Wango so apusu zo biani ti sala ye

A LINGBI a-ancien ahinga ti “wa azo na nzo tënë”. (Tite 1:9). Na ambeni ngoi, a lingbi a sala ye so na gbele aye so ayeke ngangu mingi. A yeke kota ye ti mû wango alingbi na ye so Mbeti ti Nzapa afa. Ni la, a lingbi a-ancien abata wango so: “Mo zia bê ti mo na tënë ti . . . wa [azo].” (1 Tim. 4:13). Tënë so e yeke fa ge andu kozoni kue a-ancien wala ala so ayeke sala ngangu ti wara matabisi so. Me ambeni ngoi ayeke dä so a lingbi ababâ na mama awa amolenge ti ala wala a lingbi awafango tënë amû wango na azo so ala yeke manda Bible na ala. Na yâ ti mara ti aye tongaso, a-oko fango lege so ayeke lingbi ande.

Aye so ahunda ti wa zo dä. Ti hinga na ngoi wa a lingbi a mû wango, a yeke nzoni ti gi nda ti aye so a sala tënë ni na yâ ti Bible, so na yâ ni a mû wango. Bazengele Pierre awa a-ancien ti zia lê ti ala kue na ndo kungba ti ala ti aberger ti kundu ti Nzapa (1 Pi. 5:1, 2). Paul awa Tite ti mû wango na amaseka-koli ti “bi bê ti ala na lege ni.” (Tite 2:6). Paul awa amba ti lo Chrétien ti sala si “tënë ti yanga ti [ala] kue aga oko,” na ti kpe yongoro na azo so ayeke gi lani ti zia kangbi na popo ti aita (1 aCor. 1:10; aRom. 16:17; aPhil. 4:2). Atâa so Paul agonda azo ti kongregation ti Thessalonique ndali ti aye ti nzoni so ala yeke sala lani, lo wa ala ti bata ahon ti kozo wango so ala wara (1 aThes. 4:1, 10). Pierre ahunda na amba ti lo Chrétien ti “ke nzara ti mitele”. (1 Pi. 2:11). Jude awa aita ti lo ti “tiri bira ti bata mabe” ndali ti ngangu so azo so ake Nzapa, so abi tele ti ala na yâ salango sioni, ayeke sala na ndo azo (Jude 3, 4). A wa aChrétien kue ti mû wango na mba si ngangu ti handa ti siokpari asala pëpe si bê ti ala akpengba (aHéb. 3:13). Pierre amû wango so na aJuif so ade lani ti mä na bê na Christ pëpe, lo tene: “I zia Nzapa asö i na popo ti awagame ti kirikiri so.”​—Kus. 2:40.

A hunda asalango ye wa ti mû wango na yâ mara ti aye tongaso? Zo so ayeke mû wango alingbi ti sala tongana nyen si wango ti lo ni aduti mbeni ye so a lingbi a sala ni hio, sân ti sala ye na ngangu?

Ndali ti “tënë ti ndoye”. Tongana e mû wango ti e pëpe ndali ti “tënë ti ndoye,” zo alingbi peut-être ti bâ ni tongana ye so ayeke ngangu mingi (Phm. 9). Tâ tënë, tongana a hunda ti sala ye fade fade, a lingbi salango tënë ti wamungo diskur ni afa ye so na gigi. Azo alingbi ti bâ salango tënë na ngangu pëpe tongana kamene. Na oko ngoi ni, a lingbi a mû wango ni na bê kue nga na anene tënë ti bê. Wango so a mû na ndoye ayeke pusu ande mingi azo ni ti sala ye. Na ngoi so Paul asala tënë teti lo mveni nga teti amba ti lo, lo tene na azo ti Thessalonique: “I hinga e sala na i oko oko kue legeoko tongana babâ asala na amolenge ti lo mveni, e wa i.” (1 aThes. 2:11, 12). Asurveillant so amû wango na aita ti ala na ndoye. Zia si atënë ti mo aluti na ndo tâ bingo bê na azo so ayeke mä mo.

Sala tënë na ndara. Sala pëpe si azo so mo yeke sala ngangu ti wa ala ti sala ye aduti na mo na tënë. Na oko ngoi ni, gbanzi tele ti mo pëpe ti tene na azo so ayeke mä mo “wango-tene kue ti Nzapa.” (Kus. 20:27). Azo so abâ ye na nene ni ayeke sala ngonzo pëpe wala ala yeke ke mo pëpe ndali ti so mo wa ala na nzobe ti sala ye so ayeke na lege ni.​—Ps. 141:5.

Mingi ni, a yeke nzoni ti to nda ti wango na mbeni mbilimbili tënë ti gonda so alondo na bê. Gbu li na ndo aye ti nzoni so aita ti mo ayeke sala, aye so alingbi gi ti nzere na Jéhovah. A yeke aye tongana mabe so ala fa na yâ kusala ti ala, ndoye so apusu ala ti sala ngangu ti ala kue nga gbungo ngangu ti ala na lê ti atara (1 aThes. 1:2-8; 2 aThes. 1:3-5). Ye so ayeke mû ande maboko na aita ti mo ti bâ so a ne ala na a hinga ye so ayeke si na ala; a yeke sala ande nga si ala yeke duti ndulu ti yeda na wango so ayeke ga na peko.

“Na lege ti be-nze-pepe.” A lingbi a mû wango “na lege ti be-nze-pepe”. (2 Tim. 4:2). Ye so andu nyen? Be-nze-pepe andu gbungo ngangu na kangango bê na gbele ye ti sioni wala gingo yanga. Zo so ayeke na be-nze-pepe aduti lakue na beku so azo so ayeke mä lo ayeke sala ande ye alingbi na ye so lo tene. Ti mû wango na bibe tongaso ayeke kanga ande lege na azo so ayeke mä mo ti hinga so mo bâ ti mo ye ti sioni mingi na ndo ala. Teti mo hinga na bê kue so aita ti mo aye ti sala na Jéhovah na ngangu ti ala kue, ye so ayeke mû ngangu na nzara ti ala ti sala ye so ayeke mbilimbili.​—aHéb. 6:9.

“Na lege ti fango ye so ayeke nzoni.” Tongana nyen mbeni ancien alingbi ti “mû wango na azo na lege ti fango ye so ayeke nzoni”? Na lege ti so “lo gbu tâ tënë ngangu, tongana a ndu tënë ti kode ti lo ti fango ye”. (Tite 1:9, NW ). Ahon ti tene mo fa tënë ti bê ti mo mveni, zia si Tënë ti Nzapa amû ngangu na tënë ti mo. Zia si Bible afa lege na mo ti bâ ye wa a lingbi mo tene. Fa wungo ti aye ti nzoni so zo ayeke wara na salango ye alingbi na ye so Bible atene na ndo tënë ni. Zia si aye so ayeke ga, laso nga ande, na peko ti salango ye pëpe alingbi na Tënë ti Nzapa aduti polele na yâ ti li ti mo, na sala kusala na ni ti ga na azo so ayeke mä mo ti yeda na nene ti gbian aye so a hunda.

Bâ si mo fa polele na azo so ayeke mä mo ye so a lingbi ala sala, na tongana nyen a lingbi ala sala ni. Sala si azo abâ polele so fango nda ti tënë ti mo aluti ngangu na ndo Mbeti ti Nzapa. Tongana Mbeti ti Nzapa azi lege na zo ti mû desizion kue ti bê ti lo, fa ndo so lo lingbi ti si dä. Na pekoni, na yâ ti andangba tënë ti mo, mû ndangba wango so ayeke kiri ti mû ngangu na azo so ayeke mä mo ti leke na bê ti ala ti sala ye.

“Na mbito pëpe.” Ti wa azo nzoni, a lingbi zo asala tënë “na mbito pëpe tënë ti mabe”. (1 Tim. 3:13). Ye wa ayeke mû lege na mbeni zo ti sala tënë na mbito pëpe? Tongana “tapande ti nzo kusala” ti lo ague oko na ye so lo yeke wa aita ti lo ti sala (Tite 2:6, 7; 1 Pi. 5:3). Tongana a yeke tongaso, azo so ayeke wara wango ni ti sala ye ayeke bâ ande so zo so ayeke mû na ala wango ni ayeke ku pëpe na mbage ti ala ti sala ye so lo mveni lo sala pëpe. Ala yeke bâ ande so ala lingbi ti mû tapande ti mabe ti lo na ngoi so lo yeke sala ngangu ti mû tapande ti Christ.​—1 aCor. 11:1; aPhil. 3:17.

Wango so aluti na ndo ti Tënë ti Nzapa na so a mû ni na ndoye alingbi ti sala ye ti nzoni mingi. A lingbi azo so awara kungba ti mû mara ti awango tongaso asala kue ti sala ni nzoni.​—aRom. 12:8.