Jésus afa tënë na Galilée na lo leke abazengele ti lo

A sara ngu use tongaso awe la si Jésus asara kua ti fango tënë mingi so. Eskê fadeso lo yeke hu nga tere ti lo kete na peko ti kua ni so? Ên-ën. Nde na so, lo kono yâ ti kua ti lo ni na lege so lo tambela ti fa tënë “na yâ ti agbata [ti Galilée] nga na akete kodro oko oko kue. Lo fa ye na yâ ti asynagogue ti ala nga lo fa nzoni tënë ti Royaume. Lo sava mara ti akobela nde nde kue.” (Matthieu 9:35). Aye so lo bâ amû lege na lo ti bâ so a yeke nzoni a fa tënë mingi ahon ti kozo. Me, lo yeke sara ande ni tongana nyen?

Tongana lo yeke tambela na yâ ti akodro ni, lo bâ so azo ayeke na bezoin ti tene a sava ala na lege ti yingo nga ti tene a dë bê ti ala. Ala yeke tongana ataba so ayeke na berger ape, ni la yâ ti ala akangbi kirikiri tongaso. Mawa ti azo ni asara lo, na lo tene na adisciple ti lo ni, lo tene: “Ti tâ tënë ni, akobe ti yaka ni ayeke mingi, me azo ti kua ni ayeke mingi ape. Tongaso, ala voro yanga na Wa ti kua ni ti tokua azo ti kua ti fâ akobe ti yaka ti lo.”—Matthieu 9:37, 38.

Jésus ahinga ye so apeut ti aidé ande. Lo iri abazengele ti lo 12, lo kangbi yâ ti ala use use na lo tene na ala: “Ala mû lege ti azo ti amara nde pëpe nga ala lï na yâ ti mbeni gbata ti Samarie pëpe. Me, ala gue gi na mbage ti azo ti Israël so ayeke tongana ataba so agirisa. Na ngoi so ala yeke gue, ala fa tënë, ala tene: ‘Royaume ti yayu aga nduru awe.’”—Matthieu 10:5-7.

Royaume so ala gue ti sara tënë ni na azo ayeke ti so Jésus asara tënë ni na yâ ti sambela so lo sara ni lani. ‘Royaume ni aga nduru awe’ na lege so Jésus Christ, Gbia so Nzapa asoro lo, ayeke na milieu ti ala awe. Me nyen la ayeke fa ande biani so adisciple ti lo ayeke biani alembe ti Royaume ni so? Jésus amû na ala ngangu ti sava azo, nga même ti zingo akuâ. Lo tene na ala ti sara ni senge senge. Me adisciple ni ayeke sara ande tongana nyen ti wara kobe ti ala ti lâ oko oko?

Jésus atene na adisciple ti lo so, na ngoi ti tambela ni so, a lingbi ala mû pëpe ambeni ye na tere ti ala. Lo tene na ala ti mû pëpe lor wala argent wala cuivre, ti zia ni na yâ ti bozo ti ala ti nginza. Lo tene na ala même ti mû pëpe bozo ti kobe ndali ti lege wala ti mû mbeni bongo wala mbeni poro nde na tere ni. Ngbanga ti nyen? Lo dë bê ti ala lo tene: “Zo so asara kua ayeke na droit ti wara kobe.” (Matthieu 10:10). Azo so ala yeke wara ande, na so a yeda na tënë ni, ayeke mû ande na ala aye so ala yeke na bezoin ni senge. Jésus atene: “Ndo kue so ala gue dä si azo ayamba ala na yâ ti da ti ala, ala ngbâ dä juska ala zia kodro ni ti hon.”—Marc 6:10.

Jésus afa nga na ala tongana nyen ti fa tënë ti Royaume ni so tongana ala si na yanga-da ti azo. Lo tene: “Tongana ala lï na yâ ti mbeni da, ala bara azo ti da ni. Tongana azo ni ayamba ala, zia siriri ti ala aduti na ndo ti da ni. Me tongana azo ni ayamba ala ape, zia siriri ti ala akiri na ala. Na ndo kue so mbeni zo ayamba ala ape wala lo mä tënë ti ala ape, tongana ala sigi na yâ ti da ni wala na yâ ti gbata ni, ala pika sese ti gere ti ala.”—Matthieu 10:12-14.

A peut ti si so a yeke azo ti yâ ti mbeni gbata kue wala ti mbeni kete kodro kue la ake ti mä ala. Me, nyen la ayeke si ande na kodro ni so? Jésus atene so a yeke fâ ande ngbanga ti sioni na ndo ti kodro ni so. Lo tene: “Ti tâ tënë ni, mbi tene na ala, na Lâ ti fango ngbanga, ngbanga so a yeke fâ na ndo ti gbata so ayeke duti ngangu mingi ahon ti kodro ti Sodome na Gomorrhe.”—Matthieu 10:15.