Tongana e kui, ye nyen ayeke si?

TONGANA ti so mo hinga peut-être nzoni, azo laso ayeke ga mbakoro, ala tï kobela na ala kui. Même ambeni molenge ayeke kui nga. A lingbi mo sala mbito ti kuâ wala ti mbeni zo so akui awe?— Tongana e kui, mo hinga ye so ayeke si?—

Zo oko pëpe laso, so akui awe, akiri na fini ti tene na e ye so ayeke si na peko ti kuâ. Me tongana Jésus, Kota Wafango ye, ayeke lani na ndo ti sese, mbeni zo tongaso ayeke dä. Na dikongo ye na ndo ti lo, e lingbi ti hinga ye so ayeke si na azo so akui awe. Koli so ayeke lani mbeni kamarade ti Jésus. Lo yeke na Béthanie, mbeni kete kodoro ndulu na Jérusalem. Iri ti lo ayeke Lazare, na lo yeke na aita ti wali use, Marthe na Marie. Zia e mä tënë so Bible atene na ndo ni.

Mbeni lâ, kota kobela asala Lazare. Me na ngoi ni so, Jésus ayeke ti lo na mbeni kodoro yongoro. Tongaso, Marthe na Marie atokua zo na peko ti lo ti tene na lo so tele ti ita ti ala Lazare aso. Ala sala ye so ngbanga ti so ala hinga atene Jésus alingbi ti ga ti zi kobela ti ita ti ala ni. Jésus ayeke mbeni docteur pëpe, me lo yeke na ngangu so alondo na Nzapa ti zi mara ti akobela nde nde na tele ti azo.​—Matthieu 15:30, 31.

Ye oko, kozoni si Jésus ague abâ Lazare, tele ti Lazare aso ngangu si lo kui. Me Jésus atene na adisciple ti lo so Lazare ayeke lango, na Lo yeke gue ti zingo lo na lango ni. Adisciple ni amä yâ ti tënë ti Jésus ni pëpe. Ni la, Jésus atene polele: “Lazare akui awe.” Tënë so afa nyen na ndo kuâ?— So kuâ ayeke tongana mbeni kota lango, mbeni lango so zo ayeke bâ même li ti lo dä pëpe.

Jésus ague fadeso na tele ti Marthe na Marie. Gbâ ti akamarade ti ala asi kâ kozoni awe. Ala ga ti zi vundu ti Marthe na Marie ngbanga ti kuâ ti ita ti ala ni. Tongana Marthe amä atene Jésus ayeke ga, lo gue ti tingbi na lo. A ninga pëpe, Marie nga kue asigigi ti tingbi Jésus. Mawa ahon ndo ti lo, lo yeke toto. Lo gue lo tï na gere ti Jésus. Ambeni zo ni so amû peko ti Marie ayeke toto nga.

Kota Wafango ye ahunda ndo so a zia Lazare dä. Azo ni ague na Jésus na mbeni dû ti tênë, ndo so ala lu Lazare dä. Na bango azo kue na totongo ni, Jésus nga kue atoto. Lo hinga tongana nyen a yeke tâ ngangu mingi ti girisa na yâ kuâ mbeni zo so e ye tënë ti lo.

Teti so a kanga dû ni na mbeni kota tênë, Jésus atene: ‘I zi tênë ni.’ A yeke nzoni ala zi ni?— Ti Marthe, a yeke nzoni pëpe. Lo tene: ‘Seigneur, kuâ ti lo ni akomanse ti fun awe, teti lo sala lango osio awe.’

Me Jésus atene na lo: “Mbi tene na mo kozoni pëpe? tongana mo mä na bê, fade mo bâ gloire ti Nzapa.” Jésus aye ti tene so Marthe ayeke bâ ande mbeni ye so ayeke mû gloire na Nzapa. Jésus aye ti sala nyen la? Tongana a zi tênë ni awe, Jésus asambela Jéhovah na kota go. Na pekoni, lo tene na kongo: “Lazare, sigigi!” Fade lo yeke sigigi? Lo lingbi ti sigigi la?—

Mo lingbi ti zingo mbeni zo so alango?— Mo lingbi, tongana mo dekongo na kota go, lo yeke zingo na lango. Me mbeni zo so alango na yâ kuâ, mo lingbi ti zingo lo?— Oko pëpe. Atâa mo dekongo ni tongana nyen, kuâ ni ayeke mä ti lo mo pëpe. Mbi na mo na azo kue so ayeke na ndo ti sese laso alingbi ti zingo mbeni kuâ pëpe.

Me Jésus ayeke tongana tanga ti azo pëpe. Ngangu ti lo so ayeke nde alondo na Nzapa. Ni la si tongana lo hiri Lazare, mbeni ye ti dongo bê asi. Koli so akui lango osio awe so asigigi na yâ dû ti tênë ni! Lo kiri na fini! Lo lingbi ti hu pupu, ti tambela na ti kiri ti sala tënë! Biani, Jésus azingo Lazare na popo ti akuâ.​—Jean 11:1-44.

Fadeso, gbu li ti mo kete: Tongana Lazare akui, ye nyen asi na lo? Mbeni ye na yâ tele ti lo, tongana âme wala yingo, asigigi na ague na mbeni ndo nde? Âme ti Lazare ague na yayu? Lo gue lo duti na tele ti Nzapa na a-ange na yayu kâ teti lango osio?—

Oko pëpe. Dabe ti mo so Jésus atene kozoni so Lazare ayeke lango langongo. Tongana mo lango, nyen la ayeke si na mo? Tongana mo lango ngangu, mo yeke hinga ye so asi na tele ti mo?— Na tongana mo zingo na lango, gi bango lê ti montre si alingbi ti fa na mo so mo lango teti l’heure tongaso.

A yeke oko tongaso na akuâ. Ala hinga ye oko pëpe, na ala lingbi ti sala ye oko pëpe. A yeke ye so asi lani na Lazare la. Kuâ ayeke tongana mbeni kota lango so zo ayeke dabe ti lo na ye oko pëpe. Bible atene: ‘Akuâ ahinga ye oko pëpe.’​—Zo-ti-fa-tene 9:5, 10.

Gbu nga li ti mo na ndo ye so: Tongana Lazare asala lani lango osio na yayu kâ, fade lo yeke tene mbeni tënë na ndo ni ape?— Na tongana lo yeke lani na yayu, ka Jésus alingbi ti zi lo na pendere ndo so ti kiri na lo na sese ge?— Oko pëpe!

Me azo mingi atene so e yeke na mbeni âme, na so na peko ti kuâ, âme ni angbâ lakue na fini. Ala tene so âme ti Lazare ague lani na mbeni ndo. Bible atene ti lo tongaso pëpe. Lo tene ti lo so Nzapa asala si kozo zo Adam aga “âme ti fini.” Adam ayeke lani mbeni âme. Bible atene nga so tongana Adam asala siokpari, lo kui. Lo ga mbeni “kuâ” wala mbeni âme so akui, na lo kiri na pupu sese so a leke lo na ni. Bible atene nga so amolenge ti Adam kue awara siokpari na ayeke kui.​—Genèse 2:7; 3:17-19; Nombre 6:6; aRomain 5:12.

A yeke tâ polele so e yeke na mbeni âme so ayeke sigigi na yâ tele ti e pëpe. E kue e yeke mbeni âme. Teti so azo awara siokpari na lege ti zo oko, Adam, Bible atene: “Âme so asala siokpari, fade a kui.”​—Ezéchiel 18:4.

Ambeni zo ayeke sala mbito ti akuâ. Ndali ti so ala bâ ti ala atene akuâ ayeke na a-âme so asigigi na yâ tele ti ala si asala sioni na azo, ala yeke pusu ndulu na mbeni cimetière pëpe. Me mbeni kuâ alingbi ti sala sioni na zo so ade na fini?— Oko pëpe.

Ambeni zo amä même na bê so toro ti akuâ alingbi ti ga ti bâ azo so ade na fini. Ni la, ala yeke bata kobe nde ndali ti ala. Me azo so asala ye tongaso amä na bê biani pëpe na ye so Nzapa atene na ndo akuâ. Tongana e mä na bê na ye so Nzapa atene, e yeke sala mbito ti akuâ pëpe. Na tongana e mû biani merci na Nzapa ndali ti fini so lo mû na e, e yeke sala aye so anzere na Nzapa.

Me mo yeke hunda peut-être tele ti mo: ‘Nzapa ayeke kiri ande na fini amolenge so akui awe? Lo ye biani ti sala ni?’ Zia e bâ ni na yâ chapitre ti peko.