Nyen la Nzapa aleke na bê ti lo ti sara ndali ti e?

Bible atene so gigi ti azo ayeke “gï nduru nga asi singo na aye ti vundu.” (Job 14:1). Eskê gigi so Nzapa aye ndali ti e la? Tongana a yeke ni la ape, nyen la lo leke na bê ti lo ti sara ndali ti e? Ye so lo leke ayeke si ande mbeni lâ? Zia e bâ akiringo tënë ti Bible so adë bê.

1. Mara ti gigi wa la Jéhovah aye ndali ti e?

Jéhovah aye ti tene gigi ti e anzere na e mingi. Na ngoi so lani lo créé kozo koli na kozo wali, Adam na Ève, lo zia ala na yâ ti mbeni pendere paradis, yaka ti Éden. Na pekoni, “Nzapa airi tënë nzoni na ndö ti ala nga lo tene na ala: ‘Ala dü, ala ga gbani, ala si ndö ti sese na ala sara si sese ni aga na gbe ti ala.’” (Genèse 1:28). Jéhovah aye lani ti tene ala dü amolenge, ala sara si sese kue aga mbeni paradis nga ala bâ lege ti anyama. Lo leke lani na bê ti lo ti tene azo kue aduti na nzoni seni nga ala ngbâ na fini lakue lakue.

Atâa so gigi ti e ayeke tongaso laso ape, ye so Nzapa aleke na bê ti lo ti sara achangé ape (Ésaïe 46:10, 11).a Lo ye ti tene azo so amä yanga ti lo aduti nzoni lakue lakue na ndö ti sese.​—Diko Apocalypse 21:3, 4.

2. Nyen la e peut ti sara ti tene gigi anzere na e laso?

Jéhovah acréé e na “bezoin ti aye ti yingo,” so ti tene, lo créé e na nzara ti hinga lo nga ti voro lo. (Diko Matthieu 5:3-6.) Lo ye ti tene e ga akota kamarade ti lo, ‘e tambela na lege kue so lo fa na e, e ndoye lo’ nga e sara na lo ‘na bê ti e kue’. (Deutéronome 10:12; Psaume 25:14). Tongana e sara ni, e peut biani ti duti na ngia atâa e yeke na akpale. Vorongo Jéhovah asara si gigi anzere na e nga e hinga ndani so e yeke na fini.

3. Jéhovah aye ti tene gigi ti azo aduti pendere mingi

Zia VIDÉO ni, na pekoni kiri tënë na hunda so:

VIDÉO: Ngbanga ti nyen Nzapa aleke sese?—Mbage ni (1:41)

• Ngbanga ti nyen la Jéhovah aleke pendere planète ti e so?

Diko Zo-ti-fa-tene 3:11, na pekoni kiri tënë na hunda so:

• Na lege ti versê so, nyen la mo manda na ndö ti ye so Jéhovah aleke na bê ti lo ti sara ndali ti e?

4. Ye so Jéhovah aleke na bê ti lo ti sara achangé ape

Diko Psaume 37:11, 29 nga na Ésaïe 55:11, na pekoni kiri tënë na hunda so:

• E hinga tongana nyen so ye so Jéhovah aleke na bê ti lo ti sara ndali ti e achangé ape?

5. Vorongo Jéhovah asara si e hinga tâ ndani so e yeke na fini

VIDÉO: Mbi ga ti hinga ndani so e yeke na fini (5:03)

• So Terumi ahinga ndani so e yeke na fini, nzoni ti nyen la lo wara dä?

Diko Zo-ti-fa-tene 12:13, na pekoni kiri tënë na hunda so:

• So Jéhovah asara aye mingi ngbanga ti e, nyen la e doit ti sara ti kiri singila na lo?

NA NDURU TËNË

Jéhovah aye ti tene e duti nzoni lakue lakue ge na ndö ti sese. Tongana e voro lo na bê ti e kue, e yeke duti na ngia même laso.

Dango bê

• Nyen la Jéhovah aleke lani na bê ti lo ti sara ndali ti Adam na Ève?

• E hinga tongana nyen so ye so Nzapa aleke na bê ti lo ti sara ndali ti azo achangé ape?

• Tongana nyen la mo peut ti hinga ndani so e yeke na fini?

GI NDA TI YE

Bâ aye so afa so yaka ti Éden ayeke lani dä biani.

“Yaka ti Éden ayeke ândö dä biani?” (Tour ti Ba Ndo ti lango 1 ti février 2011)

Gi ti hinga ndani so e peut ti duti sûr so sese ayeke ngbâ ande lakue lakue.

“Eskê a yeke futi ande sese?” (Article na ndö ti site)

Bâ aye so Bible afa na ndö ti aye so mo peut ti sara ti duti na ngia.

“Ngbanga ti nyen la e yeke na fini?” (Article na ndö ti site)

Bâ tongana nyen la mbeni koli so apensé lani so lo yeke na aye kue awara ye so amanke lo.

Fadeso mbi wara nzoni ye ti sara na yâ ti gigi ti mbi (3:55)