Mo peut ti ga kamarade ti Jéhovah

Jéhovah aye ti tene mo hinga lo nzoni. Ngbanga ti nyen? Lo hinga so tongana mo hinga asarango ye ti lo nzoni, fason so lo yeke sara na ye na mbage ti azo nga ye so lo leke na bê ti lo ti sara, mo yeke ye mingi ti ga kamarade ti lo. Eskê mo peut biani ti ga kamarade ti Nzapa? (Diko Psaume 25:​14.) Nyen la mo lingbi ti sara ti ga kamarade ti lo? Bible akiri tënë na ahunda so nga afa so sarango kamarade na Nzapa ayeke kota mingi ahon sarango kamarade na tanga ti azo kue.

1. Jéhovah atisa mo ti sara nyen?

“Ga nduru na Nzapa, na lo yeke ga ande nduru na [mo].” (Jacques 4:8). Tënë so aye ti tene nyen? Jéhovah ayeke tisa mo ti ga kamarade ti lo la. A yeke ngangu na ambeni zo ti yeda so ala peut ti ga kamarade ti Nzapa ndali ti so ala lingbi ti bâ lo ape. Me na yâ ti Mbeti ti lo Bible, Jéhovah afa na e aye kue so e bezoin ti hinga na ndö ti asarango ye ti lo ti tene e ga nduru na lo. Tongana e diko tënë so Jéhovah atene na e na yâ ti Bible, songo ti kamarade so e yeke na ni na lo ayeke kpengba atâa so e bâ lo lâ oko ape.

2. Ngbanga ti nyen la Jéhovah ayeke tâ nzoni Kamarade ahon atanga ni kue?

Mbeni zo so aye mo ahon Jéhovah ayeke dä ape. Lo ye si mo duti na ngia nga mo sara tënë na lo na ngoi kue so mo bezoin mungo maboko. Mo lingbi ti “mû agingo bê ti [mo] kue [mo] bi ni na ndö ti lo, ngbanga ti so lo yeke bi bê ti lo na ndö ti [mo].” (1 Pierre 5:7). Jéhovah ayeke lakue nduru ti mû maboko na akamarade ti lo, ti dë bê ti ala nga ti mä ala.​—Diko Psaume 94:​18, 19.

3. Nyen la Jéhovah aye e sara ti ga akamarade ti lo?

Jéhovah aye azo kue, “me akota kamarade ti lo ayeke azo ti mbilimbili.” (aProverbe 3:​32). Jéhovah aye si akamarade ti lo agi ti sara aye so ayeke nzoni na lê ti lo nga ti kpe aye so ayeke sioni. Peut-être ambeni zo abâ so ala lingbi pëpe ti sara aye kue so Jéhovah aye ti tene ala sara, nga ala lingbi pëpe ti kpe ti sara aye kue so ayeke sioni. Ye oko, Jéhovah ayeke comprendre zo nzoni. Lo yamba zo oko oko kue so aye Lo na bê ti lo kue nga so ayeke sara kue ti zia ngia na bê ti Lo.​—Psaume 147:​11; Kusala 10:​34, 35.

GI TI HINGA AYE MINGI

4. Abraham ayeke lani kamarade ti Jéhovah

Mbaï ti Bible na ndö ti Abraham (so a iri lo nga Abram) a-aidé e ti hinga ye so aye ti tene ti duti kamarade ti Nzapa. Diko ye na ndö ti Abraham na Genèse 12:​1-4. Na pekoni kiri tënë na ahunda so:

• Nyen la Jéhovah ahunda na Abraham ti sara?

• Zendo wa la Jéhovah amû na lo?

• Nyen la Abraham asara lani?

5. Aye so Jéhovah ahunda na akamarade ti lo ti sara

Ambeni ye ayeke ka dä so e ye ti tene akamarade ti e asara.

• Ambeni ye wa la mo ye ka ti tene akamarade ti mo asara na mo?

Diko 1 Jean 5:​3, na pekoni kiri tënë na hunda so:

• Nyen la Jéhovah aku ti tene akamarade ti lo asara?

Ti mä yanga ti Jéhovah, a lingbi e changé asarango ye ti e. Diko Ésaïe 48:​17, 18, na pekoni kiri tënë na hunda so:

• Ngbanga ti nyen la Jéhovah ahunda na akamarade ti lo ti sara achangement?

6. Aye so Jéhovah ayeke sara ti aidé akamarade ti lo

VIDÉO: Jéhovah asara ye mingi ndali ti mbi (3:20)

• Tongana nyen la Jéhovah amû maboko na wali ti yâ ti vidéo so ti hon ndö ti asioni pensé nga na songo bê?

Diko Ésaïe 41:​10, 13, na pekoni kiri tënë na ahunda so:

• Nyen la Jéhovah amû zendo ti sara na akamarade ti lo kue?

• Mo pensé so Jéhovah apeut ti ga mbeni nzoni Kamarade ndali ti mo? Ngbanga ti nyen?

7. Ti ga kamarade ti Jéhovah e bezoin ti sara tënë na lo nga ti mä lo

Songo ti akamarade ayeke kpengba tongana ala yeke sara lisoro na mba. Diko Psaume 86:​6, 11, na pekoni kiri tënë na ahunda so:

• Tongana nyen la e lingbi ti sara tënë na Jéhovah?

• Tongana nyen la Jéhovah ayeke sara tënë na e?

NA NDURU TËNË

Jéhovah aye ti duti Kamarade ti mo, nga lo yeke mû maboko na mo ti ga nduru na lo.

Dango bê

• Jéhovah ayeke mû maboko na akamarade ti lo tongana nyen?

• Ngbanga ti nyen la Jéhovah atene na akamarade ti lo ti changé ambeni sarango ye ti ala?

• Mo pensé so Jéhovah ahunda ye ahon ndö ni na akamarade ti lo? Mo tene tongaso ngbanga ti nyen?

GI NDA TI YE

Tongana nyen la gango kamarade ti Nzapa alingbi ti ga na mo aye ti nzoni?

“Jéhovah: Mbeni Nzapa so a lingbi zo ahinga lo” (Tour ti Ba Ndo ti lango 15 ti février 2003)

Gi ti hinga tongana nyen la mo lingbi ti ga kamarade ti Nzapa.

“Tongana nyen la mo peut ti ga kamarade ti Nzapa?” (Hunda ti amaseka: Anzoni kiringo tënë, volume 2, chapitre 35)

Bâ ngbanga ti nyen la mbeni wali abâ so, so lo ga kamarade ti Jéhovah asö fini ti lo.

“Mbi ye lani ti kui ape!” (Tour ti Ba Ndo N° 1 2017)

Mä amaseka so afa atënë ti bê ti ala na ndö ti Jéhovah.

Ti duti kamarade ti Nzapa aye ti tene nyen? (1:​46)