Manda nzoni kode ti fa atënë ti bê ti mo
YEKE si so ambeni ye asala si tele ti mo anzere pëpe? Mo yeke sala ngonzo wala bê ti mo ayeke so ka hio mingi? Mo yeke gi bê ti mo mingi na ndo ti gigi ti mo? Tongana a yeke tongaso, ye nyen ayeke mû ande maboko na mo?
Tongana mbeni ye asi, azo ayeke fa atënë ti bê ti ala na alege nde nde. Tongana azo afa ye so ayeke na bê ti ala na lege ni a yeke sala si gigi anzere. Ye oko, Mbeti ti Nzapa atene so “na lege ti sala ngangu na zo, wandara aga buba”. (Zo-ti-fa-tene 7:7). Aye ti ngangu nga na andao amû ndo na yâ sese ti laso, na a sala si a yeke ngangu na azo kue ti fa atënë ti bê ti ala na lege ni. Na mbage, Mbeti ti Nzapa atene so tongana “zo awara ngia na lege ti kusala ti lo”, mbeni ye ti nzoni ti hon ni ayeke dä pëpe (Zo-ti-fa-tene 3:22). Tongana e ye si gigi ni anzere na e mingi, a lingbi e manda ti fa atënë ti bê ti e na mbeni lege so ayeke nzoni. Me tongana nyen e lingbi ti maï anzoni kode ti fa atënë ti bê ti e na ti dö asioni kode ni ti zia?
Ambeni ye ayeke dä so e lingbi ti sala ni tongaso si e hon ndo ti asioni kode ni. Na tapande, tongana e yeke gi bê ti e na ndo ti ambeni ye so e lingbi ti sala ye ndali ni pëpe, a yeke nzoni ti hu tele ti e kete na mbeni ye so e yeke sala ka ni lakue. A yeke nzoni nga ti gue na mbeni ndo nde tongaso si e tara ti girisa kete aye so e yeke gi bê ti e na ndo ni. Ti gue ti gboto gere kete, ti mä mbeni pendere mozoko, ti tara tele wala ti mû maboko na mbeni zo so ayeke na bezoin ni alingbi ti dë bê ti e nga ti sala si e duti na ngia.—Kusala 20:35.
Tâ nzoni lege ti kpe asioni kode ti fango atënë ti bê ti e na gigi ayeke ti zia bê ti e kue na Wasalango e. Tongana asioni pensé angbâ ti ga na li ti e, a lingbi e zia ‘ye kue so e gi bê ti e dä na tïtî Nzapa’ na yâ sambela (1 Pierre 5:6, 7). Bible adë bê ti e tongana a tene: “L’Eternel ayeke ndulu na azo so bê ti ala afâ awe . . . Ye ti vundu ti zo ti mbilimbili ayeke mingi; me L’Eternel azi lo na yâ ye so kue.” (Psaume 34:19, 20). Nyen la e lingbi ti sala si e bâ Nzapa biani tongana ‘Zo ti sala na e, na Sauveur ti e’? (Psaume 40:18). Mandango Bible nga na gbungo li na ndo apendere tapande so ayeke na yâ ni, atapande so afa tongana nyen Nzapa ayeke bi bê na nzoni ti awakua ti lo, ayeke mû lege na e ti bâ lo tongaso.