Atënë so azo ahunda

Tongana Jéhovah atene “oko ti E” na Genèse 3:22, lo ye ti sala tënë ti lo na zo wa?

Ti bâ ni nzoni, Jéhovah Nzapa ayeke sala tënë ti lo na Molenge ti lo ngengele oko tongana lo tene: “Zo aga tongana oko ti E ti hinga nzoni na sioni.” (Genèse 3:22). Zia e bâ ngbanga ti nyen e tene tongaso.

Jéhovah atene lani atënë so na pekoni so lo dë ngbanga na ndo akozo koli na wali. Ambeni zo atene so na tenengo “oko ti E”, Jéhovah aye ti sala gi tënë ti lo mveni tongana mbeni lege ti fa kota ti lo. Ye oko, na ndo Genèse 1:26 nga na 3:22, Donald E. Gowan, mbeni wagingo nda ti ye na ndo Bible, atene: “Ye oko pëpe na yâ Testament ti Giriri afa so tënë ‘e’ so ge aye ti sala gi tënë ti zo oko tongana mbeni lege ti fa kota ti zo ni, wala ti sala tënë ti azo mingi na yâ Nzapa oko . . . Atënë so amû lege oko pëpe ti fa nda ti Genèse 3:22 so asala tënë ti ‘oko ti E.’ ”

Jéhovah alingbi fade ge ti sala tënë na Satan Zabolo so ato nda ti soro gi lo mveni “nzoni na sioni”, na so apusu lani akozo koli na wali ti sala tongana lo? A yeke duti na lege ni pëpe ti tene tongaso. Ge, Jéhovah asala kusala na tënë ‘oko ti E’. Na ngoi ni so lani, Satan ayeke mbeni pëpe na popo ti bungbi ti a-ange be-ta-zo ti Jéhovah; ni la, a lingbi pëpe ti zia lo na popo ti ala so ayeke na mbage ti Jéhovah.

Nzapa ayeke sala lani tënë na a-ange so ayeke be-ta-zo? E lingbi pëpe ti tene biani so a yeke tongaso. Ye oko, tongana e bâ kamba so ayeke na popo ti atënë ti Genèse 1:26 na 3:22, a yeke mû lege na e ti hinga tënë na ndo ni. Na Genèse 1:26, e diko so Jéhovah atene: ‘Zia E sala zo na image ti E, tongana image ti E mveni.’ Lo yeke sala lani atënë so na zo wa? Tongana bazengele Paul ayeke sala lani tënë ti Jésus so ayeke giriri mbeni zo ti yingo me so aga mbeni zo ti mbilimbili-kue na sese, lo tene: “Lo yeke image ti Nzapa so zo alingbi bâ pëpe, Kozo ti ye kue so Nzapa acréé; teti na yâ Lo, A créé ye kue so ayeke na ayayu na so ayeke na ndo sese.” (aColossien 1:15, 16). Biani, a yeke na lege ni ti tene so na Genèse 1:26, Jéhovah ayeke sala tënë na Molenge ti lo ngengele oko, “wakode” so ayeke lani na tele ti lo na ngoi so a yeke sala ayayu na sese (aProverbe 8:22-31). Kpango tele so ayeke na popo ti atënë so na ti Genèse 3:22 amû lege ti tene so ge Jéhovah akiri asala tënë na lo so ayeke lani tâ ndulu mingi na lo, so ti tene Molenge ti lo ngengele oko.

Na bango ni, Molenge ti Nzapa ngengele oko ahinga lani ye ti “nzoni na sioni”. Teti so lo sala kusala aninga mingi nga tâ ndulu mingi na tele ti Jéhovah, kite ayeke pëpe so lo manda ye nzoni mingi na ndo bango ndo ti Babâ ti lo, akpengba-ndia ti Lo nga na asalango ye ti Lo. Tongana Jéhovah abâ biani so Molenge ti lo ahinga aye so nzoni mingi awe, na lo yeke bata tâ ni ngangu, Lo mû peut-être na lo liberté ti leke ambeni tënë, me a yeke ti Molenge ti lo ni ti ga lakue pëpe na mbage ti Lo ti hunda bango ndo ti Lo na ndo atënë oko oko kue. Ni la a sala si Molenge ni awara lani lege alingbi na ni ti fa ye wa ayeke nzoni na so ayeke sioni. Ye oko, lo sala ye lâ oko pëpe tongana ti Satan, Adam na Eve na ziango na sese mbeni lege ti salango ye ti nzoni na ti sioni so ague nde na ti Jéhovah.