni so Jéhovah ayeke bata ala. Ala yeke bâ nga ala mveni so lo yeke mû ande biani maboko na ala na yâ atara kue so ala yeke na ni fadeso.​—Es. 41:10, 13; 1 Pi. 5:7.

Fa na gigi ngia na yâ aye so Nzapa ayeke sala fadeso. Na ngoi so mo yeke gi lege ti mû ngangu na aita ti mo, gboto lê na ndo aye so Jéhovah ayeke sala fadeso. Tongana mo sala tënë na ndo aye so na mbeni lege so afa so ala mû ngia na mo, ye so ayeke zingo ande mara ti ngia tongaso na yâ bê ti azo so ayeke mä mo.

Bâ tongana nyen Jéhovah amû maboko na e ti luti na gbele ngangu so gigi ayeke sala na ndo ti e. Lo fa na e tâ nzoni lege ti duti na fini (Es. 30:21). Lo fa ngbanga ti nyen azo akpe ndia pëpe, ngbanga ti nyen ye ti kirikiri, nzinga, kobela nga na kui ayeke dä; nga lo tene na e tongana nyen lo yeke lungula ande aye so kue. Lo zia e na yâ bungbi ti aita so ayeke na ndoye. Lo mû na e kpengba matabisi ti sambela lo nga ti duti aTémoin ti lo. Lo zi lê ti e ti bâ so a zia Christ awe na ndo mbata ti gbia na yayu, nga so lâ ti nda ni ti aye ti fadeso ayeke gue hio ti hunzi.​—Apoc. 12:1-12.

Na ndo ti apendere ye so, e yeke na abungbi ti e ti kongregation nga na akota bungbi. Tongana mo sala tënë ti aye so a leke na mbeni lege so afa so mo kiri singila biani ndali ni, mo yeke sala si amba ti mo akiri aleke na bê ti ala ti bâ tongana senge ye pëpe bungbingo na aita ti ala.​—aHéb. 10:23-25.

Atondo so afa polele so Jéhovah ahiri deba nzoni na ndo ngangu so e sala na fango tënë ayeke nga mbeni lingu ti mungo ngangu. Na ngoi ti akozo Chrétien, tongana Paul na Barnabas ayeke na lege ti gue na Jérusalem, ala “mû ngia mingi na aita kue” na fango anzene nzene tënë na ndo tënë ti amara so agbian lege ti ala (Kus. 15:3). Mo nga mo lingbi ti mû ngia na aita ti mo na fango na ala ambeni ye so asi, so akpengba zo.

Tongana a mû maboko na azo oko oko ti bâ nene ti ye so ala yeke sala, ye so ayeke kiri ti mû ngangu na ala. Gonda ala ndali ti so ala mû mbage ti ala na kusala ti Chrétien. Gonda azo so dutingo mbakoro nga kobela akanga lege na kusala ti ala ngangu mingi, me so ayeke ngbâ lakue ti gbu ngangu. Dabe ti ala so Jéhovah ayeke girisa pëpe ndoye so ala fa ndali ti iri ti lo (aHéb. 6:10). Mabe so tara afa so a kpengba ayeke mbeni ye ti ngele ngangu mingi so zo ayeke na ni (1 Pi. 1:6, 7). A lingbi e dabe ti aita ti e na ye so.

Sala tënë na wâ na ndo beku so ayeke na gbele e. Azendo ti aye so ayeke ga, so a sala ni na gbe ti yingo, ayeke mbeni kota lingu ti mungo ngangu na azo kue so andoye Nzapa. Peut-être mingi ti azo so ayeke mä mo amä atënë so fani mingi awe. Me na lege ti singila so mo fa tongana mo yeke sala tënë na ndo azendo so, mo lingbi ti sala si azendo so aduti tâ ye na lê ti azo. Mo lingbi ti sala nga si azo ni azia bê ti ala na gango tâ tënë ti azendo ni nga ti sala si bê ti ala asi singo na singila. Salango ye alingbi na ye so mo manda na Ekole ti Kusala ti aChrétien alingbi ti mû maboko na mo ti sala ye so.

Jéhovah mveni ayeke kozo Zo so ayeke mû ngangu na azo ti lo. Ye oko, mo lingbi ti sala kusala maboko na maboko na lo na yâ mungo ngangu so. Na ngoi so mo yeke sala tënë na kongregation, sala kusala nzoni na lege so mo yeke na ni ti sala tongaso.