Fade Jéhovah Ayeke Dabe Lo na Mo Tongana Nyen?

“O NZAPA ti mbi, Mo dabe Mo na . . . mbi.” Fani mingi, Nehémia atoto na Nzapa na lege ti atene so. (Néhémie 5:19; 13:14, 31) A yeke biani na lege ni so tongana azo ayeke na yâ vundu, ala bi lê na Nzapa na lege ti atene ti hundango ye tongaso.

Ye oko, azo ayeke na nyen na li ti ala tongana ala yeke hunda Nzapa ti dabe lo na ala? A yeke polele, ala ku ti tene Nzapa asala ye mingi ahon gi ti dabe lo na iri ti ala. Ala yeke biani na beku legeoko tongana mbeni oko ti awakengo-ndia so a fâ ala na tele ti Jésus. Zo so, nde na mba ti lo, avoro yanga na Jésus: “Dabe mo na mbi na ngoi so mo lï na yâ royaume ti mo.” Lo ye si Jésus adabe gi na lo pepe, me nga lo sala mbeni ye teti lo: lo zingo lo na popo ti awakinda.​—Luc 23:42.

Mingi ni, Bible afa so ti Nzapa, “dango bê” aye ti tene salango nzoni kusala. Na tapande, na peko ti so ngu ti moa ahon ndo ti sese teti alango 150, “Nzapa adabe Lo na Noé. . . . Nzapa asala si pupu aïa na ndo sese, na ngu azu.” (Genèse 8:1) Angu ngbangbo mingi na pekoni, Samson, so aPhilistin asala lo waziba na akanga lo na zingiri, asambela: “Nzapa, mbi voro Mo, Mo dabe Mo na mbi; mbi voro Mo, Mo sala si mbi wara ngangu gi lege oko so.” Jéhovah adabe lo na Samson na mungo na lo ngangu so ahon ti azo si lo lingbi ti futa kula teti lo mveni na ndo awato ti Nzapa. (aJuge 16:28-30) Ti Nehémia, Jéhovah ahiri deba nzoni na ndo angangu so lo sala, na tâ vorongo akiri na Jérusalem.

Bazengele Paul asû na mbeti: “Tene kue so a sala na Mbeti ti Nzapa giriri, a sala na mbeti si e manda ye, si na lege ti bê so azia pepe, na ti tene ti Mbeti ti Nzapa so alungula vundu, e lingbi duti na beku.” (aRomain 15:4) Tongana e dabe e na Jéhovah na gingo ti sala ye so bê ti lo aye, tongana ti so awakua be-ta-zo ti lo asala giriri, e lingbi ti hinga biani so Jéhovah ayeke dabe lo ande na e na mungo maboko na e ti wara aye so atia e lâ oko oko, na yâ atara ti e, nga na zingo e na ngoi so lo ga na ngbanga na ndo azo so ake lo.​—Matthieu 6:33; 2 Pierre 2:9.