A zingo Lazare na kuâ

Na peko ti so Jésus awara tere na Marie na Marthe nduru na kodro ti Béthanie, ala kue ague na place ti dû ti kuâ ti Lazare. A yeke mbeni dû ti tênë so a zia mbeni kota tênë na yanga ni. Jésus atene: “Ala zi tênë ni.” Bê ti Marthe agi lo ndali ti so lo hinga ye so Jésus aye ti sara so ape. Lo tene: “Seigneur, juska na ngoi so, lo fun awe, ndali ti so a sara lango osio awe.” Me Jésus atene na lo atene: “Mbi tene nyen na mo fade? Mbi tene na mo so tongana mo mä na bê, mo yeke bâ gloire ti Nzapa.”—Jean 11:39, 40.

Tongaso, a zi tênë ni. Jésus ayô lê ti lo na nduzu na lo sambela, lo tene: “Babâ, mbi kiri singila na mo so mo mä mbi. Ti tâ tënë ni, mbi hinga so mo yeke mä mbi lakue; me a yeke ndali ti gbâ ti azo so aluti na ndo so si mbi sara tënë, ti tene ala mä na bê so mo tokua mbi.” Sambela ti Jésus so afa na azo so ayeke bâ lo, so ye so lo yeke gue ti sara so, a yeke Nzapa la amû na lo ngangu ti sara ni. Na pekoni, Jésus adekongo, lo tene: “Lazare, mo sigi!” Na Lazare asigi! Gere ti lo, maboko ti lo nga na lê ti lo angbâ na bongo so akanga na lo. Tongaso, Jésus atene: “Ala zi lo na ala zia lo gue.”—Jean 11:41-44.

Gbâ ti azo so aga ti dë bê ti Marie na Marthe kue abâ miracle ni so, na ala mä na bê na Jésus. Me, ambeni amû lege ahon na ala gue asara tënë ni na aFarizien. Amokonzi ti aprêtre nga na aFarizien ni angbâ asara mbeni bungbi na azo ti Sanhédrin, so ayeke azo ti kota da-ngbanga ti aJuif. Caïphe so ayeke kota prêtre ayeke nga na yâ ti bungbi ni so. Ambeni na milieu ti ala ayeke dema atene: “E yeke sara ande nyen? so koli so asara amiracle mingi so. Tongana e zia lo, lo gue na ni tongaso, azo kue ayeke mä na bê na lo, na aRomain ayeke ga ti mû ndo ti e nga na mara ti e.” (Jean 11:47, 48). Atâa so ala kue abâ na lê ti ala so Jésus “asara amiracle mingi,” a nzere kete na ala ape ti bâ ye so Nzapa ayeke sara na lege ti Jésus. Kozo ye so ala yeke pensé ti ala na ni ayeke gi kota ndo so ala yeke na ni.

So a zingo Lazare na kuâ so, kamene agbu aSadducéen, ndali ti so ala mä na bê pëpe na tënë ti londongo ti akuâ. Tongaso, Caïphe, so ayeke nga mbeni Sadducéen, atene: “Ala hinga ye oko dä ape, nga ala bâ pëpe so a yeke ndali ti nzoni ti ala ti tene zo oko akui ndali ti azo ni, si a futi mara ni kue ape.”—Jean 11:49, 50; Kusala 5:17; 23:8.

Teti so Caïphe ayeke kota prêtre, Nzapa la apusu lo ti tene tënë ni so. Tënë ni so “alondo na lo wani pëpe.” Caïphe aye ti tene a fâ Jésus, ndali ti so mbeto ti tene azo azia lege ti mû peko ti amokonzi-nzapa ti aJuif asara lo. Me, tënë ti prophétie ti Caïphe so afa so, kuâ ti Jésus ayeke duti ande tongana mbeni ngere so a futa ti zi gi aJuif pëpe, me ti zi ‘amolenge ti Nzapa kue so yâ ti ala akangbi kirikiri.’—Jean 11:51, 52.

Caïphe ague na azo ti Sanhédrin ngbii ti gbe lingo ti fâ Jésus. Eskê Nicodème, so ayeke mbeni membre ti Sanhédrin, na so aye ti lo tënë ti Jésus, ayeke fa ande na Jésus ye so azo ni so aye ti sara so? Atâa ye ni ayeke lani tongana nyen, hio, Jésus azia ndo so ayeke nduru mingi na Jérusalem lo hon, ti kpe ti tene lo kui kozo na lango so Nzapa afa.