Nzobe ti Jéhovah ayeke kota mingi
‘Nzobe ti Jéhovah ayeke kota mingi.’—PSAUME 145:8.
“NZAPA ayeke Ndoye.” (1 Jean 4:8). Pendere tënë so andu bê afa so komandema ti Jéhovah aluti na ndo ti ndoye. Ni la, même azo so amä yanga ti lo pëpe ayeke wara nzoni na lege ti lâ nga na ngu-nzapa so lo mû ni na ala na ndoye. (Matthieu 5:44, 45). Teti so Nzapa aye sese ti azo, même awato ti lo alingbi ti gbian bê ti ala, ti kiri na lo, na ti wara fini (Jean 3:16). Ye oko, Jéhovah aga ndulu ti futi azo ti sioni so aye ti changé pëpe, si azo so aye lo alingbi ti duti lakue lakue na yâ fini sese so mbilimbili ayeke dä.—Psaume 37:9-11, 29; 2 Pierre 3:13.
2 Jéhovah afa ndoye ti lo teti atâ wakua ti lo na mbeni lege so ayeke pendere mingi, nga so aninga. A fa mara ti ndoye so na lege ti mbeni tënë na yanga ti Hébreu so a kiri pekoni na “nzobe”, wala “ndoye so agbian pëpe”. David, gbia ti Israël ti giriri, abâ lani nzobe ti Nzapa na nene ni mingi. Ndali ti ye so asi na lo mveni nga na lege ti gbungo li na ndo salango ye ti Nzapa na mbage ti azo, David alingbi lani ti he bia so na bê kue: “Nzobe ti Lo [wala ndoye ti lo so agbian pëpe] ayeke kota mingi.”—Psaume 145:8.
Lege ti hinga na abe-ta-zo ti Nzapa
3 Na ndo Jéhovah Nzapa, mama ti prophète Samuel, Hanna, atene: “Lo bata gere ti azo ti Lo ti nzobe [“abe-ta-zo ti lo”, NW ].” (1 Samuel 2:9) “Abe-ta-zo” so ayeke azo wa? Gbia David afa ni. Tongana lo hunzi ti sepela apendere lengo ti Jéhovah, lo tene: “Fade azo ti Mo ti nzobe [“abe-ta-zo”, NW ] asala tënë nzoni na Mo.”—Psaume 145:10.
4 Abe-ta-zo ti Jéhovah ayeke biani ala so ayeke sala nzoni tënë ti lo na azo. Na ngoi ti abungbi nga na ambeni ngoi so ala tisa amba ti ala, tënë ti ye wa si ala yeke sala tënë na ndo ni mingi? Tâ gi tënë ti Royaume ti Jéhovah! Awakua be-ta-zo ti Nzapa ayeke na mara bibe ti David, so atene: “Fade ala sala tënë ti gloire ti royaume ti Mo [Jéhovah], na ala sala tënë ti ngangu ti Mo.”—Psaume 145:11.
5 Tongana abe-ta-zo ti lo asala nzoni tënë ti lo, Jéhovah ayeke dengi mê ti lo ti mä ala? Biani, lo yeke dengi mê ti lo. Na yâ mbeni prophétie so andu tâ vorongo ti ngoi ti e, Malachie asû na mbeti: “Ala so akpe mbito ti L’Eternel, ala sala tënë na popo ti ala; na L’Eternel azia mê ti Lo ti mä, na Lo mä. Na a sala mbeti ti dabe na gbele Lo tënë ti ala so akpe mbito ti L’Eternel, na ala bi bê ti ala na iri ti Lo.” (Malachie 3:16). Bê ti Jéhovah anzere mingi tongana abe-ta-zo ti lo asala nzoni tënë ti lo, nga lo yeke dabe ti lo na ala.
6 A lingbi ti hinga nga awakua be-ta-zo ti Jéhovah na ngangu ti ala ti mû li ni ti fa tënë na azo so ayeke awakua ti tâ Nzapa pëpe. Biani, abe-ta-zo ti Nzapa ayeke ‘fa na amolenge ti azo kusala ti ngangu ti lo, na kota gloire ti royaume ti lo.’ (Psaume 145:12). Mo yeke gi ti mû alege kue so azi ti fa tënë ti royaume ti Jéhovah na awande? Nde na angorogbia ti azo so aga ndulu ti hon, royaume ti lo ayeke ngbâ lakue lakue (1 Timothée 1:17). A lingbi azo amä tënë ti royaume ti Jéhovah so ayeke ngbâ lakue lakue nga ala mû mbage ti ala na ni. David ahe bia so: “Royaume ti Mo angbâ lakue lakue, na Mo komande na ngoi ti awagame kue.”—Psaume 145:13.
7 Ngbele ye na ngu 1914, mbeni nda ti tënë ayeke dä ti fa tënë ti royaume ti Jéhovah na azo. Na ngu ni so, Nzapa aleke gere ti Royaume ti Messie na yayu kâ, na Jésus Christ Molenge ti David, si ayeke Gbia ni. A yeke tongaso si Jéhovah asala si zendo so lo mû, so fade royaume ti David ayeke ngbâ lakue lakue, aga tâ tënë.—2 Samuel 7:12, 13; Luc 1:32, 33.
8 Ye so afa biani so Jéhovah ayeke komande fadeso na lege ti Royaume ti Molenge ti lo, Jésus Christ, ayeke so fä ti singo ti Jésus angbâ ti ga tâ tënë. Mbage ti fä so ayeke kota ahon ambage ni kue ayeke kusala so Jésus atene ândö so abe-ta-zo kue ti Nzapa ayeke sala ni tongana lo tene: “Fade a fa Tene-nzoni so ti royaume na sese so kue teti tënë ti témoin na amara kue; na tongaso fade nda ni aga.” (Matthieu 24:3-14). Teti so abe-ta-zo ti Nzapa ayeke sala kusala so na wâ, akoli, awali, na amolenge ahon kutu omene ayeke mû mbage ti ala fadeso na yâ kota kusala so a yeke kiri ti sala ni mbeni pëpe. Na yâ ngoi kete, a yeke futi ande awato kue ti Royaume ti Jéhovah.—Apocalypse 11:15, 18.
Warango nzoni na lege ti kota yanga-ti-komande ti Jéhovah
9 Tongana e mû tele ti e na Nzapa awe, songo ti e na Kota Gbia Jéhovah ayeke ga na ye ti nzoni mingi na e (Psaume 71:5; 116:12). Na tapande, teti so e kpe mbito ti Nzapa na e sala ye so ayeke mbilimbili, lo yeke fa nzobe ti lo na e, nga e yeke ndulu na lo na lege ti yingo (Kusala 10:34, 35; Jacques 4:8). Me tongana a bâ amokonzi ti sese so, mingi ni ala yeke gi na tele ti azo so iri ti ala awu, azo tongana amokonzi ti aturugu, azo ti nginza, wala awanguru so iri ti ala awu. Mbeni mbeti-sango ti Afrika (Sowetan) afa peko ti tënë so mbeni kota zo ti kodoro atene na ndo ambage ti kodoro ti lo so nzinga ayeke dä: “Mbi hinga fadeso awe ngbanga ti nyen mingi ti e aye pëpe ti gue na ando so. A yeke gi ngbanga ti so e ye ti girisa so amara ti dutingo tongaso ayeke dä. Tongana e gue kâ na [akutukutu] ti e so ayeke ti ngele ngangu, li ti e ayeke ne nga kamene asala e.”
10 Tâ tënë, ambeni mokonzi ti sese so ayeke bi bê ti ala biani na ndo ti dutingo ti amba ti ala. Me même ala so aye ti sala nzoni mingi na azo, ala hinga azo ti ala ni nzoni kue pëpe. Ni la, e yeke hunda peut-être tele ti e: Mbeni mokonzi ayeke dä, so ayeke bi bê mingi na azo ti lo kue, si tongana kpale asi na mbeni oko, lo yeke kpe hio ti mû maboko na lo? Biani, mara ti mokonzi tongaso ayeke dä. David asû na mbeti: “L’Eternel abata azo so ayeke tï, na Lo yä na nduzu ala kue so tele ti ala aba.”—Psaume 145:14.
11 Teti so ala yeke na awokongo nga ala yeke na yâ sese so ayeke na gbe ti ngangu ti Satan, “wato-sioni”, abe-ta-zo ti Jéhovah Nzapa ayeke wara akpale mingi (1 Jean 5:19; Psaume 34:20). A yeke sala ye ti ngangu na aChrétien. Ambeni ayeke na akota kobela wala mbeni zo ti ala akui. Ngoi na ngoi, girisango lege ti abe-ta-zo ti Jéhovah alingbi ti sala si “tele ti ala aba” na yâ vundu ti bê. Ye oko, atâa kpale wa asi na ala, Jéhovah ayeke lakue ndulu ti mû dengo bê nga na ngangu na ala oko oko kue na lege ti yingo. Gbia Jésus Christ ayeke na oko ndoye so na mbage ti adisciple ti lo so ayeke be-ta-zo.—Psaume 72:12-14.
Kobe so asi na tâ ngoi ni
12 Ndali ti kota nzobe ti lo, Jéhovah amû na awakua ti lo kue aye so atia ala. So andu mungo nzoni kobe so akaï nzara ti ala. Gbia David atene: “Lê ti azo kue aku Mo [Jéhovah]; na Mo mû na ala kobe na ngoi ni. Mo lungula maboko ti Mo, na Mo mû ye alingbi na nzara ti ye kue so ayeke na fini.” (Psaume 145:15, 16). Même na ngoi ti akpale ti ndagigi, Jéhovah alingbi ti sala si abe-ta-zo ti lo awara ‘kobe ti lâ oko oko.’—Luc 11:3; 12:29, 30.
13 David atene so a kaï nzara ti “ye kue so ayeke na fini.” So abâ nga anyama. Sese ayeke na gbâ ti akugbe ti kasa, akeke so ayeke nga na gbe ti ngu, anyama ti gbe ti ngu, andeke nga na anyama so ayeke tambela na ndo ti sese. Tongana fade aye so kue ayeke dä pëpe, ka a yeke wara pupu ti hu nga na kobe ti te pëpe (Psaume 104:14). Me Jéhovah abata ti tene a kaï nzara ti ala kue.
14 Nde na anyama, azo ayeke na nzara ti ye ti yingo (Matthieu 5:3). Jéhovah ayeke kaï nzara ti ye ti yingo ti abe-ta-zo ti lo na lege so ayeke pendere mingi! Kozoni si lo kui, Jésus azê so “ngbâa be-ta-zo na ti ndara” ayeke mû ande na adisciple ti Lo ‘kobe ti yingo na tâ ngoi ni’. (Matthieu 24:45, NW ). Tanga ti aChrétien 144 000 so a sa yingo na ndo ti ala ayeke bungbi ti ngbâa so laso. Na lege ti ala, Jéhovah amû gbâ ti kobe ti yingo.
15 Na tapande, mingi ti azo ti Jéhovah awara fadeso fini Bible so a kiri pekoni nzoni mingi na yanga ti kodoro ti ala. So tâ pendere deba nzoni si Les Saintes Écritures — Traduction du monde nouveau ayeke! Nga, a ngbâ lakue ti sigigi na gbâ ti ambeti ti mandango na Bible na ayanga ahon 300. Akobe ti yingo so kue ayeke mbeni deba nzoni teti atâ wakua ti Jéhovah na ndo lê sese kue. Zo wa alingbi na gonda ndali ti aye so kue? Jéhovah Nzapa. Na lege ti kota nzobe ti lo, lo sala si bungbi ti ngbâa ni awara lege ti mû “kobe na [tâ] ngoi ni.” Na lege ti kobe so, a kaï “nzara ti ye kue so ayeke na fini” na yâ paradis ti yingo ti ngoi ti e. Na so ngia si awakua ti Jéhovah ayeke na ni ndali ti beku ti ala ti bâ na yâ ngoi kete so sese ni aga paradis!—Luc 23:42, 43.
16 Bâ mbeni pendere tapande ti warango kobe ti yingo na tâ ngoi ni. Na ngu 1939, Use Bira so Amû Sese Kue asungba na Poto. Na oko ngu ni so, numéro ti Tour ti Ba Ndo na Anglais ti 1 novembre ayeke na mbeni article so li ti tënë ni ayeke “Dutingo nde.” Tënë so a fa polele na yâ ni amû maboko na aTémoin ti Jéhovah ti sese kue ti bâ nene ni ti duti tâ nde mingi na atënë ti amara so ayeke tiri bira. Ye so asala si angorogbia so ayeke tiri bira teti ngu omene asala ngonzo mingi na tele ti ala. Atâa so a kanga lege na ala, na a sala ngangu na ala, abe-ta-zo ti Nzapa angbâ lakue ti fa nzo tënë ti Royaume na azo. Ti londo na ngu 1939 ti si na ngu 1946, azo gbâ ni gbâ ni aga abungbi legeoko na ala. Nga, pendere tondo ti be-biani so ala zia na ngoi ti bira so angbâ lakue ti mû maboko na azo ti hinga tâ vorongo.—Esaïe 2:2-4.
17 Kobe ti yingo so Jéhovah amû asi gi na tâ ngoi ni pëpe, me akaï nga nzara ti azo biani. Na ndembe so Use Bira so Amû Sese Kue ayeke kporo ngangu na popo ti amara, a mû maboko na azo ti Jéhovah ti bata lê na ndo ye so ayeke kota mingi ahon fini ti ala mveni. Jéhovah amû maboko na ala ti hinga nzoni so kota tënë ni, so andu dunia kue, ayeke droit ti Jéhovah ti komande tongana Gbia. So tâ ye ti ngia ti bâ so, na dutingo be-ta-zo, aTémoin ti Jéhovah oko oko kue amû mbage ti ala kete na yâ fango na gigi kota yanga-ti-komande ti Jéhovah, nga so Zabolo ayeke wamvene (aProverbe 27:11). Nde na Satan, so abi tënë ti mvene na li ti Jéhovah nga na ndo lege so Lo yeke komande, abe-ta-zo ti Jéhovah angbâ lakue ti fa na azo kue so ‘Jéhovah ayeke mbilimbili na lege ti lo kue’.—Psaume 145:17.
18 Mbeni tapande nde ti warango nzoni kobe na tâ ngoi ni ayeke buku Ga ndulu na Jéhovah. Buku so asigigi na ngoi ti aKota Bungbi ti District “Awakua ti Royaume so ayeke na wâ” so a sala ni ngbangbo mingi na ndo kue na ngu 2002 ti si na ngu 2003. Buku so, so “ngbâa be-ta-zo na ti ndara” nga na aTémoin ti Jéhovah asigigi na ni, aluti mingi na ndo apendere lengo ti Jéhovah Nzapa, so ambeni ayeke na Psaume 145. Pendere buku so ayeke mû ande maboko mingi na abe-ta-zo ti Nzapa ti ga ndulu na lo mingi ahon ti kozo.
Mbeni ngoi ti ga ndulu na Jéhovah mingi ahon ti kozo
19 Mbeni kpengba kapa ti lekengo tënë so andu yanga-ti-komande ti Jéhovah ayeke pusu ndulu. Tongana ti so a sala tënë ni ândö na Ezékiel chapitre 38, Satan aga ndulu ti hunzi kua ti lo tongana “Gog ti sese ti Magog.” Ye so ayeke ga ande na bira na tele ti azo ti Jéhovah na ndo lê sese kue. Satan ayeke sala ande ngangu kue ti buba be-biani ti abe-ta-zo ti Nzapa. Me, tongana ti so ade asi lâ oko pëpe, awakua ti Jéhovah ayeke duti ande na bezoin ti hiri lo na bê kue, même ti dekongo na mbage ti lo ti wara mungo maboko. Fade kota mbito nga na ndoye so ala yeke na ni teti Nzapa ayeke duti ande gi senge ye? Oko pëpe, teti Psaume 145 atene: “L’Eternel ayeke ndulu na azo kue so adi iri ti Lo, ala so adi iri ti Lo na lege ti tene-biani. Lo mû na ala so akpe mbito ti Lo ye so bê ti ala aye, Lo mä toto ti ala, na Lo sö ala. L’Eternel abata ala kue so andoye Lo, me fade Lo fâ azo ti sioni kue.”—Psaume 145:18-20.
20 So tâ ye ti ngia ti bâ ande tongana nyen Jéhovah ayeke duti ndulu na e mingi, nga ti bâ ngangu ti lo ti songo zo tongana lo hunzi azo ti sioni kue! Na lâ ti kota ngoi so ayeke pusu fadeso ndulu mingi, Jéhovah ayeke mä gi “ala so adi iri ti Lo na lege ti tene-biani.” Lo yeke mä azo ti yanga use pëpe. Mbeti ti Nzapa afa polele so tongana azo ti sioni aku ngbii ngoi angbâ gi kete si ala di iri ti Jéhovah, so kue ayeke duti gi senge ye.—aProverbe 1:28, 29; Michée 3:4; Luc 13:24, 25.
21 Fadeso ayeke ngoi ti tene azo so akpe mbito ti Jéhovah “adi iri ti lo na lege ti tene-biani” mingi ahon ti kozo. Abe-ta-zo ti lo ayeke na ngia ti di iri ti lo na yâ ti sambela ti ala nga na yâ atënë so ala yeke tene na ngoi ti abungbi ti ala. Na yâ ti asenge lisoro ti ala, ala yeke di iri ti Jéhovah dä. Nga, na mbito pëpe ala yeke fa iri ti Jéhovah na gbele azo kue na yâ fango tënë.—aRomain 10:10, 13-15.
22 Ti ngbâ ti wara nzoni na lege ti kota songo ti e na Jéhovah Nzapa, a yeke nga nzoni ti tene e ke lakue aye so ayeke buba zo na lege ti yingo, aye tongana kota nzara ti akungba, angia so ayeke nzoni pëpe, nga bibe ti mungo pardon pëpe, wala bingo lê pëpe na mbage ti azo so ye atia ala (1 Jean 2:15-17; 3:15-17). Tongana e ke ni pëpe, mara ti alengo so alingbi ti pusu e ti sala akota siokpari nga na nda ni ti girisa nzobe ti Jéhovah (1 Jean 2:1, 2; 3:6). A yeke ye ti ndara ti bata na li so Jéhovah ayeke fa lakue nzobe, wala ndoye so agbian pëpe, na mbage ti e gi tongana e ngbâ be-ta-zo na lo.—2 Samuel 22:26.
23 Tongaso, zia e bata lê ti e na ndo kota ye so ayeke ku abe-ta-zo kue ti Jéhovah. Na salango tongaso, e yeke na pendere beku ti duti na popo ti azo so ayeke sepela Jéhovah nga ayeke sala nzoni tënë ti lo ‘lâ na lâ teti lakue lakue.’ (Psaume 145:1, 2). Ni la, zia e ‘bata tele ti e na yâ ndoye ti Nzapa na bibe ti warango fini ti lakue lakue.’ (Jude 20, 21). Na ngoi so e ngbâ lakue ti wara nzoni na lege ti apendere lengo ti Babâ ti e ti yayu, so andu kota nzobe ti lo so lo fa na mbage ti ala so aye lo, zia atënë ti bê ti e aduti oko na ti so David afa na ndangba tënë ti Psaume 145, so atene: “Fade yanga ti mbi asala tënë ti sepela L’Eternel. Zia mi kue asala tënë nzoni lakue lakue na iri ti Lo ti nzoni-kue.”
Fade mo kiri tënë tongana nyen?
• Tongana nyen Psaume 145 amû lege na e ti hinga abe-ta-zo ti Nzapa?
• Tongana nyen Jéhovah ‘akaï nzara ti ye kue so ayeke na fini’?
• Ngbanga ti nyen a lingbi e ga ndulu na Jéhovah mingi ahon ti kozo?
[Ahundango tënë ti manda na ye]
1. Ndoye ti Nzapa akono tongana nyen?
2. Kota ye wa so andu ndoye ti lo Jéhovah afa na mbage ti ala so amû tele ti ala na lo?
3, 4. (a) Tongana nyen Psaume 145 amû maboko na e ti hinga abe-ta-zo ti Jéhovah? (b) Abe-ta-zo ti lo asala “tënë nzoni” ti lo tongana nyen?
5. E hinga tongana nyen so Jéhovah ayeke dengi mê tongana abe-ta-zo ti lo asala nzoni tënë ti lo?
6. Kusala wa amû maboko na e ti hinga abe-ta-zo ti Nzapa?
7, 8. Ye nyen asi na ngu 1914? Ye nyen afa so Nzapa ayeke komande fadeso na lege ti Royaume ti Molenge ti lo?
9, 10. Kangbi wa ayeke na popo ti Jéhovah nga na amokonzi ti sese so?
11. Akpale wa asi na abe-ta-zo ti Nzapa, na ye nyen amû maboko na ala?
12, 13. Jéhovah ayeke mû aye so atia “ye kue so ayeke na fini” tongana nyen?
14, 15. A yeke mû kobe ti yingo laso tongana nyen?
16, 17. (a) Atapande wa afa so kobe ti yingo ayeke si na tâ ngoi ni? (b) Tongana nyen Psaume 145 afa tënë ti bê ti abe-ta-zo ti Nzapa na ndo kota tënë so Satan abi na sese?
18. Tapande wa, so asi ade ti ninga pëpe, afa so kobe ti yingo asi na tâ ngoi ni nga so akaï biani nzara ti azo?
19. Kota ngoi wa ayeke pusu ndulu? E lingbi ti sigigi dä tongana nyen?
20. Tongana nyen atënë ti Psaume 145:18-20 ayeke ga ande tâ tënë na yâ kete ngoi?
21. Tongana nyen abe-ta-zo ti Jéhovah afa so ala yeke na ngia ti di iri ti lo?
22. Ngbanga ti nyen a lingbi e ke asalango ye nga na nzara ti sese so?
23. Kota ye wa ayeke ku abe-ta-zo kue ti Nzapa?
[Foto na lembeti 16]
Abe-ta-zo ti Nzapa ayeke na ngia ti sala tënë ti akusala ti kpene ti lo
[Foto na lembeti 17]
Awakua ti Jéhovah ayeke mû maboko na awande na mbito pëpe ti manda ye na ndo gloire ti royaume ti lo
[Afoto na lembeti 18]
Jéhovah amû kobe teti “ye kue so ayeke na fini”
[Lingu ti foto ni]
Anyama: Parque de la Naturaleza de Cabárceno
[Foto na lembeti 19]
Jéhovah afa lege nga lo yeke mû ngangu na abe-ta-zo ti lo so ayeke gi mungo maboko ti lo na yâ sambela