Beku ti Wara Salut Ayeke Dä?

A hiri siècle 20 ni oko ti asiècle so a tuku mênë mingi so azo ade ahinga ni lâ oko pepe. Kengo-ndia, abira, tiri na popo ti akete mara, nyongo mbangi, salango ye na lege ti handa, nga na salango ngangu amu mbilimbili ndo kue na yâ akete ngu so ahon. Na ndo aye so ge a wara nga pasi na vundu so aga na lege ti kobela, gango mbakoro, na kui. Zo wa si aye pepe ti sigigi na gbe ti akota kpale so ayeke na yâ sese laso? Tongana e bi lê na ndo kekereke, mbeni beku ti wara salut ayeke dä?

BA SUMA so bazengele Jean awara a sala angu 2 000 awe. Lo sû na mbeti: “Ba! Tente ti Nzapa ayeke na azo, na fade lo duti na ala, na ala ga azo ti lo. Na fade Nzapa mveni ayeke na ala. Nga fade lo mbô ngule kue na lê ti ala, na fade kui ayeke mbeni pepe, fade mua wala wuluwulu wala pasi ayeke mbeni pepe. Angbele ye ahon awe.” (Apocalypse 21:3, 4, NW) Prophète Isaïe atene nga kozoni: “Lo hunzi kui teti lakue lakue; fade Seigneur L’Eternel ambô ngule na lê ti azo kue; na fade Lo lungula zonga ti azo ti Lo na ndo sese kue, teti L’Eternel asala tene so awe.”​—Esaïe 25:8.

Bi bê kete na ye so gango tâ tene ti azendo ti Nzapa aye ande ti tene! Fade a yeke sö, wala a yeke zi, azo na gbe ti sioni komandema nga na ye ti ngangu, na gbe ti aye so aga na pasi na vundu. Biani, même kobela, gango mbakoro, na kui ayeke sala ande sana na e pepe! Tene ti Nzapa, Bible, amu zendo ti fini ti lakue lakue na yâ dutingo so ayeke mbilimbili-kue na ndo sese. (Luc 23:43; Jean 17:3) Na azo kue so asala nzala ni alingbi ti wara ni. “Bê ti [Nzapa] aye si mara ti azo nde nde kue alingbi sö kuâ na awara tâ hingango ye ti tâ tene.”​—1 Timothée 2:3, 4, NW.

Tongaso, ti wara nzoni na lege ti azendo ti Nzapa, a lingbi e gbu nda ti kusala so Jésus Christ ayeke na ni na yâ songo e nga e fa na gigi mabe na yâ lo. Jésus mveni atene: “Nzapa andoye sese so tongaso, lo mu Molenge ti lo ngengele oko, si azo kue so afa na gigi mabe na lo a lingbi ti futi ala pepe, me ala yeke na fini ti lakue lakue.” (Jean 3:16, NW) Na fango kota kusala ti Jésus Christ na yâ ye so, bazengele Pierre atene: “Salut ayeke na yâ mbeni zo oko pepe; teti mbeni iri ayeke na gbe ti yayu pepe, so ayeke na popo ti azo, so e lingbi wara salut na ni.” (Kusala 4:12) Bazengele Paul na fon lo Silas awa na ngangu mbeni zo so amä ala na tâ bê kue: “Mo mä na bê na Seigneur Jésus, na fade mo wara salut, mo na azo ti da ti mo.”​—Kusala 16:30, 31.

Biani, Jésus Christ ayeke “Mokonzi so amu fini,” na a yeke gi na lege ti lo si zo alingbi ti wara salut. (Kusala 3:15) Me tongana nyen zo oko alingbi ti duti na kpengba kusala mingi tongaso na yâ songo e? Fade nzoni gbungo nda ti kusala ti lo na yâ ye so ayeke kpengba beku ti e ti wara salut.

[Lingu ti afoto na lembeti 2]

Lembeti 3: Alapara ti bingo anene ngombe: Foto ti USAF; amolenge so nzala asala ala: BENDO TI GIGI/J. FRAND; mangboko so ayeke gbi: U.S. Navy photo