“Lo fa lege na mbi na tele ti ngu so asua na ngangu pëpe”

NA Palestine, kâ ndowa ayeke mingi nga lâ oko oko, a lingbi a wara ngu ti nyongo ni teti ataba. Tongaso, kota mbage ti kusala ti wabatango nyama ayeke ti mû ngu na ataba ti lo. Ngoi na ngoi, awabatango nyama ayeke gboto dû ti ngu, ala tuku ngu ni na yâ ti akota dû ti sembe si ataba ni alingbi ti nyon (Genèse 29:1-3). Me mingi ni, na ngoi ti ngu, a yeke wara na yanga ti akete ngu wala abale ‘ando ti hungo tele so ngu asua dä nzoni.’​—Psaume 23:2.

A lingbi mbeni nzoni wabatango taba ahinga ndo so lo lingbi ti wara ngu nga na anzoni pele teti anyama ti lo. Tongana lo hinga ndo ni nzoni, a sala si ataba ti lo ayeke ngbâ na fini. David, so teti angu mingi abata ataba na yâ ahoto ti Juda, ahaka fango lege ti Nzapa na lege ti yingo na mbeni wabatango nyama so afa lege na ataba ti lo na ndo so afini pele nga na ngu so amû fini ayeke dä. David atene: “Lo fa lege na mbi na tele ti ngu so asua na ngangu pëpe.”​—Psaume 23:1-3.

Angu mingi na pekoni, na lege ti prophète ti lo Ezéchiel, Jéhovah asala kusala na mara ti toli so. Lo zê ti bungbi azo ti lo so a kangbi ala kirikiri na akodoro nde nde, tongana mbeni wabatango nyama so ayeke bungbi ataba ti lo. Lo tene na ala: “Fade Mbi sala si ala sigigi . . . Mbi fa ndo ti tengo pele na ala na ndo ahoto ti Israël kue, na tele ti angu kue”.​—Ezéchiel 34:13.

Jéhovah Nzapa aye nga mingi ti mû ngu ti yingo na azo. Buku ti Apocalypse asala tënë ti mbeni “ngu so amû fini,” so asigigi na trône ti Nzapa (Apocalypse 22:1). Hiringo ndo ti nyon ngu ti bale so, a mû ni na azo kue: “Zo so aye, zia lo nyon ngu so amû fini, zia lo nyon senge senge”.​—Apocalypse 22:17.

Ngu ti fini, so ayeke na lege ti fä, ayeke aye so Nzapa aleke teti fini ti lakue lakue. Zo kue alingbi ti to nda ti nyon ngu so na mandango ti ‘hinga tâ Nzapa nga na Jésus Christ, zo so Lo to lo awe.’​—Jean 17:3.